متى ينزل الرجل من عين زوجته ومتى تسقط هي من نظره؟

[المدهش]

"اللي يقول لمراته يا عورة الناس تلعب بيها الكورة" ..مثل شعبي جميل ويحث على احترام الرجل لزوجته وعدم انتقادها على الملأ وأمام الناس حتى لا تفقد هيبتها وكرامتها بينهم..وخصوصاً أمام أولادها وبناتها..حلو..طيب ماذا يقال عن المرأة التي تفعل ذلك مع زوجها ..يعني تسخف كلامه أو تسخر منه أمام الناس، أو حتى بينها وبينه..أعتقد أن هذه المرأة زوجها نازل أصلاً من نظرها ..طيب ليه وامتى ممكن الرجل ينزل من عين زوجته ..وإمتى يحصل العكس..

[yasovinas]

الراجل ينزل من عين مراته لما يعتمد على قرشها ولما يكون مهزوز الشخصيه وايضا من الاشياء او الاسباب التي تجعل الراجل ينزل من عين مراته لما يكون ابن امه

[ابن بلد]

عندما لا تشعر المراه بالامان

و

عندما يفقد الرجل ثقته فى زوجته

طبيعى ان يسقطوا من اعين بعض

الى اسفل تحت ارجلهم

[عطر]

الراجل ينزل من عين مراته لما يعتمد على قرشها ولما يكون مهزوز الشخصيه وايضا من الاشياء او الاسباب التي تجعل الراجل ينزل من عين مراته لما يكون ابن امه

ممكن اوي يعتمد على قرشها وتكون هي راضية وسعيدة وفاكرة نفسها بكدة هي واقفة مع جوزها وبترضى ربها

لكن ينزل من نظرها لما ما يطمرش فيه ويخون العشرة ويعتبر ان قرشها حق مكتسب وانها مش بتعمل فيه جميل

[White heart]

المدهش كتب:

ليه وامتى ممكن الرجل ينزل من عين زوجته ..

عندما يكذب ..... أو عندما يعلمها بطريقة او بأخرى ان زواجه منها كان لتحقيق مصلحة ما .. وليس لحبه لها! :angry2: :wub:

وإمتى يحصل العكس..

عندما تتعمد التعالى عليه .... أو تحاول أن تعلمه يطريقة او بأخرى بأنه كان فى حياتها من تعتقد يانها كانت سوق تصبح احسن حالا معه اذا ما إرتبطت به .... و لكن نصيبها جاء مغايرا !!! :blush: mfb:

[hopsan]

الحكايه ليست بالورقه و القلم و لكل بيت زوجيه خصائص خاصه تخص هذا البيت و تقريبا لا يوجد بيت مثل الآخر و لكن هناك متشابهات

اهمها الحب المتبادل ...و الحب هذا يختلف من عام لآخر من حيث النوعيه و الكم

فكل عام يمر يتحول الإشتياق العنيف الجارف بين الزوجين الى معنى آخر اقرب للموده و العشره و عند ظهور الأولاد يتحول الحب تدريجيا الى الموده الحقيقيه و التعاون على خلق بيت يسوده التفانى و التضحيه و التنازل و التغاضى لأشياء أهم و هى فى المقام الأول الأولاد

و كل هذا يندرج تحت مسمى الحب ...فالحب معنى اكبر و اشمل من مجرد غريزه تشبع عن طريق الطرف الآخر

فى حاله ان ينزل الرجل من عين زوجته و هذه مصيبه يبدأ البيت فى التصدع الحقيقى و ينذر بإنهياره فى اى لحظه غضب و من علامات نزول الرجل من عين زوجته هو ان يبخل عن الصرف و يتجه بمصروفه اما على ملزاته او على طرف آخر غير زوجته ..فهى ممكن ان تغفر له اى سيئه طالما هو فى نطاق سلطتها كأنثى عدا ذلك فهو ملك لإمرأه اخرى ثانيا عندما ينسب الفضل لنفسه فى اى نجاح و يهمل وجودها فهى شريكه له فى كل ما يحدث رغم انه الذى يقوم بالميادره و العمل و لكنها جزء من هذا العمل ثالثا عندما يهملها كأنثى و ينسى ان لها مطالب لا تتحقق إلا به و يعطل فيها امكانياتها الأنثويه و كثير من الرجال بفعلون ذلك و يصاحب هذا قله او عدم حلو الكلام لها فالكلمه الحلوه انشالله كلمه اكلك حلو النهارده ناهيك عن معسول الكلام و التى تعلم علم اليقين انه زائف و لكن مجرد قوله يعمل عمل المعجزات و بالتالى لا تشعر انها كم مهمل فى البيت رابعا عندما يسقه منها امام اهله او اهلها او زمايلها فى العمل او حتى الأولات فهى بالتالى تستشعر بهذا الكلام و تصدقه و تعيش به ..اذا كان شريك حياتها و اللى فاهمها اكثر من اى شخص آخر بيقول كده يبقى مين اللى حينصفها

