وزنك بيزيد عليكي وعلي..........

[Folana]

السلام عليكم ورحمة الله .........

سامحونى ياجماعة والله على التأخير ..بس كنت فى رحلة قصيرة كده الى جمهورية شرم الشيخ ..قلت الحق اصيف قبل نتيجةالعيال و وقوع المحظور..وكمان قلت اشوف الدنيا فيها ايه ...ياه ه ه ..ده طلع فيها حاجات كتير قوىىىىىى...اما الدنيا دى مليانة تناقضات غريبة جدا ..او نقول مصر بوجه الخصوص ..وعلى رأى الشاعر اللى انا مش عارفة اسمه ...ناس هايصة وناس لايصة ....الا بمناسبة الشعراء ..فين حسن شاعر الرومانسية ياترى بيدخل ولا مختفى ؟

نرجع لموضوعنا....خضر ...لازم تجرب الملوخية على فكرة علشان تعرف انها بتكون جميلة ..انا كنت زيك كده برضه ..اقول ايه ده تقلية من غير سمن وهل يعقل ذالوكا.....طبعا لأ.....بس لما جربتها لاقيتها جميلة ادخل بقلب جامد ولا يهمك ....

اليوم الفرى ده ممكن تأكل اللى انت عايزاه بس بكميات مناسبة ..لان الهدف الاساسى من الرجين انك تروض معدتك على الاكتفاء بكمية قليلة من الاكل ( وده مش حيحصل اسالنى انااااااا مدوباهم عشر سنين رجيم ..والمعدة كما عهدتها دائما ..رافعة شعار "هل من مزيد"....)

بالمناسبة انت مسموح لك تاكل بطيخ عادى ...يعنى شقة بطيخ كده ..هم بيقولوا 100 جرام ......بس باتبع مذهب ثمرة فاكهة وباعتبر البطيخة ثمرة :rolleyes: ...انت مصرح لك تاكل فاكهة مرتين فى اليوم بعد الاكل بساعتين ..ممكن تمشيها بطيخ ....

الله....نفسى اكل ثمرة بطيخ جدا دلوقت ..

سندريلا.....يابنتى والله انا ضعيفة جدا قدام المانجة كمان ...وانا بقى باكلها رحمة ونور من غير ماادفع فيها لا دولار ولا يورو...وكل الانواع بقى متوفرة ....بس برضه شليها لليوم الفرى

انا باشرب الشاى الاخضر على طول ...مش هو ده اللى تقصديه؟...بس اللى عندى ليبتون مش الياسمين

الحق اكتب لكم بقى الاسبوع الثالث قبل الجاز مايخلص من الكمبيوتر ويشحر.....

..الاسبوع الثالـــــــــــــــث...................(مش عارفة افتكرت فيلم امير الدهاء ليه وانا باكتب الثالث :wub: )

الافطـــــــــــــار:

1 خبز رجيم +بيضة مسلوقة +حبة طماطم

اليوم الاول .............

الغداء:

7 ملاعق فاصوليا خضراء نى فى نى + طبق سلطة + صدر فرخة بدون جلد

العشاء:..

50 جم جبن قريش مع العشاء وخس

اليوم الثانى ................

الغداء:....طبق ملوخية او سبانخ (والتقلية فى طاسة تيفال بدون زيت او سمن )+ ربع ارنب او ربع فرخة + طبق سلطة

العشاء...

نصف علبة تونة مصفاة من الزيت ومغسولة بالماء والخل او فيه تونة فى ماء مش زيت + خس وبصل

اليوم الثالث.....

الغداء :...

3 ملاعق مكرونة مسلوقة او مطهية فى عصير طماطم مركز مع الثوم ( يعنى نسبك عصير الطماطم على النار من غير زيت او سمن ونضيف لها توم مفروم ) + 3 قطع لحم مشوية + طبق سلطة

العشاء:...

2 حبة فاكهة ماعدا الممنوع

اليوم الرابع ....

الغداء ..

طبق كوسة نى فى نى + ربع دجاجة + طبق سلاطة

العشاء :...

كوب لبن خالى الدسم + سلطة

اليوم الخامس ......

