وزنك بيزيد عليكي وعلي..........

[sendrella119]

وزنك بيزيد عليكي وعلي..........

Jasmine Tea

[sendrella119]

ده مش موضوع

ده بس كده علي الماشي

ما اعرفتش اكتبها في اي موضوع .....علشان الكل يقراها

للفائده :unsure:

[Folana]

السلام عليكم ورحمة الله ....

الاخت الفاضلة سندريلا....

دخلت موضوعك وانا كلى تفاؤل .....وكان العنوان مغرى جدا ...لكن مافهمتش ايه المقصود...هل هذا اعلان عن شاى جاسمين ..طب وايه فوايده وبيتباع فين ...ياريت شوية توضيح حتى تعم الفائدة ....

لكن لو حبيتى تنقصى وزنك فعلا ..قوللى وانا اكتب لك عن خبرة 70 سنة من عمرى فى انقاص الوزن

تحياتى ... :unsure:

[khedr]

..قوللى وانا اكتب لك عن خبرة 70 سنة من عمرى فى انقاص الوزن

تحياتى ... :lol:

ياريت ياسيدتنا العزيزه شويه نصائح للعوده للوزن القريب من الطبيعي

ولي سؤال ..كيف يقوم الانسان بعمل رجيم وفي نفس الوقت يحتفظ بنشاطه

وكيف يقضي علي الشعور بالجوع

وكيف....

معلهش كترت مني الكيفيات

وكيف تكون حياته عاديه يأكل بدون ان يزيد الوزن

شكرالكي

وشكرا لسندريلاا علي الموضوع الرجيم

[MZohairy]

يا جماعه

الموضوع سهل جدا

خلوا المدخلات أقل من المخرجات!

طبعا المخرجات هنا المقصود بيها السعرات الحراريه المفقوده نتيجة المجهود

اتحركوا و كلوا بعقل

بلاش الأكلات اللي فيها بلاوي زرقا أو قللوا فيه على قد ما تقدروا زي:

الحلويات بكافة انواعها

السمنه و الزبده و الدهون بصفه عامه

النشويات زي العيش و الرز و المكرونه

و خدوا قاعده أن معظم الحاجات اللي طعمها لذيذ غالبا ما تكون مش صحيه

و ربنا مع الجميع لأن التخسيس مش سهل على اي حال

بهدي النفوس بس :lol:

[sendrella119]

اولا... فلانة

هل هذا اعلان عن شاى جاسمين ..طب وايه فوايده وبيتباع فين ...ياريت شوية توضيح حتى تعم الفائدة ....

لا مش اعلان دي تجربة

انا كل شوية بحب اغير صنف الشاي بتاعي

المهم

جوزي جاب لي ده ..بغض النظر عن نواياه :o

كل يوم اشرب المج بتاعي في العصاري

لقيت نتيجة ملحوظة واهمها

سد النفس <_<

الشديد جدا

خضر

وكيف يقضي علي الشعور بالجوع

جرب ده وشوف

خلي المدام بعد ما تخلصوا وجبة الغداء تخفي اي اثار للاكل في المطبخ

يعني اللي يروح التلاجة يروح

اللي يتحط في الحوض يتحط

وبقية ......صينية المكرونة الباشميل ما تتسابش علي الرخامة

تخبيها

علشان لما تقوم بعد ساعة تعمل شاي ولا قهوة ولا ..ولا ....ولا

ما يكونش في مغريات قدامك .....وتاخد حبة من الصينية كده عي الماشي :blink:

اما بخصوص الكيفيات ..........

بس مفيش غير الرياضة

او المشي :happy:

والنصيحة الاولي

زهيري

طول عمرك

بهدي النفوس بس

خصوصا في موضوع غياب س س :ph34r:

انت بتتكلم براحتك .الدينا عندك شايفها من فوق(190) ..........واخر مزاج

بس اللي عايز يعمل رجيم اول حاجة يبعد عنها

هي العيش

كارثة لووحده

انما ما انصحش بالسكريات والحلويات ....في البداية

هذا........... ولله التوفيق :angry2:

[khedr]

هي العيش

كارثة لووحده

هو ده

احب كل انواعه

البلدي الشامي الالبيض الفينو الخبز الصامون مرحرح بتاو موضه (انواع عيش)

فاضي مليان حاف ناشف

لكن الرياضه انا احب لعب الكوره جدا

احب العب مش اتفرج علي الاحمر والابيض

وكل اسبوع بنروح نلعب لمده ساعتين بس لعب فوق السن طبعا

لكن برضه مفيش فايده............

