مؤهل متوسط ... طب هاشتغل إيه؟ (عصام شوقى)

[عصام]

لست متأكدا من أن هذا هو التصنيف الصحيح لما أريد الكتابة فيه ..

ربما كان باب موضوعات شخصية هو الأنسب .. أو حتى باب استشارات طبية ونفسية !!

القصة ببساطة .. أن لى أخا ..

واحد من مجموع ستة أخوة ..

ذلك الأخ هو الوحيد - والذى ونتيجة لمرض شديد (حمى) أثناء امتحانات الإعدادية - من بين أخوته حصل على مؤهل متوسط ..

تلك المسألة سببت له بمرور الوقت مشكلة نفسية معقدة ومتشعبة .. كونه الوحيد بين إخوانه وأصدقائه وحتى المجتمع الذى يعيش فيه الحاصل على مؤهل متوسط ..

شعر أن الأبواب كلها مغلقة ..

كل جهات التوظيف تطلب مؤهلات عليا .. بينما هو مؤهل متوسط ..

أصدقائه .. أطباء .. ومحامون .. والباقى يعمل فى شركات ذات أسماء محترمة جدا ..

بالتالى لم تتوفر لديه النية على تقبل الواقع والقبول حتى بفكرة البحث عن عمل يناسب المؤهل الذى حصل عليه .. فهذا يسبب له بالتأكيد شعور مستمر بأنه أقل ..

بلغ عمره الآن حوالى 30 سنة .. فى الوقت الذى فشلت فيه كل المحاولات بإقناعه بالخروج من حالة الاكتئاب تلك ووضع أقدامه على الطريق بدلا من ذلك .. اى طريق .. " المهم أن تبدأ" .. ,و ... و .... إلخ

وبدلا من أن يدفعه ذلك الكلام إلى الأمام .. فإنه يجد فى الانزواء والاكتئاب متنفسا ..

أعمل إيه؟

هل المشكلة فى سياسة التعليم؟

هل المشكلة فى سياسات التوظيف والعمل؟

هل المسألة فى النهاية .. مشكلة شخصية؟

طيب نفسية؟

مش عارف

[se_ Elsyed]

إبننا العزيز عصام

"لست وحدك "

لأ بجد

سواء كان الشخص مؤهل متوسط أو من غير مؤهل أساساً فكثير من اللوم لابد أن يُلقى عليه ..

يا أخي حظه وقدره ونصيبه كده .. إيه بقى خلاص يقعد حاطط إيده على خده وينعي حظه وتمر الأيام وهو كما هو ...

يا أخي الكريم الدنيا ليست وظيفة حكومية أو شركة واحده يعمل الإنسان فيها ولو فاتته يبقى خربت ...

فهناك الكثير من المهن المحترمه التي يُمكن أن يمتهنها ...

تصدق بالله وما تضحكش على كلامي ؟

لو واحد معاه مؤهل متوسط أو إعدادية حتى .. وراح إتعلم مهنة الحلاقة مثلاً - إحم إحم - واللي مش هاتاخد منه سنة بالصبر والمثابرة ... هل ده عيب ولا حرام ؟

مهنة شريفة ومحترمة ودخلها ممتاز وممكن خلال فترة قصيرة وده رأيته بعيني بحكم درايتي بالمهنة - بس أنا مش حلاق يعني - ممكن خلال فترةقصيرة يفتح له مشروع صالون حلاقه خاص به .. ومحلات الإيجار على قفا من يشيل .. مش هانقول محل تمليك .. ولكن هناك عشرات بل مئات المحلات بتتأجر بالسنة وممكن ببعض المدخرات أو الإسثمارات القليلة يبدأ مشروع زي ده ...

أقولك على مهنة تانية شريفة أخرى .... عارف صنايعي البوفية أو المطعم بياخد كام في الوردية الثمان ساعات شغل ؟

من 30 إلى 50 جنية ... تخيل ؟

وده برضوا لا يأتي من فراغ .. فممكن يبدأ صغير وفي خلال فترة بسيطة جداً يتعلم المهنة دي ...