اهم حاجه عندما تكتشف انه بيعاكس بنات صغيره ...تلك الحاله تصيبها فى مقتل و حاله من القرف و على الفور يسقط من نظرها ..اما لو كانت اللى بيعاكسها ست كبيره و اكبر بصوره واضحه من سن زوجته تسيبه و يمكن تساعده ولا يشكل ما يفعله اى شيىء عندها ...اذا معاكسه الزوج لأمرأه اخرى مرتبطه و بشكل كبير بعمر المرأه الأخرى و درجه جمالها و دى مهمه جدا

اما عندما تسقط الزوجه من عين زوجها ...اعتقد انها تتلخص فى جمله واحده ...هى انها عندما لا تحترم رجولته فهى فى تلك الحاله لا تعد زوجه و لا حتى شريكه

مع تحياتى

[بنت شعنونة]

يسقط الرجل من عين زوجته في الحالات التالية....

لما يعمل زي بقية الرجالة ويتريق علي الزواج او عليها ولو في صيغة هزار في وجودها " هزار دمممممممممه يلطش بس كل المصريين بيعملوه مش عارفا ليه والستات كمان بيعملوه لكن الرجالة ما يعرفوش :) ولو عرف ان مراته بتتريق عليه قدام صاحبتها تبقى ليلة كحلي!!!!!!!! :P "

- لما ياخد فلوس من اهله في حين انه ممكن يمشي حاله ولو بشد الحزام شوية او شويتين...!

- لما يمسح جوخ لرجل اخر ولو كان رئيسة في العمل قدامها..

- لما يسيب ست اخرى تعلي صوتها عليه حتى لو كانت رئيسته في العمل!!! " اشمعنى مراته يعني!! :angry2: "

- لما ما يقضيش طلبات بيته مش لقصر ذات اليد و لكن لقصر ذات الفهم!!!!

-لما يصدق كلام غلط اتقال على مراته ويجي يسألها الكلام دا صح والا غلط؟؟؟؟؟؟؟؟ خصوصا لو كان من اهله!!!!!!!

- لما يكيل بمكيالين في نفس الموقف بينها وبين اهله.. او بين اهلها و اهله...

لو افتكرت حاجا تانية ها ابقى اقولها :angry2: :D :P

احنا جايين نهدي النفووووووووووووووووووس

[elhondos]

والله يا جماعة الموضوع ده منتشر اوى اوى فى معظم الاسر المصرية وطبعا ليه اكتر من سبب من اهمها الاسباب دى :

تدخل الأهل:

-قد يكون لتدخل أهل الزوج أو الزوجة أثر في إيذاء أحد الطرفين وخصوصًا إن كان سكن الزوجين مع الأهل، وهنا على الزوجة أن تكون عاقلة ومقدرة للموقف فلا تأمر زوجها بقطع أهله، وتصبر هي عليهم وتتغاضى عما تواجهه منهم من أجل زوجها ومن أجل نجاح حياتها الزوجية، كما أن عليها أن تحد من تدخل أهلها أيضًا في أمور زواجها وتحافظ على سرية مشاكلها.

وجود صفات سيئة عند أحد الزوجين:

-فالنسبة للزوج: هي على نوعين:

الأول: يمكن الصبر عليه ومحاولة تغييره مثل البخل أو الفقر أو قسوة الطباع والعصبية أو كثرة الخروج من المنزل وعدم الاهتمام بالزوجة، وضرب الزوجة وإهانتها.

والنوع الثاني: لا يمكن الصبر عليه وهي مصائب كبيرة مثل شرب الخمر ، والعياذ بالله، وترك الصلاة وارتكاب المعاصي، وخيانة الزوجة، ووجود مرض نفسي أو مرض عضوي فيه إيذاء من حوله.

