أكفل زملكاوي .. يكفيك شر البلاوي

[Ahmad Farahat]

أنا معروف في باب الرياضة بروحي الرياضية-على الأقل في المنتدى ده- عشان كده اترددت كتير قبل ما اتكلم هنا..........

بس ما انكرشي إن الموجودين هنا أغلبهم هزروا وضحكوني وقطعوا قلبي من الضحك كمان...........

ولا أنكر الحزن الذي انتابني عندما علمت أن العزيز جدا على قلبي موديست طلع زملكاوي مش ممكن الرقة والشاعرية والكلاسيكية الجميلة دي تطلع زملكاوية ..........أنا اتغشيت يا رجالة...........!!!!!!!!!!!

بس مش مهم!!!!!!!!!!.............

بحبك برضه يا موديست.............

وما دمناهنهزر نهزر............

يعني مينفعشي أتكلم بالطريقة اللي بيتكلم بيها البعض هنا ................

التحليلات يا إخواني وحتى الشتيمة والخناق مكانهم في باب الرياضة.................

وادينا بنتخانق كويس هناك!!!!!!!!!!!!....................

أنا أهلاوي طبعا...............

ودي علامة العزة والشموخ................

وعلامة الجودة برضه...............

بس عايز أسأل سؤال جد...........

عندما حمل الأهلي لواء الكرة المصرية, ألم يكن على قدر المسئولية؟.............

ألم يرتفع بالكرة في مصر؟.............

ثم لماذا الحديث عن أبي تريكة وكأننا انتفعنا به فقط كأهلاوية؟.............

عفوا أعزائي الزملكاوية لقد انتفعنا به جميعا كمصر في الوقت الذي قل فيه إنتاج حازم إمام ولا عيب في هذا.....

ثم لأنني قرأت معلومة خاطئة هنا............

هناك من قال أن وائل جمعة كان يلعب مهاجما في الوقت الذي كان يجلس فيه أحمد بلال إحتياطيا وأثق تماما في خطأ تلك المعلومة.............

وإلى قائلها أقول............

يا أخي لقد كان مصابا..............

وليس هو فقط...........

كان متعب المجهول آنذاك -بالنسبة إلى الأهلي- وأصيب بالأمارة في مباراة غزل المحلة وهي المباراة الأولى لجوزيه في ولايته الثانية للأهلي والتي انتهت أربعة واحد لصالح الأهلي..............................

أما بلال فقد أصيب بعدها في الدور الثاني..............

الإحتراف الداخلي في مصر لمّع بالبلدي كده الجواهر المدفونة.............

والقائمة طوييييييييييييييييييييييييله.............

وفي الزمالك قبل الأهلي................

أنا عن مباراة إنبي أقول..............

هناك ضربة جزاء واضحة لمتعب في الشوط الأول...............

كما أن الهدف صحيح...............

وأخطاء الحكام واردة............

كما حدث مع الزمالك في مبارايات كثيرة................

بس ده مش مهم................

عموما أنا باعترف إني معرفتش أهزر ....قوي....

بس أنا مستعد مع كل الأهلاوية على كفالة الزملكاوي مش كده وبس والتبرع ولو بلعيب............

إيه رأيكوا في حسام حسن............

بس أنا شايف إن الأولى التبرع ولو بعضو مجلس إدارة..............

كنت عايز أقول حاجة كمان بس بعدين.........

لما أشوف ردودكوا هتبقى إيه............

[drhouba]

إنتهت منذ دقائق مباراة الأهلي و إنبي بفوز الأهلي 2/1 في الوقت بدل الضائع "كالعادة" مع إلغاء هدف صحيح لإنبي بشهادة مُحلل قناة النيل للرياضة "الأهلاوي" خالد جاد الله.

