تصرفات الشباب والرد من البنات

[بنت شعنونة]

سايقة عربيتي لا بية ولا علية كالعادة

الشارع بتاعي ما ينفعش ادخل فيه بالعربية لازم الف بعديه بشارعين

عشان اللي بعدي ممنوع الدخول

يبقى بالعقل اللي بعده هوا اتجاهي! :blush:

الشارع دا صغير ومعتم جدااااااااااا

وبالعافية يعدي عربية واحدا

دخلت بالعربية لقيت عربية تانية جاية في وشي ..

ادتها نور..

اداني نور..!! :)

واحنا الاتنين بنمشي برضه

لحد ما التقينا في وش بعض

حظظظظظظظظظظظظظظظظظظظظه السعيد انه وراه عربية تانية

مع انه الشارع ليا انا

المهم

العربية دي فيها اربع شباب يغموا نفس فعلا يعني

لقيت السواق بيشوحلي انه ارجعي

قلتله دا طريقي

بس فيه جنبك مكان يكفي عربيتي ف ابعد و نوسع لبعض

لقيته بيشوح برضه وصوته عالي جدا بس مش واصلني كلام مفهوم!!!

كله زعيق

فجأة

بدون مقدمات

لقيت واحد من اللي في العربية دي واقف جنب شباكي وعمال يزعق بمنتهى قلة الأدب

اعملللللللك ايييييييييييه يعني

بقولك ارجعي

هوا شارع ^%^&%$#%$#

وابتدى يخبط على باب عربيتي!! mfb:

طريقة كلامه منحطة

او مبرشمة

يعني في جميع الأحوال هوا مش طبيعي..

لو انتي مكاني

و لو بنتك مكاني او زوجتك

ايييييييييييييييييييييييييييييه التصرف السليم اللي مفروض يتعمل في اللحظة دي؟

مع مراعاة كل التفاصيل السابقة

ومراعاة حاجا بسيطة

اني ما اتفرسششششششششششش لما اروح بعد ما الموقف يعدي -_- :o

[White heart]

شوفى يا شانا هو فى حلين .. واحد ملائكى و التانى عفاريتى mfb:

الأول الملائكى و بناء على كل التفاصيل و الظروف و الملابسات اللى حكتيها، يبقى تقصرى الشر و للخلف در و تفقعيهم كام دعوة لربنا لأنك مظلومة ... و ربنا يسامحهم و ربنا على الظالم و المفترى ....

أما الحل التانى العفاريتى ... فهو الإستبياع !

يعنى أول حاجة تقفلى العربية بالــ center lock و بعدين بمحمولك و بسرعة تتصلي بالبوليس و بالمختصر المفيد خالص .. يعنى كلمتين و بس تشرحى فيهم انتى فين و انك فى مشكلة و محتاجاهم بسرعة ... و بنفس المحمول تخدى صورة الشاب اللى بيخبط على بابك ... وبعدين 5 متر لورا و ترجعى على الاول و تدوسى بنزين و تخبطى فى اللى قدامك ( بس من غير ما تعورى لا نفسك و الا اللى قدامك ) و بسرعة تلزقى ايدك على الكلاكس و اوعى تشليها ... و بس ! :blush: :) -_- :o

[yasovinas]

صح يا وايت انا شخصيا اؤيد الاقتراح التاني

[ابو محمود]

الست شعنونة ازاى سبتى العيال دول من غير ماتادبيهم انتى طيبة اوى انا لو منك اشترى كلب من بتوع الشرطة وخلية فى العربية علشان المواقف اللى ذى دى

وبعدين انتى ممكن كنتى اتصلتى بالمنتدى واحنا كنا نجيلك بسرعة زى النت

او انك كنتى نزلتى من العربية وعملتى ان العربية عطلت حركة ندالة زيهم

المهم دة موضوع فعلا لازملة حل سريع بس مش مؤقت احنا احسن حاجة ندعى عليهم

الست دلوقت لها حقوق زى الراجل مش كدة ؟

اية فى اية احنا متسويين ازاى معرفش مع ان فية فرق غريبة؟

المهم معلهش تعيشى وتخدى غيرها دول عيال قولالات الادب وشبيحة ومتزعليش حقق عليا :sad:

[yacho]

أما الحل التانى العفاريتى ... فهو الإستبياع !

