قومي يا مصر وأفرحي ... تامر خد براءة

[se_ Elsyed]

ما شاهدته أمس الأول في جلسة محاكمة المطرب العملاق تامر حُسني هو مهزلة بكل المقاييس

مهزلة قضائية وقانونية

مهزلة أخلاقية

مهزلة إعلامية

-----

مهزلة قانونية .. لما يجيبوا واحد وكيل نيابة بيقرأ من ورقة ومش عارف يقول كلمتين على بعضهم وكلامه مليء بالأخطاء الإملائية وكإنه طفل في إبتدائي يتهته ويريل ..

ولا طاقم الدفاع عن المجرم الذي ركز على إن المتهم لم يكن يعلم بإن تلك الشهادات مزورة .. وكإن الشهادات دي أصبحت الآن مثل علب السلمون ممكن تشتريها من البقالة .. وبالتالي فأنت مُعرض للغش وممكن واحد يديك شهادة مضروبة ....

مهزلة قضائية .. لما تشوف القاضي إمبارح ماسك في إيده الشهادة الجامعية وشهادة الخدمة العسكرية المزورتين والذي إستخدمهما المجرم لتحقيق أغراض ومصالح خاصة .. ومع ذلك يديله براءه ويقوله " حرصاً على مستقبلك الفني "

مهزلة أخلاقية .. لكمية الشباب ( صبيان وبنات ورجالة وستات متجوزين ) اللي رايحين يدافعوا عنه وكإنه بطل من أبطال حرب التحرير .. وخالعين هدومهم عشان يغطوا القفص اللي محبوس فيه عشان ماحدش يصوره وهما حالقين له أقرع وفي الحبس ... ولابسين فانلات مكتوب عليها بنحبك يا تامر ... ولا الست الناقصة اللي ما تربتش في بيت أهلها اللي تقدمت للمحكمة بطلب خُلع لكي تتفرغ لمتابعة قضية توت وتلبس إسود عليه وعلى أيامها السودا .... ولا الصويت والصراخ لما إتنطق الحكم وأخد براءة ..... ومهزلة أخلاقية أيضاً عندما يرى الشباب الجاد الذي ينحت في الصخر تلك المهازل وبالتالي يشك في نفسه وبإنه هو اللي على خطأ وإن دول هما اللي صح وبالتالي يكفر بكل القيم والمباديء التي تربى عليها .. لإن الهرم إتقلب واللي فوق بقى تحت واللي تحت طلع فوق ...

مهزلة إعلامية .. لهذا الإهتمام الضخم بشاب مجرم متهرب من خدمة الوطن .. ومُزور لشهادة جامعية بالرغم من إنه فاشل وتلاقي معاه إعدادية ... وهو أساساً شخص غير نافع للمجتمع .. فما فائدة الرقص والغناء وهز البطون وفتح الصدر عشان الناس تشوف إن عنده شعر في صدره ؟

ولا كمية البوسترات الموضوعه له في شوارع مصر ومكتوب عليها " وحشتنا "

وكإنه بطل سياسي مُعتقل من أجل قضية وهدف وطني ....

إخص على كده ..

وإخص على الأحوال اللي وصلنا لها واللي عملناها بإيدنا ...

ونرجع نقول مشاكل إقتصادية وسياسية وأخلاقية

وطبعاً هايخرج المترب العاتفي من السجن وهو محمولاً على الأعناق ويُكرم تكريم الأبطال بدلاً من أن تُداس صورة بالنعال ويصبح منبوذاً مثل من سبقوه من الذين يعتبرهم البعض نجوم وهم شواذ ومرجمين وكثيراً منهم دخل السجن في قضايا مُختلفة من أول الدعارة إلى النصب والإحتيال والتزوير ومع ذلك هم الآن نجوم الصفحات الأولى وأوسمة على صدر المجتمع ...

لا أدرى أين رجال الدين المسئولين عن أخلاقيات المجتمع واللي هما بمثابة الترمومتر لنا

وأين رجال علم الإجتماع وعلم النفس من تلك الظواهر الشاذة التي تهدم المجتمع من أسفلة إلى أعلاه ؟

-----

وعلى فكرة كان في نفس اليوم اللي هو الخميس .. كان القضاة يداسون بأحذية رجال الأمن وهم يقفون في وجوه تلك الآلاف المحتشدة من جنود التتار والتي لا تعرف الرحمة ولا الهوادة .. بالرغم من رؤيتهم لزملاء لهم يموتون عندما أنقلب لوري مُحمل بعساكر وظباط أمن مركزي من فوق كوبري 6 أكتوبر وراح ضحيته ظابط برتبة رائد و6 عساكر وهم في طريهم إلى دار القضاء العالي لتأديب القضاة والمتظاهرين الشرفاء الذين يصنعون حرية البلد بأيديهم ....