الأهلي يكسب يخسر .. و بأي طريقة و خصوصاً الطرق التي تعودنا عليها في العديد من المباريات .. نو بروبليم :angry2:

إنما مذيع المباراة يعبِّر عن أهلاويته بهذه الطريقة البشعة فهذا غير مقبول و كأن الأهلي كان يلاعب إسرائيل.

بعد الهدف الثاني للأهلي متهيألي كان ناقص يرقص عشرة بلدي و ينزل يبوس عماد متعب و هو يردد بصوت عالي "الله عليك .. الله عليك .. الله عليك تسلم رجليك"

أنا صعب أُستَفز (بضم الألف) .. لكن هذا الشيء الذي كان يذيع الماتش استفزني بصورة رهيبة... و كان شعوري سيكون مماثل إذا كان المذيع زمالكاوي بهذه الطريقة الفجة في مباراة بين فريقين مصريين.

صديقى الزملكاوى المفروس مودست إنت أول مره تلاحظ الكلام ده ؟ ده الكلام ده بتتوارثه الأجيال فى البلد دى بس إحنا اللى ما بنعرفش نتفرج و إن شاء الله ربنا يكرمك و ما تديش مسدات لسين سين و تتصل تكلمه كمان قول يا رب

تم تعديل 26 ديسمبر 2006 بواسطة drhouba

[أبو حميد]

لا بقى كده الموضوع زاد عن حده أوي وأحنا ساكتين ومش عاوزين نتكلم.

الموضوع ده مليان بالتريقة الزيادة عن الحد المقبول من عنوانه المستفز لمحتواه وكل يوم عمال يزيد والواحد ساكت وبيقول خليهم يفرحوا يومين.

بس للصبر حدود

وأنا برجو من المحاوين الأهلويه الجدعان عدم المشاركة في هذا الموضوع والإكتفاء بهذا القدر والحفاظ على روح المودة مع اخوانهم الزملكاويه في ظل الظروف الحالية للفريق اللي أحنا بنشجعه.

لكن لو الموضوع ده طول عن كده فأحنا كزملكاويه هنبدأ في الهجوم والهجمات الإنتحارية ويا قاتل يا مقتول.

زملكاوي للأبد .

مع أني كنت بطلت أهتم بالكورة بس مقدرش أسمع الكلام ده كله واقعد ساكت.

إلا كبرياء الزمالكاويه يا رجالة أحنا نتهزم بمزاجنا وعارفين أن الأهلي هو اللي بيكسب دايما حتى لو الزمالك احسن منه 100 مرة لكن أحنا بنقاوم ضد الأغلبية المستبدة وما بنجريش ورا المكسب المضمون أحنا أصحاب مواقف ودي بطولة لوحدها ومنقبلش التريقة من أي حد.

[drhouba]

يا هوبا ما تاخدش الامور على صدرك وخليك كول

مال الإشراف ومال التشجيع ؟

وبعدين إنت هاتقف لي عالواحده

بص كده

عشاكي عندي بإذن الله

يعني الحمد لله لا جبت سيرة هُبل ولا اللات والعُزى :angry2: عشان حضرتك تقول

سين سين إنت نسيت تقول إن شاء الله و لذلك أبشرك بما هو آت

وما تزعلش يا سيدي

يارب الأهلي يتغلب - من ورا قلبي - عشان نانو تتبسط وتنتهي مشاكلها العائلية وتتعشى على بسطة السلم مش بره

وهاغير يا سيدي عنوان الموضوع لـــ " عشي زملكاوي بره ولك الجنة " :angry2:

سين.... أيوه كده عاوز حتة الزملكاوى الفطريه اللى بتتولد فى كل بنى آدم تظهر عليك لأن الإنسان زى ما إنت عارف بيتولد على الفطره و بعد كده بيتلوث يبقى أحمر أو أخضر أو أى لون إنكشارى و السلام بس إنت عارف دايما الخير هو اللى بينتصر فى الآخر و لذلك فإحنا مطمئنين و شعارنا ( نأكل بره نأكل جوه الزمالك هوه ... هوه ) :wub:

تم تعديل 26 ديسمبر 2006 بواسطة drhouba

[Scorpion]

انا دخلت غلط هنا و الا ايييييه....