يعنى أول حاجة تقفلى العربية بالــ center lock و بعدين بمحمولك و بسرعة تتصلي بالبوليس و بالمختصر المفيد خالص .. يعنى كلمتين و بس تشرحى فيهم انتى فين و انك فى مشكلة و محتاجاهم بسرعة ... و بنفس المحمول تخدى صورة الشاب اللى بيخبط على بابك ... وبعدين 5 متر لورا و ترجعى على الاول و تدوسى بنزين و تخبطى فى اللى قدامك ( بس من غير ما تعورى لا نفسك و الا اللى قدامك ) و بسرعة تلزقى ايدك على الكلاكس و اوعى تشليها ... و بس ! :sad: mfb: :sad: :D

عجبنى قوى الحل التانى يا وايت :) .. بس ادعيلى ان ف يوم من الايام اقدر اعمل اللى انت قلت

عليه ده لو اتعرضت لنفس الموقف .. نفسى ابطل اكش من المواقف اللى ممكن اتعرض فيها لكلام جارح

من ناس مش مؤدبه -_-

[nancy]

بصى يا شانا انا حلين وايت هارت عاجبنى وخصوصوا التانى بس قبل ما اعملة لازم اكون مامنة شوية نقط

1- ان ميكونش معايا بناتى علشان ميتخدوش

2- ميكونش الوقت ليل اوى

3- اكون فى مود رايق علشان اقرفهم

[بنت شعنونة]

"السيد" محمود مصطفى

ليه شايفة في كلامك صيغة تهكم؟ :sad:

مش عاجبك الموضوع

دخلته ليه من اصله

كنت ما دخلتش واهو تبقى ارتحت وريحت يعني! -_-

حاجات غريييييييييبة جدا بتحصل في المنتدى اليومين دول والله.........

استغفر الله العظيم!!!!!!!!! :sad:

[shahd]

انا عن نفسي يا شانا لو مكانك حينزل عليا سهم الله ومش حعرف حتى ارد بس من جويا ببقى مولعه ناااااااار

ويمكن اقعد فترة وانا بقول لنفسي انت سكتي لييييييييييييه

واخرتها حولع في روحي من الغيظ

شـــــــــــــــهد مع ايقاف التنفيذ

[khedr]

طبعا كل كلام اخواتي واخواني واساتذتي في المنتدي علي عيني وراسي

طيب لو سمحتم لي تعالوا ناخد ناحيه تانيه في الموضوع

تعالو نحاول بالضبط نحاول ونحاول اننا نغير الاسلوب اللي بنتعامل به مع الغير

مش عايز اقول نحط نفسنا مكان الغير لان في حالات متنفعش

تعالوا نجرب ااننا نحاول محاوله جاده من داخلنا ان نقنع الاخرين بمدي خطوره وسوء ما يفعلوه

وهناك اقوال جميله الجواب اللين يصرف الغضب... ومن لا يستطع فبلسانه

وعندي ثقه كبيره في ربنا ان الموضوع لو اني ناوي انا الخير فيه هيكون فيه خير

يعني......

لو اني قاصد اوجه او انبه او اقول لهم ببساطه بلاش كده وهم ممكن يكونوا مش علي قدر المسؤليه

ساعتها سنجد التدخل السماوي اما في صوره رجل شرطه جاءت به الاقدار ....ام انسان عاقل يتدخل بالحسني

او هدوء وعدم رد منهم .. او هدوء وراحه داخلك.......فيه حاجه هتحصل

اعتقد دائما نفترض الخير في الللي امامنا ...

وعلي هذا استريح اثناء الحوار وعندما اخلو مع نفسي

هذا رأي وانا معكم

[Hammer]

انا بقي عندي حل تم إفرازه من ثقافة مجتمعنا بس بيحتاج قلب جامد شوية .

السيدات في البلد عندهم Asset ( أصول ) مهمة جداً بس لو عرفوا يستخدموها ألا و هي إن السيدة دائماً علي حق و أي طرف رجالي أمامها بتكون نيته مش سليمة و يسعد المجتمع بل و يشرفه بجميع طوائفه و درجاته التدخل لدرء العدوان , كل واحد علي قد ربنا ما يقدره( شلاليت , بونيات ,روسيات...إلخ.) لدفع العدوان عن السيدة الفاضلة حتي و إن لم تكن محقة .