- مهنة أخرى وليست أخيرة ... فني تركيب الألوميتال .... أنا بأسميها مهنة الكرافتات الشيك .. تحس إن اللي بيشتغلوا فيها فنانين ...

وأنا ما بأكلمكش عن مهنة زي البنا مثلاً أو النقاش أو مبيض المحارة اللي كلها شقى وممكن الواحد يتكسف إنه يتعلمها أو يشتغل فيها ....

لكن نرجع ونقول أي مهنة شريفة مش عيب ...

واللي هايفضل مستني الوظيفة الحكومية أم 120 جنية يبقى لا يلومن إلا نفسه .. اللي حتى لو إشتغلها مش هاتكفيه عيش حاف ...

وحتى بعد ده كله لو عايز يبقى موظف ويعمل عمل إداري .. ممكن يتعلم الكمبيوتر والسكرتارية والطباعة ....

أو يدخل مجال المبيعات في أي فرع أو تخصص من تخصصاته .... وفي حاجات كثيرة لا محتاجة لُغة ولا مهارات كثيرة ..

بس أهم من ده كله إني ما أبصش لغيري .. وأقعد أندب حظي وأقول إشمعنا أخويا طلع مهندس .. والتاني دكتور .. أو محاسب أو أو وأنا الوحيد اللي خاب أملي .....

فكل واحد له قدر ورزق مكتوب ومرسوم .. وعلى الإنسان أن يؤمن بذلك مع سعيه الدائم والدؤؤب على أن يُحسن من نفسه .

-------

في أثناء إجازاتي كثير ممن أقابلهم وبيخرطوا على قلب الواحد بصل ويقعدوا يشتكوا همهم والبطالة والعيش والعيشة واللي عايشينها .. بأرد عليهم وأقولهم : طب إنت إتعلمت مهارات إيه تانية غير ورقة الشهادة اللي معلقها على الحيطة عشان تشتغل ؟ يقولك يا عم هي البلد فيها شغل ما هي الشباب متلقحه على القهاوي أهي ... وإوعى يغرك إعلانات الوظائف اللي بالمئات في الجرانين ... أصل دول يا عم ناس بتبقى متعينه جاهزة والشركة بتنزل إعلانات كده وكده ....

شفتوا الخيبة ؟

وحتى لما أتوسط لحد وأقوله روح الشركة الفلانية وقابل فلان الفلاني عشان تشتغل ... تلاقيه رايح قرفان ومش مستعد وحالته كرب ..

طب إيه يعني عايز تشتغل فرد دراع أو تخليص حق ؟

إيه المانع إني احاول وأفشل وأحاول مرة ثانية واتعلم خبرات ومهارات جديدة بدل وقتي اللي بأضيعه يا إما في النوم أو مع أصحابي او في الفرجة على البرامج التافهه في التليفزيون ؟

من تلات سنين كده زوج بنت خالت المدام .. جالي برضوا وقعد يشتكي لي من الدنيا وقرفها وإنه قاعد من غير شغل .. والله يخليك شوف لي حد من اللي تعرفهم هنا يشغلني ...

هو خريج تجارة ... وبعد ما خلص دخل الجيش ظابط إحتياطي لمدة 3 سنوات .. وكمل كظابط متخصص وعمل محاسب في الجيش .. وكان بياخد مرتب ومزايا أكثر من ممتازة ولكنة قرف من الجيش والخنقة بتاعته المهم خرج برتبة نقيب وعشان مدة خدمتة كانت قليلة فلم يستحق معاش .. وطبعاً تصرف برعونة ولم يخطط للبديل بعد أن سترك تلك الوظيفة ..

المهم قلت له تعالى معايا يوم كذا هانروح الشركة بتاعتنا في مصر وأقدمك لهم لإنهم محتاجين محاسب اليومين دول .. ورئيس مجلس الإدارة صديقي أساساً وهاندخل له على طول ...

روحت معاه وسيبته في الإختبار وقلت أقعد مع الناس اللي هناك ..

