في حد يعرف انك بايت هنا ؟

[احمد هادي]

اعزائي

زي ماانتو عارفين اغلبنا هنا بيكتب باسماء مستعارة

وأيا ما كان السبب . مش دي القضية

لكن ياتري قلت لمين من الناس اللي يعرفوك في الواقع انك فلان أو علان اللي بيكتب في المحاورات

طب وقلت له ليه ؟

انا بسال السؤال ده لأني اكتشفت انه كل ما تبقي مجهول حتي لأقرب الاقربين كل ما بتحس بحريه أكبر في التعبير عن مشاكلك ومخاوفك وهمومك

يعني من الآخر كده مش حاسس بأي رقيب حتي لو كان شريك حياتك أو أعز اصدقائك خصوصا اللي زي حالاتي معظم موضوعاته شخصيه وانسانيه

انا بصراحة بفكر أخللي عروسة المستقبل تقرا مداخلاتي هنا عشان تعرفني اكتر في وقت أقل لأن ايام اجازتي في مصر معدوده

مخاطرة ؟ مغامره ؟ مش عارف

عايز رأيكم

تحياتي

[ATHENA]

موضو حلو أخ أحمد

شخصيا كنت بخلي معظم معارفي و افراد من عائلتي بشكل تلقائي يشتركوا في المواقع الي أنا مشتركة فيها...و يعرفوني بإسمي طبعا و ده كان له جانب سلبي من ناحية التقييد الطبيعي اللي بيتحس لما يكون حد من أفراد عيلتك يكون معا و إنت مع صحابك مثلا لكن منكرش إني كنت بتعامل بنفس تلقائيتي و شخصيتي.... و كانت الإيجابية الوحيدة إن البعض فهمني أكتر و لو كان من عيلتي لأني يمكن مش بتكلم في الطبيعة قد ما بتكلم و زي ما بتكلم و بعبر عن نفسي في المنتدى...

تم تعديل 11 مايو 2006 بواسطة ATHENA

[nancy]

بالنسبة لى انا كل المنتديات بدخلها باسم واحد وهو انى اعكس اسمى

ومش بافكر انى اكتب راى فى اى منتدة او حتى اتكلم عن اى حاجة انا باقراء

واجمع معلومات تهمنى وخلاص

انما هنا دة المنتدى الوحيد الى دخلت فية باسمى وبتكلم عن نفسى عادى

لانى مش حسة ان لازم اخبى افكارى

واى حد بيسالنى عن اى معلومات على الخاص برد عادى

محستش ان فيه مشكلة

[مصرية الهوى]

أنا بنات خالاتي هم بس اللي عارفين اني بايته هنا :lol: ..

وبيعرفوا كل حاجه عن المحاورات واللي في المحاورات ..

ما هو لازم يبقى فيه حد عشان احكيله ..

<_<

انما سؤالك عن انك تخلي خطيبتك تقرأ كلامك في المحاورات ..

احس انها حاجه ظريفة ومش تقليدية انها تعرف شخصيتك من كلامك على النت ..

[عصفور طاير]

أنا شخصيا لا أحد على الإطلاق يعرف أي شيء عن مشاركاتي في المنتدى.. بل أن هناك بعض الأصدقاء يشاركون ولا يعرفون أني معهم، وكان منهم من يحكي عن المحاورات لي ولا يعرف أني أشارك، وأنا بدوري لم أقل له شيئا.

أنا شايف إن ده أفضل كتير.. أو بالأصح أريح كتير.

[yasovinas]

اخفاء الشخصية الاصليه بيكون مريح في حالات قليله كان يكن هناك معارف او اصدقاء لك في نفس المنتدى وهذا يجنبك بعض الحرج في بعض الحالات

فمثلا عندما يقول احدنا ان زوجته مثلا هي اغلى انسانه له في الوجود وبفرض وجود اخوة ممكن يزعل ونفس الوضع اذا قال ان بنتي الصغرى هي احب بناتي وبنته الكبيرة معاه هتزعل وهكذا

ايضا عندما يذكر حادث او حكاية غرامية حدثت له زمان وطبعا الهدف انه يكون بيضرب مثل او بيحكيها من باب اخذ العيرة والعظة تخيلوا بقى لو المدام معاه وقريت اللي اتقال ;) :) :P طبعا تاني يوم هيبات هنا بجد

صديقي الغالي هادي نصيحة لوجه الله راجع كوووول مداخلاتك وافحصها واحده واحده قبل ما تعمل عملتك انا قلت لك اهو تيجي تقول شوفولي حته ابات فيها ما ليش دعوه

:D

[khedr]

انا مع ان الواحد يدخل من غير ما حد يعرف انه هنا

احيانا الواحد بيقي عايز يفضفض ومش بيلاقي احسن من المكان ده ياخد راحته فيه

احيانا الكلام بيكون واقف مجامله قلق خوف اعتبارات كثيره

لكن لما تكون حاسس انك كده براحتك .................لا بيطلع كل الكبت وكل اللي جواك

واعتقد انه في الغالب بيكون فيه صفاء ..........ومش هوي ولا نفاق ولا خداع

[نورية]

امممم مش عارفة بس انا مدية فكرة عن المنتدى هنا لاسرتى

بس مافضلش ان حد يدخل و يشوف اللى انا باكتبه.. لا اسرتى و لا خطيبى ولا اى حد من اصدقائى.

ساعات بتبقى عايز تفضفض بحاجات جواك و ماحدش من اللى انت تعرفهم يتطلع على الحاجات دى..

انا طبعا مش باكتب حاجة اخجل منها... بس مجرد انى بافضفض باسلوب معاكم هنا بيبقى غريب شوية على اللى حوالية فى الحقيقة...امممم يعنى ممكن اتكلم معاكم هنا فى موضوع و اقول رأيى او استخدم جمل تعبيرية مابستخدمهاش فى حياتى اليومية... يمكن استخدمها مع اصدقائى المقربين جدااااااااااا...

عامة لو صادف و حد عرف انى بابات هنا و قرا اللى انا كاتباه فدة ماعتقدش انه راح يضرنى فى حاجة... بالعكس دة اللى قرا بكدة يكون عرف جانب خفى من شخصيتى... و اعتقد دة ممكن يقرب بينى و بينه اكتر... كدة يبقى عرف نورية بجد... من غير رتوش و لا (مساحيق تجميل) ممكن اكون حاطاها على شخصيتى عشان اعمل حدود بينى و بين الناس..

امممم بس كدة