الغداء.....2 شريحة بفتيك مع المشروم وشرائح البصل + 4 ملاعق مكرونة مسلوقة ومضاف لها ماعقة زبادى وريحان مفروم + طبق سلطة

العشاء:.....

50 جم جبنة قريش ( يعنى ملعقتين كده ولا حاجة ماتوزنوش يعنى ...كبروا )+ خيار

اليوم السادس :....

الغداء:...2 شريحة سمك فيلية مطهى فى الفرن مع كوسة وفاصوليا وبصل وطماطم + سلطة

بالنسبة للطبق ده ..ممكن تشوى السمك وتعمل خضار سوتية ...او تعمله طاجن بالخضروات بس راعى ان السمك بيستوى بسرعى يعنى سوى الخضار نص سوى الاول وبعدين ضيف السمك ...اللى عايز طريقة حاجة يقولى ياجماعة بس انا مش عايزة اتوهكم معايا فى الوصفات

العشاء:....

كوب لبن خالى الدسم + سلطة

اليوم السابع :....

الغداء:...

100 جم كفتة مشوية (يعنى سيخ كفتة بس اللحمة تكون حمرا طبعا ومش ضانى ) + طبق سلطة

العشاء :....

بيضة مسلوقة + سلطة

فســــــــــــــــــــــــــــــــــــــــــــــــــــــــــــــــــــــحة (شاملة الجبنة البيضا والعيش والمانجة وكلــــــــــــــــــــه)

ملحوظة: انا نسيت اقول ان ممكن بدل العيش السن ناخد ربع رغيف بلدى

ونلتقى بعد الفاصل

[مريوم المصرية]

لا فعلا تقليه الملوخيه كانت هتدخلني قي قائمه الارهابييين

عندما سمعوا مني ان فيه ملوخيه من غير تقليه بالسمنه او الزيت

معلش يا عمو خضر .حتى أنا لما قلت مره إننا مش بنطبخ بأي دسم غير زيت الزيتون

كانو هيبلغوالFBI ومجلس الأمن

بس الصراحة زيت الزيتون ساعدني جدا

كنت 65 كيلو.

الحمد لله بقيت53

نصيحة يا جماعة(زيت الزتوووون)طبعا الى جانب كل الكلام اللي قلتوه قبل كده

مع تمنياتي للجميع بدوام الصحة والعافية :rolleyes:

تم تعديل 22 يونيو 2006 بواسطة مريوم المصرية

[khedr]

وعدنا

..............................

الوضع في الوقت الحالي مضبوط

والاحساس بالنتيجه رائع.

............................

هو الواحد تقريبا اتعود علي نظام مريح في الاكل

وهي دي النقطه الهامه في تطبيق الرجيم

ان تعود الي العادات السليمه في تناول الطعام

ولا تجري وراء انفك ولا وراء معدتك

.............................

الاحساس بالتغيير في متطلبات الواحد الغذائيه اصبح اقل

فترات البعد عن المطبخ زادت وطال الجفاء والبعد

وشرب السوائل والمياه اصبحا ضرورتين زلم تفيدنا الكريمه المحترمه فلانه في ذلك الموضوع

..............................

وياريت لا تنسانا في موضوع السوائل المسموح والغير مسموح

.............................

سندريللا .....انا صابر صبري عبد الصبور في كل حياتي

ومن ناحيه الشاي الاخضر انا با استعمله وفيه نتيجه مش وحشه

بس باحط عليه نعناع اخضر علشان الطعم يكون مقبول بسكر قليل

..........................

مريوم المصريه

معلهش....احب اسم مريم وكل مشتقاته بطريقه عدوانيه..!!!!!!!

