قومي يا مصر وأفرحي ... تامر خد براءة

[Tafshan]

tafshan قال:

"السؤال هو للى عايز الشباب يحط صورة زويل في البيت ... كم صرفت البلد على زويل و كم صرفت البلد على تامر حسنى ؟؟ " اعتقد انك تقارن بين وحدات غير متكافئة، تقارن بين"عالم"و"مطرب" والمطلوب ان ننتصر للعالم على حساب المطرب "التافه" فمن قال ان العلم لايزدهر الا بازدراء الفن؟ ولماذا تضعنا فى موقف المفاضلة بين العلم أو الفن ؟! وللمفارقة العجيبة فقد شاهدت منذ مدة لقاء مع احمد زويل نفسه على العاشرة مساءا ومضى الرجل اكثر من 40 دقيقة يمدح فى ام كلثوم ويتحدث عن ذكرياته الجميلة مع اغانيها ! ولكن لانها ام كلثوم فلن يتحرك احد ليتحدث عن "الفن الهايف" و"المجتمع الهايف" مع العلم ان ام كلثوم هذه كانوا يقضون الساعات الطويلة فى سماعها ويكفى فقط ان مقدمات اغانيها تصل احيانا الى 10 ،15 دقيقة !! فلماذا لم يتحدث احد وقتها أوبعدها عن انشغال المجتمع بالهيافة على حساب العلم والبناء؟؟!! ام هى فقط عنصرية وحقد من جيل "المسنين" !! :rolleyes:

ثانيا انت تقول "كم صرفت البلد؟" ولم توضح من المقصود بالبلد هل هى الدولة ام الناس؟ فالدولة لاتنفق على احد من الجانبين لاعلم ولافن ولابطاطس!! اما الناس فمن الطبيعى ان ينفقوا على الفن اكثر لان الفن ذو طبيعة استهلاكية وتعرف لمنتجاته ثمنا تستطيع التعامل به أما احمد زويل فهو لم يعلن مثلا عن جمع تبرعات اوفتح باب المساهمة فى بناء مركز بحثى أو جامعة حديثة وبالتالى لا تستطيع الحكم على مدى مشاركة الناس او تقديرهم لاهمية ما يدعو اليه ولكن اتفق معك ان المشاركة سوف تكون مخزية ولكن هذا بالطبع ليس بسبب اقبال الناس على الفن .

تقبل تحياتى

اقول لك :

بص يا سيدى ... مصر عندها مدينه للأنتاج الاعلامى و عندها اكبر مبنى للاذاعة و التليفزيون و كل ده على حسابنا الشخصى من اموال دافعوا الضرائب ... بالمقارنه كم هى ميزانية الدولة للبحث العلمي ؟؟

المقارنه هى بكم الصرف و بالتالى نحدد اولوية الدولة في صرف تلك الاموال على اعتبارها جهاز شرعى لتصريف ما جمعته منا من ضرائب : اذاً الدولة تضع الفن كأولوية قصوى

انا على فكرة مش ضد الفن بس انا ضد وضعه كأولوية بحيث يتحول العاملين فيه الى قوى شعبية تستطيع تغير القانون و ده من زمان جداً ... يذكر ان ام كلثوم كان يقال عنها انها كانت تتحدث مباشرةً مع الرئيس جمال عبد الناصر و كانت بتناديلو " جيمى " يعنى سلطة الهيافة كانت من زمـــــــــــــان قوى و هو ده اللى مرفوض

على رأي أسد يعنى شعبية تامر حسنى خوفت الجهاز القضائى اكثر من شعبية ايمن نور و بالتالى تغاضى عن تخطيه للقانون ؟؟

لو القضاء بيخاف .. تبقى مصيبة ..

و لو بيخاف من تامر اجدع ناس .. تبقى المصيبة اكبر

[Sherief AbdelWahab]

ما علينا ( معلش يا شريف استلفتها لحاد آخر الشهر )

مفيش مشكلة يا ليدو .. وح أتنازل لك عنها لو نجحت أكتر معاك :P

الجميع :

مش عايز ننزل للمستوى اللي هووليجانز تامر وأخواته عايزيننا ننزل له ، وهو أننا ضد البيه تامر فقط لمجرد أنه فنان ، لأن البيه الفنان المحترم في حالتنا دي كذاب فنياً ، زي ما كتب ماجد حبتة في الأسبوع في مقال مش لاقيه خالص على النت ..

محدش ضد الفنان لمجرد إنه فنان .. دة إذا كان فنان أصلاً!

قلت في موضوع آخر إن مسألة المظاهرات دي تحولت لصيحة من صيحات الروشنة ، زي حضور مباريات كرة القدم ، والظاهر إن النضال - ولو في سبيل تامر حسني - تحول إلى موضة هو الآخر..

