كفر الصنايده (1) - اوبريت غنائى فى حلقات

[daktara]

اهل الكفر ملتفين حول احد الافراد و هو ينشد

عم شمروخ قام و قال يا ولاد بلدنا

الوزير فى الانتخاب طالب ودادنا

لو ساندناه واديناه اصوات ولادنا

قال حيبنى لنا مصليه بمادنه

ياللا ندعى له ف ركوعنا و ف سجودنا

الجميع:  ربنا يعلى مراتبك يا وزير

ربنا يخليك وتترقى مدير

واحد:    بسى عايزين للمصليه حصير

آخر:     وابقى عينِى على المادنه غفير

شمروخ:   ياللا قوموا يا شباب كفر الصنايده

           ابدءوا الحمله و هاتوا البت عايده

         واحبسوها فى الزريبه م النهارده

اصلها بتعمل دعايه للمعارضه

الجميع: المعارضه   المعارضه

ياللا قوموا يا شباب كفر الصنايده

ياللا قوموا يا شباب كفر الصنايده

افتحى الباب يام عايده

افتحى الباب يام عايده

ام عايده: دهده دهده  ايه جرى ياهل الصنايده

الجميع:  هى فين البت عايده  

هى فين البت عايده  

هى:      عايده نايمه...اصلها بعافيه النهارده

اه صحيح مالكم انتوا و مالها عايده

الجميع:  احنا مش ناقصين مناكفه او مناهده

هى:       لازم اعرف انتوا ليه عايزينها عايده

واحد:    عايده بنتك عضو بارز فى المعارضه

هى:المعارضه؟ طب وايه هىَ المعارضه؟

واحد اخر:لما شعبان كان حيتقدم لعايده

عايده وافقت ولا قالت يومها لأ؟

هى:     الحقيقه عايده قالت الف لأه

الجميع: طب وايه الفرق بين لأ و معارضه

هى:     طب وايه دخل الجوازه فى المعارضه

الجميع: فى السياسه لأ معناها المعارضه

هى:     ليه كده بسى يا عايده

ليه كده بسى يا عايده

الجميع:ياللا قوموا جرجروا عايده المعارضه

واحبسوها فى الزريبه يا صنايده

هى:     اه يا خيبتك يام عايده

اه يا خيبتك يام عايده

*****************

المشهد لشمروخ بين مجموعه من اهل الكفر

شمروخ:  قوم يا منسى و بيع فى سوق الكفر بطه

وانزل البندر و هات كام متر بفته

وابقى عدِى وانت راجع م المحطه

قول لسيدنا يسيب شغله ويفضى

لاجل ما يخطط بايده الحلوه يافطه

وابقى قول له يحط بالخط الكبير

يا رفاق الحاج شمروخ الغفيـــر

بايعوا بالدم مولانا الوزيــــر

صاحب المبدأ وابو القلب الكبير

واوعى تنسى تحط جنب اليافطه زير

واللى يشرب منه يدعى للوزير

_____________

والى اللقاء فى الحلقه القادمه

(Edited by daktara at 2:57 am on Oct. 28, 2001)

[هشام عبد الوهاب]

هايل يا دكتره

بس مين المجنون اللى بايع نفسه و اللى معاه  ...يقدر يعمله

اذا كانت البدايه كده ؟؟؟؟؟  النهايه ايه!!!!!!