و بناءاّ عليه فهناك كثير من السيدات من يحسن إستغلال هذه الميزة الرائعة التي قدمها إليها المجتمع ... و لإن الرجالة عارفة اللي فيها فمعظمهم يفضل الإنسحاب :ph34r: .

نيجي بقي للأكشن أو الفعل .... كل ما عليك قبل إستخدام هذا الأوبشن هو التأكد من وجود ناس علي مقربة منك للنجدة و أن لا يكون هناك ظلام أو عزلة في مكان العركة <_<

ييجي بعد كدة ... تسليك الحنجرة و فتح صوت حياني يتضمن بعض الإتهامات بما يفهم منه إن الشباب بتغلس و تعاكس ...

بس خلاص ...

و الباقي علي شباب المنظقة العترة أو المارة ... و غالباً ما ينسحب الشباب مطئطئاً حيث يعلمون تماماً إن المعركة هنا غير متكافئة .

و الخطوة الأخيرة و المهمة , إنك تبصي لهم و إنت معدية بعد ما يوسعولك و تروحي عاملة كدة

[Cleo]

أنا شخصيا فى الموقف ده هنسحب بكرامتى لأن ماعادش الراجل الجنتلمان اللى كرامته ماتسمحلوش يهين واحدة ست..

بالعكس... يزعق وبعلو حسه هيبتدى يشتم بكلام يعاقب عليه الشرع والقانون ومحدش هيرضى يتدخل لأن الناس دلوقتى بقت كل واحد فى حاله واللى يخاف يتعور فى خناقة مالوش يد فيها واللى يخاف يتسرق فى الزحمة... فهشرب الموقف ده لوحدى بعد ما أكون اتبهدلت واتمسح بكرامتى الأرض..

أما بأة لو عيار الإجرام عند العيال دى زيادة شوية، ممكن يفضل يدب على الإزاز بتاع عربيتى لحد ما يكسره، أو يكسرلى الفوانيس مثلا أو أى خسائر مادية أخرى..

وطالما أنا ماعنديش مقومات الإجرام اللى تخلينى فيه احتمال لو 1 فى المليون "أنتصر" يبقى أنسحب أحسن

الخلاصة: لا تضع نفسك فى ندية أنت لست كفئا لها...

[عشمان خير]

[font=

الفاضلة (شانا)

معذرة يا بنيتي مما حدث لك.. فكلنا مسئولون عن ذلك..

لكنها ظاهرة تحدث مع الصغار والكبار .. والرجال والنساء.. فهذه هي ثقافة الشارع المصري.. ثقافة البلطجة والإرهاب والصوت العالي..

والمشكلة تزيد ولا تنقص.. بل تتعقد مع الأيام نتيجة الضيق.. ضيق الأفهام .. وضيق الصدور.. وضيق الشوارع والأرصفة.. وأخشى أن يتبع ذلك ضيق القبور.. نعوذ بالله منه ونسأله سبحانه اللطف والرحمة..

ونصيحتي التي أصدقك فيها بعد طول المرار مع سائقي المحروسة.. أن ترجعي في صمت.. ليمر الآخر أو الأخرى.. وترحمي نفسك من أهوال الضغط العصبي والنفسي الذي ستعانينه في حال تمسكك بحقك المروري...

أقول لك ذلك وانأ أعلم مرارته .. لكني أقول ذلك بعد 25 سنة قيادة في شوارع وحواري أرض الكنانة.. ولك أن تتخيلي كم مر علي فيها من مواقف تحرق الدم والبنزين .. حاولت طويلا أن آخذ حقي وفقا لكل الشرائع.. القانونية والغابوية.. أفلحت أحيانا وأخفقت كثيرا.. حتى لا أكون مواطنا سلبيا.. كنت أشرح الأمر وأوضح الأولوية .. لكن واحدا يفهم ويستجيب .. مقابل عشرة ما بين جاهل أو مكابر أو مستقوي بأي شيء.. يستوي في ذلك من يستقوي بمنصب أو نفوذ أو معارف أو لسان أو حتى عضلات !!! لكن المشكلة هي: مع من تتناقشين ؟؟ وكل سائق في مصر يعطي الأولوية لنفسه لأنه لا يعرف شيئا عن قواعد المرور.. والبعض يعرف لكنه يكابر...