----

وفي نفس الوقت أيضاً وبالمصادفة إتحكم على الملاكم العالمي وبطل العالم البريطاني " نسيم حميد " وهو من أصل يمني ب 15 شهر سجن لقيادته السيارة بشكل متهور وإصطدامه بسيارة أخرى وإصابة قائدها مما يعني ضياع مستقبلة .. ولكن في أوروبا والدول المتقدمة القانون قانون وفوق الجميع - غالباً -

مش زي عندنا إذا سرق الصغير الضعيف نقلع اللي في رجلنا ونضربه به ...

أما الكبير فإذا سرق ونهب .. فإنه أفعاله هذه هي صفحات من نور في سجل الشرف ...

----------

أخيراً أود أن أقول للمترب العاتفي أبو شعر في صدره

كل مره بأشوفك فيها ... بأبقى نفسي أ أ أ

بس ريقي بيبقى ناشف

[مصرية الهوى]

أ ايه يا عم ..

استنى بس ..

اجيلك اقولك انك كلك على بعضك عندي بالحياة ..

طب أ ..

:lol:

بالراحة على نفسك يا سي السيد .. احسن تروح فيها يا اخويا ...

عارف يعني ايه زمان انقلبت فيه المقاييس ؟؟!!

تامر حسني ... بتاع الرقص والغنا وطب أ والكلام الفارغ هو البطل الهمام .. القدوة لكل الشباب والبنات ..

اللي هيفتح لنا كليات وجامعات ومراكز ابحاث ويحرر القدس ان شاء الله ..

وفاكرين الشاب مجدي النشار العبقري الكيميائي اللي بيدرس في بريطانيا - فعلا الشاب ده انا اتأثرت بيه جدا - واتهموه مرة بضلوعه في احد التفجيرات ..

ده بقى ارهابي .. مخرب .. ومش عارفه ايه !!

طيب نيجي للبوسترات .. عمرك شفت بنت والا شاب حاطين في غرفهم صور زويل مثلا .. والا ان شاء الله جيفارا والا غاندي .. او اي انسان مخلص وشريف وعمل حاجه مفيدة لبلده ..

دي متبقاش اوضه ان ماحط فيها تامر حسني والا شاكيرا والا اي حد من الناس اللي بيعتبروا صفوة المجتمع للاسف واللي المفروض يبقوا تحت ..

اه بس

[ابن بلد]

على راى المثل

هم يبكى وهم يضحك

رغم انى مش شايف الايام دى اى حاجه تضحك

فطست على نفسى من الضحك عندما رايت مظاهرات

بالسيارات من اجل تامر حسنى فى احد المناطق الراقيه فى القاهره

وفى نفس اللحظه

حزنت جدا ان حالنا وصل لكده

لانى كنت راجع من وسط البلد وشاهدت

تهجم الامن على النعتصمين بجوار نادى القضاه

لكن الامل ان شاء الله فى المحكمه العسكريه

بخصوص شهاده التجنيد

ولو اخد براءه برضه

يبقى ................

وياعينى عليكى يا مصر وعلى شبابك

[khedr]

والله ما عارف اكتب ولا اقول كلمه

حسبنا الله ونعم الوكيل

[أسد]

لأ .. والخيبة القوية ..

الننوس بيقول .. بعد ما أطلع من السجن .. حاسافر أمريكا .. ومش قاعد في مصر ..

أمريكا إيه .. ده صايع ومايعرفش يعمل حاجة غير إنه يغني الكلام إللي بيعمله وبيضحك على الشباب الفاضي إللي عندنا ..

حيعمل إيه في أمريكا الصايع ده ..

وبعدين ..

المركب إللي تودي ..

البلد مليانه صيع وحرامية ومزورين .. وبركة إنهم حينقصوا واحد ..

حاجة تحرق الدم ..

[se_ Elsyed]

بالمناسبة الظواهر دي مش جديدة

فلقد شاهدنا زمان من يركع لأم كلثوم .. أو يستميت لكي يُقبل حذاءها اللميع وهي تُغني

أو الشباب اللي إنتحروا يوم وفاة عبد الحليم وهم ، الآن بالتأكيد هم ينعمون في جهنهم وبئس القرار

ولكن إذا أستمرت هذه الظواهر وأخذت أشكال متعددة من الشذوذ والخروج عن المألوف .. فهل نسكت على ذلك ؟

وإذا سكتنا .. فماذا نقول لأبناءنا ونحن نتعامل معهم وكأننا نُمسك الجمر بأيدينا ونحاول أن نُخرجهم شباب صالحين للمجتمع .. ثم فجأة تأتي مثل هذه الأفعال لكي تهدم في لحظات ما نحاول أن نبنيه في سنوات ؟

كان لي موضوع قبل كده بعنوان " هل نحن فعلاً شعوبٌ جادة "

طبعاً أنا عارف الإجابة بس بأستهبل ...