فلا تبخلي علينا بمداخلاتك معنا المستمره هنا وهناك

وعمو خضر بيقول لك ايه 65 دول يادوب رجل الواد ميدو الصغنن

يامييييييييييييييييييييييييييييييييييييدو

كلم مريوم

تم تعديل 23 يونيو 2006 بواسطة khedr

[مريوم المصرية]

ممكن أسأل سؤال غبي mfb:

هو مين الواد ميدو الصغنن؟؟؟؟؟؟؟؟؟ :)

[khedr]

ما فيش نِفس اليومين دول

[badroora]

بجد باشكرك يا مدام فلانه انك عرفتينى عالموضوع دا

بس سؤال اخر مشاركة هنا كانت شهر 7 2006

وبعد كدا الناس بطلت تكتب

هل الناس خست ووصلت للوزن المثالى

ولا زهقوا واحبطوا

انا عجبتنى اوى فكرة نانسي اننا نشجع بعض ونتابع مع بعض ونشوف كل واحد خسر كام

والخاسر الاكبر نديلوه جايزة

لو حد عاوز يخص او الناس لسه موجودين يا ريت يدخلوا تانى وننفذ العملية

فى انتظار المتسابقين

[white rose]

ربنا يوفقك يا طنت نجفة وكل اللي عاوزين يخسو :)

[عبده بيه]

العنوان مغري جدا برافوا عليكي وبرافوا لزوجك الليعرف يلاقي الحل

اما الشاي يا ستي لا ياسمين وام ياسمين نافع مشنافع غير السمين

تحياتي

[Folana]

السلام عليكم ورحمة الله.......

تصورى يا نجفة انا عمالة اقرأ الموضوع ومش واخدة بالى خالص انه الموضوع اياه....:unsure:...كنت سرحانة فى المجموعة الرائعة المتواجدة فى الموضوع...قد كده كنا بنحب بعض ...وبنتعامل بمودة واخوة فعلا...من غير تلاكيك ولا مكائد ولا حاجة خالص.....

خضر ونانسى وسندريلا

ومريوم وطفشان وكمان فولانة...(ايام كنت تادرس).وامرؤ المزهوراتى وياسو وزعلان ووليد.....وغيرهم كتير كتير....ياه ه ه ربنا يبارك فيهم جميعا يارب ...تعرفى يا نجفة انا بحب فيك روحك الجميلة بتفكرينى بشبابى ...وعلشان كده انا حاساعدك انك تبدأى الدايت...وحابدأ معاك كمان ....موافقون؟؟؟موافقة...

ارجع بقى لمداخلتك...بعد رحلتى عبر الزمان ...

ياستى لا شكر على واجب....ما احنا لازم نساعد بعض كلنا فى الرجيم عباسية......انت كده حتخلينى اكتب الاسبوع الرابع واللى اكتشفت فعلا انه ناقص من السنة اللى فاتت...بس بمناسبة مرور الذكرى السنوية على الموضوع يبقى نكمل الاسبوع اللى ناقص...بس على وعد منك انك تبدأى ولما تقولى لى الاسبوع الاول خلص نبدأ نكمل....وانا معاك خصوصا فى اليوم الفرى... :)

وبخصوص الخمسة دولار اللى جوست حيتبرع بها للجرام الواحد...انا اتمنى انه يبقى باليورو احسن...لانى محتاجة لهم اليومين الجايين دول...:lol: مش انت ناوية تدينى اتعابى برضه؟...

حنقول بسم الله ونبدأ..فى انتظارك....

[نبض الابداع]

وسع يا جدع نبض الابداع وصلت

قلي اي اكله انت بتحبها وانا اخليهالك رجيم والله وبتطلع حلوة

[Folana]

وسع يا جدع نبض الابداع وصلت

قلي اي اكله انت بتحبها وانا اخليهالك رجيم والله وبتطلع حلوة

السلام عليكم ورحمة الله....

نبض الابداع...وحشانا .....ربنا يطمن قلبك ياررررب..اى اكلة اى اكلة ممكن تبقى رجيم.....ياسبحان الله md2:

طب أنا باحب المسقعة جدا...ممكن تحوليها رجيم؟....ده انا ادعى لك ليلا نهارا...

هه يالا بقى فى انتظار الوصفة بتاعتك...... :wub:

وتسلم ايديك مقدما.....

