يعني إيه يفتح بيت ؟

[Sherief AbdelWahab]

لي صديق من خلفية شعبية ، دائماً يسألني السؤال الممل : انت مش حتتجوز؟

زهقت من الدخول معه في مناقشات بيزنطية ، وأراه شخصاً لا يحمل الكثير من الإحساس بالمسئولية.. إلا أن غيري في العمل لا يوافقني الرأي ، بدليل أن سيادته بيجهز بيته من دلوقت ، الشقة ، والعفش والذي منه ..

ومع ذلك فمش بيبطل شات ، ومش بيبطل يكلم الأجواء بتاعته على المحمول!

فتح البيت شقة وعفش بس؟ .. تفتكروا؟

مش عايز ردين تلاتة ، عايز كل المنتدى يرد عليا! :P

خلص الكلام

[nancy]

موضوع فتح بيت دة يا شريف مش حاجة بسيطة ولها معانى كبيرة

انا طبعا معرفش سنك اد اية وان كنت فعلا تستحق تتسال السؤال دة او لا

او انت بتشتغل اية فهل دخلك يفتح بيت بسهولة اولا

وبعدين انت تقصد ان زميلك دة بيعرف بنات كتير فمنين هو بيجهز نفسة للارتباط ومنين بيعمل كدة

هو مش غلطان هو مش مقرر يتجوز بس عاوز يكون عندة ممتلكات تكفلة ان يكون جاهز

انما نرجع لكلمة يعنى اية يفتح بيت

البيت دة مش حطان وبس دة معناه حيز من الفراغ تملكة

امكانيات داخلية من فرش واجهزة ووسائل للراحة

واهم من دة كلة القدرة المادية على اعالة زوجة

انما اصل البيت احساسك انك عاوز اسرة صغيرة تعيشوا فى حب ودفىء

ولازم يكون عندك احساس عالى بالمسؤلية لانك مش حتكون وحدك فية ناس فى رقبتك

وفية اطفال اهم من الفلوس محتاجين الى يربى ويعلم ويحتوى ويتفهم

كل دة معناه يفتح بيت

المقومات دى بتاخد وقت على ماتتكون داخل كل واحد وبالتالى فتح البيت صعب جدا فى الزمن دة

من الناحية المادية والناحية النفسية

[yasovinas]

تفتح بيت

يعني تكون اسرة يعني جيل جديد يعني مسؤلية وامانه في رقبة رب البيت يعني القدرة على تحمل الاعباء والقدرة على حمل الهم والقدرة على فهم الآخر

فتح البيت بعنب القدرة على التنازل عن الكثير مما يتمتع به الاعذب من حرية وعدم مسئوليه - اقصد مسئولية الغير- فتح البيت هي القدرة على الالتزام بميعاد حضور وميعاد خروج القدرة على قبول الآخر واستيعابه والتفاعل معه

فتح بيت يااااه يا شريف دي كلمه كبيرة قوي بس الحب بيخليها بسيطه جداً ربنا يهديك يا شريف وتتجوز بقى :P

[khedr]

فتح البيت شقة وعفش بس؟ .. تفتكروا؟

كنبه

وقله

وكبايه

.................................................

تعني..ببساطه البساطه في تناول موضوع فتح البيت ولا اقصد الاستسهال

اي انك تُقدم علي البناء وتجد الامور كلها وقفت معك وتساعدك

بناء البيت وبناء الاسره وبناء المجتمع......

يربطهم جميعا خيط واحد وهو الفرد

[Sherief AbdelWahab]

معنى يفتح بيت في نظري أعمق من مجرد أثاث..

معنى يفتح بيت يعني ببساطة شديدة إن يبقى عندك مسئولية إنسانة اختارتك علشان تتجوزها .. ومسئولية عائلة مستقرة لازم تكونها .. مسئولية قيادة بيت وقرارات لازم تاخدها وتتحمل وغيرك يتحمل مسئوليتها..

ولأنه رحم الله امرئ عرف قدر نفسه ، فأنا محجم عن الجواز لغاية لما تكون عندي الخبرة الكافية في المناطق دي تحديداً..

وللسبب دة بأحس إن شغل كازانوفا النوفا كبنوفا اللي بيعمله صاحبي دة أبعد ما يكون عن المسئولية وفتح البيت ، وحتى فتح إزازة البيبسي!

الجواز يعني استقرار يا جماعة الخير..