تاني يوم لقيت رئيس مجلس الإدرة بيتصل بي وبيقولي الراجل أبيض يا فل .. لا محاسبة ولا أنجليزي ولا كمبيوتر وجاي بشنطة هدومه عايز يشتغل .. وطبعاً إحنا شركة كمبيوتر مش مسمط ..

أتصلت باخينا وقلت له : إنت بتعرف محاسبة ؟

قال لي لأ ..

قلت له إومال إنت كنت بتهبب إيه في الجيش؟

قال لي: كنت بأشتغل في المرتبات والمصروفات والحاجات البسيطة دي .. يعني لا قيود ولا ميزانيات ولا يحزنون .. يعني بمبدأ الله جاب الله خد الله عليه العوض .

طب أخبارك إيه في الأنجليزي ؟

قال لي : أبيض يا ورد ؟

طب الكمبيوتر ؟

قال لي : زي الإنجليزي

قلت له : طب روح لمراتك وقولها غطيني وصوتي ولما حد يسأل عليه قوليله المرحوم مات .

[yasovinas]

طيب يا عصام والاف بل ملايين من معهم شهادات عليا عملوا بيها ايه احيانا بيكون فرصه المؤهل المتوسط افضل من المؤهلات العليا معلش يا عصام المشكله في رايي الشخصي في اخوك وليست في المؤهل المتوسط

طيب يعني ايه المشكله انه يشوف له حرفة او مهنه كما قال س س مبيعات توزيع اي شيء

[mickey_egp73]

السلام عليكم ورحمة الله و بركاته

استاذ عصام

بلغ عمره الآن حوالى 30 سنة .. فى الوقت الذى فشلت فيه كل المحاولات بإقناعه بالخروج من حالة الاكتئاب تلك ووضع أقدامه على الطريق بدلا من ذلك

اسمح لي اسأل ..ساكتين عليه لغاية السن ده ليه؟

أعمل إيه؟

الحمد لله ان ما زال في مصر عائلة و بشر تراعي الاخرين و تهتم بهم اعتقد ان اخوته الخمسة الاخرين (او من يتطوع منهم)من الممكن ان يجمعوا مبلغ معين يستطيع ان يبدأ به هذا الاخ مشروعا و يصبح صاحب ملك و بهذا ربما يكون افضل حالا من كثير من زملائه الاطباء و المحامين..

او ان يسعوا الي سفره الي مكان اخر لا يتطلب ان ينظر فيه الي زملائه اعتقد ان تغيير البيئة و المعارف ربما يؤثر عليه ايجابيا و يبعث فيه روح التحدي ان شاء الله..

و يبقي فقط ان ندعو له و لامثاله عسي ان يفرج الله عليهم و نذكر هذا الاخ بتقوي الله

و من يتقي الله يجعل له مخرجا و يرزقه من حيث لا يحتسب..

[عصام]

مش عارف يا خوانا اشكركم ازاى على اهتمامكم ..

المشكلة ان كل الكلام الحلو اللى انت قولته دا يابو السيد .. كلنا قولناه قبل كدا كتير .. جدا وبدل المرة الف

وهو للأمانة حاول .. بس مش بالجدية المطلوبة ..

إشتغل فى نت كافيه

واشتغل كاشير

وحاجات كدا من النوع دا

لكن دلوقتى اهو بلغ السن دا ونتيجة لعدم ارتباطه بـ career معين أصبح ما عندوش خبرة فى أى مجال بما يؤهله للعمل بمكان ما ..

يمكن اللى قاله ميكى أقرب إلى المنطق .. لكن لحد وقت قريب جدا كان صعب موضوع توفير مبلغ دا ويمكن دا يفسر التأخير فى حل المشكلة .. لكن بمشيئة الله دا اللى انا قررت اعمله .. ومعايا اخويا الكبير ..

ولسه حالا عارض عليه المسألة وطلب منى إننا نتقابل بالليل ونقعد نفكر سوا ..