[badroora]

ربنا يوفقك يا طنت نجفة وكل اللي عاوزين يخسو :wub:

وانتى كمان يا عيون الطنت md2:

[badroora]

المدام الشابة الجميلة مدام فلانة

شوفتى بقي ماشاء الله شايفة الناس بدات تدخل الموضوع والله يسهل

بخصوص اليورو هو بس اخونا غوص يشخشخ جيبة وانا من عيونى هاحلولهم ليوروا وهاقسم معاكي

انا بافكر ابدا من اول شهر 7 عشان عندي امتحان يوم 28 ومش عاوزة ابدا ريجيم قبلها لاتنح وانا اجازة الايام دي وبحاول ابعد عن الكربوهيدرات على قد ماقدر وبدات استخدم العجلة بتاعى 10 دقايق وانام بعدها ساعة عشان وجع الركب بس ان شاء الله ربنا يسهل بعد امتحانى ما يخلص

هاقولك وهنبدا واتمنى يكون اخوانا السمناء يشاركونا ونبدا مع بعض

وانتى بقي حاولى تشوفلينا رجيم بعيد عن اللحوم والبيض وربنا يسهل

md2: وخلينا متابعين لحد ماول 7 يجي تحياتى على تشجيعك لنا

[لخبطه]

الموضوع كبير بس انا قريت الاجزاء الاخيرة منه بس

هو العنوان مر علي كتير بس كنت بحسب أنه قاصر على أخواتنا فقط لكن طلع للكل

انا كان وزني زيادة أوي يعني 12 كيلو فوق المعدل الطبيعبي وكمان كرش مش كبير أوي :(

بدأت من 18 يوم بس ( وادعوا لى ربنا يعطيني العزم و اقدر استمر )

عملت التالي :-

الاكل نزلته للنصف ( مع الوضع في الاعتبار أني أكيل ) بس باكل كل الاصناف وكل الحاجات

يوميا مرتين تمارين بطن ( الظهر وبالليل ) بعد تقريبا 20 في كل تمرين

جري أو سباحة بشكل يومي لمدة نصف ساعه

السكر وقفته تقريبا يعني في الشاي خفيف وحتى العصاير الطبيعية بدون سكر وكل العصائر المعلبة والغاازيات ( الببسيات وما شاكلها ) وقفتها

طبعا أنا عارف أنه برنامج عبيط لكن انا اللى حطيته لنفسي بدون الرجوع للبرامج أو حتى طبيبة أو حتى النت

الغريبه أنه جاب معاي نتايج مذهله في الوقت البسيط دا

نزلت 5 كيلو وزن

والكرش نزل منه 40 % على الاقل

اللياقة بتاعتي زادت بشكل ملحوظ

السؤال على البرنامج دا معقول استمر عليه وهل النتايج دي في ميزان الناس اللى فاهمه تعتبر مرضية ؟؟

[badroora]

الموضوع كبير بس انا قريت الاجزاء الاخيرة منه بس

هو العنوان مر علي كتير بس كنت بحسب أنه قاصر على أخواتنا فقط لكن طلع للكل

انا كان وزني زيادة أوي يعني 12 كيلو فوق المعدل الطبيعبي وكمان كرش مش كبير أوي :(

بدأت من 18 يوم بس ( وادعوا لى ربنا يعطيني العزم و اقدر استمر )

عملت التالي :-

الاكل نزلته للنصف ( مع الوضع في الاعتبار أني أكيل ) بس باكل كل الاصناف وكل الحاجات

يوميا مرتين تمارين بطن ( الظهر وبالليل ) بعد تقريبا 20 في كل تمرين

جري أو سباحة بشكل يومي لمدة نصف ساعه

السكر وقفته تقريبا يعني في الشاي خفيف وحتى العصاير الطبيعية بدون سكر وكل العصائر المعلبة والغاازيات ( الببسيات وما شاكلها ) وقفتها

طبعا أنا عارف أنه برنامج عبيط لكن انا اللى حطيته لنفسي بدون الرجوع للبرامج أو حتى طبيبة أو حتى النت

الغريبه أنه جاب معاي نتايج مذهله في الوقت البسيط دا

نزلت 5 كيلو وزن

والكرش نزل منه 40 % على الاقل

اللياقة بتاعتي زادت بشكل ملحوظ

السؤال على البرنامج دا معقول استمر عليه وهل النتايج دي في ميزان الناس اللى فاهمه تعتبر مرضية ؟؟