خلص الكلام

[النسر المصري]

معنى يفتح بيت في نظري أعمق من مجرد أثاث..

معنى يفتح بيت يعني ببساطة شديدة إن يبقى عندك مسئولية إنسانة اختارتك علشان تتجوزها .. ومسئولية عائلة مستقرة لازم تكونها .. مسئولية قيادة بيت وقرارات لازم تاخدها وتتحمل وغيرك يتحمل مسئوليتها..

ولأنه رحم الله امرئ عرف قدر نفسه ، فأنا محجم عن الجواز لغاية لما تكون عندي الخبرة الكافية في المناطق دي تحديداً..

وللسبب دة بأحس إن شغل كازانوفا النوفا كبنوفا اللي بيعمله صاحبي دة أبعد ما يكون عن المسئولية وفتح البيت ، وحتى فتح إزازة البيبسي!

الجواز يعني استقرار يا جماعة الخير..

خلص الكلام

شريف حبيبي...اسمع اما اقولك

انت بتتكلم عن المسؤولية بصفة عامة وليست خاصة....يعني الشخص المسؤول المعتمد على نفسه في حل الأمور بطريقة ناجحة باكثر من خمسين في الميه...فهمت حاجة....طبعا هتقولي لأ ;)

هارجع أقولك....انك غلطان لما تفكر بطريقتك دي...يعني موضوع انك تاخد خبرة كافية في المناطق دي تحديدا زي مابتقول ..هي كانك اخضعت المسؤوليه للتقسيم ...وهو ضد المنطق

حيث ان المسؤولية لاتقبل القسمة او التخصيص دون غيرها...مثلما انت مسؤول في دراستك أو عملك او اكلك وشربك...اذن فانت ايضا بنفس المستوى تستطيع ان تعرف مقياسك من خلال تلك التجارب هل انت شخص مسؤول ام لا!!

علماء النفس عندما كتبوا لنا اختبارات لقياس مستوى الشخص في تحمل المسؤولية...لم يذكروا اسئلة من نوع هل انت قادر على فتح بيت ام لا...انما سألوا أسئلة من حياتك اليومية...مثل طرق تعاملك مع الناس..او مع مديرك...او حارس العمارة حتى

المهم انها أسألة تدل على ان اكتساب خبرة تحمل المسؤولية بشكل عام هي من حياتنا اليومية..وليست بالتعرض لخصخصة المسؤلية

هتقولي طب انا عاوز اعرف واخد خبرة بردو في المواضيع بتاعت الجواز الأول......مممم...طيب ...يعني انت مش نافع معاك الكلام بالذوق :lol:

هاقولك يكفي ان تقرأ مواضيع عن مشككلات الزواج...ويكفي تجربتك التربوية في ظل والديك...وياحبذا لو لك اخوة متزوجون..وكمان صحاب متزوجة من هنا وهنا..ووووو....كل دول يدولك صورة كافية (وليست خبرة زي مابتقول)..عن الزواج ووأشكاله وطرق تحمل مسؤليته (طرق فقط)

يعني خذ الصوره بشكل عم..على شوية خبرة من حياتك اليومية اللي بتثق فيها بان تكون شخص مسؤول...على كام كيلو طماطم ودرزن فاصوليا بيضا ام عين سوده..واتوكل على الله وخش ياراجل :wub:

وارجع واقولك...ممكن تكون شخص مسسؤول ومعتمد عليك رقم واحد

في اسرتك

في شغلك

في بيتك

في غربتك

بتطبخ وبتغسل وبتمسح لنفسك

بتربط رباط جزمتك لوحدك

معاك فلوس ومستورة والحمدلله

عندك شقة بخمس متارح يردوا الروح وروح اللي خلفوا اللي مايتخلف

عفشك دهبك شبكتك عربيتك..كله موجود

ذكي ولماح ومشهور وعبقري مؤمن وبتصلي ووالديك راضين عليك ليوم القيامة...(يارب دومها علينا نعمه)

وفوق ده كله......متتجوزش....ليييييه....ماعرفش......مفيش نصييب

فخمتوا ياخبيبي ولا مش فخمتوا ;)

[مصرية الهوى]

أنا معاك يا شريف مليون في المليون إن الزواج مش بيت وعفش ويوم الفرح وبس ..

وخصوصا إن شباب اليومين دول والبنات كمان مفيش عندهم أي إحساس بالمسئولية ( قال يعني أنا مش من بنات اليومين دول :lol: ) ..

وطبعا المسئولية مادية ومعنوية ..