ده باب الأبتسامات ... يعني منطقتي .. و السيد الرئيس ادالي جرين كارت فيه ....

باب الرياضة فوق شوية علي ايدك اليمين بعد عم سيد بتاع اللب ,,,, هنا الزعل مرفوع و الشكك ممنوع ....

نهدي اللعب بقي و نرجع نضحك مع بعض .. و سيبكم من الزمالك و البتاع ده اللي بيشجعه سي السيد .. مش فاكر اسمه ايه بصراحة .. بس هي حاجة شيوعي ...

و بمناسبة سي السيد ... اللي حيتريق عالزمالك في الباب اللي انا مسئول عنه ... حتأشكف عليه و اقفله الموضوع و حيتلدع انذارين صفر و طرد احمر .. علشان تنبسط ... عندك حاجة تقوللها ....

افترا بقي .....

و بعدين الفولة بانت لبتها ... و الخبر في كل الجرايد "الأهلية" و الأنترناسيونالية ...

عاجل لرويترز :

القبض علي عصابة تحتال من خلال الشبكة العنكبوتية علي فاعلي خير .. و تتاجر بأستغلال كبوة جواد الكرة المصرية الأصيل .. فريق الزمالك لصاحبه المعلم مرتضي منصور يطول عمره و يزهزه عصره و ينصره علي مين يعاديه هاااااااي هي ... و بأستخدام معسول الكلام و الشعارات التي تدغدغ شعور العامة استطاعوا الحصول علي مبالغ طائلة من خلال عملية تبرعات تمت تسميتها "أكفل زملكاوي ".. و من خلال متابعة تلك الأموال اللي ماشفش منها اي زملكاوي مليم احمر .. تم التوصل الي حساب بنكي تم فتحه بأحد بنوك السعودية ...

في الصورة رئيس العصابة و الذي سيتم ترميز اسمه ب ( س.س.) و هو جالس أمام احد المطاعم الفاخرة بالسعودية بعد ما صرف جزءآ كبيرآ من المبلغ علي معدته هو و اصحابه الشيوعيين .. اكمنه طول عمره طفس )

انتهي الخبر

شفت يا سي السيد .. لو كنت عملتها عملية من عمليات عصابة حساس .. و اتقاسمنا فيفتي فيفتي .. ما كنتش شبحت عليك .. اللي ياكل واحده .. يحصله اييييييييييه ؟؟؟؟؟؟

عالعموم .. حقك ... اتريق زي ما انت عايز ... بس خليك فاكر ... الدنيا عاملة زي ال... زي ال ....

زي المرجيحة .... مرة فوق و مرة تحت .... و مسيرها حتلف ...

و ساعتها يا حلو :angry2:

[se_ Elsyed]

أنا مستغرب فعلاً للموضوع اللي بقى له أكتر من سنة يحمل طابع فُكاهي ومع ذلك إتقلب إلى باب الرياضة للجميع ....

لا تعليق

وبرضوا سيظل هذا الموضوع مُخصص للفكاهة ليس إلا .... وموعدنا يوم السبت .. وإبقوا خلوا سكربيون ينفعكو -_-

[Modest]

عاجل لرويترز :

القبض علي عصابة تحتال من خلال الشبكة العنكبوتية علي فاعلي خير .. و تتاجر بأستغلال كبوة جواد الكرة المصرية الأصيل .. فريق الزمالك لصاحبه المعلم مرتضي منصور يطول عمره و يزهزه عصره و ينصره علي مين يعاديه هاااااااي هي ... و بأستخدام معسول الكلام و الشعارات التي تدغدغ شعور العامة استطاعوا الحصول علي مبالغ طائلة من خلال عملية تبرعات تمت تسميتها "أكفل زملكاوي ".. و من خلال متابعة تلك الأموال اللي ماشفش منها اي زملكاوي مليم احمر .. تم التوصل الي حساب بنكي تم فتحه بأحد بنوك السعودية ...