عايزك بس يابو عمر تدينى فى أفكار بس مش مكلفة .. مشروع صغير اعمله وهو يديره

[ابن بلد]

الاخ عصام

حاله اخو حضرتك مش صعبه اوى ولا حاجه

والاقتراحات اللى قالها الاخوه الافاضل وخصوصا الاستاذ سين سين

والمفروض مناقشته فى الامر

وان ماهو فيه هو حال شباب كتير جدا

وخريجى جامعات مش دبلومات

لكن العبره بالشخص نفسه

وياريت لو حواليكم نماذج

حاولت تخرج من محنه البطاله

وتعمل اى حاجه فى حياتها

وخصوصا لو كان خريج جامعى مثلا

واتجه لاى مهنه حرفيه

تتكلموا معاه عن التجربه دى

واكيد هتلاقى كتير

ويفضل ان يكون الكلام بطريقه غير مباشره فى البدايه

حتى يدخل معكم فى نقاش

وان دخل فى نقاش حول هذا الامر

فهذا اول طريق الخروج من محنته

واسهل شىء ممكن تساعدوه بيه

فتح مشروع تجارى بسيط له

لا يتحمل تكاليف باهظه

وفى منطقه شعبيه لاتتحمل ايجارات غاليه

مثل مشروع السوبر ماركت مع مكتبه

وهدايا رخيصه يستطيع التسويق من منطقه الموسكى فى سوق الجمله هناك

بايجار شهرى لا يتعدى 150 جنيه شهريا

بتكلفه مشروع لا يتعدى خمسه الاف جنيها (2000 جنيه مصرى )للتجهيزات و (3000جنيه مصرى)لشراء البضاعه وهذا رقم يكفى جيدا للتسويق لمحل فى بدايته

وحضرتك بتقول انكم خمسه اخوه له

لو كل واحدتبرع له بالف جنيه

وقدر الامكان يجب ان يفهم ان هذا المبلغ على سبيل السلفه وليس التبرع

لانه او فهم غير ذلك سيكون الامر سهل امامه ولن يكون هناك اى تحمل للمسئوليه

وبعد ماتستقر به الامور ان شاء الله

مش مشكله وقتها ان يفهم ان هذا المبلغ تبرع

وانا تحت امرك حضرتك فى اى تفاصيل

عن كيفيه التسويق ونوعيه الاصناف المفروض التجاره فيها

[عصام]

والله يا ابن البلد الفكرة بتزن فى راسى بقالها فترة ..

بس دايما باجى عند نقطة نجيب إيه من عند مين .. واعطل

انا اعرف فعلا ان فى منطقة الموسكى تجار جملة .. بس بابقى قلقان أدخل عليهم يفهموا إنى ماليش فيها ومش شغلتى اساسا يقوموا يستغلوا النقطة دى والمشروع يخسر والمسألة مش مستحملة ..

[ابن بلد]