نحن أبعد ما نكون عن الجدية ...

ونستحق فعلاً المكانة التي نحن فيها .. وإننا نبقى عبرة وفُرجة للعالم

-----

أيوه العالم الغربي فيه هوس يمكن أكثر من ذلك ...

لكن

وقت الجد بتلاقيهم رجالة .. وبيشتغلوا زي الوحوش ... بغض النظر هو بيشتغل لنفسه أو لبلده أو عشان الفلوس .. فياريت يبقى عندنا هدف واحد حتى من دول

أقسم بالله أنا شفت بعيني وكان معانا في العمل فلبينيين وأوروبيين .. بس بعيد عنكم " جنس ثالث " ولا يخجل الواحد منهم في أن يتباهى بإنه أصحابه كلهم رجاله - على أساس إن معرفة الرجال كنوووووووز ... وأشياءٌ أخرى - وهو عايش مع أصحابه في الكمبوند " بوي فريند متجرجل ... بيقوم بدور الجيرل يعني " ، لكن الولا منهم في الـ 8 ساعات عمل ما يعرفش أبوه .. وفعلاً زي الماكينة في إجتهادة وعمله وإخلاصة وجديته ... يعني ماحدش يقدر يهرج معاهم مثلاً ويفتح سيرة الموضوع ده أثناء العمل ، أنا شفت منظر لتلك الجدية دي مش قادر أنساه لغاية دلوقت ... معانا واد من فنلندا متخصص في مجال " أمن المعلومات " الولا ده الضفيرة وصله لحد وسطه وشعره أنعم من شعر الصبوحة قبل ما تتجنن .. ولما ييجي يتكلم تحس إن رشا بنت أختك هي اللي بتتكلم ... نعومة إيه ورقة إيه ... ... فكنت مرة في أحد الجولات التفقدية في الشركة ودخلت السيرفر رووم ... وهي حاجة كده زي الفريزر من كثر البرد اللي فيها عشان السيرفرات اللي فيها ما تسخنش ... والواد ده قاعد لوحده وواخد الكيبور على حجره - ما حدش يفهمني غلط - وهات يا شغل وكإنه مثلاً بيرسم لوحه أو بيعزق في أرض زراعية من طرقعة الحروف .. وولا حاسس باللي حواليه أو مين دخل الأوضه أو مين خرج منها .. وهو على نفس الحالة كده من 8 الصبح إلى الخامسة مساءً .. اللهم إلا لو قام يضرب فنجان قهوة ولا حاجة ...... لكن لما الثمان ساعات يخلصوا بالتمام والكمال بيتحول لتوتو وبيعيش حياته ... ومع ذلك أدينا عارفين ديتهم

أما أحنا فلا حصلنا توتو ولا كمنوتو ... حاجة كده لخبطيطة ... الهزار جد والجد هزار ... ووقت العمل شغل تريكو ورغي ومجايب في سيرة الناس ومحسوبية وتطنيش ويا عم كبر دماغك .. أنا بأشتغل على قد فلوسهم ... هي بلدنا .. ياكش تولع ... هو أنا مهما عملت هاجي زي الحرامية الكبار اللي قاعدين فوق!!!!!

وكل الكلام ده نجمعه على بعض = في النهاية المجتمع العربي المُستهلِك واللي العالم بيبص له على إنه كحقل تجارب

[وليد صفوت]

من ساعة ما طلع هذا المترب الهياس المهياس و احنا مسميينه ( شيبوب ) عشان طالعله شعر فى وشه و منعكش شعره و عامل زى شيبوب فى الفيلم بتاع فريد شوقى و كوكا لما كان شيبوب ماسك الربابة و بيغنى على عبلة عند بنى شيبان.

و بصراحة انا كان هيجيلى نقطة عصبية فى اللوز الوسطى لما عرفت اخبار المظاهرات الجامعة الأمريكية و الناس اللى كاتبة فى الجرنال و اللى راسمين على التيشيرتات ...... ايه الهبــــــــــــــــــــــــــــــل ده ...... هو الناس اتجننت و لا ايه !!!

بس فى فعلاً نقطة هامة جداً, يعنى ايه خدمة الوطن ؟

ايه اللى بنستفيده من كلمة ممطوطة ملهاش لازمة زى دى ؟ هو انا يعنى هعمل ايه لما اروح اخدلى كورس تهزيق على قلة حيا على قذارة من ناس ملهاش لازمة فى الدنيا ؟؟؟ البلد استفادت ايه ؟؟؟

لازم لما نقول خدمة البلد يبقى فعلاً البلد بتستفاد مش بهدلة على الفاضى ...