أما عند الزوجة:

فنجد العناد والتحدي والكبرياء، واختلاف البيئات بين الزوجين، واختلاف المفاهيم الموروثة عن الزواج، ويدخل في ذلك أيضًا عصيان المرأة لزوجها وعدم طاعته، وسوء تربية الفتاة .

النكد الزوجي:

-إذا كان أحد الزوجين يتقن فنون النكد الزوجي، فهذا قد يتسبب في تدمير حياتهما الزوجية ، ومن مظاهر النكد الزوجي الشجار المستمر وغلظة القول وعبوس طرف في وجه الآخر، وأخذ الأمور بانفعال وتوتر مما يجعل الحياة مشحونة ومشدودة دائمًا.

وأقول للزوجة خاصة إن مجرد البسمة في وجه زوجها يمكن أن تحل هذا النكد، وقد قال رسول الله صلى الله عليه وسلم: 'تبسمك في وجه أخيك صدقة' فكيف بالزوج [رواه البخاري].

سوء العلاقة الخاصة بين الزوجين:

-وذلك لأسباب وهمية أو أسباب حقيقية، وهذا يرجع إلى عدم الاستعداد للزواج بالنضج والثقافة الزوجية، ويتطلب ذلك من الزوجين فهم الفروق النفسية والبدنية بين الرجل والمرأة والاختلاف في أسلوب تعبير كل واحد منهما عن الحب.

نشوز الزوجة أو الزوج:

-كلمة نشوز تعني خروج الزوجين أو أحدهما عن طبيعة وظيفته وعدم قيامه بها مدفوعًا بالكراهية وعدم الطاعة، وهذا قد يؤدي إلى الإطاحة بأركان البيت والوصول به إلى طريق مسدود.

و نقول للزوجين .... عليكما التفكير فيما إذا كان هناك مجال للصبر والتعايش مع الوضع ..... ولا تنسوا الفضل بينكما

[بنت شعنونة]

:angry2: :P

استاذ هندوس

اعتقد ردك دا تبع موضوع ازواج وزوجات؟

والا انا غلطانة؟ :angry2: :)

[زعلان]

وجود صفات سيئة عند أحد الزوجين:

-فالنسبة للزوج: هي على نوعين:

الأول: يمكن الصبر عليه ومحاولة تغييره مثل .....................وضرب الزوجة وإهانتها.

الضرب والاهانة :angry2: عادة زوجية ويمكن التغلب عليها :) ده كارثة ومصيبة

[elhondos]

يا بنت شعنونة انا توقعت تعليق على ردى بالشكل ده زى محضرتك علقتى لكن لو حضرتك قريتى ردى كويس هتلاقى موجود فيه اسباب سقوط الرجل من نظر زوجته والعكس

[المسروق]

يسقط الرجل من عين زوجته عندما تسقط هى من عينه

فأنا اعتقد ان كل شئ فى يد الرجل حتى حب زوجته له هو المتحكم فيه واحترام المرأة لزوجها مسؤليه الزوج نفسه

بدايات السقوط الصوت العالى والاوامر الهايفه للزوجة (يعنى ما تجيش فى الهايفه وتتصدر) والصوت العالى والزعيق فى الغالب مصاحب لشخصيه ضعيفة

ولكن السقوط الحقيقى عندما يضرب الرجل زوجته فتغير من صفه الزوج الى صفه اخرى لا اعرف لها مسمى

ففى هذه الحاله تكون زوجته سقطت من نظرة بدليل معاملته لها كحيوانه أو مجرمة فى نفس لحظه رفع اليد على زوجته يسقط من نظرها

[yacho]

انا حاكتب بشكل خاص شويه .. انا عارفه ان ردود الافعال حتختلف بس انا احب اعرفها لانها حتساعدنى فى اتخاذ قرار

مهم جدا حيتوقف عليه حاجات كتير جدا فاى حد حيشاركنى مشكلتى ارجو انه يفكر كويس ويحس بيا كأنسانه قبل ماكون

زوجه .. اى حد حيشارك يحط نفسه مكانى من فضلكم قبل ما يكتب اى كلمه .

مراحل سقوط وانهيار ونزول جوزى من عينى لدرجه اختفاؤه التام والنهائى من عقلى قبل قلبى رغم انى كنت بحبه جدا

وشايفاه احسن واجدع واشهم راجل فى الدنيا .

