ما هى صفات ولاد البلد الآن ؟

[عمر عباس]

كان زمان ولاد البلد لهم شكل وميزة وبيتناقشوا فى كل حاجة وتجدهم متابعين مش لأخبار بلدهم بس لكن لأخبار العالم من حولهم وما اكثر نكتهم وتعليقاتهم ... كانوا مشهورين بالنخوة والرجولة والشهامة وعدم البخل حتى لو كان اللى فى ايدهم قليل .. لازم يكون راجل في مظهره.. تجده نظيف و مستحمي ولو بصابون مواعين ، وشعره قصير وضوافره قصيرة ونظيفة ..وهدومه مغسولة كانت توجد اصول وتقاليد فى الحى لابد من احترامها ...انا للأسف مهندس نشأت فى أسرة فقيرة ( اقول للأسف لأن ابى ربانى خطأ ... طلعت واخدها جد .. قفل يعنى .. مش فهلوى أو منافق أو حلنجى ) المهم ... فى مرحلة من عمرى امتزجت مع عمال وفنيين العمل وكنا بناكل سوا ... وممكن نتقابل على القهوة ... من هنا ومن الحى الفقير اللى نشأت فيه عرفت يعنى ايه اولاد البلد

لكن دلوقت تعالوا شوفوا ولاد البلد :

الولد : شاب فقير متعلم علي قده وبيسمع شعبان عبد الرحيم او غيره من اللى بيقلوا عليهم روشنه وهو ايضا الشاب الفقير المطحون اللي اتخرج و مش لاقي شغل و بيحاول ينسي همومه بالسنكحة في الشارع او يمكن الشاب اللي المجتمع مقدرش ينمي حسه الفني من خلال تعليم محترم يفهمه ان الجوهر اهم من المظهر و النظافة من الايمان .... نجد هذا الولد ..

لابس حظاظة و هاري شعره زيت وجيل وعطور مضروبة... يتحدث بأيده من نوع البلطجة وانه مش هامة حاجة في الدنيا وطوق الكلاب اللي في الرقبة .... بيلبس بطريقه غريبه وبيتكلم بطريقه اغرب خلي مثلا واحده حلوة تعدي من جنبه واسمع المعاكسه عامله ازاي منتهى القرف وياسلام بقى لو البنت صدته يبقى حلت عليها اللعنه وهيشتمها باقذر الالفاظ اللي يعاقب عليها القانون وكلكوا عارفين ان ده بيحصل ... المهم لا تجد رائحة النظافة تفوح منه ، ودي مش محتاجة اكتر من ماء وصابون ... وطبعا بيلاقي وقت يسمع اغاني هابطة لكن كمان لا تجد لديه وقت يقرا ويثقف نفسه .... تعالى ناقشه فى حاجة .... يضحك ويسيبك ويمشى ...

البنت : التشدق باللبانة، والأكل وبقها مفتوح ، الصوت العالي في الكلام وتلاقي كل الخلق حواليها سمعينها ، شرشوحة بقى بعيد عنكم، وتلاقيها بتشوح يمين وشمال بإيدها... لابسه حاجات محزقة وبلوزة الوان ماجيك .. وطبعا وضعه ايشارب لزوم الحجاب !

وكله كوم وجمال الظوافر كوم تاني... طبعاً القدم ... مقشفة ومشققة شوية، وماشية تكركع على الأرض... واسمع منها ..شوف يا حاج انا ساعات بحب ابقي بيئه ولما ابقي بيئه انسي , الشمحطجي دا صفر علي الشمال بالنسبه لي , تقوم بعد شويه تكتشف اني برضه متعلمه وبرضه بنت ناس.... زمان كنت تحب تتفرج على البنت او الست فى الملاية اللف .... وطبعا بتتفرجوا عليها فى افلام اسماعيل يس وعبدالفتاح القصرى

عصر انتهى وانتهى معاه كل تقاليد الشرف والامانة والنخوة والرجولة والفهم ايضا ... علشان كده اللى زينا تعابنين قوى فى حياتهم ... ويقولو يارب ننتهى على خير

[yasovinas]

مش عارف يا عم عمر انت جبت الصورة دي منين الكلام اللي قلته في الاول عن ابن البلد بتاع زمان ؛؛ وكمان هذه النوعية التي تحدثت عنها في ابناء اليومين دول كانت موجوده برضه زمان وكنا بنسميهم عيال فافي او عيال صيع

القصد ان زمان كان في ابن البلد اللي وصفته حضرتك وكمان كان في هذا المسخ المحسوب على الرجال

ايضا زمان كان في بنت البلد الجدعه اللي بمية راجل المحتشمه وكذلك كان هناك هذه النوعية الاخرى واللي كنا بنسميها شلق او شرشوحه

في هذا الزمان ايضا يوجد من نوعية ابن البلد الجدع الشهم وهناك ايضا المسوخ التي ذكرتها

اما موضوع شعبان عبد الرحيم فاظن ان ابن البلد بتاع زمان او الصنايعيه اللي حضرتك ذكرت انك كنت بتتعامل معاهم كانو بيسمعوا احمد عدوية وكتكوت الامير ومسعد القص ومتقال يعني ما فرقتش كتير يا باشمهندس

تحياتي

[ابن بلد]