بصراحة الواد ده معذور فى الهرب من الجيش ( مش معذور على التزوير طبعاً ) و محدش يسالنى ايه الفرق .... بس اكيد فى فرق بين الأتنين .... يعنى هو معذور على الدافع اللى خلاه يعمل كده مش الفعل نفسه.

انا شايف ان الجيش مش محتاج هذة الأعداد الهائلة من الناس اللى نفسهم ينزلوا سوق العمل ... اشمعنى سوريا بتخلى المواطن يدفع مقابل الإعفاء ؟؟

[se_ Elsyed]

سؤالك عن فايدة التجنيد الاجباري خطير جداً

وطبعاً عايزنا نطيب خاطرك ونقولك انه مالوش لازمه وهو انت اللي هاتحيب النصر ويا عم دول بيتهزؤا وبيلاقوا ظروف قاسية

وده خطأ كبير جداً

لإن احترام قوانين البلد واجب

واطاعة أولي الأمر واجبة

بغض النظر بقى الحاكم ده ديكتاتور ولا في عبر الدنيا لإننا بنتعامل مع كيان وبلد وليس افراداً

ولو فتحنا المجال لمثل هذا السؤال وسقنا الكثير من المبررات الخايبة وأسف في اللفظ

فستنهار الدولة

تعرف ليه ؟

النهاردة هانبرر الهروب من التجنيد

وبكرة هانبرر التحايل على الضرايب

وبعد بكره هانبرر سرقة التيار الكهربائي زي ما شفت ناس بعيني معدومي الضمير سارقين كهربا عشان المكيفات اللي مركبينها بتسحب كهربا جامد ويا عم الفلوس اللي احنا بندفعها بتروح في كروش الهليبه

وهكذا سنتحول الى لصوص وكل واحد هاتقع تحت ايده حاجه هاينهبها وهاتبقى غابه وتحس ان الكل بياكل في بعضه

ويوم ما تقوم حرب او يحدث اعتداء على وطننا الدائم والذي يفنى فيه الحكام اياً كانت ميولهم وطريقة حكمهم ولكن تبقى الارض

ساعتها بقى مش هانلاقي حد يقدر يدافع عن الارض والعرض والمال

فبلاش السكة دي يا وليد

وخلي بالك ان الرسول نهانا ان نكون إمعه إذا أحسن الناس أحسنا وإذا أسأوا أسئنا

[Blue_mind]

كنا رجالة و وقفنا وقفة رجالة :angry2:

[النسر المصري]

يعني أنا ببص في خلقته بتكرععععع على طول

ده حاجة تقرف والله العظيم

ايه المسخخخخخخخخرة دي...اية القرف والجهل الأعمى ده

المصيبة ياجماعة الخير ...المصيبة الكبيرة....أقدم واحد من أصدقائي وهو زميل مهنة وجامعة وومدرسة وكويت ومصر رايح جاي لأكثر من اربعتاشر سنه....فجأه بقوله شفت المسخرة القذرة بتاعت خامر خوسني

قالي آآه يا أخي والله مسخره...(هنا أنا كنت منكشح انه معاي على الخط ....لحد لما قال)....مش عارف ازاي يحبسوا واحد فنان محترم عبقري اساسا....اكيد دول ناس كارهين نجاحة...ده ممكن يكون عمرو دياااب ياراجل

انا بقى احوليت ..واتهبلت في ربعي الشمال من القفص الصدري...وجالي ضيق تنفس في البؤبؤه العينيه الوسطى...عوضا عن آذان خنشورية الشكل منبطحة المظافر متفركشة البطارخ.في قفايا التحتاني...وتقرحات متنفخة في طبلة ودني اليمين

الراجل الناقص (ده صاحبي المفروض) اللي عمره اتنين وتلاتين سنة والشبة بدأت تضرب في نافوخة ..وهو من أشهر الجرافكيين على الإطلاق....طلع هو كمان شيبوبي على رأي وليد

حسبي الله ونعم الوكيل فيكم يااا..........فنانيييين

[وليد صفوت]

وطبعاً عايزنا نطيب خاطرك ونقولك انه مالوش لازمه وهو انت اللي هاتحيب النصر ويا عم دول بيتهزؤا وبيلاقوا ظروف قاسية

عايزكوا ؟؟؟ و تطيبوا خاطرى ؟؟ ايه الكلام ده يا س س ؟ mfb:

اولاً انا مش عاوز حاجة من حد انا بعبر عن رأيى و مش محتاج تشجيع من حد عشان اتأكد من كلامى :angry2: ... انا واثق من اللى بقوله يعنى مش بقول كده و انا مهزوز من جوا و مستنى حد يأيدنى ....

