يا عيني ع الصبر

[احمد هادي]

يقال ان عنتره سؤل عن سر قوته

فقال لمن سأله : ضع اصبعك في فمي وخذ اصبعي في فمك وليعض كل منا علي اصبع الآخر بكل ما أوتي من قوة لنري من يصرخ أولا فيكون الآخر هو الأقوي .

فصرخ الرجل أولا معلنا فوز عنتره

فلما سأله الرجل عن السبب قال

لو لم تصرخ انت لصرخت أنا

ألا إن القوة الصبر

تعرفوا يا جماعة الخير ايه أكتر شئ محتاجينه في حياتنا بصفة عامة واليومين دول بالتحديد ؟

احنا محتاجين كتيير من الصبر

الصبر علي كل المستويات

الانسانية والمهنية

كام مرة استعجلت وندمت ؟

كام مرة مقدرتش تصبر وبعدين اكتشفت انه كان فاضل القليل بس انت اللي كنت مستعجل

بتقدر تصبر علي رغباتك واحتياجاتك ؟ ولا لأ

بتقدر تصبر علي الناس واخطائهم وعيوبهم ومشاكلهم ؟ ولا بتتخانق وتصطدم وتكره؟

بتقدر تصبر علي ولادك لما يغلطو ؟ ولا بتزعق وتشخط وترمي بأقرب حاجة ؟

بتقدر تعصر علي نفسك لمونه - وتصبر علي المذاكرة وأيام الامتحانات والشغل في مواسم الضغط - ولا بتتعب نفسيا وتكره نفسك وتكره الدنيا وتلعن اليوم اللي دخلت فيه الكليه أو اشتغلت في الوظيفة رغم انك دخلتها بمزاجك و يمكن كنت بتحلم بيها كمان ؟

أما أحبائي الأزواج والزوجات . فدول صبرهم من نوع خاص جدا

أيها المصريون ..........

أخباركم ايه مع الصبر ؟

[واحد تاني]

شوف يابوحميد ... انا هقولك رأي اتنين من كبارات المصريين في موضوع الصبر ده

الست لما سألوها عن الصبر قالت:

وصفولي الصبر

لقيتو خيال وكلام فى الحب

كلام ... يادوب يتقال

اما عن الشاعر الكبير (نا-ننس) فقال:

يا صبر صبر قلوب الصبايا المتصبرين

و صوب صبابك علي قلوب الصبايا المصبصبين

اما لو جيت لباقي المصريين فستجد انه فى جميع المصالح الحكومية وداخل اي فرن بلدي اوعند البقال ويمكن الساعاتي ان الشخص اللى بيقوم بخدمتك متعلق وراه على الحيط ورقة كرتون مربعة الشكل ربما تكون جزء من نتيجة العام السابق مكتوب عليها بالخط الثلث احدى العبارتين (الصبر جميل) او (الصبر مفتاح الفرج) وفى بعض الاحيان الاتنين معا . وما ان تبدأ فى الامتعاض من بطئ الخدمة او عدم وجودها من الاساس حتى يقول لك: الصبر.... الصبر يا استاذ ربنا خلق الدنيا فى 6 ايام او قد يرمقك بنظره حادة يعقبها بأن يشيح (بابوني) بوجهه تجاه تلك الورقة الكرتون... واحيانا يشير اليها باصبعه فى غضب دون ان يلتفت اليك.

وان كان هذا هو المغزى من مصطلح الصبر لدى الكثيرين الا ان للصبر فوائد متعددة وانا من خلال موقعى كصابر قديم اؤكد لك ان اللى يصبر ينول وربما كان هو ده السبب فى انى لسه صابر لغاية دلوقت. والصبر على شريكة الحياة دا مهم جدا خصوصا اذا كنت لسه على البر... الصبر هيساعدك تشوف كل الميزات وكل العيوب بتأني وتقدر ساعتها يا تن-تن يا تن-تن ولو تن-تن التانية هترجع تصبر لغاية ماتلاقى اللى تبدأ من تاني تصبر عليها. وبالنسبة للجيران بقى فصبرك على جار السو هيضعه فى موقف حرج, ومفترق طريقين يا يرحل ... يا تجيله بلوه بمبي تشيله, وفى الحالتين هترتاح منه.

