قهوة النشاط

[ragab2]

يا قطب كفاية القعاد ع القهوة مع الفاضيين

شوف لنا شغلة  نشتعلها وما تنتظرش التعيين

أحسن من لعب الطاولة والبص ع البنات الحلوين

ده القهوة دى  بيجيلها البوكس ويلم النشالين

وصاحبها تاجر مخدرات ومن كبار الحشاشين

قول للواد يغير الحجر ويحط معسل النخلتين

ويخصص لنا شيشة حلوة ومعاها حجرين

ويحط  لنا حتتين فحم مولعين وحاميين

خدلك نفس حامى وشد جامد وادينى نفسين

ربنا يسامحك ده أنا كنت مبطل التدخين

بص بعينك اللى جاية دى مش هى البت قمرين

اللى اتجوزت الواد شحاتة ابن طنط شيرين

من يوم ما اتجوزت بقت على سنجة عشرة واتنين

بيقولوا أخدت قرض من البنك بمليونين

وظرفت مدير البنك نصف مليون من المليونين

ما هو شيلنى واشيلك والقفة ليها ودنين

وحلنى بقى على ماييجى معاد تسديد الدين

والفقير لو عاوز يستلف بس ألفين

يجيب ضمان م الأمم المتحدة وضامنين

سمعت آخر خبر اللى عليه العين

ظبطوا خواجة  خارج ومعاه شنطتين

شنطة فيها هدومه والتانية فيها مليونين

كان جاى مصر يكون نفسه وراجع بلده يعمل مشروعين

معقول مصر فيها فلوس كتير كدة ومش عارفين

ما يوزعوها ع الغلابة اللى مش لاقيين

طب الفلوس دى كلها عملها ازاى وجابها منين

والرقابة المدة دى كلها كانت فين

فيه ناس مش لاقية الدقة ولا حتى رغيفين

وناس بتغرف بالملايين وتطلع لسانها وتغمز بالعين

يا عم احنا مالنا مفيش أحسن م الفول وبصلتين

تاكلهم وتنام رايق البال وما عليكش دين

ده والله بعد الحلال مافى حاجة زين

تحل البركة وتخف باسبرينتين

وغيرك يسافر عشان يتعالج ويصرف مليونين

ويرجع زى ماراح وشايلينه على نقالتين

ياالله بقة نروح  نتغدى  ونشوف أم العيال والعيلين

(Edited by ragab2 at 11:31 am on July 2, 2001)

[Imhotep]

 يا تري يا خويه يا رجب حتتغدى زي ما فطرت و زي ما حتتعشى....فول و بصلتين!!!! حاولت ارشيك بكل انواع الSea food اللي في الدنيا.... مفيش فايده... عرضت عليك مشاريع الدنيا... نبيع و نهلب... برده راكب دماغك!!! اعمل فيك ايه بس قولي!!!!!

[Imhotep]

متسمعش كلامه يا خويه يا قطب... خليك معايا تاكل الشهد....حاكم رجب ده مورهوش الا الفقر ووجع الدماغ...متبتلي كده في قال ايه شرف ووطنيه و كرامه... حاجات عاف عليها الزمن و متوكلش الا فول!!!! ده حتى انا عندى مطرب حبيبي اسمه حسن سلكه نفسه يغني كلامك....قرالك حتتين يا قطب يا خويه و وصاني اكلمك... بس غرضه تهيف و تسطح الكلام شويه...تشخلع الكلام يعني...متردش عليه دلوقتي.. قلب الموضوع في دماغك.. و ادي باكويين عربون... امسك  يا راجل متتكسفش هو احنا مش اخوات برده.... بتكلم في سري...لما اشوف بقي انا و الا انته يا عم رجب!!!!! ها  ها  ها.......

                           امضاء

                                 إيمحوتب السو !!!