و ثانياً تطيبوا خاطرى على ايه بالضبط ؟ ده على اساس انى ممكن البس جيش يعنى و عاوز دعم معنوى ؟؟ :blink:

وده خطأ كبير جداً

لإن احترام قوانين البلد واجب

واطاعة أولي الأمر واجبة

هى فين القوانين دى يا س س ؟ يوم الخميس كان من يومين بس ... و على عينك يا تاجر مافيش حاجة بقت مستخبية . -_-

و بالنسبة يعنى لأولى الأمر دول .... لما بإذن الله ابقى انا قاعد فى الجيش زى ست ابوها ( مرات البواب ) بقزز لب و جنبى شعب كامل بينضرب بكل انواع الأسلحة و اللى المفروض اننا اشقاء و بينا قوانين دفاع مشترك ( اهى قوانين برضو من ضمن القوانين اللى بتتكلم عليها ) ابقى انا و الجيش كله اللى انا فيه إسمنا ايه ؟

ولو فتحنا المجال لمثل هذا السؤال وسقنا الكثير من المبررات الخايبة وأسف في اللفظ

معلش يا س س احنا حبايب طبعاً بس ده مش كلام خايب ... دى الحقيقة .... مافيش اى فايدة للجيش تذكر فى الفترة دى نهاااااااائى ...

كل الخيابة انى ابقى متخرج من كليتى فى دماغى مخطط لحياتى و فاكر كل اللى درسته و عندى رغبة فى العمل .... اقوم البس ثلاث سنين و شهرين فى مكان حقيييييييير و مع شخصيات قذذذذذذذذذذرة و اتعامل مع اسوأ فئات الشعب ( اسوأ من سواقين الميكروباصات و الله العظيم ) حتى تنتهى فترة ( خدمتى ... قال خدمة قال :blink: ) بلا هدف و لا سبب غير اشياء هلامية خيالية لا اجد لها اى وجود فى الواقع زى ( خدمة البلد ) و ما شابه ....

و النهاية ايه ؟ شاب خارج بعد ثلاث سنين من الجيش ... فاقد الذاكرة بما درسه فى كليته ... اكتسب فنون القذارة و الوضاعة من الأفاعى اللى كان بيتعامل معاهم بالداخل .... عنده حالة ضجر من الحياة العملية اساساً بسبب تأخر دخوله الى سوق العمل ...... من الآخر شاب نفسية عنده رغبة فى تحطيم كل ما يعترض طريقه ( و له كل العذر ) من فرط زهقه من تعطيل قدراته و تشتيت مجهوده فى حاجات بلاااااااااااااا لزمة .

النهاردة هانبرر الهروب من التجنيد

وبكرة هانبرر التحايل على الضرايب

وبعد بكره هانبرر سرقة التيار الكهربائي زي ما شفت ناس بعيني معدومي الضمير سارقين كهربا عشان المكيفات اللي مركبينها بتسحب كهربا جامد ويا عم الفلوس اللي احنا بندفعها بتروح في كروش الهليبه

لا يا س س ... انا مش بقول تبريرات للتهرب من الجيش كما تقول ...انا اصلاً غير مقتنع بحاجة اسمها خدمة عسكرية إجبارية .... يعنى المووضع من اساسه غلط مش مجرد تبريرات .. انا عارف طبعاً ان كلامى ربما لن يغير من الحقيقة شيئ و لكنه يظل رأيى حتى يأتى من يقنعنى بالعكس ....

و ما تقوله هنا مختلف عما اقوله انا ..... فتلك الفئة من الناس تبرر لنفسها الغلط لأنها تريد فعله .....

يعنى اللى بياخد رشوة و بيبرر لنفسه ده بإنه مش بيعمل حاجة مقارنة بأصحاب الكروش الكبيرة ... ده اصلاً مش كويس من جواه ... و بدل ما يدور على لقمة حلال .. بيدور على الطريق السهل .. و عشان كده بيدور على اى مبرر يخليه يمشى فى سكة الندامة .. كذلك المتهرب من الضرايب ... هو عارف انه حق الدولة عليه انه يدفع جزء من مكسبه ليها ... لكنه بيدور على اى مبرر عشان يتهرب ..... مثلاً ان المال ده مش هيروح للبلد ... ده آخر محطة فيه هو جيوب المسئولين الفاسدين ....

