أكفل زملكاوي .. يكفيك شر البلاوي

[بنت النيل]

ياأختي الفاضله

صلي على النبي

الراجل بيهزر وفاتح الموضوع في باب دعوه للإبتسام

واللي خلاه يسخر من الزمالك انه اصبح كذلك

واللي خلاه يسخر من الزمالكاويه انهم بيشجعوا من يستحق الدعاء لا التشجيع :ph34r:

كل سنه وانتي طيبه

عليه افضل الصلاة والسلام

نعلم يا اخ زوهيرى ان الاخ الفاضل س س فاتح الموضوع للهزار

ولكن هناك بعض المداخلات بها كلام ( ثقيل ) شوية يعنى ممكن يكون مستفز

ونخشى ما نخشاه ان يلاقى غضب ورد بالغلط من طريقه الكلام :ph34r:

فلا داعى ان نوقع نفسنا فى الخطا .........

وعلى العموم سنظل اخوه متحابين ومصرين رغم انف الاهلى والزمالك

وكل سنة وانت طيب والهديه للاستاذ اياد عشان يعيد بيه ;)

[se_ Elsyed]

عارفه يا بنت النيل

لو تابعتي موضوعات قديمة شوويه من 2003 مثلاً هاتلاقينا كاتبين نفس الكلام عن الاهلي مع إن فينا أهلاويه

وهاتروحي بعيد ليه .. طب خلي الأهلي يتغلب كده بكره وشوفي هانقول إيه

وكل ده من باب النقد الساخر البعيد عن أي ألفاظ خارجة او إساءة أدب

وخلي بالك إحنا في باب الإبتسام ... يعني إضحكي كده وإنسي الهم ماحدش واخد منها إينيسينج

[ابو ايمان]

الاخوات و الاخوه

ليس من طبيعتنا وطبيعة ديننا ان نشمت فى احد

بكونى اهلاوى وعضو فى منتديات مجلة الاهلى

لا احب أى احد ان يشمت فى نادى الزمالك

هذه كوره فهى يوم لك ويوم عليك

الزمالك مثله كمثل ريال مرديد مثلا فعند لعيبه وحريفه

ولكن بعض المشدات وهى وارد فى اى نادى ان يصل مستوى النادى لهذه الدرجة

فيجب ان نشجع فريق الزمالك وكل الفرق حتى يكون هناك تنافس شريف

فالكره المصرية لن تزهوا الا بارتفاع مستوى الانديه مثل الاهلى يجب ان يكون هناك

الزمالك والاسماعيلى والاتحاد والمحلة وغيرهم من الانديه حتى يبنوا لنا فريق وطنى

جدير بالثقه ان يمثل مصر ويدخل الفرحه فى قلوبنا بلعبهم وليس بدعواتنا

وشكرا

ابو ايمان

[نانو]

يعني هاتعشي بره ولا مش هاعشي بره في سنتي ديه؟؟؟؟؟؟ :rolleyes:

[se_ Elsyed]

يعني هاتعشي بره ولا مش هاعشي بره في سنتي ديه؟؟؟؟؟؟ :rolleyes:

عمال اتحاشى إني أرد عليكي لمرارة الرد

إمسحي دموعك يا نانو

عشاكي عندي بإذن الله

لإن في الخمس سنين الجايين مافيش امل في العشا يا بُنيتي العزيزة .

عمو سين سين الأهلاوي

[MZohairy]

يعني هاتعشي بره ولا مش هاعشي بره في سنتي ديه؟؟؟؟؟؟ :rolleyes:

عشاها عليك يا رب :)

[drhouba]

يعني هاتعشي بره ولا مش هاعشي بره في سنتي ديه؟؟؟؟؟؟ -_-

عمال اتحاشى إني أرد عليكي لمرارة الرد

إمسحي دموعك يا نانو

عشاكي عندي بإذن الله

لإن في الخمس سنين الجايين مافيش امل في العشا يا بُنيتي العزيزة .

