الاسرة - 1

[ezzat afifi kotb]

            الاسرة - 1

كان قرايبنا خمسة اخوات ---- فيه ولدين وثلاثة بنات

طلع السر وابوهم مات ---- وساب الورث ف محلات

الاولى ارملة مربوطة بستة ---- والثانية بتخدم مشلول الجتة

وثلاث صبيان ومبينهم قطة ---- والثالثة عدها القطر وفات

الاخ الاكبر ف الميرى بيه ---- وشغل السوق ما يلقش عليه

والاخ الثانى فنان بأيديه ------ وليه يتورط فى مهمات

قالت الستات اموالنا تجارة ---- محتاجة رعاية ونظارة

تحفظها من اى خسارة --------- لو تتقلب البورصات

نسيب الورث بدون تقسيم ---- هما رجال واحنا حريم

ف مقام الاب لهم تعظيم ----- وح يبنوا علينا مظلات

ومشى الورث بالاهمال ---- ولا حد يراجع ع العمال

ولا يحسب فين الاموال ---- ناس تشبع ولغيرها فتات

الرجالة مصروفهم زاد ---- وسلايف عملوها مزاد

واقفل ع الشرع باوتاد ---- وافتح بوابة الحفلات

واحد يقبض اخر الشهر --- والثانى وراه بعد الظهر

والاخوات قاعدين بالقهر --- ولا كشوفات ولا حسابات

الثالثة يعينى بقيت وحديها --- جت ام اربعه تتونس بيها

عليل وعيال بيحادوا عليها ---- لقوها ملاك ناقص جناحات

البكرية جوزها اصيل --- شارك اخوه وبدون تسجيل

وكان الرزق كفيض النيل --- يقنى مع الاسواق عتبات

زاد الضغط عليه واتأثر --- مات ووراه الستة القصر

قال العم انا اب واكثر --- وعليه كل التبعات

جالهم راتب شبه معاش --- ولا ارباح شركة واحواش

ويتيم الاب يروح ببلاش --- والمولى يحاسب ع النيات

فات ايام والقاصر طال --- وكلام همس صرخ بسؤال

فين الشرع مع الانجال ---- لما الاب بقت له رفات

اولاد العم ما طاقوا السيرة --- جم بالقوة ومنعوا الميرة

جت ايام ف العيشة مريرة --- ينام بالجوع صاحب الالوفات

الاصغر قال انا ح اتقاضى --- الاكبر قاله بلاها لماضة

ريح نفسك يا ابنى تغاضى --- فين اورقنا والعقودات

اولاد عمنا اصحاب الحاكم --- ولا تنفع شرطة ولا محاكم

احسن حاجة نخرس ونسالم --- واكفى ع الخيبة اعتذرات

وجوز الثانية معاه شهادات --- وذكاء وقاد ووميض ولغات

لولا اتشل لكان له حاجات ---فى الاحزاب او ف السياسات

كانوا ف الشتا يقعدوا ببساطة --- ياكلوا سخينة وشووا بطاطة

ويعيدوا ف قصص مطاطة --- والمشلول يحكى الحكايات

سمعوا منه الليلة الالف ---- والبؤساء ماشيين ف الصف

وخلق الكون وجزاء العنف --- وكل حكاية وليها سمات

فى فنوغراف كده بالمنافله --- مع بوق واسع قد الحلة

لف بأيدك بقى واتسلى ---- واسمع شخشخة اسطوانات

قالوا خليك والشغل خفيف --- ولا ترقية ولا نقل ف ريف

ومرتب صعب التصريف --- وف عيشة زوجته ابتكارات

لما راجلها اتشل وقاعد ---- رجل شمال ومعاها الساعد

طبعا ابوها كان بيساعد --- رطلين لحمة مع الخضرات

قالت حق الورث يجينى --- ح اسند ضهرى واشد جبينى

والاربع زهرات ف يمينى --- والمكتوب ع الراجل فات