عشان اسهل المنطق ده شوية هعكسه ..... تخيل واحد بيعدى على الناس فى المسجد و بيعلن انه بيجمع تبرعات عشان فلسطين .... او عشان الفقراء ... المهم ان فى اللحظة دى هتلاقى كل شخص بيتصرف حسب طبيعته اللى اتربى عليها ... اللى هيحط ايده فى جيبه على طول... و اللى هيفكر شوية .. و اللى هيعمل نفسه مش واخد باله ..... و اللى هيقولك ان الفلوس دى مش رايحة للفقراء و لا حاجة دى آخرها جيب الراجل اللى بيجمعها ده ... يعنى برضو بيدور على مبرر عشان مايعملش الخير ...

بنفس المقياس هتلاقى الناس بتدور على مبررات عشان تعمل الشر....

انما اللى بقوله انا مالوش علاقة لا بده و لا بده ... لأن الدولة ملهاش عليا حق الخدمة العسكرية .. عارف ليه ؟

هقولك دلوقتى ....

ويوم ما تقوم حرب او يحدث اعتداء على وطننا الدائم والذي يفنى فيه الحكام اياً كانت ميولهم وطريقة حكمهم ولكن تبقى الارض

ساعتها بقى مش هانلاقي حد يقدر يدافع عن الارض والعرض والمال

اصلاً كده كده الدائرة واحدة ... و ما تفتكرش ان الشاب مننا لما يأدى الخدمة العسكرية اصبح ارنولد بتاع السيما و بقى خبير فى استخدام الأسلحة و اى اعتداء على البلد هتلاقينا بنهب زى الأسود بسبب الخدمة العسكرية !

سمعت عن المقاومة الفرنسية لهتلر يا س س ؟

كانت اشرس مقاومة فى اوروبا للنازية .... و كانت المقاومة قامية على اكتاف شباب الفرنسيين ... تعرف بقى الشبان دول كانوا عاملين أزى قبل ما المانيا تدخل فرنسا ؟؟؟؟ تامر حسنى بالنسبة لهم كان عنتر بن شداد ! :blink: .. يعنى من الأخر كانوا اشبه بالواد توتو اللى عندكوا فى الشغل ده .....و عشان ما ندخلش فى حواديت جانبية ..... عندما احتلت البلد انقلب توتو و سوسو الى اشرس مقاومة فى اوروبا للإحتلال النازى .....

يعنى المقياس ليس فى الخدمة العسكرية .... و مع ذلك تستطيع البلد انها تقصر الخدمة دى فى الكليات على هيئة تدريبات و محاضرات ( بدل التربية العسكرية الخاااااااااايبة اللى احنا بناخدها فى الكليات دى ) .......

يعنى ننظر للهدف ايه الأول و بعدين نشوف انسب الطرق لتنفيذه ....

انا مع تامر فى الدوافع اللى خليته يعمل كده ... بس مش معاه فى الطريقة اللى اتصرف بيها ...

و بعدين يا س س انا ما بعرفش اتكلم بالنحوى .. ممكن اعرف تقصد ايه بالجملة الآخرانية دى ؟

وخلي بالك ان الرسول نهانا ان نكون إمعه إذا أحسن الناس أحسنا وإذا أسأوا أسئنا

اخوك فى التجنيد , دندى مدنّد وليد الدهشورى

[ابو محمود]

الكل شاف الوكسة شاف النكسة واللة دى مصيبة ال اية المغنى الحقير ابو مناخيروشعر كتير ومزور خطير بقى قدوة للشباب الهايف اللى بينادى مليش دعوة ببلادى ايوة بيقولو كدة ان مصر مش بتعتهم هما عايشين فيها من اجل الغنا والرقص والسكس الواد من دول حلق شعرة زى حلاقة الحمار الانجليزى والبنت مبينة ما وراء البلوزة

على صدرها ومنزلا الكمر بتاع البنطلون حتى ؟عيب مش هكمل

المهم الواد الخرونج ضرب الشهادة المعفاة والاخ بيستهبل وبيقول انة جدع

المهم الشباب الضايع التلفان عجبة اوى اللى الخرونج دة عملو اصلة هرب من الجيش بس ؟

اصل الجيش للرجالة ودول مش رجالة بصراحة عندهم حق

الشباب بتاع هز الوسط حرام يشيل سلاح يشيل احسن كيلينكس علشان ينشف ؟

الشباب دول هيدفعو عن البلد قريب بعصيان الشماسى (الدولسى) وهيقولو للعدو امشى ياوحيش احنا تبع تامر تمورا تمميرو الواد الجامد اللى هرب من الجيش مناش دعوة ادخلو انت احرار بس خلونا نغنى ونرقس وناكل

والاخ بتاع ان التجنيد الاجبارى غلط هى المدة اللى غلط يااءستاذ عدوك الحقيقى اسرائيل الشعب كلة هناك مجند اجبارى فوق انت نايم اصحى هما عيزنا نبقى كلنا تامر؟