إذا سادت شريعة الغاب... وغاب الذوق والمعرفة. .. وحضر الشيطان فكل السيناريوهات مطروحة !!! وليس من بين المطروح أن تأخذي حقك عن طريق الشرطة.. فالناس في مصر أصبحوا يعتمدون على أنفسهم.. لأن الجهاز الأمني لا يفكر في مثل هذه التفاهات والسفاسف.. والأمن مسخر لتشريفات السيد الرئيس وعائلته ثم السادة أصحاب السلطة والبيزنس والنفوذ..

منذ عشر سنوات تقريبا.. كنت ذاهبا لزيارة صديق بالمنيل.. وحدث لي ما حدث معك تقريبا.. ولكن بشكل مختلف.. دخلت في شارع جانبي يعج بالسيارات الواقفة يمينا ويسارا.. وخلفي عدة سيارات.. وفوجئت بسيارة نصف نقل تغلق الشارع .. وصاحبها يدخن الشيشة على باب احد المحلات.. نزلت أبحث عنه .. وادعى الجالسون انهم لا يعرفوا صاحبها.. العربية مفتوحة.. ركب أحد السائقين ممن هو خلفي في العربية النقل.. وبدأنا نحاول دفع السيارة.. فاذا بالجالسين يقومون رافعين الكراسي والزجاجات في وجوهنا.. وبدأ بيننا تلاسن وتراشق لفظي أنأى بك وبأفاضل المنتدى عن وصفه.. وحضرت الشرطة ممثلة في ثلاثة أشخاص .. ظابط برتبة نقيب.. وأمين شرطة ومخبر.. الغريب أن النقيب المبجل قال لي: يا رجل انت باين عليك راجل متعلم وبتفهم.. ازاي تعطل نفسك وتعطل الناس اللي وراك؟؟ وربت على كتفي في حنان سلطوي غير معهود طالبا مني الرجوع .. والأغرب أن الناس في الشارع قالوا نفس الكلام.. لدرجة أنني وجدت الرأي العام تقريبا ضدي .. ليه؟؟؟ الحجة التي قالوها جميعا: انني راجل متعلم.. ودول شوية (صيع) .. رجع من هم خلفي واحدا تلو الآخر .. وأخيرا وجدت رجلا من نفس الشارع يصر على أن أشرب معه الشاي ويعتذر لي.. جلست معه وشربت ما جادت به نفسه جبرا لخاطره.. وحضر السيد ظابط الشرطة اياه حيث علمت أنه يقف بصفة شبه دائمة في الميدان الذي عبرت منه وشرب معنا الشاي, وقال لي بحكمة بالغة: انت تحمد ربنا .. ده لولا اني جيت كان زمانك متقطع.. دول شوية مجرمين وبيستخدموا أي حاجة يضربوا بيها.. وكان ممكن تاخد لك مطوة من أي صايع ويهرب.. بس لأنك راجل طيب ربنا بيوقف لك ولاد الحلال.. الرجل بيتكلم بكل بساطة.. ويعطيني درس في كيفية التعامل مع الحياة.. وكلما قاطعته قائلا: الحق عند مين؟ يقولي: الحق عند طبعا وأنا معاك.. بس مش معقول عشان معاك حق تودي نفسك في داهية !!! وعلى ايه ؟؟ دي حكاية عبيطة كلها من أولها لآخرها.. وانت راجل بتفهم..!!!!