عمو سين سين الأهلاوي

سين سين إنت نسيت تقول إن شاء الله و لذلك أبشرك بما هو آت ... لأن هى دى المرحله اللى كان نفسى يوصلها كل أهلاوى من الغرور و بما إنك مشرف هنا لو حدث ما أتوقعه من عقاب السماء لكل ما هو أحمر أرجو منك رجاء خاص أن تغلق هذا الموضوع و تفتح لنا موضوع جديد يكون عنوانه إرحموا عزيز قوم ذل

يعني هاتعشي بره ولا مش هاعشي بره في سنتي ديه؟؟؟؟؟؟ :mellow:

ما تقلقيش يا نانو إن شاء الله إن شاء الله حتتعشى كتير من هنا و رايح و حتخربى بيت جوزك و كل ده تشكرى عليه بعد ربنا سين سين و رفاقه :closedeyes:

[Modest]

أنا مش فاهم و مالُه العشا جوه؟!!! ... ده حتى الدنيا برد و أكل بره بقى مش مضمون

خليهم همّا يتعشوا برّة كل ماتش و هايبردوا و يعيُوا -_-

أبشرك يا د. هوبا .. واحد جاب لي النتيجة من الكنترول و قال لي كسبانين إن شاء الله .. بس حاولت اعرف منّه كسبانين ايه بالضبط مارضيش يقول لي :closedeyes:

أخوك موديست

(من اللي بقالهم كام سنة بيتعشى في البيت) :mellow:

[se_ Elsyed]

يا هوبا ما تاخدش الامور على صدرك وخليك كول

مال الإشراف ومال التشجيع ؟

وبعدين إنت هاتقف لي عالواحده

بص كده

عشاكي عندي بإذن الله

يعني الحمد لله لا جبت سيرة هُبل ولا اللات والعُزى :closedeyes: عشان حضرتك تقول

سين سين إنت نسيت تقول إن شاء الله و لذلك أبشرك بما هو آت

وما تزعلش يا سيدي

يارب الأهلي يتغلب - من ورا قلبي - عشان نانو تتبسط وتنتهي مشاكلها العائلية وتتعشى على بسطة السلم مش بره

وهاغير يا سيدي عنوان الموضوع لـــ " عشي زملكاوي بره ولك الجنة " -_-

موديست

أحيي فيك روحك الإقتصادية

ما تجيب بوسه

موديست ... ميسدات بقى قبل الماتش وأثناء الماتش ... شغال ؟

[بنت النيل]

عارفه يا بنت النيل

لو تابعتي موضوعات قديمة شوويه من 2003 مثلاً هاتلاقينا كاتبين نفس الكلام عن الاهلي مع إن فينا أهلاويه

وهاتروحي بعيد ليه .. طب خلي الأهلي يتغلب كده بكره وشوفي هانقول إيه

وكل ده من باب النقد الساخر البعيد عن أي ألفاظ خارجة او إساءة أدب

وخلي بالك إحنا في بال الإبتسام ... يعني إضحكي كده وإنسي الهم ماحدش واخد منها إينيسينج

ماشى يا س س طلما انت شايف كدا على العموم احنا كل اللى يهمنا انك تكون مبسوط

حتى لو على حساب الزملكاوية :closedeyes:

عشان بس تعرف مين اللى بتبرع لتانى -_-

[نانو]

عشاكي عندي بإذن الله

يارب الأهلي يتغلب - من ورا قلبي - عشان نانو تتبسط وتنتهي مشاكلها العائلية وتتعشى على بسطة السلم مش بره

و انا مالي يا س س ...ايه ده... -_-

يعني د. هوبا جوانياته مش حلوه توجاه الاهلويه انا مالي

كنت هاتعشيني عندك

و اذ بك تتمنالي عشوه علي بسطه السلم :closedeyes:

ياللهول :mellow:

[se_ Elsyed]

يا دكتورة نانو إنت مقام عندنا عالي وإنتي عارفه

لذلك أحلى عشا في أعلى مطعم في الر ياض على حسابي ( بتشوفي برج الفيصلية في الصور ؟ .. شوفتي بقى الكورة القزاز اللي فوق دي ؟ أهي دي عبارة عن مطعم فخيم فخامه .. ومالكيش دعوة بالمينيمم تشارج ) وهانبقى نحكي لبنت النيل على اللي اكلناه ...