دبدوبه بتسلم عليكي

[sendrella119]

فاضي مليان حاف ناشف

:o

خلاص مؤقتا امنع الفينو

وخليك في الباقي

وشوف النتيجة

وخليك علي الياسمين شاي

علشان بجد بيفقد الشهية

علي فكرة هو لونه اصفر بس طعمه لذيذ

وطبعا لاني بقرف من المشروبات الصفراء

بحط له ربع معلقة شاي احمر من بتاعنا

بجد جربه وحتشوف النتيجة

بس متنساش تدعي لسيندريلا بنت ام ....ريلا <_<

[khedr]

شاي ياسمين ده بيتباع عندنا في مصر

وفين الاماكن ....

.تقصدي الشاي الاخضر

دعوتي

يارب يارب يارب ياسندريللا 119 تبقي سندريللا 120

الا هو يعني ايه الرقم ده

واقبلي مني الهديه دي

[ATHENA]

الريااااااااااااااضة

[sendrella119]

ايوة موجود في كل حته

ممكن تلاقيه في اي فرع لفروع مترو ( التسوق طبعا)

او رويال هاوس اللي في ميدان روكسي

وهو نوع من انواع الشاي الاخضر

وباكتات ....زي ليبتون

وسعره مش غالي علي فكرة ....

يارب يارب يارب ياسندريللا 119 تبقي سندريللا 120

الا هو يعني ايه الرقم ده

حتعرف بعدين.....مفيش داعي نفتح قنابل دلوقتي :rolleyes:

خلي الطابق مستور

[khedr]

يعني الفكره انه الشاي الاخضر مش بتهم قوي الماركه

ماشي

اوقات شربه قبل الوجبات مش كده والا يه وقت محدد

شكرا علي معلوماتك وتواصلك

منتظرين مفاجأتك

[yasovinas]

انا مشكلتي في الجلوس لفترات طويله على المكتب او امام التي في او الكمبيوتر ودا مع السنين سبب الكرش الله يلعنه وياخده يارب

زمان كنت بلعب ايروبك وبمشي وبركب عجل وكمان واظبت مدة كبيرة على الغدا سلطه خضرا ولحم مشوي او اي حاجه بدون سمن وكانت عامله معايا شغل كويس قوي الحكاية دي

لكن مشكلة السفر كثير لمصر بيخرب اجدعها نظام اكل في الدنيا

عموما انا رجعت للبسكليته من اسبوعين ومنتظم فيها ساعه يوميا من 6 صباحا الى 7 قبل الذهاب للعمل

يمكن لسه ما حسيتش بفرق في الوزن لكن حسيت قوي في النشاط

[nancy]

فية شوية نصايح عامة للتخسيس

علشان تبقى رشيق يا خضر زى :rolleyes:

1- كوبين ماء معصور عليهم لمونة الصبح اول ما تصحه

2- لو تقدر (اعشاب المرمية والشاى الاخضر والنعناع واكليل الجبل والبابونج والجنزبيل ) وعلقة من كل دول على مغلى 3 اكواب ماء

دى بتعمل فايدة مزدوجة اولا بتسد الفنس وثانيا بتنزل الكرش والبطن عموما

3- البعد عن الابيض ( دقيق -سكر -ملح)

4-البعد عن الدهون

النظام اليومى

الصبح ماء مع لمون وبعديها بساعة كوب من الاعشاب بعديها بساعة الافطار

شاى بالدايت مع ربع رغيف فية اى حاجة بتحبها

والغداء سلطة اكبر كمية ممكنه ابله كوب ماء كبير وبعد السطه اى خضار وبعدية كوب اعشاب تانى

العشاء زبادى وشاى وفاكهه

اى جوع ماء او جزر او خيار او فاكهه

قبل النوم اخر كوب اعشاب

يعنى تعمل ترموس وتشربة على 3 مرات

الرياضة اهم حاجة المشى نص ساعة برة او على سير فى البيت( نص ساعة)

ولو تقدر تنط الحبل كمان هايل لانة بيحرك الدهون من اماكنها (ربع ساعة)

ولو تعرف تمارين البطن كمان هايل( ربع ساعة)

اهم حاجة كمان تعمل حافز لنفسك

يعنى متلبس هدوم واسعة ومتجبش هدوم اكبر من مقاسك علشان كل ما تتحشر فى الهدوم تفتكر انك تخنت

