الخريطة الخفية لمدينة الإسكندرية

[engmido]

كل صيف وانتم طيبين

حد عايز يفيد زيستقيد فى موضوع اسكندرية

حد مسافر السنة دى

س س مبتشاورش عقلك

[hanzalah]

من أجمل موضوعات الاسكندرية الساحرة

بمناسبة موسم الصيف والاجازات

[عادل أبوزيد]

موضوع ظريف جدا يستاهل التحديث

 

الفاضل أبو محمد  النجدة  النجدة

 

عايزين تفاصيل حديثة

[أبو محمد]

حاجات كتير اتغيرت

حاجات كتير اتبدلت

 

يعنى مثلا "سابليه" جليم اللى بيتكلموا عليه خلاص بح

دلوقت مكانه أربع حاجات

الدور العلوى "ليبانيرو" .. كوفى شوب .. يعنى أكل وشرب (ومع ذلك اسمه كوفى شوب :) )

وتبعه فى الدور الأرضى يعنى على المية مباشرة "لاتينو"

برضه كافيتيريا وكوفى شوب

بينهم بقى دورين "ميراج" .. وأخيرا "سى جل"

"سى جل" بتاع السمك عارفينه طبعا

أخد مكان مطعم مشويات "كان" إسمه ستوديو مصر

فى الحقيقة البلوك ده أنا باحبه

 

فيه حاجات كتير ظهرت فى الـ Down town اللى قدام كارفور

يعنى صالات أفراح وبلبع وقرية عبد الوهاب وابو فارس وكمان "لاتينو" وجنجلز Jungles

المولات انتشرت

فى لوران على شارع شعراوى مول الوطنية

فى سان ستيفانو مول سان ستيفانو

ده غير كارفور على مدخل اسكندرية من الطريق الصحراوى

ومول زهران اللى فى سموحة ودول قدام شوية لكن فيهم كل حاجة

كافتيريات مطاعم محلات هيبر ماركت

 

بالنسبة لأكلات السمك

جزيرة الملكة بقالى كتير مش باروحها

إنما زيها حسنى فى العصافرة كان مشهور انه بتاع مشويات لكنه بيقدم سمك

برضه "قرية عبد الوهاب" اللى فى السيوف مشهور عنها إنها كباب وكفتة وبط وسمان وموزة وحاجات من دى

اللى ناس كتير ما تعرفهوش هو إنه أخد الفيلا اللى لازقة فيه وعمل مطعم سمك هايل

هايل بمعنى الكلمة

 

لاحظت حاجة برضه أسعر 2006 خلتنى أبتسم

يعنى بيقولوا الجمبرى 40 و 60 و80 جنيه ها ها ها

دلوقت 200 إلى 300 جنيه

ها ها ها

[Grandma]

هي خريطة اسكندرية وقفت في قلب إسكندرية !!

طيب اتوسعوا شوية 

روحوا شمال ولا يمين ولا اعملوا أي حاجة 

فيه هناااااااك عند الملاحات مجموعة مطاعم أغلبها بدوي( الموضة كدا ) 

أشهرهم اسمه خطاب وفيه كوكو العربي دول قبل كارفور (مول العروبة )

الحقيقة هما بيعملوا كفتة وكباب مافيش زيه في اسكندرية 

لا حسني ولا قرية عبد الوهاب ولا بلبع كلهم مضروبين 

لكن المشكلة بقى في الاتموسفير البدوي العربي انا مش بحبه 

لكن ناس كتير ما تفرقش معاها بالعكس بتحب الجو دا

و للي بيحب الجو دا فيه برضو ابو هاني في طريق الصحراوي مقابل ماكدونالدز على ال Side التاني قبله بشوية 

و لو دخلت طريق برج العرب اللي بيوصل للمطار فيه كذا واحد 

اشهرهم عكنش و افضلهم الاخرس 

في مول العروبة نفسه في كذا كافيه Moto و Harris كويسين 

مقابل مول العروبة فيه برضو الصفواني فرع فاتح جديد ... كويس 

و لمحبي الشيشة و الفرجة على ماتشات الكورة فيه قهوة بساطة في نفس المكان بعد الصفواني بتلاتين متر 

الشارع دا باختصار كله مطاعم وكافيهات تقدروا تجربوا كل يوم واحد 

وفي طريق الساحل تحت فتح الله فيه لاتينو و ليبانيرو لكن طبعا موقع و خدمة فروعهم اللي على البحر في جليم أفضل كتير . 

 

انا بحب سانتا لوتشيا اللي قدام سينما مترو.. و سبكترا اللي في داون تاون ( دايما بيقولوا عنده لحوم فاسدة ) مش عارفة حقيقي ولا حد مستقصده . 

و اكتر مكان بافضله للاسماك فيش ماركت اللي فوق تكا جريل . 

الدنيا كلها مطاعم وكافيهات أهم حاجة المطبخ النضيف نفسي افتش على مطابخهم علشان اعرف مين اللي كويس حقيقي مش من برة هله هلة ومن جوة يعلم الله . 

تم تعديل 16 سبتمبر 2015 بواسطة Grandma