هل تقبل تعمل ...... سبوبة؟

[واحد تاني]

انت دكتور

-تقبل تكتب للمريض 4 اصناف دوا فيهم صنف مش محتاجه وصنف البديل بتاعه له نفس التركيبة وبنص تمنه؟

-تقبل تعمل عمليه جراحيه ممكن تكون هى الخيار التاني بعد العلاج اللى لسه مجربتوش ؟

-تقبل تطلب منه تحاليل واشعات مش محتاج بعضها ؟

لأن دي سياسة المستشفى الكبير اللى بتشتغل فيه؟

انت مهندس

-تقبل تعمل تصميم فيه كل اللىOWNER يطلبه حتى لو كان ده هيطلع مبنى لا ينطبق عليه اي معايير ولا نسب جماليه معروفه للبشر ولا ينتمى لاى مدرسة معمارية ولا حتى كتاب (مفرد كتاتيب) .... من مبدأ ان الزبون دائما على حق؟

-تقبل توصف مواد غاليه بدون داعي تزود قيمة المشروع وتعرض بعد كده انك تعمل (VALUE ENGINEERING) يقلل التكلفة ويزود اتعابك ؟

-تقبل تعقد خطوات تنفيذ المشروع عشان تقوم بعملPROJECT MANAGEMENT) برضه عشان تزود اتعابك؟

انت محامي

-تقبل تكسب قضية لظالم رافعها ضد مظلوم (وانت عارف انه مظلوم) لانه هيدفعلك اتعاب كويسه؟

-تقبل تطلع واحد براءة وانت متأكد انه مذنب ..... بس لانك شاطر والقانون اعمى وكله بحسابه؟

انت مدرس

-تقبل تشرح فى الفصل على اد الفلوس اللى بتاخدها وأهو العيال هتفهم فى الدرس؟

-تقبل تحفظ الطلبة فى الدرس نماذج اسئلة الامتحانات وبس, المهم ينجحوا ويجيبوا مجموع يعمل لك سمعة عشان دروس السنة اللى جاييه؟

انت مبرمج

-تقبل تعمل فى البرامج بتاعتك (BUGS) تظهر بعد فتره عشان العميل يضطر يعمل عندك صيانة؟

انت محاسب

-تقبل تظبط الحسابات وتخليها متخرش الميه (واخد بالك؟) عشان الزبون يراعيك؟

انت حاجة تانية

-تقبل تعمل حاجة تانيه عشان خاطر اي حاجة تانيه وأهي سبوبة والسلام؟

افيدونا برأيكم افادكم الله .....

تم تعديل 16 مايو 2006 بواسطة واحد تاني

[Blue_mind]

لأ طبعا

[se_ Elsyed]

في بعض الحالات هاقبل ونص

زي حالة المهندس اللي الزبون بيطلب منه يعمل له عماره أو فيلا إن شالله على شكل كعبورة مكعبرة ... وأنا مالي .. قد يكون التصميم الجميل من وجهة نظري هو غاية في القبح من وجهة نظرة .. وبعدين هو اللي هايسكن مش أنا كمهندس .. بس الواجب بيقول إني أنصحة وأقوله على الصح .. ولو صمم على اللي في دماغه .. يبقى مابدهاش ...

بالنسبة للدكتور اللي بيعمل سبابيب فده بيبقى شيطان ولا يستحق أي شفقة أو رحمة لو سقط نتيجة إجرامة ... وشيء فعلاً بيحز في نفسي لما ألاقي إنسان المفروض إنه ملاك رحمة جعله الله سبباً لشفاء الناس ثم فجأة يتحول إلى تاجر جشع كل همه الفلوس وزيادة دخله على حسب جثث الآخرين وصحتهم .