[ragab2]

عندى يا حبيبى طلبك جاهز

عندى

البت كتاتة بنت شحاتة

وعندى

الواد زعبلة اللى كسر القلة كان واد فنان

بس لايمنى ع الأبيج وحتلقينى فريرة

أشخلعلوا أى حاجة على مقاسه

احنا يعنى غاويين ناكل فول

دة قصر ديل وقلة حيلة غصب عنا

قول لأبو على يأشر واحنا تحت الأمر

وعاوز الكلام مع اللحن يعنى مقاولة تسليم مفتاح

والا يصرف هو فى اللحن

والفرقة ياسيدى من عندى فوق البيعة

منتظر جوابك

عشان اديت خبر للجزار يحضر لى ماسورة نعمل عليها شوية شوربة للعيال

وبعت القطط سربتها مع البواب عشان متشمش الماسورة

وتعمل لنا ازعاج ومظاهرة فى العمارة

اصل ديك النهار بعت الواد ابنى اصطاد شوية سمك بسارية من النيل

وقفت لنا القطط طوابير

ما عرفناش ناكل كويس واضطرينا نرمي لهم الشوك

ما تتأخرش على يا أمنتحتب يا خويا

[Imhotep]

يعني خلاص دماغك لانت و الفول هراك!!!! ماشي ياعم... عمومآ يا عم انته اخويه و توأم روحي... وانا منساش حبيبي و اخواتي ابدآ... بس في حاجه... انا محتاجك معايا في موضوع تلميع اختنا عبله علشان تمسك البلد .... انا عوزك تبطل اكل فول لمده شهر علي الاقل وتبدأ كده تمخمخلي كده في قصيده كويسه... في طلب كمان... ملكش دعوه بقطب ... انا مش عوزك تملي دماغه بمواضيع الشرف و الوطنيه والكلام الفارغ ده... انا محتاجه في الاغاني الهابطه... الولا حسن سلكه العجلاتي حيغني كلامه... انا عاوز اتوه الشعب....

                         امضاء,

                              إيمحوتب السو.

[ragab2]

يعنى ايه ياأمنحتب ياخويا

حسن أبوعلى صرف النظر

طب والماسورة اللى دفعت عربونها للجزار

أدبسه فيها

وخليتنى سربت القطط ع الفاضى

طب ايه رأيك أعملك اغنية ع  البواليع

وهى فكرة جديدة ومحدش لسة غنى للبواليع

بس خايف يسرقوا الفكرة

عاوز اسجلها الأول

متتأخرش علية ورد بسرعة

عشان أخش الحمام ألحنها

(Edited by ragab2 at 5:44 pm on July 3, 2001)

[ezzat afifi kotb]

اخويا رجب معلهش اخوك غرقان للشوشة فى شوية شغل اخلصهم وارجع اخد معاك نفسين .. وتأكد اننا ح نلين مخ اخونا امحوتب ... ويتأكد ان الكلام الجد قوىممكن يكون دمه خفيف مع التمسك بمبادىء اخونا رجب ...

المهم يا اخويا رجب ... واخويا اكرم

... تسلمت رسالة على البريد الالكتونى من اخونا جمال حسنين ...وهو مقيم باستراليا ويحملنى ان انقل لكم رغبته فى مشاركتنا جلسة طرية فى مقهى النقرزان ... المهم انا قدمت له دعوة مفتوحة وعضوية دائمة .. الباقى عليك يا عم رجب وعم اكرم ...

[Imhotep]

  بقولك ايه يا خويه يا قطب... مش بعد ما خدت الباكويين حتقولي كلام مش عارف ايه!!!! اه... الشغل شغل يا حبيبي... الواد حسن سلكه مستني علي نار... خلصنا اعمل معرف... دا حتي انا مجهزلك العشر بواكي... همتك بقي يا بطل...

------

  يا رجب يا خويه... ميبقاش مخك ملليمي امال... سيب سبوبه الاغاني دي لقطب... انا عوزك في التقيل!!!!

[ragab2]

هات اللى تجيبة يا قطب نلحن له لحنين

مش مهم عايش فى استراليا أو عايش فين

المهم يكون مريش ويدفعلنا قرشين

نعشى بيهم العيال ونجيب لهم رغيفين

وعندى له أغنية الدنيا فونيا يا محمدين

واذا كان عاوزها استرالى يبقى يا بغلين

ودى أغنية هاتكسر استراليا والفلبين

البت جوزفين بنت عم أنتونى متجوزة اتنين

ولما خلفت ولد سموه باسمين

أصل الواد ده اتولد براسين

وكان فرحان عشان ليه أبين

اصل استراليا بلد العجايب والتفانين

ومافهاش أخلاق ولا حتى دين

[Imhotep]

  وادي باكويين لاخويه رجب ... باكوين اخضر... حاكم انا محبش غير الاخضر.... بقولك ايه يا رجب يا خويه.. وانته كمان يا خويه يا قطب... عاوز كلمتين كده يلمعوا الملكيه و يخلوا العهد الملكي هو افضل حلولنا... الحته دي حدفع فيها عشر بواكي.