مسرح العبث

[ezzat afifi kotb]

            مسرح العبث

فرقة مسرح حوش البيت .... تحت السلم وجدت نص

قالوا حنمثل اوبريت .... والعرض ح يبدأ عشرة ونص

واحد قال وبدون احراج .... انا ع الفرقة اتوليت

انا متخصص ف الاخراج ....ومعايا اوسكار شربة زيت

قال للفرقة اقعدوا ع البسطة ...خلونى اوزع ف الادوار

دور للثورى ودور للاسطى ... وادوار مجاميع الاشرار

ح فن ف عرض يهز الخلق ... ويرفع راية الفن الهزلى

والتنظير بين غرب وشرق ...وبين الاتنين تلعب نازلى

احدث صيحة ف الاخراج ...الشعب ف دور الصمت الكامل

بسياسة الجزرة والكرباج ....والتعتيم والجهل الشامل

سلط كل الضوء ع القادة .... والمجاميع ف الجانب المظلم

يعنى الشعب ح يبقى وسادة ... يرتاح فوقها البطل الملهم

ومعاه هيئة تكنوقراط ... فاتحة مراجع للتمويه

واختبارات سبب الاحباط ...واستعراض خدنا التوجيه

يبقى متختخ وبنضارة ....وبشهادات فوقها التقدير

لو مرة اترشح لوزارة ....ح يبرر كل التقصير

وايها علم نهايته بلوجيا .... يبقى الحاكم فيه الاول

نبع الفكر وراسه العليا ....والجامعات منه بتتسول

الفصل الثانى مشاهد البيعة ... وعرض بايعنا يا مواطنين

رقص فيها شباب الضيعة ...واقفل يومها على الدواوين

رص الصناديق للتصويت ....فوقها قوائم فيها رموز

رمز الحافى والشلاليت .... والتسعات دايرة ومهموز

تحت قيادة الكابتن مرسى ... اصرف للهتيف لحلوح

يهتف للقاعد ع الكرسى ... نفديك بالدم وبالروح

وهات الامن على البوابة ... يمكن نحتاج حبة اكشن

وذخيرة حية فوق الدبابة ... لو الشعب ابتدى يسخن

ابداع من بنات الافكار ... والعرض اصيل ميه الميه

حبة بكينى وحبة خمار ... صراع الثورى والاصولية

واحد قال له يا مخرج دار ... والايرادات ح نجبها منين

والفاشلين قاعدين بنوار ....والانتاج مرهون للدين

قال له بسيطة عايز قرشين ....طلع وسط العرض العالمة

الفرق ما بين العين والغين ....كشوفات تتوزع ف الضلمة

وحط بهار السكس ابيل ... ح تزيد ايرادات الشباك

لما لعاب الشعب يسيل ... زود اسعار الاستهلاك

الهى الناس ف الابداع ... يعنى المبدع من غير قيد

ارفع سعره مع الاقذاع ... واديله اعفا من التجنيد

واحدة قالت له يا ننوس عينه ...تيجى تحفظنى الشخصية

ويبقى ما بينا ملح وفينو ... وجواز عرفى ف السرية

وبرضة يا مخرج عايزين حانة .. فيها لواد كاو بوى يتنطط

عزف ورقص وكاس مليانه ... خاللى شبابنا الحلو يزأطط

واحد قال له فلان له لزمة ... لابس دور الثورى تمام

ليه شخصية وعنده كاريزما ... وراه الناس ح تعيش اوهام

قال له نعدل ف الاوراق .... ونطلعه ف نهاية العرض

تبقى القافلة من الحراق ... ونجيب الجماهير الارض

قال له دا كله كلام تمهيد ... ارسم ع الخشبة بطباشير

يعنى الحركة بالتحديد ... بين الصياد والعصافير

بس تأكد ع التلقين ... يقعد صاحى ف الكمبوشة

واوع يهاجم حد تخين ... يدونا علقة بالبرطوشة

ولما البطل الثورى يزعق ... حقنا ناخده مش احسان

ننشأ مصنع بعدها يغرق ... واكبر انتاجه الحرمان

واحد قال له العرض مهلهل ... فين الحبكة والموضوع

قال له استنى عليه اتمهل ... السسبنس يقوده الجوع

قال له الجوع هزمك من جوه ... رعشة ف ايدك نظرك زاغ

ناسى النخوة وناسى مروة ... حتى الكلوة تبيعها بصاغ

انهى العرض بأى ستارة ... تنزل ع الاحداث وتغطى

مهما يكون فى تاريخنا اثارة ... بأثر البطش الكل يوطى

والجمهور ع الخيبة يصقف ... م الافلاس ومشاعر الغم

واحد يجرى بعد ما يهتف ... عرضك عايز تغيير دم

عزت عفيفى قطب