وكمان لو انت متغرب تفكر انة فية حد عزيز عليك حيتفاجىء لما يشوفك اتغيرت

انا ديما لما بزيد بافكر انى حاتزل مصر بعد شهر ونص ولازم انزل الزيادة

ولو تحبوا نعمل موضوع ونشجع بعض فية وكل واحد يقول هو عاوز ينزل اد اية ويعترف لو خرب الرجيم ونشجع بعض ونعمل شهر نظام ونشوف مين الى فاز فى انة ينزل اكتر

انا مستعدة لانى بعمل رجيم دلوقت لانى زى خضر مدمنة عيش وجبنة وشاى بلبن

اى نوع شغال معايا

فمنعة كل دة وماشية على النظام دة لانى عوزة انزل كام كيلو

[sendrella119]

خضر

يعني الفكره انه الشاي الاخضر مش بتهم قوي الماركه

اوكي لو لقيت شاي اخضر اوكي ماشي هو نوع من انواعه

علي فكرة يا ياسو

عموما انا رجعت للبسكليته من اسبوعين ومنتظم فيها ساعه يوميا من 6 صباحا الى 7 قبل الذهاب للعمل

دي بقة هايلة

علي فكرة الوزن لما بيخس في الاول بينزل بصعوبة

اول 2 كيلو دول بينزلوا بالعافية

انما بعد كده ....بتقدر تخس بسهولة

ايوة فعلا يا اثينا الرياضة مهمة

نانسي

انا مستعدة لانى بعمل رجيم دلوقت لانى زى خضر مدمنة عيش وجبنة وشاى بلبن

اى نوع شغال معايا

وانا كمان زيك غاوية اجبان بانواعها .......مع شاي بلبن مش عارفه ايه الحكايه :)

كوبين ماء معصور عليهم لمونة الصبح اول ما تصحه

نصيحة يانانسي

بلاش الموضوع ده لان اللمون ممكن علي الريق يعمل قرحة في المعده انا كنت بعمل كده زمان

وبطلت بس كنت بشربه علي ميه سخنه وبعدين عرفت ان ده ممكن يوسع المعدة.....يعني يوسع العمليه اكتر

المهم يا جماعة عايزة اقولكم علي تجربتي

الرياضة

كلنا بنكسل عليها

خصوصا لو قاعد علي الكنبة ومرتاح وبتفرج علي ..التي في ....

او مثلا لسه مخلصة شغل البيت

بكسل اقوم اعمل رياضة

عارفين انا عملت ايه؟

اخدت اهم 3 تمارين

للارداف وللبطن

وكل يوم بعد الصلاة طبيعي بكون قاعدة علي الارض اروح

عاملة كل تمرين 10 مرات ..........بس

تخيل بقي لو عملت كده شوف بعد شهر ممكن تخس اد ايه

جربوها

لان دي هي الفترة الوحيدة في اليوم اللي فيها بتقعد علي الارض

ومش غاوية صالات جيم ......

علي فكرة انا خسيت 10 كيلو في 3 شهور.....

كنت :rolleyes: 70

وبدون ما اقلل السكر

كل الللي قللته هو العيش.... .قللته خالص ....وكنت بعاني في مشكلة

ازاي تقاوم الاكل ....بس الحمد لله اتحلت

بس للاسف رجعت تاني بعد البيبي التاني :P

وحاليا انا ..بعمل رجيم تاني بنفس الطريقة

وفعلا خسيت 3 كيلو ....

حاجة تانية عايزة اقولها

في الاول حتلاقي الجسم شكله خس واتظبط

تيجي تتوزن تلاقيك ناقص 3 جرام .... :lol: بس

بلاش كل شوية تنط علي الميزان

علشان ده بيعمل احباط :huh:

لو لقت صور للتمرينات حا انزلهالكم

[Folana]

..قوللى وانا اكتب لك عن خبرة 70 سنة من عمرى فى انقاص الوزن

تحياتى ... :wub:

ياريت ياسيدتنا العزيزه شويه نصائح للعوده للوزن القريب من الطبيعي

ولي سؤال ..كيف يقوم الانسان بعمل رجيم وفي نفس الوقت يحتفظ بنشاطه

وكيف يقضي علي الشعور بالجوع

وكيف....

معلهش كترت مني الكيفيات

وكيف تكون حياته عاديه يأكل بدون ان يزيد الوزن

شكرالكي

وشكرا لسندريلاا علي الموضوع الرجيم

السلام عليكم ورحمة الله ....