مراحل السقوط واسبابها

-------------------------

اول كذبه .. كانت قاتله بس كنت صغيره وبحب ومفيش حاجه اسمها طلاق فى عيلتى الا فى الحاجات الجامده قوى

لما حكيتها للمقربين التمسوا الاعذار لجوزى واقنعونى ان هو كذب عشان خايف ازعل واضيع من ايده .

مع العشره .. اكتشفت انه معندهوش اى اهتمامات ثقافيه ومقفول .. الدنيا حواليه بتتقدم وهو لا يبحث عن اى

شئ مفيد يطور بيه نفسه .. شئ صعب لما الست تكون متطلعه ومثقفه وعمرى والله والله والله ما حسست جوزى

انى احسن منه وحياة اولادى انا كنت دايما باكمل الناقص عنده وافيده باى شئ عشان شغله يكبر ويتقدم وربنا

شاهد على كلامى .لكن السقوط هنا كان بسبب ادعاؤه المعرفه واسلوبه الغير راقى مع اصدقائنا او المعارف

ومحاولته لتسفيه ارائنا جميعا باسلوب سمج ومستفز وهو حاطط رجل على رجل فى وش اللى بيكلمه وكانه

عارف كل حاجه وللعلم هو فقد كل اصحابه الكويسين .. واحتفظ بس بالناس الاقل وطبعا كلنا فاهمين ليه .

القهر .. بمعنى استغلال سلطاته كزوج فى فرض كل حاجه مش عايزاها عليا .. واول مره اعترضت اتعلمت اول

درس ممنوع اعترض نهائيا على اى شئ .. وحاقول السبب فى السقطه اللى جايه

الشتيمه .. فى البيت وبره البيت.

مد الايد .. اسلوب التفاهم الوحيد المعترف بيه عنده .. كل ده وانا بره مصر وعندى اولاد .. ماتسالونيش

سكتى ليه .. بكل صراحه الخوف انا بخاف منه جدا جدا جدا

ملحوظه انا مبحبش الفضايح .. يعنى لما تحصل مشكله عمرى ما عرفت ازعق او اصرخ زيه او اشتمه لما يشتمنى

انا متربتش كده .. بجد .. رد فعلى الصمت لان اى رد حلو او وحش بيزود انفعاله .. طبعا ضعفى ده كان الفرصه

الذهبيه للشخصيه الغير سويه دى فى انها تتمادى لان مش لاقيه حد يوقفها عند حدها ..

ومن عيوبى القاتله اللى بندم عليها ان كبريائى منعنى احكى لاهلى وخفت اعمل مشاكل انا مش عارفه عواقبها ايه

وولادى بيحبوا بابابهم قوى قوى عمرى ما تخيلت انى احرمهم منه . . اهم حاجه فى الموضوع انى عمرى ما اشتغلت

ولو حبيت انفصل لازم اشتغل فى مصر عشان اقدر اصرف على نفسى وعلى الاولاد

ولذلك الصبر اللى انا صبرته ده فى الغربه ماكانش بدون فايده .. انا درست هنا والحمد لله معايا دبلومات فى اللغه

الفرنسيه تؤهلنى للعمل فى مصر فى حاله الانفصال الى جانب انى باكمل دراستى فى الصحافه وان شاء الله فاضل

لى سنه واخلص ربنا يصبرنى وتعدى على خير .

الصحوه

1-من 6 شهور بس بدات اتمرد بادب يعنى .. اتكلمت بهدوء مع جوزى فى انى مش سعيده وانى مش مرتاحه فى الحياه

معاه وان الولاد بداوا يكبروا واكبرهم بدا يسمع ويشوف حاجات ماحبش انه يعرفها واذا كنت صبرت فده كان عشانهم

ولو جو البيت مش هادى والاستمرار مش فى مصلحتهم يبقى الانفصال بهدوء افضل الحلول لهم ولنا عشان نقدر نربيهم

بطريقه كويسه حتى لو احنا منفصلين .. سالنى عن اللى مضايقنى .. سعدت بالبدايه دى وبدات اتكلم بصراحه .. النتيجه

سكوت 5 ايام وهو الهدوء الذى يسبق العاصفه حتى اول يوم فى العيد الكبير اللى فات .. للاسف انا مش باخللى الولاد