استاذ لخبطة اهلا بك فى الكلاب العام للتخسيس

لا والله برافوا عليك استمر وانا هيدا اول يوليوا ان شاء الله

واتمنى لك بكرش زايل وصحة جيدة ووزن نازل باذن الله

md2: انا بشجعك اهوا عشان تبقي تشجعنى

ماشي

اختك فى الكلاب

نجفة :wub:

طلب بقي من مدام فلانه وبعد اذن اختنا الفاضلة كاتبة الموضوع

لو تضيف كلمتين فى عنوان الموضوع جنب وزنك بيزيد عليكي وعلى ,,,,

ممكن نغيرة لعنوان واضح حتى ينجذب الجميع ونعرف بقي مين التخين ومين اللى مش

دا اقتراح يعنى لو وافقتم علية ولو لا العنوان دا بردة مش بطال بس بيلخبط شوبة

تم تعديل 23 يونيو 2007 بواسطة نجفة المغرورة

[بنت الشاطئ1]

يا ريت يا اعزائى تقولولى وصفة للى عايز يتخن

بس يا ريت من غير الدهون لأنها مش جيده للصحة

انا عارفة انه سؤال عكسى للموضوع لكن انا واثقة انى سأجد الجواب فى هذا الموضوع :lol:

ا

[Folana]

السلام عليكم ورحمة الله...

نجفة كتبت:

المدام الشابة الجميلة مدام فلانة

:sad: :blush2:

اسمحى لى اطبع القول المأثور ده واعلقه على باب حجرتى فى دار المسنين ؟

يارب تخسى يانجفة 30 كيلو كمان مش عشرين بس. ..ياترى اخبار الامتحان ايه...عايزينك تطمنينا وترفعى راسنا..ان شاء الله تكون الامور كلها جميلة....

وانا فى انتظارك فى اول يوليو نبدأ الرجيم سوا..انا دلوقت بأكل بالطاقة القصوى على اساس انى حابدأ معاك اوعى تخلى بىّ بقى....بخصوص تغيير العنوان...اقترحوا اسم ونغيره..انا مش عارفة افكر فى اسم مناسب...ماعنديش غير مثلا " وصفات ذكية لفقدان الشهية "...أو ..." المرجع النفيس فى أصول التخسيس"...ايه بقى هه...ايه...قولتى ايه؟.... :lol:

اهم حاجة يا نجوف انك ماتفكريش انك بتعملى رجيم وحتبدأى فترة حرمان......فكرى بس فى انك حتغيرى نظام الاكل بتاعك وحتبدأى سلوكيات جديدة فى تناول الطعام..وكل ما الشيطان يوسوس لك انك تاكلى قولى لنفسك ما انا اكلت كتير قبل كده وكله متخزن فى جسمى..احرق منه شوية بقى...

وكمان مايكونش هدفك انك تخسى بس...خلى الهدف انك تحافظى على مظهرك وتبدأى عهد جديد مع نوعيات الاكل .....يعنى هدف دائم لا ينتهى بمجرد انك تخسرى الكيلوجرامات الغير مرغوب فيها...

المشى مهم جدا ومفيد جدا وبيأتى بنتائج هايلة...اكتر من العجلة خصوصا لو ركبتك بتؤلمك ....

اوزنى نفسك اول ما تبدأى الرجيم واستنى لما تخلصى اسبوعين كده واوزنى نفسك تانى على نفس الميزان ..لان بيكون هناك فروقات فى الموازين ممكن تحبطك...

نلتقى فى اول يوليو الدامى.........ربنا معاناااااااااااااا:)

أخى الفاضل لخبطة...ماشاء الله ولا قوة الا بالله...هايل طبعا....برافو عليك....استمر....وقولنا على النتائج باستمرار ..علشان الناس تتشجع...

طبعا برنامج هايل...طالما فيه نتيجة مرضية...ماهو مافيش برنامج ثابت لازم نتبعه...انا دايما باقول ان الوصول الى نتيجة مرضية لشخص بعينه تعتبر نجاح مبهر..حتى لو اختلفت مقاييس النجاح من شخص لاخر..المهم انك حققت نجاح فعلا فى اتباع النظام الغذائى اللى وضعته لنفسك....وده انجاز عظيم.....