شوف يا اخ عصام

مشكله التسويق دى بتكون اقل صعوبه وضررا

لو توكلنا على الله وتكون االنيه خير ان شاء الله

وواضح انها كذلك

والسعى والتركيز فى الحصول على اقل الاسعار

وعاده اسعار الجمله مش بيكون فيها اختلاف كبير

وتختلف فقط فى الكميات الكبيره جدا

ثم انك مش هتشتغل فى تجاره فيها فنيات كتير ولا حاجه

الانشطه التى تقلق منهاهى قطع الغيار وتجاره الاقمشه

لكن مشروع مكتبه وهدايا ده

من خلال تجربه تجاريه

ومرور على كثير من الاسواق

ومنها الموسكى

شكل البيع هناك بيكون بالكميه

ومعنى كلمه كميه يعنى دسته 12 قطعه وممكن تطلب نصف دسته وعادى جدا

ومفيش كسوف ولا خجل فى التجاره

وأسال فى اكثر من محل عن سعر الصنف

ولا تبدا عند السؤال بصنف ان تعلم سعره جيدا

بالعكس اسال اولا عن صنف لا تعرف سعره

واجعل الصنف الذى تعرف سعره هو السؤال الثانى

نتكلم فى المهم

اولا يجب ان المشروع فى صيغه شركه

لانه ضريبيا افضل كثيرا من ان يكون نشاطا فرديا

ثانيا

يجب عمل فاترينات للعرض

ثالثا

يجب المرور على محلات مشابهه للنشاط

وحدد الاصناف ولو بنسبه 60%

يعنى مثلا

البرفانات التركيب والبرفانات الجاهزه

ساعه اليد الحريمى والرجالى وساعات الحائط

منبهات باشكال مختلفه

محفظه جلد حريمى ورجالى

ميداليات مفاتيح باشكال مختلفه

لعب اطفال تتراوح من جنيه الى خمسه عشر جنيها

اكسسوارات حريمى

هدايا طلبه الجامعه مثل القلوب وكروت الاهداء

يوجد اشياء غريبه للمقالب

مثل زجاجه عطر ذو رائحه كريهه

ولاعه تكهرب من يستخدمها

وهكذا

يوجد ايضا الادوات المكتبيه

وتجد بعضها فى الموسكى

ومن الممكن تسويقها من الفجاله

وعلى فكره

سوق الفجاله فيه حاجات حلوه كتيره جدا ايضا

ومفيش عندهم لعب كتير فى الاسعار برضه

ممكن برضه شراء خط موبيل تجارى وتشغيله على موبيل رخيص

على نظام(اتكلم براحتك)الدقيقه 75قرش

لمعلوماتك الاصناف الى ذكرناها لا يتعدى تسويقها اكثر من 2000جنيه

وحاول ان تكون الكميات قليله فى البدايه

التعب هيكون فى البدايه فقط

وبحد اقصى اول شهرين

وبعد كده

هيكون التسويق عادى جدا

وانا لا زلت تحت امرك فى اى استفسار

وربنا معاكم وبالتوفيق

[nashwa]

معلش يارجالة <_< ... أنا عارفة انكم رجالة فى بعض ودخلت كده ... بس أحححم

عن خبرة صاحبة عمل سابقة ... وعاطلة "بسبب الست جنة"" حاليا

أحسن حاجة الشغل الحر .. أشتغل لحسابك ...

كلام الأستاذ ابن البلد فيه جوانب ايجابية وواقعية كثيرة ... وأحيه عليه

أهم حاجة فى الموضوع ده هو أخوك ... لابد وحتما ان يعرف انه لازم يتحرك

لازم يعتمد على نفسه ... أعتقد انكم مسؤلين عنه ماديا بشكل او آخر

المشروع مش حينجح (حاشا لله) ... الا لو عرف ان دى فرصته الأخيرة

البدايه تكون بسيطة ... بأحتهاده وتشجيعكم ومساندتكم فى صعوبات البدايه

أن شاء الله المشروع يقف على رجليه ... وهو ينطلق

ومثل ماذكر ابن البلد لازم يفهم انها سلفة ... لغايه الوقت اللى يرجع فيه الفلوس

يعتبرها مساندة وتقدير لنجاجه ان شاء الله

مشروع الحاجات "" الصغيرة"" وأدوات المدرسة ... أعتقد انه فعلا مناسب

لايحتاج خبرة ... ولكن يحتاج الى قدرة للتعامل مع الناس ... يعنى ميزهقش بسرعة

الناس ممكن تقلب وتمشى ... المطلوب ابتسامة

خليكوا وراه .... وربنا يوفقه ...

[kokowawa1979]

سي السيد كتب :

إبننا العزيز عصام

"لست وحدك "

لأ بجد

سواء كان الشخص مؤهل متوسط أو من غير مؤهل أساساً فكثير من اللوم لابد أن يُلقى عليه ..

يا أخي حظه وقدره ونصيبه كده .. إيه بقى خلاص يقعد حاطط إيده على خده وينعي حظه وتمر الأيام وهو كما هو ...

يا أخي الكريم الدنيا ليست وظيفة حكومية أو شركة واحده يعمل الإنسان فيها ولو فاتته يبقى خربت ...

فهناك الكثير من المهن المحترمه التي يُمكن أن يمتهنها ...