ورويدا رويدا.. أدركت أنني كنت مخطئا .. في حق نفسي وأولادي.. وبدات أتخيل السيناريو لا قدر الله.. لو أنني عدت لأسرتي مشوها بضربة سكين أو شاكوش أو عتلة أو ما شابه ذلك.. أو حتى تشابكنا بالأيدي وعدت ممزق الملابس وطالع لي بقليلة في عيني ولا في نافوخي .. أو ربما لم أكن لأعود البته.. وشكرت الظابط الحكيم الذي علمني درسا لن أنساه.. لكني قلت له بعد الشكر على ما أضافه الي من حقائق.. عندي سؤال واحد فقط: كيف أشعر بالانتماء لوطن لا يحميني.. ونظر إلي الرجل بسخرية قائلا : تاني.. يعني بعد كل اللي حكيته ده ما فيش فايدة..!! يا عم ما بلاش الكلام الكبير ده.. والجمل الرنانة دي.. ثم ولى مدبرا ولسان حاله يقول: من أي كوكب أتيت الينا؟؟؟ انت مش عايش في مصر ولا ايه؟؟؟!!!!

وهكذا ببساطة .. قررت أن اتبع سياسة ظبط النفس ومحاولة السيطرة عليها.. لأنه لا بديل عن ذلك.. والآن وبعد أن أوشكت على الخمسين من العمر.. لم يعد لائقا أن أتماسك أو أتشابك أو حت أتلاسن مع اي كان سواء كان من العامة أم الغوغاء أو حتى أنصاف المتعلمين ...

ذات المشكلة تعانيها زوجتي .. فهي لا تطيق التفريط في حقها.. وحتى أنا شخصيا .. لا زلت أعاني.. فرغم محاولتي الدائمة للبس قميص الحكيم لقمان.. والتأسي بأيوب الصابر ... الا أنه يحدث أحيانا أن يخونني التوفيق وأتصايح مع هذا أو ذاك.. لأعود باحثا عن حبوب الضغط وجهازه..

لذا اسمحي لي يا عزيزتي أن أؤكد لك أن العلاج الأنجع يكمن في ظبط نفسك وتمالكك لأعصابك.. فان تمكنت من جعل ذلك مقرونا بالنية كسبت الأجر من الله.. من باب قوله تعالى في وصف عباد الرحمن في سورة الفرقان : ( وإذا خاطبهم الجاهلون قالوا: سلاما) وقوله تعالى: ( خذ العفو وأمر بالمعروف وأعرض عن الجاهلين) .. وقوله صلى الله عليه وسلم: ( ليس الشديد بالصرعة.. ولكن الشديد الذي يملك نفسه عند الغضب ).. وقول الشاعر :

إذا نطق السفيه فلا تجبه فأبلغ من إجابته السكوت

بل انني أحيانا أنظر الى الأمر بفلسفة أخرى... فأقول لنفسي: يا أخي احمد الله على أن بصرك ورشدك ولم يجعلك من الجاهلين.. واحمد الله حين تنظر إلى المارة في الشارع وهم يتزاحمون ويتخبطون من هول ما يعانوه كمواطنين من الدرجة السادسة.. الناس في مصر( صرعى كأعجاز نخل خاوية).. الناس في مصر حيارى وسكارى من هول ما يتجرعوه من بؤس وشقاء.. هم في فزع وهلع واستعجال دائم.. الكل يتسابق سواء على الأقدام أم في السيارات أو في المواصلات.. أحد أصدقائي اللبنانيين علق على ذلك منذ سنين طويلة قائلا: كلما نزلت وسط القاهرة.. أحسست بفزع القيامة.. فالمرء فيها يفر من زحام إلى زحام.. ولكل امرئ منهم شأن يغنيه.. وكان أبي رحمه الله يشك في أن سبب تسميتها بالقاهرة قهرها لمن فيها.. وما فيها.. صدقوني: الإنسان ليس وحده المظلوم فيها.. إنما النبات كذلك مجني عليه وحتى الحيوان والجماد.. وماذا تنتظرين من شعب مقهور .. في المنزل والعمل والشارع !!!!