في الصورة رئيس العصابة و الذي سيتم ترميز اسمه ب ( س.س.) و هو يخرج من احد المطاعم الفاخرة بالسعودية بعد ما صرف جزءآ كبيرآ من المبلغ علي معدته هو و اصحابه الشيوعيين .. اكمنه طول عمره طفس )

انتهي الخبر

آه.. صح ... انا شاهد -_-

شاهدت هذا الحوت و أعوانه في يومين متوازيين أثناء تناولهم العشاء في مطعم أعلى برج الفيصلية عندما تنكرت على هيئة "طبق لحمة انتركوت" على الترابيزة اللي جنبه و سمعت كل ما يدور بينهم و رأيته أثناء توزيعه للغلة التي كانت معبأه في 14 شوال مقاس XXL

لكن لا توجد جريمة كاملة يا سيدي الفاضل .. و كل الشكر للشرطة في عيد الأم.

و يوم السبت إن شاء الله هانكسب .. و برضه هاتعشى في البيت

[se_ Elsyed]

سيدي القاضي

الحلو بانت لبته .. بعد ما دابت قشرته

فهذا المُجرم الأثم الماثل امامكم وعامل فيها شاهد إثبات وعايش في دور ربع جنبيه فضه وبييجي يشهد في القضايا بدولار وإتنين في القضية من دول ... إعترف بقرقوشة لسانه وقال

" و من خلال متابعة تلك الأموال اللي ماشفش منها اي زملكاوي مليم احمر "

فخلي بالك يا سيادة القاضي من الكلمتين دول لإن دليل براءتي ونزاهتي فيهم ... فمن المعروف يا سيادة القاضي إن مافيش زملكاوي بيرى اللون الاحمر ... والمجرم هنا قال " مافيش زملكاوي شاف مليم أحمر "

وبعدين حتى الصورة يا باشا اللي جايبها دي إلتُقطت في دولة أوروبية وشوف سعادتك بنفسك لبس العساكر عامل إزاي .. زي بتوع الكير سيرفيس .. وحد يا باشا يحط جراب طبنجه لونه أبيض في جنبه ؟

وازيدك من الشعر بيت

أنا شفت ميسد كول وإس إم إس من سكوربيون الشهير بــ " آل سكوربيوني على وزن آل كابوني " إلى ذلك الشاب الصغير الأغر موديست وهو بيقوله " عايزك تشهد زور معايا يا موديست ضد سين سين وهاشوفك بتأشيرة مبلولة لإيطاليا وهاشغلك في أجدعها محل بيتزا عندنا في باريس " ولقد صدقه المسكين وهو لا يعلم إن سكوربيون رئيس عصابة للمتاجرة في البشر وأخرها الستميت واحد مصري اللي لبسهم في الحيط ..

وحتى يا سعادة البيه القاضي من شهادة موديست تحس إنه طيب وعلى نياته ولا ليه في الإجرام ولا غيره وبيدوخ لو شرب كوباية شاي بلبن .. بص يا باشا قايل إيه في شهادته " شاهدت هذا الحوت و أعوانه في يومين متوازيين "

بالله عليك يا باشا عمرك شوت الأيام بتتوازى ؟

اهو إنت كنت علمي رياضه وعارف الحاجات دي

يعني مثلاً عمرنا شوفنا الإثنين والثلاثاء ماشيين جنب بعض ومطبقين ورديه ؟

يعني معنى كده الإسبوع ممكن يبقى 6 أيام وإحنا مش عارفين ؟

الحمد لله ... خربقت لهم القضيه وربنا هايوقعهم في شر أعمالهم ... وإبقى خلي مرتضى منظور يخرجهم بقى

