كوادر حزب ابو شناب

[ezzat afifi kotb]

          كوادر حزب ابو شناب

          ----------------

واحد قاللى افكار عال             تعكس خطك تقرا شمال

تعمل حزب من الاشبال            تبقى زعيم الحزب الثائر

قمت بسرعة بعت جواب            برنامج حزب ابو شناب

قالوا برنامج كله ضباب         قلت المعنى ف بطن الشاعر

بس مواصفات الاعضاء             ولا شهب الليلة الظلماء

كوادر ما بتعرف اعياء         وما بينها تواصل وتخاطر

عندى النائب اول فرز             ولا سيارة بفتيس غرز

لو تخسر يتحول جرذ              مع اول موجه حيغادر

بص النائب عمك غالى        فى موسوعة جينس طوالى

بيصقف بالصوت العالى        ف الجلسة والوقت الشاغر

والكادر هزاز الراس              اللى موافق قبل الناس

امبارح وقع كراس          وموافق غايب اوحاضر

وكادرنا عبده النعسان              فاتح بقه لكوم دبان

ومسلم لقضا الرحمن            يقفل بقه يلاقى حوافر

ومعانا مرسى الطهقان           قبل الحزب كان فلسان

ضمنه الحزب ف كام دكان        غير اسمه مرسى الشاطر

وكادرنا صاحى المتاوب         لو نعلن حرب ح يتثائب

وحيبقى الحاضر الغائب     واهه صوت بيرجح ويناور

اما النايب كاره ناسه        ف الحرية قميص بمقاسه

ويعلنها طوارىء من راسه        وسجونه مفتوحه للحاضر

والنايب دمغة النتاش           اكتسح الرزق مخلاش

لو سلعة تخدها ببلاش        اعبائها ضريبة ومخاطر

وقوائم للجنس الناعم          الشرشوحه جنب الهانم

قبل الجلسة الكوفير غانم       يرسم ف المكياج بمساطر

واقترحات النائب هاله            اوعوا تأمنوا للرجاله    

بعد الحب بتيجى نداله         لازم يبقى معانا خناجر

والكادر بائسة البسطامى        بتعادى الشرع الاسلامى

فى ميراث وملابس واسامى        والرجاله اشباح ومناظر

بس النائب بنت نفين        ساعة بتغضب ساعة تلين

وبعد ما نبقى متفقين          تاخد اذن عشان تتظاهر

وكوادر ميت صنف ولون        لو كانوا ف عصر نابليون

الحملة ما تسيب بسيون       ونسمى على لويس العاشر

عزت عفيفى قطب