اخى الفاضل ..اتأخرت فى الرد معلش ..بس هى مشكلة نتية بحتة ..بمعنى انى اواجهه صعوبة فى دخول النت ..وده بالاضافة لان بناتى بتتمحن ومافيش وقت ...لكن خلينى أرد على اسئلتك بسرعة قبل النت مايفصل عاشر ...:)

اولا لازم نتفق ان الرجيم الناجح لازم تسبقه ارادة قوية ...يعنى تقول انا عايزة افقد وزن ..وده مش حيكون عن طريق السحر ..ولكن بنظام غذائى معاه شوية مشى لمدة نص ساعة ....ايه رأيك لو اكتب لك رجيم مشبع جدا ...حاكتب لك اسبوع وجربه ..وبعد اسبوع اكتب لك الاسبوع اللى بعده ....

ولو مشيت صح على الرجيم ده ...لك فى ثامن يوم ..وجبة فرى ...بمعنى انك تفك الرجيم وتاكل كل اللى نفسك فيه فى الوجبة دى ...وبعدين تكمل ...اظن ده شىء مغرى جدا ....

فى الاول فيه شوية ملاحظات مهمة :

1- عند الاحساس بالجوع بين الوجبات ممكن تأكل خيار ..او ..خس بدون ورق ..او جرجير ...

2- تشرب على الاقل 3 لتر ماء فى اليوم لتحافظ على بشرتك ..بس ممنوع الشرب اثناء الاكل

3- ممكن استبدال خبز الرجيم بربع رغيف بلدى

4- تثبيت مواعيد الطعام

5- بعد الافطار ساعتين وبعد الغدا بساعتين تتناول فاكهة (برتقال - حبة كمثرى - حبة جوافة - قطعة موز صغيرة - ثلاث خوخات - 100 جم بطيخ - 100 جم فراولة ....9

6- المشى لمدة نص ساعة يوميا

7- ممنوع السكر تماما وممكن استبداله طبعا بالبدائل المعروفة وجميع المشروبات تكون بدون سكر

الاسبوع الاول

الافطار اليومى

1 خبز رجيم او 2 توست رجيم او نصف رغيف بلدى + 3 ملاعق فول بدون زيت او 2 ملعقة جبنة قريش + كوب لبن خالى الدسم او كوب زبادى او كوب عصير برتقال (او جريب فروت) او بيضة مسلوقة او ملعقة عسل

الغــــــذاء

قطعة لحم مشوى او مسلوق او صدر فرخة مشوى او مسلوق او 2 سمك مشوى او علبة تونة

8 ملاعق شوربة خضار (مسلوقة فى مية او شوربة لحم بتلو او شوربة فول نابت ) أو كوسة أو سبانخ أو فاصوليا أو ملوخية أو خرشوف أو باذنجان

+

4 ملاعق ارز مسلوق او 4 ملاعق مكرونة او 1 خبز رجيم او حبة بطاطس مشوية

+

8 ملاعق سلطة خضراء

العشـــــــــاء

كوب زبادى منزوع الوجه بالردة ..أو 2 حبة فاكهة او بيضة + توست رجيم ..أو 50 جم جبنة قريش + توست رجيم ..أو نصف علبة تونة + طبق سلطة خضرا أو طبق شوربة خضار

===============================================================

وطبعا للامانة ده رجيم كتبه دكتور هايل الحقيقة بس مش عارفة مسموح اكتب اسمه ولا لأ ...

ونخلى بالنا من علامة + ومن كلمة او ....

او طبعا للاختيارات و+ للاضافة ...

عايزة اقول كمان ..ان كل الاكل من غير زيت او سمن ....الارز ..طبعا فيه رز بنى ده بيكون جميل او ممكن رز عادى ومن غير دهون برضه

الملوخية ...طبعا الكل استغرب علشان التقلية لكن التقلية تتعمل برضه من غير دهون بتتحمص فى طاسة تيفال وتتطش عادى على الملوخية اللى هى اصلا على شوربة مش دسمة ...

والمرات الجاية حابقى اكتب لكم طريقة عمل الوصفة بس الرجيم ده مكتوب فيه كل البدائل فصعب انى اكتب كل الوصفات

وطبعا ملاحظ ان الوجبات مشبعة جدا ...يعنى ممكن الغدا ده ماتكونش بتاكله فى الايام العادية ...

جربه وقولى على النتيجة علشان اتشجع واكمل الاسابيع التانية ....