[Eldisel]

بمى اني اهلوى النسب ( ابويا واخويا واجدادي اهلوية وولود اهلوية ) فانا عاوز اشارك في التبرعات باتنين مليم احمر وزلوية مش :blink: ويجعلة عامر

وانا سمعت ان اللحمة الزملكاوي هتنزل في العيد الكبير ....... وبعدين انا سمعت اخر تعليق من سائق الميكروباص الي كنت ركبة امبارح في وقت متش الاهلي وامبي وكان السواق من الاحرار ولمى قلتلة ان الاهلي اتعادل وكان لسة المتش مخلص قال لي :( هو الاهلي عاوز اكتر من الي عملة اية والله كتر خيرة النادي رفع اسم مصر والاهلوية .. وكمان الواحد حاسس ان الماتشات اللي جاية مش مهمة )

/////////////////////////////////////////////////////////////////////////////////////////////////////////////////////////////////////////////////////////////////////////////////////////////

خبر عاجل -_-

عمليات انتحار جماعيه على كوبر قصر النيل في القاهرة لجماهير الزمالك التي رُفض( بضم الواو وكسر الفاء ) قبول نقل انتمائها الي النادي الأهلي ومازالت المظاهرات مستمرة امام النادي الاهلي من قبل جماهير الزمالك لتغير انتمائهم رسمياً واخذ التطعيمات الازمة لذلك رغم فوز الزمالك على حرس الحدود امس 3/2 بالعافية :ph34r:

[واحد تاني]

الدفاع يتفضل ...

عنك انت يا سيكو سيكو ...

بسم الله ...

واحد تاني ... المحامي بالنقض والاستئناف ومحكمة الفن الغنائية ... احم احم ... امن الدولة العليا ... حاضر عن المتهم

يا حضرات المستشارين ...

ان موكلي الماثل امامكم في قفص الفراخ ... عفوا -_- ... قفص الاتهام , لبرئ براءة الذئب من دم بن يعقوب

استحلفكم بالله ... فلتنظروا اليه ... انظروا الى هذا الحمل الوديع ...

انظروا لابتسامته البريئة وانتم تطئونها بظنونكم ... هذا الانسان الذى كان جل همه هو مد يد العون والمساعدة لفئة من بني وطنه , فئة - لن نقول انها ضالة - ولكنها مضللة ...

جل ما اراده هذا الشهم ... هذا العتي ... هو مساعدتهم ... وشحذ عطف ذوي القلوب الرحيمة لكفالتهم ... او نقل كفالتهم ...

سيدي القاضي ... حضرات المشتشارين ... :blink:

لم يثبت زميلي ممثل الادعاء اي مما ورد على لسانه من التوصل الي حساب بنكي تم فتحه بأحد بنوك السعودية ...

واليكم ايها السادة صورة من كشوف حسابات موكلي ببنك ناصر الاجتماعي - فرع بنها العسل ...

لتتأكدوا من انه قام بالفعل بفتح حسابا باسم الجمعية , جمعية "اكفل زمالكاوي في بيتك الهي يعمر بيتك" لجمع التبرعات والمساعدات من فاعلي الخير ...

ولتتأكدوا من ان كل مليم احمر او حتى قرش ابيض -بخطين حمر- قد دخل في حساب الجمعية ...

واليكم ايضا صور سندات استلام النقدية التي استلمها كل فاعل خير عند تقديمه للي يجود بيه في مقر الجمعية ...

والمفاجأة ايها السادة ... ارفق لكم هذا المستند الخطير ... والذي يدحض دعوى شاهد الاثبات الذي قدمته النيابة ...

وهو خطاب مسجل بخط يد الشاهد -بذات نفسه - يطلب فيه من موكلي ورفاقه رجال البر والاحسان -كما ورد بأقواله- المساعدة ومد يد العون ...