سمعوا عن الثورة الاطفال --- سألوا ابوهم قال ف الحال

ثوار فازوا بقم ابطال --- ثوار خسروا بقم عصابات

اول خبطة محل الصينى --- لهفة العمال عينك عينى

اتوزع بينهم دكاكينى --- وبخر لى جوز الشنبات

حط الستات الايد ع الخد --- جدار احباط ازاى يتهد

ابقاق مفتوحة وكيف تنسد --- بكسر الصينى والزجاجات

كلمة ف كلمة الاخ اتغير ---- قال اولعها طويل وقصير

حقى الشرعى ولسة صغير --- ح اخده ولو اعمل جنايات

راح لاخوه وسوس ف ودانه --- والشيطان ساعده باعوانه

خلى الدم ضرب ف جنانه --- احرق لاختى اربع شمعات

ضربت ف الاخوات اسافين --- وقالوا فرقنا ليوم الدين

والرجاله قالوا مش سألين --- لو تضرب ف اخوتنا افات

شهر ف شهر القبض يقل --- وشمس العيشة من غير ضل

شربوا المر وشافوا الذل --- وبين الاخوات زادت مسافات

ثانى خبطة ف محل قماش --- جه اخطار اتباع ببلاش

والشارى سي عبده الهباش --- كان م الصبيان القفوات

جرى على خد الثالثة دموع --- قالت المركب عايزه قلوع

قالوا محدش مات م الجوع --- اهه كله دروس وامتحانات

وفضل لسة محل بقالة --- تدعى يفضل على دى الحالة

نواية تعوض عن رجالة --- هربوا ف اوقات الازمات

فجأة سمعنا صفير انذار --- واللى يقول طفى الانوار

حرب عملها ثلاث اشرار ---- والتدبير كان ف الظلمات

بدأ السوق من غير تموين --- ولا حتى صفيحة كيروسين

والاطفال رايحين جايين --- وازاى ح يزحموا فتوات

صوت المدفع بيقول بم --- اجرى على الملجأ واتلم

اقرا القرأن وانسى الهم --- واسمع م القاعدين اشاعات

اللى يقول دى رياح تغيير --- واللى يقول ظباطنا كتير

خط قاناتنا فيه تهجير --- والتضليل يملا الاذاعات

صوت امريكا قال اتوقف --- فجأة الحرب راح متوقف

بس زعيمنا طلع بيسقف --- للروسى ويرفع له كابات

ضاعت منا ام الرشراش --- والصهيونى اخدها بلاش

واحنا يلمونا م الاحواش --- نهتف باغانى انتصارات

والمشلول مسنود ع الحيطة --- سامع هيصة وسامع زيطة

والجماهير تفرح بسميطة --- وزغللها فلاش الكاميرات

جالنا جواب فيه صورة غابة --- كان مفتوح والختم رقابة

وصورة لمصر عليها ضبابة --- مرسومة بيد مخابرات

توهنا بمصر وتاهت بينا --- وعصا الازمة على رجلينا

واللى بيخبص مننا فينا --- وضب له قوايم اتهامات

ولما اتأخرت الشهرية --- راحوا بسرعة على البكرية

يعملوا ايه ف النور والميه --- والكيس فاضى م العملات

يالا مع اختك ع الدكان --- كان مفتوح ولا فيه انسان

ولا فيه بنك ولا فى ميزان ---- بس مقام وبدون كرامات

رجعوا بعلاقة القراطيس --- وبلوحة لعربة رمسيس

وكتاب عن قادش ف الكيس --- مرمى وسط النفايات

وضاع الورث يعينى فشوش --- والاخوات م بيتقبلوش

حتى اولادهم م اتصحبوش --- والشك اساس العلاقات

جه ولدين الست الثانية --- وقالوا نخربش صخر الدنيا

مرة تراب مرة كلونيا --- ضوافرنا حتترك علامات

الى اللقاء مع الاسرة 2

عزت عفيفى قطب