تصدق بالله وما تضحكش على كلامي ؟

لو واحد معاه مؤهل متوسط أو إعدادية حتى .. وراح إتعلم مهنة الحلاقة مثلاً - إحم إحم - واللي مش هاتاخد منه سنة بالصبر والمثابرة ... هل ده عيب ولا حرام ؟

مهنة شريفة ومحترمة ودخلها ممتاز وممكن خلال فترة قصيرة وده رأيته بعيني بحكم درايتي بالمهنة - بس أنا مش حلاق يعني - ممكن خلال فترةقصيرة يفتح له مشروع صالون حلاقه خاص به .. ومحلات الإيجار على قفا من يشيل .. مش هانقول محل تمليك .. ولكن هناك عشرات بل مئات المحلات بتتأجر بالسنة وممكن ببعض المدخرات أو الإسثمارات القليلة يبدأ مشروع زي ده

عين العقل ياسي السيد مش عيب إن الإنسان يشتغل أي مهنة شريفة - البلد ماعدتش بلد شهادات زي زمان ياأخ عصام - المشكلة مش شهادتك إيه - المشكلة معاك وظيفة تاكل منها عيش وتقدر تفتح بيت واللا لأ؟؟؟

إنزل القهاوي والمولات واتفرج على اللي معاهك شهادات عليا في كل التخصصات لكن بيشتغلوا إيه ؟؟ متسكعين وراا البنات في المولات وأماكن التسوق هي دي وظيفتهم الحقيقية - شوية شعر يسبسبوه وعنين يسبلوها وشوية بانجو في جيب البنطلون الخلفي أو في الشراب !!!!

مهنة الحلاق مهنة شريفة وهي مربحة بالفعل وأغلب الحلاقين حاليا أصحاب شهادات سواء عليا أو متوسطة .

يمكن أيضا أن يتعلم التوصيلات والتمديدات الكهربائية

يمكن أن يتعلم السباكة

كل دي مهن لها أكاديميات خاصة في أوروبا لتعليمها لكننا في مصر ننظر لها بازدراء في بعض الأحيان .

يعمل معي في المزرعة ثلاثة أفراد حاصلين على مؤهلات عليا لم بشعروا بالخجل من العمل كمزارعين لكن تعاملي معهم بكل أدب وتقدير لشعورهم بأنهم أصبحوا مسئولين عن إيجاد فرصة عمل بعد تخرجهم وهم من تخصصات مختلفة وهم الذين يحددون مرتبهم الشهري بنفسهم وكذلك الزيادة السنوية المستحقة - وهم بدورهم أحبوا العمل بالمزرعة بل يعتبرونها أنها مزرعتهم بالفعل وليست مزرعتي ولا يتأففون من أي عمل مهما كان .

يجب أن تكون هذه نظرة الشباب للعمل لا النظر إلى الشهادة والانتظار حتى تفرج !!!!

[هادي]

أخي العزيز عصام

جميل أن نجد هذا (الانسان) الذي يعيش مشاكل من حوله

ربنا يبارك في عمرك ويحفظك

وأما عن مشكلة أخوك .. فسأحدثك في نقاط محددة .. عن سابق تجربة ..

ولن اضيف الى ماتفضل به الافاضل من اخوتي و اخواتي من تفاصيل

وأدعو الله ان يثيب جميع من اهتم بحل مثل هذه المشكلة وتقديم الاقتراحات

لانها بالفعل ليست بالشيء الهين ..

وأدرك .. بل وأعيش ما يشعر به عصام واخواته حاليا !!

عزيزي عصام

90% من إمكانية حل هذه المشكلة هو في يد أخيك .. ربنا يكرمه ويوهبه الرضى بالقضاء والقدر

ولا ابالغ في هذه النسبة صدقني

لسبب بسيط

عوامل النجاح .. وتركيبة النجاح .. ووصفة النجاح السحرية

تكمن فينا

بداخلنا

قوتنا النفسية والروحية

ايماننا بعظمة الخالق وحكمته في كل فعل يصدر عن مشيئته التي لا راد لها

ايماننا بقدراتنا الخاصة وتميزنا ( بدون غرور ومبالغة وتهويل ، وبدون تهوين واستخذاء وشعور بالضعف)

خميرة النجاح تكمن داخل كل فرد وكل انسان

متى يكتشفها ويشعر بها ويضع يده عليها وتنميها .. هذا هو السؤال الأهم .. متى ؟!!!