على فكرة أصل وأنا بأكتب الموضوع أفتكرت نكته بتقول " واحد إتصل بمراته وقالها حضري نفسك عشان هانتعشى بره .. رجع لقاها حاطه الطبلية على بسطة السلم "

ميتهيألي الست دي زملكاوية ... بس مش إنتي يا نانو ولا أنتي يا بنت النيل لإن أنا عارف إنكم بتاكلوا على السفرة ام 8 كراسي ونيش وشوفونيرة كمان .. ممكن تكون زملكاوية بقى لها كتير ماتعشتش بره وساكنة في ميت عُقبة وإنت رايح على أمبابة كده :closedeyes:

ربنا يبسطكوا كمان وكمان

وطظ في التلات نُقط اللي هايخلونا نخسر بعض

يحيا الهلال مع الصليب

وعاشت مصره حلوه ومستكرة

[بنت النيل]

يا دكتورة نانو إنت مقام عندنا عالي وإنتي عارفه

لذلك أحلى عشا في أعلى مطعم في الر ياض على حسابي ( بتشوفي برج الفيصلية في الصور ؟ .. شوفتي بقى الكورة القزاز اللي فوق دي ؟ أهي دي عبارة عن مطعم فخيم فخامه .. ومالكيش دعوة بالمينيمم تشارج ) وهانبقى نحكي لبنت النيل على اللي اكلناه ...

شفتوا اهو ده الاهلوى على حق بدل ما يقول نعزم بنت النيل بيقول نحكى لها ،، ربنا مايحكمك على يتامى وعوز تكفلنا لا يا عم الله الغنى

-------------------------------------------------------------------------------------------------------------

على فكرة أصل وأنا بأكتب الموضوع أفتكرت نكته بتقول " واحد إتصل بمراته وقالها حضري نفسك عشان هانتعشى بره .. رجع لقاها حاطه الطبلية على بسطة السلم "

ميتهيألي الست دي زملكاوية ... بس مش إنتي يا نانو ولا أنتي يا بنت النيل لإن أنا عارف إنكم بتاكلوا على السفرة ام 8 كراسي ونيش وشوفونيرة كمان .. ممكن تكون زملكاوية بقى لها كتير ماتعشتش بره وساكنة في ميت عُقبة وإنت رايح على أمبابة كده -_-

اما بقى الست اللى بتقول عليها دى هى زملكاويه بس تلاقيها متجوزة واحد اهلاوى فطبعا بهت عليها بلونه الاحمر :closedeyes:

مش قولتلك بلاش مانتاش قدنا

تم تعديل 26 ديسمبر 2006 بواسطة بنت النيل

[نانو]

يارب يخليك يا سينو سينو

ده العشم برضه ( العشم اللي في برج الفيصيليه )

بس نفسي موووووووووووووووووووووووووووت اقولك علي سر :closedeyes:

انا اصلا مش زملكاويه ولا باطيق الزمالك ولا سيرته ولا لونه ولا مرتضي ولا......كفايه كده

انا اصلا اهلويه يا س س اخا عن اب ...اه والله -_-

[se_ Elsyed]

نانو

إنتي من الاحرار

وأنا من هنا ورايح هاتبنى قضيتك

الحمد لله يارب

نانو طلعت أهلاويه تكتمن إيمانها

معليش يا نانو .. فرجو قريب ....

-----------

بنت النيل

عشاكي عند المُنظمة برضوا

بس بعد يوم السبت

[nash]

ولولولولولولولوللويييييييي -_- :mellow:

مبروك..مبروك يانانو...أخيرا يا ضنايا..

أخيرا..بوحتي بالسر...

يا ألف نهار أبيض يا ألف نهار مبرووك

عشاكي عندي يا بطه...

أأمري..وأختاري..من كنتاكي لحد هارديز... :mellow:

أنتبهي للأعداء يشوفوا ردك....مع أننا ناس جامده ومابنخافش...بس من خاف سلم...