الاخ عمر

انا ايضا عشت وتربيت ولا زلت فى سكان تلك المناطق

واللى اسمها( المناطق او الاحياءالشعبيه) وليست الفقيره كما ذكرت

وقد يذكر احيانا كلمه مناطق فقيره من هم سكان المناطق الراقيه

اللى كانوا يعيشون من قبل فى المناطق الشعبيه

واظن ان ما ذكرته على صفات ابن البلد سواء قديما

لا يشترط فيها ان يكون مثقف او متابع جيد لما يدور حوله عالميا

لانه لا يشترط ان يكون متعلم او يعرف القراءه والكتابه

ولكن ابن البلد الحقيقى

هو من يتصف بالنخوه والرجوله والشهامه كما ذكرت

ويطلق على تلك الصفات مجمعه (الجدعنه)

ابن البلد هو من يبادر بمساعده الغير والغريب

ابن البلد هوصاحب صاحبه ولا يخونه فى ماله ولا عرضه

ابن البلد الحقيقى تقابله فى الغربه وفى الازمات

وصدقنى لازال موجود الكثير ممن يحملون

تلك الصفات فى المجتمع الشعبى المصرى

ومن تتحدث عنهم موجودين

وما يطلق عليهم بالشباب الصايع او الروش

لكن هذا لا يرتبط لا بزماننا فقط

وما يرتدوه او ما يسمعوه هذا ليس بجديد على مجتمعنا

فمثلا الحظاظه والسلسله وتسريحه الشعر والبنطلون الضيق

تعودنا ان نجده وبكثره خصوصا

مع بدايه فتره السبعينيات

وعاده كانوا مصدر اشمئزاز ولا زالوا

وقد يكون الاشمئزاز اقل من قبل

نظرا لبعض الظروف

تحياتى

ابن بلد

[khedr]

عصر انتهى

وانتهى معاه كل تقاليد الشرف والامانة والنخوة والرجولة والفهم ايضا

... علشان كده اللى زينا تعابنين قوى فى حياتهم ...

ويقولو

يارب ننتهى على خير

الصفات التي نراه الان في الشارع وفي البلد واشتياقنا الي ان نري فعلا الاخلاق المصريه الاصيله

ما هو الا نتاج ما يحدث في البلد من تخبط وتغييرات في تركيبه المجتمع

تغييرات في اخلاق وصفات المجتمع وفي الناس

ضاعت القيم الجميله والاخلاق الحسنه

وتبدلت السرقه والنصب اصبحا فهلوه وشطاره

الواسطه والمحسوبيه اصبحت ناس واصله وقادره

البلطجه اصبحت شجاعه وفتونه

اختلفت

واختفت

واختلت

واختلطت

..................

المفاهيم

الي عم عمر

سبحان الله عم عمر من الناس اللي فعلا لهم مكانه كبيره عند الواحد

لما اجد من ترابط في موضوعاته ...واكاد اجزم ان ما افكر فيه اجده امامي منه

عموما موضوع ابن البلد ده شاغل تفكيري من مده وكان نفسي حد يتكلم فيه او كنت ناوي اكتبه

فعلا قد تتلاقي الارواح وقد لا تلتقي الاجساد ابدا

[وليد صفوت]

الفئة التى تتكلم عنها يا استاذ عمر هم بعض الفئة الفقيرة من الشعب ....لأن الفئة المتوسطة اولاً من الشباب تعتبر إرتداء اتلطوق ( الكلابى ) المشهور بين الفئة الفقيرة ( بيئة ) كما ان زمن الحظاظة انتهى منذ زمن و يوجد الأن ستريتش بريسردز تباع فى توكيلات نايك و اديداس و ليس كل الشباب ممن يرتدونها .....

كما اننى شخصياً لا استمع الى الأغانى العربية اصلاً .,... و اعتقد انه هناك اغلبية بين شباب الفئة المتوسطة و الغنية لا يستمعون اصلاً الى الأغنيات العربية .....

و نفس الشيئ بالنسبة للبنات ... فهناك حجاب فى منتهى الشياكة و الإحتشام و غير ملفت و غير فج كما فى بعض بنات الفئة الفقيرة و اللائى يرتدون حجاب فااااضح و شيب قصيرة :lol:

تحياتى ..

[المدهش]

يا سيدي ابن البلد زمان هو ابن البلد اليوم..سوقي وجاهل ..عالي الصوت وفاسد الذوق..أما الجدعنة والشهامة التي تحدثت عنها السينما والتليفزيون وقرنوا بها صورة ابن البلد فهي جزء من الاونطة..هذا لا يمنع طبعاً من وجود نماذج قليلة جيدة..لكن النسبة الغالبة ممن تقصدهم لا أخلاق ولا عقل لهم..وطبعاً تحديد ابن البلد بمحل السكن ليس دقيقاً أو منصفاً، فكثير من المثقفين والشرفاء والموظفين الغلابة والريفيون الأصلاء يسكنون الآن الأحياء الشعبية والحواري الضيقة التي يسكنها ولاد البلد..وهؤلاء يختلفون في كل شئ عن أولاد البلد الذين نتحدث عنهم..وأعني الشمحطجية الذين يشوهون صورتنا ويسيئون إلينا في كل مكان ..والستات اللاتي تجلسن بقمصان النوم على أبواب البيوت في الحواري الشعبية ولن تصدق حين أقول لك أن صديق لي حكم عليه الفقر في ظل النظام المبروك وهو صحفي موهوب أن يسكن في إحدى المناطق العشوائية ..يقول لي أن ضيق الشوارع والبيوت والاختلاط البشع بين الرجال والنساء وصل بهؤلاء الناس إلى أقصى درجات الانحطاط السلوكي لدرجة أن بعضهم يتبادل الزوجات كما في السويد..صدق أو لا تصدق!.