اختى الحبيبة بنت الشاطى 1 ...... :) md2: fty::

عايزة وصفة علشان تتخنى؟؟.....هنا.؟؟؟؟فى هذا الموضوع القاسى الشائك؟؟؟ انت مش واخدة بالك انك بتجرحى الناس فى موشعيرهم ...جرح عميك عمك التاريخ ...

اقولك ايه الله يسامح..

ولكن لانك عزيزة علينا...فانا اقولك كلى كل حاجة متحرمة على راغبى الرشاقة والنحافة...كل ارز مكرونة شيكولاتة ..حلاوة..جاتوه..كلى كل اللى تحبيه..بس ماتحكيش لنا انت اكلتى ايه ...الرحمة مطلوبة وراعينا قيراط وكدهوت يعنى...

كان معكم من مركز المحاورات لمكافحة السمنة وتهريب الحلويات

نينة الحاجة

فولانة... :vian:

[badroora]

استعنى عالشقي بالله

العزيزة الغالية مادم فلانه زملائي الاعزاء فى الكلاب الصحي للتخسيس بادارة مدام فلانه الجميلة

اعلن من موقعى هذا والله شاهد على ما اقول اننى قد بدات رجيم اليوم واتمنى من الله الثباااااااااااااات وادعو لى بالنحافة ان شاء الله mfb:

بخصوص اسم الموضوع كل الاسامى الللى اخترتيها حلوة ولكن نظرا لعدم ظهور اختنا الفاضلة كاتبة الموضوع سندريلا 119 يبقي مش هنقدر نغير الا لما هى توافق عشان مش تزعل مننا

رسالة حقد الى اختى العزيزة بنت الشاطيء

الرحمة حلوة ويا رب ينقص وزننا ويضبف عندك ونلاقيكى هنا فى الكلاب بتسالنا عن وصفات للتخسيس :sad: mfb:

وساعتها بقي هنساعدك بردة

:blink: انا باهزر طبعا

اقرى النصايح اللى كتباها مدام فلانه للتخسيس واعملى عكسها

وانا بردة عشان انتى اخت عزيزة هساعدك

عليكي بقي وعالاكل عالفاضي والملايان اى حاجة تقابلة او توقع فى ايديك اوعى تفوتيها

اكل بين الوجبات ايس كريم سفي سكر

مسليات

عيشيي حياتك ويا ريت بقي اكل ونوم اكل ونوم اياكى والمشي ولو حتى داخل الغرفة

:blink: تمنياتى لك بالتخمة ان اشاء الله mfb:

نرجع بقي لموضوعنا

اوعى حد من اللى عاوز يخس ينفذ النصايح اللى افدنا بها اختنا الغالية اللى خايفين على مصلحتها بنت الشاطيء

ترى هى ظروفها غيرنا وكمان دى داخلة على فرح اختها يعنى حلوبات وعزايم يلا مالناش دعوة

انا بس حبيت اخبركم انى بدات الريجيم

وادعولى بالثبات

مدام فولانه اوعى تكون مش بداتى

يلا بقي سلام عشان ميعاد الجيم :lol:

[لخبطه]

بردو ياسيدة / نجفة أنا مازلت على ما أنا عليه مافيش رجيم بس فيه نظام في الاكل وترتيب والابتعاد على التخبيط

وبردو النتايج حلوه بنزل والكرش خلاص تقريبا انتهى باقي له شىء بسيط

اللى انا عايز افرحكم بيه أنى ثابت خلال شهر كامل تقريبا ودا وقت حلو واللى مشجعني أكتر انى مش عامل رجيم قاسي ينزهق منه عامل حاجه كدا خفيفه بس بفضل الله نتايجها حلوه

[badroora]

موزموزيل نجفة لو سمحت :rolleyes:

لا والله برافوا عليك وكمان عليك وعلى تمرينات البطن لان الكرش عبارة عن ضعف فى عضلات البطن وارتخائها

مع تنظيم الاكل وشوية تمارين للبطن هتبقي تمام ان شاء الله

ادعيلي بقي اثبت ولو ان الاعداء حو اليا بلايس كريم وانا عمالة اقنع نفسي اجيب ايس كريم دايت او ازود الرياضة شوبة بعد الايس كريم wst::

انا متابعة وبشجعك

والله معك