- موضوع المحامي بقى .... تصدق بالله يا واحد ياخويا إني ساعات بأقعد مع نفسي أحمد الله وأشكره إني ماطلعتش محامي ... كي لا أتورط في قلب الباطل حق والحق باطل بحجة الثغرات وقوانين الإجراءات ... واللي كلهم بيبقوا متأكدين من إن فلان ده مجرم آثم ومع ذلك يقولك وأنا مالي هو أنا اللي عامل القانون .. وفي خضم ذلك بينسى القوانين الإلهيه وإن هناك عيون تراقبه وإن هناك أخرة وحساب .... مع الإعتذار لكل المحامين الشرفاء ( ودول بقوا في ندرة اليورانيوم )

- موضوع المبرمج والمحاسب .. شارح ومجاوب على نفسه ... وقد عرف الرسول الكريم الإثم أو الذنب بإنه ما حاك في الصدر وخشيت أن يطلع عليه الناس .. يعني لو واحد شريف ونضيف بيبقى بيفتخر باللي بيعمله ويتمنى إنه يشتغل في لاشارع عشان الناس تشوفه .. أما من يفعل مثل هذا المبرمج أو المحاسب بيبقى بيقول " يا حيطه داريني " وتجده دائماً يعمل في الظلام .

انت حاجة تانية

-تقبل تعمل حاجة تانيه عشان خاطر اي حاجة تانيه وأهي سبوبة والسلام؟

الأمور لازم تُعالج

case by case

أنا عن نفسي ساعات بأشتغل بمبدأ " أُربط الحمار مطرح ما يعوز الـ

الحمار

طالما هو عايز كده .. وكده ده مافيهوش مخالفة لضميري أولاً .. يبقى أتكل على الله وأربط

[واحد تاني]

في بعض الحالات هاقبل ونص

زي حالة المهندس اللي الزبون بيطلب منه يعمل له عماره أو فيلا إن شالله على شكل كعبورة مكعبرة ... وأنا مالي ..

طيب تعالى كده نمسكها واحدة واحدة

طالما هو عايز كده .. وكده ده مافيهوش مخالفة لضميري أولاً .. يبقى أتكل على الله وأربط الحمار

لو انت المهندس ده مثلا انا بقول مثلا :) وحسيت بقى ان الكعبورة دي هتوجعلك ضميرك لانك هتضيف للشارع كليب جديد فيه اسفاف ومسرسر عربي بايخ وفيلم مقاولات ملوش مضمون حاجات زى اللى بتدخل بيوتنا تفسد ذوقنا العام وتاخد بايد القيم والجماليات للانحدار اكتر واكتر هتفضل عند رايك ده؟

[khedr]

انت حاجة تانية

-تقبل تعمل حاجة تانيه عشان خاطر اي حاجة تانيه وأهي سبوبة والسلام؟

واحد تاني وحاجه تاني

طبعا مع الاختلاف الذي طرأ علي المجتمع والمفاهيم في هذا الزمن

اصبحنا نتحدث ونتكلم عن أشياء كانت في حكم ال....مفيش فيها كلام

مفيش فيها كلام ...مفيش فيها نقاش...مفيش فيها جدال

الثوابت ايام اجدادنا بل وايام ابائنا اصبحت في مهب الريح

مهما دارت عجله الزمان ومهما تغيرت الظرف ومهما اختلف الامور

واحد تاني لا يمكن يكون واحد تاني ولا تنفع معاه حاجه تاني

[Cleo]

كان فى شركتنا بنت شابة صغيرة من بتوع النظافة... كان عندها تشوه خلقى فى قدم رجلها بيسببلها ألام مبرحة..

المهم كشف عليها دكتور وقال إن لازمها تركيب 4 شرايح سعر الواحدة ألف جنيه (يعنى الإجمالى 4000 جنيه)..

المهم جيبنالها قرار علاج على نفقة الدولة... القرار صدر بقيمة 2000 جنيه بس... الدكتور من غير ما يراجعنا ولا يناقشنا قال انه هيعملها العملية (كتر خيره)..

فعلا عملها العملية وفتح رجلها ونشر عظمها واشتغل على قد ال 2000 جنيه اللى فى قرار الدولة وخيط على كدة :)

مع إنه لو كان ادانا خبر كنا قدرنا بفضل ربنا نجمع المبلغ الباقى

طبعا النتيجة الحتمية إن العملية فشلت والبنت فضلت تعانى من ألام مبرحة واضطرت تعمل عملية تانية اتكلفت 5 ألاف جنيه...