أخيراً .. تراهنوا إن جمال مبارك وفريق حملته الرئاسية لو فكر في الموضوع في جدية حيستغلوا تامر حسني في الحملة الانتخابية؟

خلص الكلام

[khedr]

من شروط الجيش

ان الواحد يكون راجل مش كده

بس هو المذكور جابها من طريق تاني

ومش عايزين احراج

ملحوظه: لا تغركم شويه الشعر اللي عنده .....

مكياج

[عطر]

صحيح زي ما بيئولوا لما البهيمة تقع تكثر سكاكينها

يعني الراجل (عارفة هتزعلوا من الكلمة دي ;) ) ذنبه ايه ان بلده بزرميط لا فيها قانون ولا فيها ناس بتفهم

ذنبه ايه انه له معجبات ومعجبين متيمين به وعملوا مظاهرات علشانه

ذنبه ايه ان ناس دفعت الوفات علشان تعمل له اعلان تقول له وحشتنا في 3 ميادين رئيسية واستخسرت تتبرع بيهم للفقرا ولا تجدد قسم في مستشفي عام ولا حتى تتبرع لمجاعة افريقيا

ذنبه ايه انه صدره فيه شعر وواد مدلع نفسه بيعرف يغني ويرقص وغيره يادوب يغني في الحمام

بصراحة من رأيي ان توتو حسني اللي عمله مفيد لنا كلنا

علشان خلانا نشوف كم الأرف اللي في البلد وكم الضياع الأخلاقي والقانوني والفكري

مبارك وعيلته موجودين ولا مش موجودين الأرف ده حيفضل موجود ويظهر كدة مفيش امل في اصلاحه :(

بجد احباط × احباط وبس وصوتي يالي انتي مش غرمانة :P

تم تعديل 15 مايو 2006 بواسطة عطر

[Doofy]

================================================================

كل الكلام اللي اتقال دا مظبوط على العين والراس لو بيصب بين حدود دوله فيها نظام "أي نظام سواء تجنيد او غيره" يفيد الشعب ويفيد شبابه...

علشان كدا انا بتفق مع الزميله عطر لما قالت " ذنبه ايه ان بلده بزرميط لا فيها قانون ولا فيها ناس بتفهم "

انا مش بدافع عن تموره دا واحد كان هدفه في التهرب من التجنيد هوه انه يسافر ويغني في الحفلات برره وميعطلش مسيرته الفنيه في زمن الهلس والعربده...

انا بدافع عن الشباب اللي ربنا كتب عليه انه يتجند وفي نفس اللحظه ملوش واسطه اثناء فترة تجنيده ...

تخيلوا المعاناه النفسيه والمعنوية اللي في الأرض اللي ممكن يقابلها اثناء فترة تجنيده...

قبل اي حاجه انتوا عارفين ياعني ايه الجيش المصري بدون واسطه سواء كنت عسكري او ضابط ..؟؟؟

اللي جرب ممكن يحكي هنا او موضوع منفصل ذكريات السنوات والشهور والأيام والساعات اللي عمره ماهيقدر ينساها في حياته ...

واللي علشان خاطر مستقبله ممكن يعمل أي تصرف سواء كان مشروع او غير مشروع في سبيل الفرار من هذا الواجب الوطني في ظل حكومته الغير وطنيه ...

[أسد]

منذ سنوات طويلة .. عشرون عاماً .. دخلت الجيش لمدة عام .. بعد تخرجي ..

كانت تلك الفترة بمثابة عقبة أمام كل من يتخرج من الجامعة ..

فكلنا متعجل ليبدأ حياته ..

ولكني لا أجد ضرراً من أن نخدم عاماً في العسكرية .. ونكون موجودين ومتاحين للدفاع عن الوطن إذا ما إقتضى الأمر ..

من يرفض هذا يقر بأن لا يوجد عدو الآن .. والأمن والسلام مستتب وكله آخر تمام ..

نعم .. الأوضاع كانت صعبة .. ومرهقة .. ومثبطة للآمال ..

ولكن لها فائدة كبيرة للجميع ..

من مر بقسوة تلك الأيام .. يستطيع بسهولة التغلب على قسوة الحياة المدنية .. والظروف الصعبة الكثيرة والمتعددة التي قد يقابلها في حياته ..

وفي النهاية ...

لا يوجد مايبرر مخالفة القانون ..

ومن يسرق أموالاً من اللص .. فهو لص أيضاً ...

قد يكون لصاً أشطر من اللص الأول ..

ولكنه في النهاية لص ..