يروحوا المدرسه عشان يحسوا بالعيد لانى باخرج بيهم مع اولاد اصحابنا تانيين نعوض الغربه شويه والبعد عن الاهل واللمه

اليوم ده لن انساه .. جوزى بيدور على اى حاجه عشان يتخانق وانا بحاول اتلافى المشاكل منعنى اخرج بالاولاد .. وفتح

الموضوع تانى وكان رده التالى

حتضربى وحتاخدى بالج....... ومش حتفتحى بقك

2- من بعد اليوم ده والحياه من اسوا الى اسوا .. النرفزه على ابنى 10 سنين طفل مالوش اى ذنب فى اى حاجه على اى حاجه

هايفه .. ضرب بوحشيه لدرجه انه بيسيب اثر على جسمه .. اتدخل يضربه اكتر واكتر .. ممنوع اتدخل .. باروح ادفس راسى فى

اى مخده عشان ماسمعش

3 - اخر حاجه كانت لما حبيت اروح بالولاد السينما فيلم اطفال .. اتحلف عليا بالطلاق انى مادخلش السينما تانى ابدا .. اصله عارف

انى بعشقها .

قررت اخيرا احكى لاهلى واطلب منهم يقفوا جنبى فى اول نزوله لمصر عشان انا حاطلب الطلاق رسمى هناك لان هنا وانا لوحدى الامر

فيه اذيه ليا وللولد .. والحمدلله ان الكل واقف جنبى .. طبعا غلطونى وعاتبونى .. بس بجد انا مش حمل حد يقوللى ليه سكتى وليه وليه

وليه ..

انا وانا بحكى مانكرش انى خايفه منكم ومن ردود افعالكم .. اللى عايز يسالنى اى حاجه يسال انا مش مخبيه حاجه عنكم

ارجو منكم تجاوبونى على سؤال واحد صح اللى انا حاعمله واللا غلط هو انا كده باظلم ولادى لو انفصلت عن باباهم؟

معلش يا مدهش انا عارفه انى ممكن اكون خرجت بالموضوع بتاعك عن مساره .. بس انا حسيت انى لما صدقت اقدر اعبر واكتب واطلب

مساعدتكم اول مره اكون شجاعه وماتكسفش وبجد بجد ارتحت ..

[بنت شعنونة]

ياشو..

تسمحيلي اسالك شوية اسالة بصفتي انسانة و زوجه و طبيبة..

ومعلش استحمليني.. :blush:

الكلام اللي قلتيه قوي وكبير جدا.. وفعلا يهدم اي علاقة

لكن ممكن اسالك شوية حاجات..

لما اتجوزتيه كنتي بتحبيه؟ وهوا كان بيحبك؟ عرفتوا بعض قبل الجواز مدة قد ايه.. التغيرات و الحاجات السيئة دي ظهرت في مصر والا في الغربة.. ومن كام سنة ظهر الوش السيء

لو قلتلك تعصري على نفسك لمونة وتطلعي برا الصوررررررة خااااااااااااااااالص وتقوليلي ك انسانة غريبة ايه المحاسن الموجودة في جوزك.. واوعي تقولي مفيش عشان اكيد فيه ولو حاجات تافهة

وعاوزة اسالك ك زوجة بقى ايه المحاسن اللي لسا موجودة فيه حتى لو كانت تحت التراب..

معلش على الأسئلة الكتيرة بس عشان يكون ردي منطقي :blush:

[yacho]

ياشو..

تسمحيلي اسالك شوية اسالة بصفتي انسانة و زوجه و طبيبة..

ومعلش استحمليني.. :blush:

الكلام اللي قلتيه قوي وكبير جدا.. وفعلا يهدم اي علاقة

لكن ممكن اسالك شوية حاجات..

لما اتجوزتيه كنتي بتحبيه؟ وهوا كان بيحبك؟ عرفتوا بعض قبل الجواز مدة قد ايه.. التغيرات و الحاجات السيئة دي ظهرت في مصر والا في الغربة.. ومن كام سنة ظهر الوش السيء

لو قلتلك تعصري على نفسك لمونة وتطلعي برا الصوررررررة خااااااااااااااااالص وتقوليلي ك انسانة غريبة ايه المحاسن الموجودة في جوزك.. واوعي تقولي مفيش عشان اكيد فيه ولو حاجات تافهة

وعاوزة اسالك ك زوجة بقى ايه المحاسن اللي لسا موجودة فيه حتى لو كانت تحت التراب..

