مواقع النت .. وصنية الافطار .. والله الواحد احتار !!!

[achnaton]

بسم الله الرحمن الرحيم

سأظل طوال العمر الباقى أدعى على مخترع الشبكة الالكترونية .. والجدع اللى خرج علينا باختراع الجرائد الالكترونية .. كان الواحد عايش ومزاجه آخر روقان .. واخبار البلد بتوصلنا بعدها بايام .. ولما يكون هناك واقعة أو حادثه آهو احنا كنا بنضيف كلمة " كان " .. ونحتسب المصائب وغيرها عند القاهر الديان .. ونقول عليك العوض يارب ..

النهارده .. مواقع النت اتاحت لنا العيش والحياة مع اخواتنا فى كل ارجاء المحروسة .. وغم النفس والحزن والاسى والحسرة اصبح احد مكونات صنية الافطار ..

وصباح اليوم دخلت اقرأ الجرائد المصرية .. وبعد لمحات سريعة فى صحف النفاق

وبلاش نقول اسماء .. ونخش على المكتوب فى الجريدة الجديدة " المصرى اليوم " بترجعنى ايام زمان .. وايام جريدة المصرى بتاعة "عائلة ابو الفتح" وكانت تتحدث بلسان حزب الوفد الاصلى .. واستولت عصابة الكاكى على الجريده ومبانيها مقابل صك على البنك ب 15 الف جنيه .. المهم ده مش موضوعنا .. عاوزين نشوف الموجود بالصفحة الاولى من جريدة المصرى اليوم قبل ما ندب فى الافطار .. عشان نوفر شوية فى المصرفات لما نفس الواحد تنسد ونضرب على الافطار .. وممكن نأكل بالمندار ( يعنى ناكل بالعكس ) ..

انا لقيت حكاية " ابو زيد الهلالى " وهو راكب حصانه الابيض ورافع سيفه وزعلان قوى على الرعية فبيطمئنهم فى بساطه ان الحكومة الالكترونية حتشكل لجنة وزارية برئاسة نظيف – خبير التنظيف – ( طبعا تنظيف الجيوب .. والصوامع من الحبوب .. عشان الشعب بحس بالطعم اللذيذ للحرمان والجوع ) .. اللجنة دى حتملك 50 % من اراضى سيناء وجنوب الوادى ( جنوب الوادى دى معناه الصعيد ؟؟؟) وشمال الدلتا للشباب يالقرعة - طبعا القرعة القارعة نسبة الى القرع التى تعودت حكومة الهم الالكترونى على استخدامه فى الطبخات –

الوزير ده من الوزراء محترفى اللزقة الامريكانى اصحاب الكراسى الغير تفال .. هو اللى قافل نقابة المهندسين .. وهو اللى منع اعضاء الجمعية العمومية للمهندسين من الاجتماع داخل مبنى نقابتهم .. ولا حتى على السلم .. !! وبرضه دى خارج الموضوع خلينا فى موضوعنا ..

انا مش عارف الاراضى اللى جيوزعوها دى تبع آى ابعادية .. يعنى يا ترى حيأمموا عزب مين ؟؟ او بسؤال اوضع تبع مين .. بتاعة مين يا حكومه الخراب .. اذا كانت اراضى الدولة يعنى ملك الشعب .. فصاحب الحق فى توزيعها هم اهل المحروسة شعب مصر .. مالم يكن اعطاهم توكيل لبيع املاكه .. هو مش كفاية عملية بيع املاكه وشركاته بتراب الفلوس ؟؟ وعلى فكرة محدش يقول لى دى لجنة الزراعة والرى بمجلس الشعب .. المجلس ده لا يمثل الشعب وبياخد تعليماته من رئيس وزارة النكد والفلس .. يعنى كده بالعربى الفصيح أحد مؤسسات الوزارة التابعة لخبير التنظيف .. ولما العربة تمشى بالعكس تبقى مصيبة واكسه .. فيه حد يقول او يعترف ان رئيس الوزراء يعطلى تعليماته ويرأس نواب الشعب ؟؟؟ خيبة إيه دى ؟؟

هو ده اللى ناقص .. بعد بيع الشركات والمصانع والقصور والمبانى .. حيدخلوا على الأراضى ؟؟؟ أنا اول امبارح شفت برنامج فى التلفزيون عن مزارع هولاندى الفدان عنده بينتج عدة انواع من الطماطم .. عارفين انتاج الفدان كام طن فى السنة .. وصلوا كده على النبى .. وعين الحسود فيها عود .. 800 طن يا ساده ؟؟؟ ياريت بقى ابو زيد الهلالى او غيرة من وزراء خبير التنظيف الالكترونى يقول لنا الفدان عندنا بينتج كام ... بلاش بالطن بالكيلو حتى ..

مهزلة بيع او تخصيص أو توزيع اراضى الدولة طبقا لقرارات معالى رئيس الوزراء الالكترونى أمر غير دستورى .. وغير قانونى .. !! حرام عليكم دا آكل مال اليتامى مصيرة ادنى درجات نار جهنم .. واتقوا الله ..

اما الخبر الثانى .. اللى أثار وجدانى .. فهو تتابع سقوط اهل الثقة .. من عصابات المماليك الكاكى اللى انتشروا كالجراد فى مؤسسات الدولة من اصغر مجلس محلى حتى اكبر شركة انتاج او تجاره .. المرة دى رئيس شركة دمياط للحاويات .. ودى احد شركات العهد الحالى .. التى اسند رئاستها بالطبع لواحد لواء .. فرقع 20 مليون ومحبوس حاليا ؟؟ فيه اخبار أنيل من كده ؟؟ وعلى فكرة حكاية شركة دمياط للحاويات دى .. دى حكاية لوحدها .. عاوزه كذا صفحة عشان نشرحها .. ونوضح ابعادها .. هو كده فى اختصار شديد جدا الموضوع كله بتاع الشركة دى .. عبارة عن خدامه .. ( مش عاوز اقول خدمه .. لأن هناك فرق عقد الخدامه وعقد الخدمة .. فعقد الخدامه ده عقد أكل حقوق الخدامين بتوع ابوهم أصحاب بواخر الحاويات .العملاقة .. وصاحب محل التخديم .. ( يعنى المخدماتى ) كان " غراب الخراب " اللى انتم عارفينه .. وطبعا الخدامين بيأخدوا ثلاثة مليم .. والمخدم بياخد أضعاف الاضعاف .. ويمكن لغاية ما استطيع أن اوضح لكم الحكاية .. يطلع لنا واحد عنده ضمير فى شلة الافاقين .. ويشرح لنا الموضوع .. والعائد على يتامى المحروسة .. من افكار أهل الثقة رديف القوات المسلحة .. والله يخرب بيت كل من ظلم هذا البلد

ونكمل فى المداخلة الجاية .. مش قادر ..

تم تعديل 26 مايو 2006 بواسطة achnaton