كل ده وهى منقطعة عن العمل طبعا بسبب ظروف إصابتها وبالتالى انقطع دخلها بسبب جراح ندل

[محمد عبدالعزيز]

أنا أرد عن نفسى, فأنا مهندس برمجيات, وتعرضت لمواقف مثل التى تحدثت عنها, أعمل سبوبة يعنى, بصراحة رفضت والمشروع الذى اشتركت فيه حاولت قدر إستطاعتى أن أعمل مايرضى ضميرى سواءً على حساب الشركة أو على حسابى شخصياً من سهر وعمل أيام اﻷجازات بدون مقابل, وطبعاً هذا ترك أثراً سيئاً لدى مديرى فى العمل وأصبحت أعانى من سوء المعاملة والتفرقة بينى وبين زملائى فى المعاملات المالية واﻷجازات وغيرها.

وعلى الجانب اﻵخر كان العميل راض جداً عن عملى وكانوا مصرين أن يبعثوا خطاب شكر للشركة على مجهوداتى ولكننى رفضت-عبيط طبعاً- وبناءً عليه تركت العمل فى الشركة.

[se_ Elsyed]

انقطع دخلها بسبب جراح ندل

عذراً للخروج عن الموضوع

عارفه يا كليو

أهو المفروض الطبيب - أسف لتسميته طبيب - اللي زي كده ومعروف وإنتوا عارفينه .. يتفضح فضيحة اللحمة في السوق .. ويتهدد إنه لو ماعملش العملية للبنت فسيتم كشفت حقيقتة القذرة أمام الناس ...

وخلي كده سُمعه سيئة تطلع على أي طبيب ويبقى يقابلني إذا حد إتعالج عنده ...

[واحد تاني]

جميل جدا ...

سمعنا وجهة النظر دي

في بعض الحالات هاقبل ونص

زي حالة المهندس ...

...

الأمور لازم تُعالج case by case

أنا عن نفسي ساعات بأشتغل بمبدأ " أُربط الحمار مطرح ما يعوز الـ

طالما هو عايز كده .. وكده ده مافيهوش مخالفة لضميري أولاً .. يبقى أتكل على الله وأربط

واتسال السؤال ده ومازال مطروح للاجابة

لو انت المهندس ده مثلا انا بقول مثلا :) وحسيت بقى ان الكعبورة دي هتوجعلك ضميرك لانك هتضيف للشارع كليب جديد فيه اسفاف ومسرسر عربي بايخ وفيلم مقاولات ملوش مضمون حاجات زى اللى بتدخل بيوتنا تفسد ذوقنا العام وتاخد بايد القيم والجماليات للانحدار اكتر واكتر هتفضل عند رايك ده؟

م.محمد عبدالعزيز ضرب مثال حي لتجربته الشخصية وطريقته للتعامل مع السبوبة ونتائجها

واضافت كليو نموذج لسبوبة (اللاضمير) الطبية

واقترح س س نظرية للتعامل معاها

يتفضح فضيحة اللحمة في السوق ..

.....

وخلي كده سُمعه سيئة تطلع على أي طبيب ويبقى يقابلني إذا حد إتعالج عنده ...

وماذا بعد ...؟

ماذا عن باقي السبابيب اللى حوالينا فى المجتمع؟

ايه الطريق لمواجهتها واعتراضها ؟

ازاي طالب الجامعة يعرف الاساسيات اللى الدكتور مش هيقولها واللى المعيد عارفها لو محصلش بينه وبين المعيد سبوبة كورس.. او ابقى قابلني لو نجحت...!

ازاي تواجه الموظف الحكومي اللى هيخلص لك ورقك بسرعة عن طريق السبوبة اللى هتطلع له منك .. او ابقى قابلني لو خلصت...!

ازاي تمارس حق من حقوقك المشروعة بانك تؤدي عملك بالطريقة اللى ترضى ضميرك وترضى ربنا من غير متكون جزء من سبوبة؟

وازاى تحصل على حق من حقوقك المشروعة فى المجتمع ده من غير متكون جزء من سبوبة؟