إلى رجال البر و الإحسان :) .... سي السيد و ياسو و " كليو :wub: "

نحن أسرة مكونة من 5 أفراد

زمالكاوية منذ نعومة أظافرنا

حاولنا التخلص من هذا الداء منذ وصول مرتضى منصور إلى الحُكم و لم نستطع

نسألكم مد يد العون .. نسألكم مد يد العون

فقط إلى أن يرحل مرتضى منصور

يمكنكم استثناء الزوجة من هذا الطلب لإنها مالهاش في الكورة لكن العيال مالهمش ذنب .. مالهمش ذنب .. مالهمش ذنب

نتمنى أن يلقى طلبنا هذا أهتمامكم و لكم جزيل الشكر على حسن إصغائكم :wub:

مرفق مع الطلب بحث اجتماعي صادر عن مديرية الشئون الاجتماعية بميت عقبة يؤكد صدق كلامنا

ملحوظة: برجاء بحث هذا الطلب في سرية تامة وعدم نشر إسمي على الملأ حرصاً على سمعة أولادي و مستقبلهم :)

و "بوناءا" على ما تقدم ... ارجو منكم ايها السادة الا تأخذكم بموكلي شفقة ولا رحمة ... واطالب بتوقيع اقصى العقوبة عليه

والله ولي التوفيق ,,, :ph34r:

[MZohairy]

اخواني موديست و واحد تاني

ارجوا الا يكون موقفكم القانوني كخصوم في هذه القضيه ينسيكم انكم فنانان كبيران اخوان محبان شعبان رمضان بتنجان :ph34r:

فلندع ما لقيصر لقيصر و نعاود العلاقه و الرابط الرئيسي بينكما الى ما كان عليه و هو فنكما الراقي الساقي الباقي

فلنجعل الرياضه للرياضه و الفن للجميع :blink:

فأنا أهلاوي مثلا لكن غصب عني بشجع الترجي و الصفاقسي التونسي -_-

حبوا بعض ياولاد

حبوا بعض :wub:

[واحد تاني]

متقلقش يا ريس ... :ph34r:

شغلنا الصبح في المحكمة لا يمكن يأثر على شغل الفرقة بالليل ...

ورق انت بس وشوفلنا اي (سرح فراولة) والا (سيد ميلاد عناب) -_-

[Modest]

لتتأكدوا من انه قام بالفعل بفتح حسابا باسم الجمعية , جمعية "اكفل زمالكاوي في بيتك الهي يعمر بيتك" لجمع التبرعات والمساعدات من فاعلي الخير ...

ولتتأكدوا من ان كل مليم احمر او حتى قرش ابيض -بخطين حمر- قد دخل في حساب الجمعية ...

أنا ما شفتش و لا منديل احمر من اللي سي الأستاذ بيقول عليهم

[se_ Elsyed]

تم تعديل العنوان ليتناسب مع روح المرحلة التي نمُر بها

-----------

أ / واحد تاني

بأقولك يا متر

أنا بأقول نحول أوراق موديست وسكوربيون لفضيلة مفتي الديار الكروية ونخلصهم من بره بره .. أنا سمعت إن في عقوبة جديدة منزلنها في السوق إنما إيه .. نتايجها مضمونه

بيقولك يا سيدي بيحكموا على المتهم الذي يثبُت إتهامه ويطلع متهم في الاخر إنه يتفرج على ماتش الـ 6/1 خمس مرات في اليوم ولمدة إسبوع لوحده وفي أوضه ضلمه ... أظن ما فيش إفتنا ( إفترا ) أكتر من كده .. بيتهيألي بسكوتايه زي موديست ممكن يفيص مننا في أول يومين ... أما سكوربيون فمونكن يعصلج وياخد معانا إسبوع ...