والجري نص المجدعه :closedeyes:

[kokowawa1979]

لم أكن أرغب بصراحة بالتعليق على كلام بعض الإخوة الأهلوية الذين تناسوا الأربع سنين العجاف الذين فقدوا فيها الدوري والكأس وكل البطولات - نسوا أن الجهبذ جوزيه كان يقوم بوضع وائل جمعة كرأس حربة في الوقت الذي كان فيه أحمد بلال على الخط !!!

نسوا ثلاثيات واربعات الاسماعيلي والزمالك !!!

نسوا أ، اتحاد الكورة رأسه يوما من الأيام رجلا من الأهلي كان همه الأول هو كيفية اسقاط أندية مصر من حسابه بل والمنتخب المصري نفسه حتى يتمكن من التفرغ لناديه والعمل على اصلاح شأنه فقام بوضع قانون انتقال اللاعبين في منتصف الموسم الذي كاد أن يسقط فيه الأهلي إلى دوري المعلم حنكورة !!!!! فتم ضم أبو تريكة من الترسانة - وهو يشكل 90% من فريق الأهلي وحده الآن - وضم بركات وحسن مصطفى وعماد النحاس وغيرهم والحمد لله أنهم نجدوا الفرقة التي كانت تنهزم من طوب الأرض !!!

أقول ذلك لنرى أن رجال الأهلي إذا تسلموا موقعا قياديا تجدهم لايبحثون إلا على مصالحهم الشخصية ومصالح ناديهم فقد أتي لنا الجهبذ بتارديللي ومعه غرق منتخب مصر إلا إن هذا لايهم المهم الأهلي وبس !!!

أما عن الإعلام فحدث ولاحرج فالكل يغترف من جريدة الأهرام لصاحبها السيد حسن حمدي المحترم ولايهم الصحفيين بعد ذلك الذمة أو الضمير لإن حسن حمدي مثل وقدوة لهم !!

حقيقة أعذر جماهير بورسعيد والاسماعيلي حينما يضعون لافتات تقول مابنحبكش ياأهلي وهم يعنون بالطبع الحكومة لإنه نادي الحكومة !!!!!!!!

أعجبني جدا رد الأخ الفاضل الرصين أبو إيمان فأهلا ومرحبا بك

[Modest]

انا اصلا مش زملكاويه ولا باطيق الزمالك ولا سيرته ولا لونه ولا مرتضي ولا......كفايه كده

انا اصلا اهلويه يا س س اخا عن اب ...اه والله -_-

و الأستاذ زوجك العزيز الزمالكاوي مش كان المفروض يسأل عن انتمائك ده قبل ما يتقدم لك؟ :closedeyes:

أنا شخصياً سألت عن مراتي لقيتها مش اهلاوية قلت يبقى على بركة الله

[kokowawa1979]

ليت العنوان يتم تغييره إلى : تبرعوا لصالح حكام مباريات الأهلي بعد فضيحة مباراة إنبي النهاردة بشهادة خالد جاد الله نفسه !!! والله فضيحة

الحكام بيصعب عليها تعادل أو هزيمة الأهلي !!!

[Modest]

إنتهت منذ دقائق مباراة الأهلي و إنبي بفوز الأهلي 2/1 في الوقت بدل الضائع "كالعادة" مع إلغاء هدف صحيح لإنبي بشهادة مُحلل قناة النيل للرياضة "الأهلاوي" خالد جاد الله.

الأهلي يكسب يخسر .. و بأي طريقة و خصوصاً الطرق التي تعودنا عليها في العديد من المباريات .. نو بروبليم :angry2:

إنما مذيع المباراة يعبِّر عن أهلاويته بهذه الطريقة البشعة فهذا غير مقبول و كأن الأهلي كان يلاعب إسرائيل.

بعد الهدف الثاني للأهلي متهيألي كان ناقص يرقص عشرة بلدي و ينزل يبوس عماد متعب و هو يردد بصوت عالي "الله عليك .. الله عليك .. الله عليك تسلم رجليك"

أنا صعب أُستَفز (بضم الألف) .. لكن هذا الشيء الذي كان يذيع الماتش استفزني بصورة رهيبة... و كان شعوري سيكون مماثل إذا كان المذيع زمالكاوي بهذه الطريقة الفجة في مباراة بين فريقين مصريين.