وفوائد اخرى قد يذكرها باقى الزملاء من تجاربهم الا ان الحقيقة الثابتة انه ورغم مرارة طعمه يا عزيزى الا انه يساعد على الشعور بحلاوة طعم ما نلته.

[yasovinas]

وكعادتة ايها الساده احمد هادي ياتينا بمواضيع مش هادية ابدا فهو كما عهدناه دائماً اسماً على غير مسمى

انا شخصيا ليس لي في موضوع الصبر دا واشعر ان الصبر يؤدي في النهايه الى الهدؤ والسكينه وفي الاخر الى الاستسلام للامر الواقع في حالة ما لم ياتي الصبر بالنتيجه المطلوبه

ومن اجمل ما قيل على الصبر او من الاقوال التي تنادي بالصبر وعجبتني جداً

{سيب حبيبك على هواه ؛؛؛؛؛ لما ييجي ذيله على قفاه} وفي رواية اخرى {ولما ييجي اديله على قفاه}

[المدهش]

انا شخصياً يا هادي آخر شوية صبر كانوا موجودين في زمزمية الصبر بتاعتي خلصوا خلاص ..ومع ذلك فكما تقول الست أم كلثوم للصبر حدود..يعني مثلاً الشعب المصري صابر 25 سنة على مبارك وزبانيته ..فهل الصبر في هذه الحالة فضيلة أم استسلام وخنوع كما قال صديقنا ياسو..أنا معك أن طول الصبر ينيل الأمل ..لكنه قد يؤدي أيضاً إلى حالة من التبلد وقتل الطموح ..فلو كنت صبرت على ظروفك في مصر لما سافرت وحاولت تحقيق طموحاتك وأحلامك على الأقل المادية ..أما لو لم تكن صابراً على الغربة لعدت إلى مصر ولما حققت شيئاً ..يعني المسألة نسبية حتى في الصبر ..المهم نعرف متى نصبر ومتى نتشجع ونقدم ونتعجل.

[احمد هادي]

فلو كنت صبرت على ظروفك في مصر لما سافرت وحاولت تحقيق طموحاتك وأحلامك على الأقل المادية ..أما لو لم تكن صابراً على الغربة لعدت إلى مصر ولما حققت شيئاً

عزيزي المدهش

لقد تركت مصر لا لقله الصبر بل لفقد الأمل في اي تغيير للأوضاع السيئة علي كل المستويات وقلة العائد رغم الجهد المبذول وضبابية المستقبل ومشاكل العمل الاخري المعتادة من واسطه وكوسه ومحسوبية ورشوره وووو

والحق أنني صبرت كثيرا- أكثر من 8 سنوات بعد التخرج - علي البقاء في مصر علي أما ان تتحسن الأحوال لأنني أكره الغربه لأني جربتها زمان وانا طفل

أما الصبر علي الغربة والعودة الي مصر فهو قصه أخري

فالعاقل طالما أخذ قراره و بدأ طريقا يراه سليما فعليه أن يكمله للنهايه والحقيقة أن العكس اصبح هو الصواب لكثير من المصريين هنا فالكثيرون لا ينزلون مصر في الصيف ويسافر الي بلاد أخري للفسحة والبعض الآخر يقضي نصف الأجازة او أقل في مصر لأنه لا يتحمل الحياة في مصر أكثر من ذلك

وجمل مثل ( النزول شر لا بد منه )

( هم أسبوعين وتلاقي نفسك زهقت وعايز ترجع )

وغيرها كثير

يعني من الآخر الناس مبقاش عندها صبر علي الغربة داخل مصر ومرحبا بالغربة خارجها

أما فيما يتعلق بصبر المصريين 25 سنه علي النظام الحالي

فدعني أقول لك يا صديقي انه ليس الصبر ولكنه العجز

لأن الصبر معناة عدم الفعل مع وجود القدرة علي الفعل

فهل هذا ينطبق علينا ؟

وهل نحن , انا وانت وغيرنا قادرين علي فعل أي شي في ظل الوضع الحالي

هل عندنا استعداد للأعتقال والسحل في الشوراع لمجرد التعبير السلمي عن رفض ما يجري ؟

أشك في ذلك كثيرا

تحياتي