أول مشاركه علها تعجبكم - كلمات أغنيه

[daktara]

ياريتك كنتى ف عينىّ يا دمعه فى عيون حبيبى

و لا اشوفه صعبان علىّ ابدا يا دمعه حبيبى

دا كان فى يوم قدرى و كان فى يوم نصيبى

*******

برغم ابتعاد الخطاوى ورغم ارتفاع الحدود

قلبى على البعد هاوى و حضنى ملوهشى حدود

شوقى امانى و سكات و شوق حبيبى دموع

وقلبى يصحى ويبات يحلم بيوم الرجوع

اكتم و ادارى اللى بىّ و اشوف عذابى بعينىّ

ولا اشوفه صعبان علىّ ابداً يا دمعه حبيبى

*******

مع كل طلّه فجر و بعد كل غروب

باستنى ليلة قــدر و تهـل يا محبوب

يكفى العذاب اللى فات خلّـى اللى جاى لينــــا

دا العمر مش ذكريات و لا صبر يواسينـــا

اكتم و ادارى اللى بىّ و اشوف عذابى بعينىّ

و لا اشوفه صعبان علىّ أبداً يا دمعه حبيبى

(Edited by daktara at 4:18 am on Oct. 1, 2001)

[NonSuperior]

جميله يا دكتره :) اهلا بيك"ى؟"

[daktara]

شكرا عزيزى

تقدر تقول [بيك]

[NonSuperior]

وتقدر تقول عزيزتى :) عزيزتى ماما ضياء مثلا :)

[ezzat afifi kotb]

كلامك حلو لكن فيه ملاحظة --- ليه اغلب اشعر الرومنسى -- عذاب وضنا -- فين عمر بن ابى ربيعة ---- وهو بيقول --- واحبها وتحبنى ويحب ناقتها بعيرى ---

[girl from alex]

جميلة قوي الكلمات ولكن لي تعليق بسيط وهو في جزئية ارتفاع الحدود فكلنا نعلم ان الحدود تبعد ولا ترتفع ، ولكن الكلمات رقيقة قوي

احسنت والله

[daktara]

الاخ عزت

شكرا على تعقيبك و بعد

فبعد ان تحب ناقتها بعيره سيبدا العذاب و الضنى

هو الحب كده

[daktara]

الاخت السكندريه الرقيقه

شكرا على رأيك و على ملاحظتك و فى الحقيقه انا كنت فعلا كتبت [ابتعاد] الخطاوى

ولما جت [الحدود] ما كنتش عايز افكر فاديتها [ارتفاع] و اعتقد انها تمشى فالحدود كالحواجز

يجوز وصفها بالارتفاع و مع ذلك لو مصممه أغيرها