كلما كانت في سنوات حياته الاولى ..

كلما أسرع ذلك بانتاج " إنسان " ناجح بكل معنى الكلمة

جزء من المشكلة في نظرة مجتمعاتنا الضيقة للاعمال وتقديرهم بحسب مجموعه في الثانوية العامة

لكن أبشرك

هذه النظرة الجوفاء في سبيلها الى التغيير ..

أعرف عشرات من الجامعيين والحاصلين على مؤهلات (عليا) كما نطلق عليها يعملون في أعمالهم الخاصة وينجحون في مجالات زراعية وصناعية وخدمية ليس لها علاقة بالشهادات التي حصلوا عليها، ويتمتعون باحترام الجميع من حولهم ، ومستواهم المادي رائع ..

المشكلة أن نؤمن يا عصام

لو انك جعلتني أؤمن أني ساعبر المانش .. تأكد أني مع التمرين والتدريب ساعبره فعلا

بداخل كل منا طاقة هائلة .. لو وضع يده عليها واحسن استغلالها .. فهو سيحقق الكثير

احب ان يكون يكون تركيزك مع اخوتك في الحديث مع اخيكم حول هذه النقاط

ثقته بنفسه ستكون نقطة الانطلاق

لا يترك نفسه نهباً لشماعة الظروف أو البكا على ما فات ..

العمر لا يزال فيه المتسع للكثير والكثير من النجاح والجهد .. وهو قادر على ذلك ( لو أراد)

فقط ان " يريد "

ثم بعد ذلك ستكون التفاصيل مثلما تفضل الاخوة ، وارسل تحية وتقدير لاخي (ابن بلد) على روحه الشفافه

ستكون التفاصيل اسهل

فقط ان "يريد" هو ان يذهب الى هذا النجاح

خطر على بالي مثل انجليزي يلخص ما أريد

(( توقع الخير .. اذهب واحصل عليه ))

expect good , go and get it

اضافة اخيرة

اعرف صديق حصل على دبلوم تجارة

يعمل الان في محل ذهب (يعمل فيه من 11 ساعة يوميا) في نفس مدينته

ويحصل على 600 جنيه راتب صافي

ويفكر في السفر للخارج ..

بعدما جلست معه جلسات نقاش مطوله

اقنعته ان السفر ليس الحل السحري

وانه يحقق كل يوم " نجاح " فعلي .. لكنه لا يشعر بذلك

ودي و احترامي

[الباشمهندس ياسر]

انا برفع الموضوع ده

عشان افكر الناس ازاى تعرف تحس بالمسؤولية عن اهلها

و كمان ازاى نعرف نفكر ف بعض

و كمان نعرف الاخبار ايه؟

طمنونا

[عصام]

و كمان نعرف الاخبار ايه؟

طمنونا

حدييييييييييييييييييد

[عصام]

آسف يا هادى لم أر مداخلتك قبل ..

جزاك الله خيرا ..

الحمد لله الأمور تطمن والراجل استقر فى وظيفة هايلة وبيتقدم ومركز وربنا يوفقه

مشششكرين ع السؤال يابو علام

[محمد عبدالعزيز]

ألف مبروك يا أستاذ عصام على وظيفة أخوك, وياريت لو ممكن نعرف تفاصيل أكتر يمكن تفيد حد عنده حالة مشابهة.

[شاب مصري]

أعتقد لا تزال مجالات شاسعة واسعة أمامه وان موضوع المؤهل ده ليس بالمشكلة على الاطلاق في مصر مبارك

ومن ناحية أخرى بصوا معايا كده

http://ar.wikipedia.org/wiki/%D8%A7%D9%84%...%85%D8%A6%D8%A9

الخالدون المئة - أعظمهم محمد .. ومحمد (صلى الله عليه وسلم) كان أمي جاهل لا يعرف القراءة والكتابة

لكنه استطاع ان يكون أهم شخصية في التاريخ حسب كلام مايكل هارت مؤلف الكتاب.