خضر ...بالنسبة للسؤالازاى نحافظ على النشاط ..احب اكتب معلومة سمعتها برضه من الدكتور اللى باتابع معاه .....اهم حاجة للتغلب على الشعور بالوهن والكسل والدوخة ..هى شرب الماء بكثرة ....لان اثناء تكسير الدهون بتنتج مادة اسمها الاستون وهى السبب فى الهزلان ده ..وعلاجها الوحيد هو شرب المياه بكثرة حتى نتخلص منها عن طريق الاخراج ...وده كلام الدكتور وانا جربته برضه

تحياتى ........... :huh:

[khedr]

أخوكم خضر الغلبان ...كان فين عن الموضوع ده نعسان

لعن الله السياسه والسياسيين والفساد والفاسديين

خلينا في الاكل والرجييييم

..............................................................

سندريللا

بارك الله فيكي علي النصائح الغاليه

نانسي

طول عمرك صاحبه واجب علينا نرده قريب يارب

ياسو طول عمرك ياسر قلبنا

فلانه عادت لنا مداخلاتك وايام زمان

وفينك ياعم بودي

وهو ياتري فين ...وفين مطبخكم اللذيذ

...............................................................

ها أحاول امشي علي رجيم سيادتك

ومعاه الرياضه المطلوبه

...........................................................

وفكره التمارين والواحد بيصلي فعلا جميله وجديده وسهله التنفيذ بس ربنا يبعد عننا العيال الشياطين

وكمان الماء الساخن مع الليمون هبطله.....لكن متهيأ لي خل التفاح هو اللي كان بيسسببب المشاكل

.........................................................

وشكرا علي موضوع التغلب علي الارهاق عزيزتنا الكريمه فلانه فعلا تفسير مقبول وهانفذه

ونبتدي علي بركه الله

سيري يانورماندي 2

اليكم جميعا

[sendrella119]

يخرب بيت ردودك يا خضر :)

:sad:

mfb:

طب يلا بقه قوم روش علينا رشة لمونادة كده ......

علشان نروق دمنا من السياسة

بص انا عايزة كوباية

مشبرة

وفيها 14 مكعب تلج

فولانه

ملاعق ارز مسلوق او 4 ملاعق مكرونة او 1 خبز رجيم او حبة بطاطس مشوية

بزمتك يا شيخة انتي بتاكلي

4 معالق رز ;)

ومسلوقين كماان :wub:

كريمة.!!!!!... :huh: .(وش جوز اخت سعاد حسني ) في فيلم صغيرة علي الحب

[khedr]

ياسلام غالي والطلب رخيص

ليمون وغلاوتك مخصوص

ودول كبايتين شاي اخضر لزوم .....

التصبيره لحد ما

نخلص التومه

ونغرف لك من الحله

وزي بعضه اختنا الكريمه فلانه نبتدي الرجيم من اليوم التامن( اليوم الفري)

يخرب بيت ردودك يا خضر :)

:angry2:

:blush:

سندريللا 119

انا ماعنديش بيت

انا قاعد بيت ابويا

[Folana]

السلام عليكم ورحمة الله .....

الاخت الحبيبة سندريلا.....طب وحياة رحمة الخواجة ينَى اللى مااحلف به باااااطل ابداااااااااااااا....انا باكل 4 ملاعق رز وكمان مسلوقة ...بس مادام حلفتينى بزمتى ...يبقى انا باغرف اربع ملاعق ..وربنا بيبارك..وبيطلعوا فى الاكل تمانية -_- ..

خلى بالك الارز مش بيكون مسلوق فى شوربة يعنى ...انت بتفلفليه عادى جدا بس من غير ماتضيفى اى دهون لا زيت ولا سمن ...وبيكون جميل صدقينى ..خصوصا لو استعملتى الارز البنى وده بيتباع فى السوبر ماركت عادى ..وانا شايفة انك من زوار سوبر ماركت مترو يعنى ممكن تجيبيه من هناك

الاخ الكريم خضر ....تصدق ان انا بقالى تلاتة اشهر فى اليوم التامن ده ... :o

لا بجد ..الرجيم ده مشبع جدا بتلاقى الطبق مليان اكل وبتشبع صدقونى .....جربوه بس ومش حتندموا ..ويالا بقى علشان اكتب لكم الباقى ....انا اتحمست لما لاقيتكم كلكم عايزين تعملوا رجيم وادينى كتبت اهو وماحدش عايز ينفعنى .... :blush:

الحقيقة ياخضر انا برضه مستغربة باب بودا مش شغال ليه لكن الحقيقة ماعنديش معلومات كافية ...بس ولا يهمك احنا كلنا موجودين هنا اهو وفى الخدمة .......