اشتباه

[ezzat afifi kotb]

             اشتباه

مسلم وبصلى الفرض       واسجد لله ع الارض

واتميز بالطول والعرض    مطلوب ميت او حى

والتهمة واساسها ظنون    خربت ف اجواء الكون

ومخرم طبقات ف اوزون    ومشتت ف شعاع الضى

وورايا الشعبة الجنائية    بدليل البقع الشمسية

وتصحر غيمة شتوية    وفساد انظمة الرى

وخناقة ف العصر الحجرى   مسلمها ارهابى وغجرى

ويهد المغارات وبيجرى     يعلن رفضة للبغى

وادانة وابقى المسؤل   عن فقد العنقاء والغول

وادلة ف الانتربول      ع اللحم تظهر بالكى

وقرائن تجمع بالراحة    عن حية وجنبها تفاحة

والمسلم انيابه دباحة     ومخرج ادم للغى

ومثلث برامودا الغامض    والصورة للوحش الرابض

بوثائق م المسلم قابض      ومغرق الجسد الحى

ومؤكد عرق الباشتون      ساهم ف الفلك المشحون

والدعوة باغراق الكون      وطوفانه الثانى اهه جى

عزت عفيفى قطب

[abla]

ياسلام عليك يااستاذ عزت ... جت في وقتها تمام ... حمد الله على السلامة ... غيابك المرة دي طال ... عايزين من الحاجات الحلوة دي كتير

[ezzat afifi kotb]

الله يسلمك يا دكتورة --وربنا يصرف عنا جميعا الشرور التى تحاك فى الظلام --وفى النور ايضا

[عادل أبوزيد]

 حقيقة و صدقا   .... افتقداك كثيرا

ارجو الا تعاود الغياب       الجميع هنا يحبونك

(Edited by Adel Abuzaid at 8:35 pm on Sep. 28, 2001)

[ezzat afifi kotb]

استاذ عادل --- انا حاليا شاعر بالذنب من احتجابى ---وعلى كل حال فانا اهتم بكل مداخلاتك --اشكر لك عذوبة المشاعر ورقتها ---وصدقنى انا ايضا احب الجميع

[ragab2]

الله ينور عليك يادرة يامكنون

شوية تشعر للناش وشوية للكون

ولما تشعر نسمع والكل سكون

وشعرك فيه فكر وعمق وشجون

[ezzat afifi kotb]

اخويا رجب -- وحشتنى ووحشتنى مشاغباتك العذبة --- وعلى كل كلنا ضيوفك الشهر ده --- ربنا يعيده عليك بالخير