تخيلوا !! أغراض البيت من اللي يشتريها أهل الشاب وإلا أهل البنت !!!

والهانم والبيه كل واحد عايش حياته لوحده .. بس متجوزين بالاسم !!

بعد الشغل .. هو يروح يسهر مع أصحابه أو مع اهله وهي تروح عند أهلها أو صحباتها .. وبالليل يرجعوا للبيت .. وأحيانا البنت تضطر إنها ترجع البيت بدري عشان وراها شغل بكرى ولازم تنام بدري والبيه لسه قاعد مع أصحابه ..

وكل يوم يحصل نفس القصة ..

وكتير من مشاويرها وحاجاتها وأحيانا حاجات للبيت تنزل تشتريها لوحدها والا مع أخواتها أو صحباتها .. مع انه المفروض يكون جوزها معاها ..

ولو قعدوا في البيت واحد قدام الكمبيوتر والتاني قدام التليفزيون ..

أمال ازاي تحس الوحدة إنها متجوزة إذا مكنتش تقعد هي وجوزها قعدة لطيفة جميلة يدردشوا سوا .... وتحس إن ليها بيت وزوج هي تتحمل مسئوليتهم .. ويحس الشاب إن عنده بيت وزوجة هو اللي مسئول عنهم ..

والا يروحوا يتفسحوا ويخرجوا سوا .. وحاجات البيت هم اللي يشتروها سوا مش اهلهم .. ولو حاجه باظت في البيت مش يكلم بابا عشان يلحقه و يجيب السباك والا الكهربائي .. عشان يصلحها ..

وخلاص اللي يتعود من أول أيام الجواز على كده .. يفضل طول عمره مش حاسس بالمسئولية .. وخصوصا بعد ما العيال ييجوا تبقى مصيبة ..

والحاجة اللي كل مفتكرها بمووت من الغيظ واحد قريبي بتقول مراته أيام شهر العسل من حظهم إنه صادف أيام امم اوروبية مش عارفه افريقية مش عارفه دوري ايه وبتاع وقرف .. فكان كل يوم بيتفرج على ماتش ;) .. أنا لو مكانها كنت اتجننت وكسرت التليفزيون فوق دماغه .. اذا كان ده ايام شهر العسل .. امال هيعمل ايه بعد عشر سنين ؟؟!! .....

من فتح البيت برضه .. موضوع العلاقة بين الزوج وزوجته ..

لأن فعلا فيه شباب عيال وبنات أعيل منهم .. كل حاجه يروح يحكيها لماما والا أصحابه .. والبنت برضه تحكي كل حاجه لماما و صحاباتها ..

ولو مشكلة حصلت بينهم ميعرفوش يتصرفوا .. بيتخانقوا زي العيال بالضبط ..

والا يعملوا تصرفات عيالية غريبة .. احكيلكو حكاية ..

وحده اعرفها عندها 19 سنة ومتجوزة وجوزها برضه في اوائل العشرينات .. المهم البنت دي ايام الامتحانات بتسيب بيتها وتروح عند اهلها عشان تذاكر .. وجوزها كل شوي بيكلمها في التليفون ... قامت قالتله : بص الله يخليك بكرى اخر امتحان وهارجع البيت خليني اركز في المذاكرة .. قفل السكة .. بعدها مباشرة كلمتها بنت خالتها .. اتكلموا شويا .. بعدين قفلت .. على طول كلمها جوزها .. تخيلوا بيقولها ايه .. يا سلام يعني انا اقفل ورايا مذاكرة .. امال البيه اللي كان بيكلمك من شويا .. ليه مقلتلوش انه وراكي مذاكرة عشان يقفل ؟؟!!! ........

انا مرارتي اتفقعت بعد الحكاية دي .. عيال والله العظيم عيال .. حد يتصرف كده .. ويتكلم على مراته بالشكل ده .. حكاية الشك دي مش لعبة .. بجد والله الموضوع خطير !!!

لا والمشكلة ان البنت دايرة في الكلية وتحكي الحكاية لكل البنات ..

أنا عن نفسي بصراحة اكتر حاجه عايزاها في شريك المستقبل انه يبقى راجل بمعنى كلمة راجل .. يحس الواحد انه في البيت راجل .. راجل بأخلاقه وتصرفاته وقراراته وتحمله للمسئولية وقيادته للبيت ..

مش راجل ترللي أي كلام !!!

وربنا يستر ;) !!