معلش على الأسئلة الكتيرة بس عشان يكون ردي منطقي :blush:

ايوه يا شانا اما اتجوزته كنت بحبه اول 4 سنين كان بيسافر وييجى لغايه ما سافرت معاه وهنا تاتى اجابة سؤالك التالت ان التغيرات والحاجات الوحشه

دى ما ظهرتش غير فى الغربه يعنى بقى لى فى الحاله دى 8 سنين .

عرفنا بعض قبل الجواز قتره قليله جدا 5 شهور

المحاسن

-بره بوالديه الله يرحمهم ايام ما كانوا على قيد الحياه.

-معاملته الطيبه لامى .

-ممكن يساعد فى البيت لو مش مجهد فى شغله.

-اتفق مع بابا الله يرحمه انى اكمل اخر سنه فى الكليه ووفى بوعده رغم التكلفه الماديه الكبيره لانى كنت بانزل مرتين فى الترمين مع بنتى وابنى .

-ايام ما نزلت مصر وعشت فيها سنه لوحدى مع الاولاد كان موفر لنا كل سبل الراحه اللى بيها نكون مرتاحين والولاد يكونوا سعداء ومستريحين(بس لما رجعنا هنا تانى بيسمعنى كل شويه ايه اللى عمله معانا )

حاليا

انا مش قادره والله اشوف اى حاجه كويسه .. حقيقى فى شئ جوايا اتكسر

[سيزيف]

عزيزى المدهش

الموضوع رائع وهام للغايه

و لكن اسمح لى ان اطرح الموضوع بشكل اخر فاسال :

ما هى الرجوله ؟

الرجوله - من وجهه نظرى - ان يكون الشخص

حنونا و قويا

حازما و عاقلا

مرح دون ان يفقد احترامه

واثق من نفسه و فى زوجته

مقنع و مرن و قوى الشخصيه

لا يخشى من الاعتراف بانه على خطا

و يستطيع ان ينبه زوجته الى اخطائها بما لا يجرحها

عفيف اللسان و اليد

صادق لا يكذب مهما كانت العواقب

مخلص لا يخون و لو حتى على سبيل الهزار و الدلع

لا يمكننى ان اتفهم ان هناك اسبابا تحث الرجل على ضرب زوجته او اهانتها

حتى ولو ادعى الرجل انها دفعته الى ذلك

كل رجل - و كذلك كل امراه - مسئول عن اختياره

فاذا اخطا الاختيار عليه التحمل و محاوله علاج الخلل

فان استحال ذلك - وانا اميل للاعتقاد انه لا يوجد مستحيل وان كل شخص قادر على التغيير - فالانفصال ان كان ذلك ممكنا

-------

عزيزتى ياشو

هل تسمحين لى ان اقول لك كلمه كاخ ؟

اعلم ان ما فعله زوجك هو امر صعب للغايه

وانا نفسى لا ارضاه لاختى مثلا

ولكن فهمت من رسالتك ان لديك اطفال

اسمحى لى يا عزيزتى ان اطلب منك عدم الياس سريعا

ان تصبرى الى اقصى درجه

ان تتحلى بالحكمه و الصبر

لابد ان يدور بينك و بين زوجك حوار

لا تسعرى زوجك بعيوبه - فبعض الرجال يكره ذلك -

حاولى ان تمتدحى مميزاته - ولو كانت قليله

وان تغطى على عيوبه و لو كانت كثيره

ليس من اجله و انما من اجل الاطفال

فهم فى النهايه من يدفع ثمن الانفصال

ان بعضنا قد يتعرض للابتلاء فى زواجه

و عسى الله ان يعوضك الصبر على تلك التجربه الصعبه

ولا تفقدى الامل فى ان يتغير زوجك

الله قادر على كل شىء

[yacho]

عزيزى المدهش

الموضوع رائع وهام للغايه

و لكن اسمح لى ان اطرح الموضوع بشكل اخر فاسال :