على العموم نجرب ونشوف

نادي عالقضية اللي بعدها

[otaka]

الذ حاجه انه انا شفت اهلاويه بقوا زملكاويه

لكن عمرى ما شفت العكس

طبعا انا بتكلم فى الناس الكبار مش الاطفال يعنى

و الغريب ان الناس دى كلها تحولت من الاهلى للزمالك فى خلال فتره السبع سنين فى التسعينات اللى سيطر فيها الاهلى على الدورى و ده فعلا كان شئ غريب و الادهى انه الشخصين فعلا كانوا بيحضروا ماتشات الاهلى كل اسبوع فى الاستاد

و انا هنا بتكلم عن حاجه شفتها بعينى يمكن الشخصين دول فى بينهم اختلاف عجيب و هو ان الاول عائلته كلها زملكاويه فطبيعى انه يكون زملكاوى

لكن التانى اهله كلهم اهلاويه و والدته كانت فى فرقه الطائره بتاعه الاهلى و خاله لاعب سابق

دى قصه للتاريخ يعنى ولا تنفى ان الاهلى و الزمالك وجهين لعمله واحده

و يا ريت الاهلويه يكفلوا الزملكاويه حبه زى ما الزمالكاويه كفلوهم ايام بترو اتلتكوا كده

[Scorpion]

يا سيااادة حاكم مصر و السودان ...

اننا نربأ عن أنفسنا ان ننزل الي المستوي البيئي (من بيئة) .. الذي يريدنا ان نتدلدل فيه هذا الشيوعي الأمبريالي الراديكالي المتوسط ...

نحن ... و اعوذ بالله من كلمة نحن ... لكن برضه نحن فريق الصفوة ...

يا حضرات المعتدلين ...

لقد بني الدفاع دفاعه علي ان مافيش زملكاوي بيري اللون الأحمر ...

يا سلالالالالام ... يا سلالالام سلم

اومال الخطين اللي ف نص الفانلة دول لونهم ايه يا سيادة الزميل ... شفتشي ؟؟؟ تيريكواااز ؟؟؟

اومال الدم اللي بيسيح من نافوخي كل مرة ارجع البيت متأخر بعد ماتش للزمالك و الاقي ام جونيور مستنياني بالنشابة .. لونه ايه يا افندي .... ازرق ؟؟؟

اومال قرص الشمس الدامي بتاع عماد حمدي اللي بنشوفه في سهرة كل تلات ... لونه ايه ... فنضااام ؟

طعن الدفاع يا سيدي المشتشار في الزي الرسمي للشرطة التي أشتركت و أقول اشتركت واخد بالك .. في القبض عليه ... نعم تمت عملية القبض بالسعودية .. و لكنها كانت عملية مشتركة دولية تمت تسميتها عملية النجم الساطع ... و تكونت من الشرطة الطليانية و الفليبينية و الموزمبقية بالأضافة الي مثيلتها السعودية ... و لقد تركوا للأيطاليين مهمة القبض عليه لأن العملية كانت في مطعم .. و ده تخصصهم ..

بينما شريكه و الذي سنرمز اليه بحرفي م.ز. ...حتي لا نضيع مستقبله هو و ابنه الرضيع ... فبهذه الصورة الدليل الكامل علي اشتراكه و علي توافر اركان الجريمة ..

سيدي البتاع ...

نحن هنا لا نطالب بعقاب هذا المحظوظ مؤقتآ ... و ان كنا لا نمانع في سحله ... و لكننا اردنا ان نظهر للعالم اجمع ... للعالم جمعاااااء ... للعالم جامعاااااات ... اننا الزملكاوية لسنا في حاجة الي كفالتكم .. وفروها لأنفسكم لما ييجي الدور عليكم .... فالحمد لله الطابق مستور و الأشيا معدن .. و عندنا رصيد في البنك يكفينا نشتري دوري نلعب فيه لوحدينا .. و برضه نطلع التالت .. بمزاجنا ...

و سونة اجدع ناااااس

[بنت النيل]

يا سيااادة حاكم مصر و السودان ...