اوعو تبقو تامر الساعة اقربت بكرة سوريا واحنا بعد كدة ؟

اوعو تبقو تامر

اوعو تبقو نمر

اوعوتنسو مين واقف على باب مصر اوعو تنسومصر مصر مصر بحبك يامصرخابو ولادك وانتى حمالة اسية؟

بحبك يامصر حب فاق الوصف بحبك لانك تتحبى فى كل عصر بحبك يابلدى انا مش قليل الاصل بحبك يامصر

بحبك مهما حصل لان ترابك كحل ودوا ولو اتعصرت عصربحبك يمصر ابنك محمود مصطفى

[وليد صفوت]

مش فاهم يا استاذ محمد مصطفى ... الكلام ده حضرتك تقصد بيه مين بالضبط ؟

ممكن توضيح اكتر ؟

شكراً

[الرافعي]

والله يا جماعة مع احترامي للجميع ... أنا شايف إن الحمد لله ... إن هذا الشيء

لم يدخل الجيش

تم تعديل 14 مايو 2006 بواسطة حلاوة العنتبلي

[se_ Elsyed]

أنا لست من هواة القص واللزق والتعليق على كل كلمة

لكن هناك جُملة إستفزتني في كلامك يا وليد أحب أعلق عليها وهي

اقوم البس ثلاث سنين و شهرين فى مكان حقيييييييير و مع شخصيات قذذذذذذذذذذرة و اتعامل مع اسوأ فئات الشعب ( اسوأ من سواقين الميكروباصات و الله العظيم )

ده أكبر غلط يا وليد

لإن المُجندين دول هم أخويا واخوك ... ووالدي ووالدك وأقرباءنا كلنا

أتحدى عيلة مصرية مافيهاش حد في الجيش سواء خدمة إجبارية أو إن دي تكون وظيفته ...

يبقى هل يصح نقول عليهم ألفاظ زي دي ؟

راجع نفسك يا وليد وأعد قراءة الكلام مرة أخرى .. وإنت حُر بعد كده في وجهة نظرك ...

و بعدين يا س س انا ما بعرفش اتكلم بالنحوى .. ممكن اعرف تقصد ايه بالجملة الآخرانية دى ؟

وخلي بالك ان الرسول نهانا ان نكون إمعه إذا أحسن الناس أحسنا وإذا أسأوا أسئنا

أقصد بها ألا ننساق وراء مثل هؤلاء المخنثين المُزورين المجرمين ونُبرر الخطأ بخطأ أخر ..

وياريته هايبقى خطأ في حق نفسنا .. إنما هايبقى خطأ في حق بلدنا .

[Tafshan]

بالراحة شوية يا جماعة الموضوع في الاصل بيتكلم عن شخص هايف ... مش كده ؟؟

المحاكمة طبعاً نتيجة طبيعية لمجتمع هايف ...

السؤال هو للى عايز الشباب يحط صورة زويل في البيت ... كم صرفت البلد على زويل و كم صرفت البلد على تامر حسنى ؟؟

ميزانية البحث العلمى قد ايه و ميزانية الاذاعة و تليفزيون قد ايه ؟؟

عندنا كام مؤسسة بحثية و كام قناة فضائية ؟؟

طب بلاش ..

البلد بتكسب اكثر - مادياً - من تامر و المسلسلات و الاخرون و بتكسب كام من الصناعة و الانشطة المحترمة ؟؟

يا عزيزي احنا بقينا عاملين زي اللى فاتح بيت للبغاء و نتربح منه و نفتخر بالريادة فيه و بالتالى طبعاً لازم يستقبل تامر حسنى استقبال الفاتحين و يعامل معاملة العظماء ..

بلاش نحط رأسنا في التراب ... هى دى مصر من اكثر من 100 سنه

طب آ :angry2:

[لخبطه]

سي السيد فاكر لما قولت لى ساعات الواحد من جمال الكلام بيبقا مش عارف يرد يقول ايه

دا تعليقي على المشاركه دي

[وليد صفوت]

طب بلاش قص و لزق يا ثين ثين :angry2: ..... بس انا حبيت ارد على كل كلامك و و ماسيبش نقطة من غير رد ...

اول نقطة قولتها دلوقتى ان الفئات اللى انا بتكلم عليها دى هم أخويا واخوك ... ووالدي ووالدك وأقرباءنا كلنا ... بس بلاش ندفن راسنا فى الرمال زى ما طفشان قال و ننكر ان فعلاً الجيش فيه ناس بالشكل ده .... و بعدين انا ما انكرتش ان الجيش فيه ناس كويسين .... بس انا حسيبك تقوللى مين اللى بيتحكم فيك فى الجيش ... فاكر الشاويش بتاعك فى الجيش كان بيعاملكوا ازاى ؟ حسيبك للأيام يا ثين ثين عشان تفتكر :blink:

تانى نقطة ... و هى الا ننساق وراء العالم دى و نبرر خطأهم ... طيب انت قريت كلامى كويس ؟ مش عارف ... أشك !

لأنى اتكلمت على نفس النقطة دى تحديداً و قولت ان كلامى مالوش علاقة بتبرير خطأ تامر .... انا معاه فى الدافع اللى خلاه يعمل كده ... بس مش معاه فى تصرف اللى هو عمله ... و انا قولت كده من البداية ....

ما علينا ( معلش يا شريف استلفتها لحاد آخر الشهر )

[maxpayne_007]

انا شخصيا فرحت بخروج تامر حسنى ولا اعرف سر كل هذا الهجوم والشتيمة فى شخص لم يصنف نفسه على انه من العباقرة أوالثوار؟ ولماذا يعشق البعض دائما تقمص دور الناصح الامين حامى المجتمع من "الانحلال" و"التفاهة"؟!

اين من هاجموه من مصدر التفاهة الحقيقى فى مصر وهو "التعليم"؟ هل تتحدثون فى السياسة والقضايا الكبرى بنفس هذا الحماس ونفس هذه اللهجة؟!

tafshan قال:

"السؤال هو للى عايز الشباب يحط صورة زويل في البيت ... كم صرفت البلد على زويل و كم صرفت البلد على تامر حسنى ؟؟ " اعتقد انك تقارن بين وحدات غير متكافئة، تقارن بين"عالم"و"مطرب" والمطلوب ان ننتصر للعالم على حساب المطرب "التافه" فمن قال ان العلم لايزدهر الا بازدراء الفن؟ ولماذا تضعنا فى موقف المفاضلة بين العلم أو الفن ؟! وللمفارقة العجيبة فقد شاهدت منذ مدة لقاء مع احمد زويل نفسه على العاشرة مساءا ومضى الرجل اكثر من 40 دقيقة يمدح فى ام كلثوم ويتحدث عن ذكرياته الجميلة مع اغانيها ! ولكن لانها ام كلثوم فلن يتحرك احد ليتحدث عن "الفن الهايف" و"المجتمع الهايف" مع العلم ان ام كلثوم هذه كانوا يقضون الساعات الطويلة فى سماعها ويكفى فقط ان مقدمات اغانيها تصل احيانا الى 10 ،15 دقيقة !! فلماذا لم يتحدث احد وقتها أوبعدها عن انشغال المجتمع بالهيافة على حساب العلم والبناء؟؟!! ام هى فقط عنصرية وحقد من جيل "المسنين" !! :angry2:

ثانيا انت تقول "كم صرفت البلد؟" ولم توضح من المقصود بالبلد هل هى الدولة ام الناس؟ فالدولة لاتنفق على احد من الجانبين لاعلم ولافن ولابطاطس!! اما الناس فمن الطبيعى ان ينفقوا على الفن اكثر لان الفن ذو طبيعة استهلاكية وتعرف لمنتجاته ثمنا تستطيع التعامل به أما احمد زويل فهو لم يعلن مثلا عن جمع تبرعات اوفتح باب المساهمة فى بناء مركز بحثى أو جامعة حديثة وبالتالى لا تستطيع الحكم على مدى مشاركة الناس او تقديرهم لاهمية ما يدعو اليه ولكن اتفق معك ان المشاركة سوف تكون مخزية ولكن هذا بالطبع ليس بسبب اقبال الناس على الفن .

تقبل تحياتى

[أسد]

إيه إللي جاب "زويل" لـ "تامر"

ده موضوع .. وده موضوع ..

المسألة العجيبة .. إنه مكانش يعرف .. إن البتاعة مزورة ..

لكن كان عارف إنه بيدفع رشاوي وهدايا لناس بتخلص كل حاجة بالفلوس ...

إنما البتاعة مزورة .. ولا طالعة بالرشوة .. دي حكاية تانية ..

أيمن نور .. إتهم أيضاً بالتزوير ..

الراجل ده "أيمن" زور .. أو إنضحك عليه .. وإتنصب عليه زي الننوس "تامر" ما إتنصب عليه ..

ده زور أو إتنصب عليه علشان يخم البلد ..

إتخبط خمس سنين سجن ...

وحيموت في السجن ...

وده ..

مع الرأفة .. وبالرأفة .. وبالكوسة .. والبتنجان ..

سنة مع إيقاف التنفيذ ..

وإلتماس وراء إلتماس .. حيطلع من حكم المحكمة العسكرية ..

علشان الشباب الروش ينبسط ..

والبنات المعجبات مايجيلهاش إحباط ...

بلاش عقد ياجماعة ..

وخدوا الموضوع إيزي ...

دي حاجة تحرق الدم والله العظيم ..