ما هى الرجوله ؟

الرجوله - من وجهه نظرى - ان يكون الشخص

حنونا و قويا

حازما و عاقلا

مرح دون ان يفقد احترامه

واثق من نفسه و فى زوجته

مقنع و مرن و قوى الشخصيه

لا يخشى من الاعتراف بانه على خطا

و يستطيع ان ينبه زوجته الى اخطائها بما لا يجرحها

عفيف اللسان و اليد

صادق لا يكذب مهما كانت العواقب

مخلص لا يخون و لو حتى على سبيل الهزار و الدلع

لا يمكننى ان اتفهم ان هناك اسبابا تحث الرجل على ضرب زوجته او اهانتها

حتى ولو ادعى الرجل انها دفعته الى ذلك

كل رجل - و كذلك كل امراه - مسئول عن اختياره

فاذا اخطا الاختيار عليه التحمل و محاوله علاج الخلل

فان استحال ذلك - وانا اميل للاعتقاد انه لا يوجد مستحيل وان كل شخص قادر على التغيير - فالانفصال ان كان ذلك ممكنا

-------

عزيزتى ياشو

هل تسمحين لى ان اقول لك كلمه كاخ ؟

اعلم ان ما فعله زوجك هو امر صعب للغايه

وانا نفسى لا ارضاه لاختى مثلا

ولكن فهمت من رسالتك ان لديك اطفال

اسمحى لى يا عزيزتى ان اطلب منك عدم الياس سريعا

ان تصبرى الى اقصى درجه

ان تتحلى بالحكمه و الصبر

لابد ان يدور بينك و بين زوجك حوار

لا تسعرى زوجك بعيوبه - فبعض الرجال يكره ذلك -

حاولى ان تمتدحى مميزاته - ولو كانت قليله

وان تغطى على عيوبه و لو كانت كثيره

ليس من اجله و انما من اجل الاطفال

فهم فى النهايه من يدفع ثمن الانفصال

ان بعضنا قد يتعرض للابتلاء فى زواجه

و عسى الله ان يعوضك الصبر على تلك التجربه الصعبه

ولا تفقدى الامل فى ان يتغير زوجك

الله قادر على كل شىء

اولا اشكرك على مداخلتك .. ويشرفنى تكون اخ لى

الصبر نفد يا شاين .. انا ساعات باسال نفسى انا ازاى استحملت كل ده بس ااستحملت عشان الاطفال دول .. والكبير فيهم بدا يكبرويفهم وعيب عيب عيب

يسمع شتيمة امه او يشوفها بتتهان .. ورغم كده وربنا الشاهد على كلامى انا عمرى ما عايرت جوزى بعيوبه ولا قلتها لحد وعمرى ما اتكلمت عنه وحش

لاى مخلوق ولا حتى الاولاد والله انا متربيه كويس وعارفه الاصول وساعات بندم انى اتربيت كده .. وللعلم انا ستات كتير تحكيلى على مشاكلها عشان اساعدهم من كتر ما هم شايفين ان احنا زوجين مثاليين وده كله ضغط عليا انا ..

بالنسبه للتغيير .. اوعوا تفتكروا انى باطلب االانفصال بدون ما اكون حاولت اغير بالادب وبالذوق وانا ما افتعلتش الادب ولا الذوق انا بطبيعتى كده

انا ماعرفش اتعامل بعنف اصلا ولا بتسلط .

بس اقسم بالله انى لو كنت حسيت ان هذه الشخصيه الصعبه فى امل فى تغييرها عمرى ما كنت حكيت لاهلى ولا حكيت هنا.

[nancy]

ياشو انا اتالمت جدا

لما شفت الى كتبتية وانا معاكى ان مفيش حاجة تغفر النوع دة من الاهانة ولا الحب ولا المساعدة فى البيت ولا برة باهلة دى تخليكى تستمرى

لان الاهانة مش حاتقل لا حتزيد

راى لو كنت مكانك ان لازم انظم دماغى

يعنى لو نزلت مصر بيتك الى حتعيشى فيه

مدارس ولادك

شغلك والدخل الى ممكن يجى من وراة

لو كل دة مظبوط وممكن انزلى مصر

ومتتطلقيش سبية يجرب الحياة من غيرك سنة

وارفضى اى كلام معاه او حوار او عتاب

سبية يراجع نافسة ويرتب اوراقة

لازم يروح لدكتور نفسى ويتكلم لحد ما يوصل اصل الحكاية دى اية

وازى يسيطر على اعصابة

بعد السنة دى تقررى وهو يعرف غلطتة

تعيشى معاه فى مصر 6 شهور وتجربى متروحيش معاه فى الغربة تانى الا لو اتاكدتى انة اتغير