بهذه الفلسفة البسيطة أحاول أن أعيش في مصر.. لأتذرع بالصبر وأشفق على حال أخوتي المصريين... المصريون الذين كانت شهامتهم تمنعهم أن يعترض احد ما طريق فتاة أو امرأة.... لذا فإنني اعتذر إليك عما حدث معك.. والمجتمع كله مسئول عن ذلك.. فلو أن الشباب الذين اعترضوا طريقك علموا أن هناك رادعا أو عقابا ينتظرهم لما فعلوا.. لكنهم ترعرعوا في ظل حكومات ربت شعوبها على النذالة .. ونشأوا في مجتمع بلا قدوة أو أسوة..مجتمع غابت فيه القيم وطغت عليه البلطجة وسادت التفاهات.. ونحن في أشد الحاجة إلى مراجعات للنفس .. نصارح فيها أنفسنا كمصريين بما فينا من عيوب ونقائص.. ونمسك بمشرط جريء في محاولة تشريحية وتوضيحية للحال المزري الذي أصبحنا عليه .. ولنعترف بأن الظروف التي تكالبت وتكاتفت على هذا الشعب المسكين جعلته بكل أسف في المؤخرة بين الشعوب بعد أن كان الحال غير الحال والمقال غير المقال.. وربما تكون هذه دعوة جريئة.. أو طرحا واضحا لمشاكل مستفحلة في مصر...لكن بداية العلاج تتطلب التشخيص.. والتشخيص بكل أسف معقد للغاية.. بعد أن بات لدي اعتقاد بأننا على أبواب تليف مستعص في القيم والعادات والسلوك.. وأرجو إلا أكون عرضة للنقد الصارخ أن بدأت بطرح هذا الموضوع للمناقشة في حال وفق الله لذلك..

وفق الله الجميع...........

Arial]

[بنت شعنونة]

يااااااااااه يا استاذ عشمان خير

كلماتك تقطر حزنا والما

والله وجعوني فعلا.. :sad:

معلش..

بس هوا عند حضرتك حق في كلامك دا اكيد بس انا بقى عندي حل برييييييييييييموا

بتخافوا من المجانين؟

بتكلم جد والله

يعني مثلا ايه كان يحصل لو انا مثلا مسكت عتلة حديد من جنبي ورحت نازلة مصرخة زي المجانين " تقمص شخصية" وجريت على عربيتهم

مش عارفا ليه عندي يقين انهم ها يخافوا مني!

تفتكروا؟

فكروا بجد وجاوبوني عشان اقولكم عملت ايه :D

اعتقد انه الواحد لو تعامل مع البلطجي بصفته انه مجنون رسمي اعتقد رد فعل البلطجي ها يتغير كتير؟؟ :P

استاذ وايت

على ما اطلب البوليس اكون في خبر كاااااااااااااااااااااااااااااااااااان

وموضوع اطفي العربية دا والله كنت ها اعمله فعلا

لولا اني حسيت انه مبرشم بجد مش فابق لنفسه اصلا.. الخناق مع واحد فايق معروف عواقبة وها تتوقع رد فعله غالبا انما مع واحد مسطوول او مجنون ;) غير مأمون العواقب..

نانسي و ياشو لازم نعمل مدرسة للفتيات للدفاع عن النفس

بس بالحيلة مش بالضرب من بعيد لبعيد

او نعمل نادي يلم ظباط من كل حتة في القاهرة ونديهم فلوس كل اخبارية ينقذونا فيها ب 50 جنيه مثلا

واللي ليه ضهر ما ينضربش :D

خضر..

كلامك صح جدا

وانا بلجأ ليه في ساعات التجلي لما اغلب شيطاني وسبحان الله الحال بيتغير تمااااااااااما والدنيا بتتحل فعلا

بس نعمل ايه

الله يلعن ابليس :lol:

هامر

قسما بالله اكنك كنت معايا :o

بس الشارع كان ضلمة :sad: :)

كليو

المصيبة انهم بيبتدوا الخناق كمان

يعني بيتلكك عليكي عشان ننزل لبعض

الناس اتجنت باين والا ايه!!!!!!! :lol:

[أسد]

الموضوع أعقد من كده بكثير ..

إختفاء الذوق بشكل كبير في الشارع المصري أصبح ظاهرة ملحوظة ..

ماحدث لك هو أمر مؤسف بدون شك ..

ولكنه لم يحدث لأنك سيدة ..

فقد يحدث لرجل .. أو شاب .. أو حتى رجل كبير ..

دون أي إحترام لسنه أو لظروفه ..

ولا يوجد من يردع هؤلاء ..

فالشارع لهم ..

والبقاء في الشارع للأكثر قلة أدب ..

للأسف