اننا نربأ عن أنفسنا ان ننزل الي المستوي البيئي (من بيئة) .. الذي يريدنا ان نتدلدل فيه هذا الشيوعي الأمبريالي الراديكالي المتوسط ...

نحن ... و اعوذ بالله من كلمة نحن ... لكن برضه نحن فريق الصفوة ...

يا حضرات المعتدلين ...

لقد بني الدفاع دفاعه علي ان مافيش زملكاوي بيري اللون الأحمر ...

يا سلالالالالام ... يا سلالالام سلم

اومال الخطين اللي ف نص الفانلة دول لونهم ايه يا سيادة الزميل ... شفتشي ؟؟؟ تيريكواااز ؟؟؟

اومال الدم اللي بيسيح من نافوخي كل مرة ارجع البيت متأخر بعد ماتش للزمالك و الاقي ام جونيور مستنياني بالنشابة .. لونه ايه يا افندي .... ازرق ؟؟؟

اومال قرص الشمس الدامي بتاع عماد حمدي اللي بنشوفه في سهرة كل تلات ... لونه ايه ... فنضااام ؟

طعن الدفاع يا سيدي المشتشار في الزي الرسمي للشرطة التي أشتركت و أقول اشتركت واخد بالك .. في القبض عليه ... نعم تمت عملية القبض بالسعودية .. و لكنها كانت عملية مشتركة دولية تمت تسميتها عملية النجم الساطع ... و تكونت من الشرطة الطليانية و الفليبينية و الموزمبقية بالأضافة الي مثيلتها السعودية ... و لقد تركوا للأيطاليين مهمة القبض عليه لأن العملية كانت في مطعم .. و ده تخصصهم ..

بينما شريكه و الذي سنرمز اليه بحرفي م.ز. ...حتي لا نضيع مستقبله هو و ابنه الرضيع ... فبهذه الصورة الدليل الكامل علي اشتراكه و علي توافر اركان الجريمة ..

سيدي البتاع ...

نحن هنا لا نطالب بعقاب هذا المحظوظ مؤقتآ ... و ان كنا لا نمانع في سحله ... و لكننا اردنا ان نظهر للعالم اجمع ... للعالم جمعاااااء ... للعالم جامعاااااات ... اننا الزملكاوية لسنا في حاجة الي كفالتكم .. وفروها لأنفسكم لما ييجي الدور عليكم .... فالحمد لله الطابق مستور و الأشيا معدن .. و عندنا رصيد في البنك يكفينا نشتري دوري نلعب فيه لوحدينا .. و برضه نطلع التالت .. بمزاجنا ...

و سونة اجدع ناااااس

ياااااااااسلام سلم يااااااااااااا سلام :blush:

اشجينى يا اسكوربيون فينك ياعم من زماااااااااان :closedeyes:

امتعنا واثلج صدورنا

هما دول الزمالكويه كل يوسع

وسع يا جدع وسع يابنى اسكروبيون هيرش المايه

[se_ Elsyed]

اخونا ديروجبا بيتكلم عن مباراة بيترو اتليتكو وان ازاي الزملكاوية كفلونا

انا كنت شاهد بصراحة وكل زملكاوي بالامارة كان جايب كافوله معاه في مباراة الـ 6-1 اصلها كانت في نفس السنة

[Diab]

اخونا ديروجبا بيتكلم عن مباراة بيترو اتليتكو وان ازاي الزملكاوية كفلونا

انا كنت شاهد بصراحة وكل زملكاوي بالامارة كان جايب كافوله معاه في مباراة الـ 6-1 اصلها كانت في نفس السنة

wst:: wst:: wst:: :wub:

:D :D :D :lol:

[se_ Elsyed]

إسكت يا دياب يا ولدي خليها تعدي على خير النهاردة وبعدين نتكلم ..

اللهم لا شماته

الأمر عظيم والمصاب جلل والرزق عالله