لية باقلك ادى فرصة

علشان الولاد الطفل الى بيحصل طلاق بين الاهل بيتكسر حاجة جواة مش ممكن تتصلح

وكمان حتة الحب الى كانت بنكم قبل كدة يمكن تنور تانى

لو دة محصلش وامورك مستقرة انفصلى عنة وافتحى صفحة جديدة فى حياتك

الطلاق مش اخر الدنيا دى حاجة ناس كتير بتمر بيها

والحياة من غير زوج احسن من الحياة مع عذاب متحرك امام عيونك

وردى على مدهش من غير كلام كتير

الراجل بينزل من عين مراتة لما ميبقاش راجل

والست بتنزل من عين جوزها لما متبقاش ست

كلمة راجل وكلمة ست مليانا بالمعانى لو تحققتش يبقى متنطبقش على هذا الانسان المنسوبة الية الكلمة

[أسد]

للأسف الشدي ..

كثير من الأزواج لا يعرف أنه قد يخسر زوجته للأبد .. ويقتل الحب ..

إذا قهرها ...

فالقهر أسوأ مايمكن أن يتعرض له الإنسان على الإطلاق ..

فما بالك إذا كان القهر من أقرب الناس ..

والإستقواء ..

هذه معضلة كثير من الرجال ..

ويعتقد أنه يمكنه الإنتصار في أي معركة مع زوجته لأن عضلاته الأقوى ...

تلك مأساة أخرى ..

[بنت شعنونة]

ياشو..

انتي سكككككككككككككر :blush:

معلش عارفا مش وقته بس كان لازم اقولها :blush:

طب يا ستي اعتبريني واحدا حشرية وعمالة ترغي معاكي.. ماشي..

وانا لا اعرفه ولا اعرفك ف اكيد ها اكون محايدة على ضوء " كلامك"

دلوقتي الحاجات اللي انتي قلتيها دي محاسنه حاجات صععععععب جدا انها تبقى تمثيل والأصعب انها تتبدل للأسوأ

وان كان لها مدلول فهي تدل انه فيه شيء طيب جوا جوزك وشيء اصيل وكيته كويسة جدااااا كمان

لكن...

وهنا دا المهم

ممكن الواحد في الغربة يتغير وقلبه يقسى

لكن استحالة يتحول في الحاجات " المحاسن" اللي ذكرتيها

وخاصة ان فيها شق ديني بعلاقته بوالدية وبوالدتك

ف دي تعتبر بداية خيط جيدة جدا بالنسبة ليا..

انا بتكلم معاكي بصوت عالي و يجوز يكون كلامي مش مرتب بس استحمليني..

الأسئلة تاني..

تفتكري هوا سعيد معاكي دلوقتي؟ وايه بيسعده منك دلوقتي وايه الحاجات اللي بتضايقة منك دلوقتي؟

فكري كووووووووووويس وحطي نفسك مكان جوزك قبل ما تجاوبي..

لو جيتي بكرا في وقت يكون هوا هادي وسالتيه بعفوية فجأة وقلتيله ... انت زعلان مني في حاجا؟ طب نفسك في حاجات اعملها ها تخليك مبسوط مني؟

تفتكري رد فعله يكون ايه و رده عليكي ها يكون ايه..

هل المحاسن اللي ذكرتيها دي لسه موجودة لحد النهاردا؟

كلامك اللي قلتيه في اول مداخلة يتلخص كله في كلمة انتي قلتيها " خايفة"

والكلمة دي تحتها مليووووووووووووون خط احمر

بس خديني على قد عقلي وانا جيالك في الكلام واحدا وحدا

استاذ اسد...

اعرف حالة زوجية فيها نفس الكلام تقريبا بس بدون غربة

تعرف السر كان في ايه؟

انه كان دااااااااايما حاسس انها احسن منه فكان الحل الوحيد انه يعاملها بغباء عشان يحس انه احسن منها...

وها ابقى اقولكم ازاي اتحلت مشكلتهم على يد طبيب نفسي وهما دلوقتي عايشين سعداء فعلا رغم انهم كانوا على حافة النهاية ...

عشان نحل اي مشكلة

لازم صاحب المشكلة يحط كل المعطيات قدام عنيه عشان يعرف يختار حل صحيح

الكافر بيتوب

و المدمن بيخف

و السرطان بقاله علاج

يبقى نحاول الف مرة وبعدين نتصرف :huh: