الخريطة الظاهرة لمدينة القاهرة

[مهيب]

كليو .. بجد ... بجد و من غير كسوف ... انتى عسل ...

بعاكس ؟؟ أه بقى .. بعاكس

يالله كملى

مهيب

[Cleo]

كليو .. بجد ... بجد و من غير كسوف ... انتى عسل ...

بعاكس ؟؟ أه بقى .. بعاكس

يالله كملى

مهيب

وطى صوتك أحسن بابا يكون بيتمشى فى المنتدى :rolleyes:

[عادل أبوزيد]

يوجد مداخلتين خطيرتين للفاضل محمد دسوقى عن "دخانيق" القاهرة ، قرأتهم بمتعة و بعدها دار فى ذهنى سؤال عن الفاضل محمد دسوقى ، يا ترى كم عمره ؟ و هل لم نلتقى من قبل ؟

تقريبا ما قاله كما لو كان واحد "حافض صم" و "بيسمع" مش ممكن.

و عند قرائتى بالأمس تصورت أنه أخطأ فى إسم محل جارو ووضع بدلا منه محل أرتين و عدت اليوم ووجدت الرجل ذكر إسم المحلين.

و لكنه لم يذكر إسم مطعم أرسطو و هو أمام الإكلسيور فى الرصيف التانى من سليمان باشا بس جوه ممر صغير على اليمين أكله محترم و شيك و خيص على أد حال الموظفين النص نص و أذكر عنده محشى ورق العنب و المخ بالليمون بس ده منذ أكثر من 36 سنة

رابطة المداخلة الأولى من مداخلتين للفاضل محمد دسوقى فى موضوع دليل الرمرمة

[se_ Elsyed]

معليش إحنا بنتكلم

بمناسبة الخرايط

نرجع مع بعض كده 45 سنة ورا أيام ما كنا في تالته رابع ونشوف خريطة القاهرة الساحره

إوعى وشك

وده موقع خريطة توماتيكي توماتيكي

للقاهرة برضوا .. ماحنا مالناش غيرها مهما أتغربنا في بلاد الله الله لخلق الله وعند الدول المجاورة زي إسكندرية اللي بقى لها ييجي 100 سنة مبنية من ساعة الإسكندر ذو الأرنين ولسه لحد دلوقت مالهاش خريطة والناس بتسأل بعض في الشوارع واللي يقولك إنت تخرم من هنا وبعدين تاخد الترام أبو دورين تركب في الدور الأولاني توصل للزنقة تلاقي الأنفوشي في وشك عدل

صلي عالنبي وأدخلوها آمنين

ودي القاهرة كلها ملفوفة في ورقة جرنان بفنادقها بمطاعمها .. خدمة فاخرة ... هوم ديليفيري على موتوسيكل للي بيحبونا .. اللي بيحبونا بس ...

محروسة من العين يا محروسة

[hopsan]

عند الدول المجاورة زي إسكندرية اللي بقى لها ييجي 100 سنة مبنية من ساعة الإسكندر ذو الأرنين ولسه لحد دلوقت مالهاش خريطة والناس بتسأل بعض في الشوارع واللي يقولك إنت تخرم من هنا وبعدين تاخد الترام أبو دورين تركب في الدور الأولاني توصل للزنقة تلاقي الأنفوشي في وشك عدل

طيب يا سى السيد و اللى يجيبلك خريطه لإسكندريه تقوله ايه ؟؟؟؟؟

مش عايز اشمت فيك .......اللهم لا شماته

الثقافه انواع و اصناف .....تعرف ان للأسكندريه خريطه بكل ما فيها مرسومه من ايام الحمله الفرنسيه

طيب بلاش دى تعرف واحد اسمه المقريزى و يقال عنه تقى الدين المقريزى عامل خارطه للبلد تقولش هو اللى بانيها و لو مشيت عليها مش حتطلع من بحرى لأن دى آخر حدوده

و آدى عم السيد الخارطه بتاعه البلد ....و ملونه كمان ..مش ابيض و اسود يا سبحان الله ( على قوله عمرو خالد ) هه ...اسكندريه ...ماشى..؟؟؟؟ جبتهالك من تحت النصبه

معلهش حسيبك دلوقتى ...اصل الدره حيتحرق و العالم بدأت تهل و كله عايز دره من ابو شلن ...محدش عايز ياخد من ابو بريزه .......و سلملى على الحلبسه

[se_ Elsyed]

العتبة الخضرا

لو جيت القاهرة وما روحتش العتبة .. يبقى اسمح لي أقولك hard luck

ولو كنت أول مره تنزل مصر ( أصلهم بيقولوا على القاهرة إنها مصر ) إوعى أول ما تنزل في محطة باب الحديد حد يقرب منك ويقولك ( تشتري العتبة الخضرا يا بلدينا ؟ ) أو لو القُشاط ده مالقكش مريش .. ممكن يعرض عليك شراء ساعة المحطة .. على قد فلوسك

ما علينا

العتبة أو زي ما كانوا بيسموها العتبة الخضرا مُشكلة من مشاكل الزمن وحاجة كده عامله زي الأخطبوط اللي له كذا ذراع

يعني لو وقفت في قلب ميدان العتبة هاتحتار تروح فين ولا فين ... تتجه لشارع 26 يوليو والجلاء ووسط البلد .. ولا تتجه للموسكي وحارة اليهود .. ولا تهب على شارع عبعزيز وتطلع على عابدين وتدحرج التماسي على الريس في قصر عابدين المُحتل .. ولا ترجع ناحية باب الشعرية ...ولا تدخل كلوت بك .. ولا تروح القلعة والسيدة عيشه .. ولا تدخل حارة العوالم ( شارع محمد علي ) ... مشكلة فعلاً .. او زي ما بيقولوا في الإعلان " عالم من الإختيارات "

- عامة لو إنت واد آب تو ديت ولك في تكنولوجيا الإتصالات - زي ياسو كده - يبقى أنصحك تروح شارع عبعزيز وتستلقط لك حتة موبيل أخر موديل بسعر رخيص ... بس إحترس من النشالين .... ولو داخل عليك أيام مُفترجه زي أيام كاس العالم وعايز حتة تليفزون مفتخر 14 إنش تشوف فيه الماتشات من خلال الوصلة المسروقة اللي بتحرق دم صالح كامل .. يبقى هاتلاقي هناك محلات بالعبيط تقدر تشتري تليفزيون محترم وبسعر أقل من السوق ...

- ولو إنتي بنت وعلى وش جواز وبتجهزي الحاجات اللي عليكي واللي إتفقتوا عليها في قراية الفاتحة ساعة لما خطيبك جه يزوركوا مع أمه واخواته وجاب لكم دستة جاتوه .. يبقى هاتلاقي في شارع عبعزيز هناك ما لذ وطاب من الإجهزة المنزلية ( ثلاجات ، غسالات ، بوتجازات بفرن ومن غير فرن ) ....ولو كان معاكي "محمود خطيبك " وهو اللي عليه النجف .. يبقى عليكي وعلى ( درب البرابرة ) حيث أجدع محلات بتقلد أتخنها نجفه كريستال نمساوي - صورة تبك الأصل - ... وبعدين ما تجيبوا النجف إسألوا على ( المناصرة ) وروحوا إتفرجوا على صورة مُصغرة من دمياط حيث العديد من محلات النابوليا وفيها الغالي والرخيص... وما تنسوش وإنتوا راجعين تعدوا على شارع محمد علي أهو بالمره تتفقوا مع الست " سنيه سيبني في حالي " العالمة المتصيطة والتي أحيت أفراح العديد من ملوك وأمراء دولة مصر والسودان ... ودي بتيجي مع الطقم بتاعها من العوالم والمغنيين وهاتعمل لكو ليله ما حصلتش .. معليش هاتلاقي الشارع اللي كان مشهور بالفن والطرب زمان إتحولت محلاته ومقاهيه التي كان يجلس عليها مشاهير الفنانيين إلى مطابع للأوفسيت .. وأهو بالمرة إطبعوا كروت الفرح بتاعكو ... بعد كده وعلى رواقه إتمشوا في شارع الموسكي أهو بالمره محمود ينقي له بدلة فرح تمشي الحال .. وإنتي تتفرجي على موديلات مختلفة ومناسبة من فساتين الأفراح ... وبعد ما تاخدوا شارع الموسكي رايح جاي كذا مره .. عدوا الناحية التانية من شارع الجيش إشتروا لك جزمتين بدل اللي دابو من اللف وبالمره إطلعوا من الناحية التانية ناحية موقف الأتوبيس - بتاع فتاة العتبة الشهيرة - وكلو كشري من عند " سِحس " وقوموا روحوا بقى عشان ما عندناش بنات تتأخر بره البيت لبعد الساعة 3 الفجر ..

- ولو كنت شاب روش وليك في اللبس على أخر موضه .. بس يا خسارة الميه ناشفه معاك والحالة ما يعلم بها إلا ربنا ومع ذلك عايز تضرب كام طقم هدوم حلوين تتمنظر بهم على خلق الله .. يبقى عليك وعلى سوق الملابس الرئيسي هناك .. وما تخافش ماحدش هاياخد باله إن الحاجات دي made in 3attaba أو زي ما بنقول عليها بالإنجليزي " عتبولي " ... وبالمناسبة لو قرصك الجوع وانت بتشتري هدوم إطلع بره شويه كده هاتلاقي محل أكل بيقدم وجبات لحوم غريبة حاجات مكورة وحاجات مدوره .. ما تسألش كتير .. كُل وإنت ساكت وماليش دعوة باللي هايجرا لك ... ولو إنت مالكش في اللحوم وواد ديليكا ولك في الفسفور .. إمشي كمان مترين بعد المحل العجيب إياه .. هاتلاقي زحمة رهيبة .. برضوا ما تسألش إتزاحم مع الناس لحد ما توصل عند البياع اللي هاتلاقيه من غير ما تطلب راح رازعك ساندوتش -المفرضو إنه جمبري مع طحينه وسلطه -وكل ده بجنية واحد.... يا بلاش مين قال هات ؟... وطبعاً مش هايبقى أكل وبحلقه يعني برضوا ما تسألش إذا كان ده جمبري ولا لأ .... وأستغفر الله مش هاجيب سيرة الحاتي اللي في السوق من بره وبيطل على شارع الجيش .. لإن إحنا إتفقنا أساساً إنك ضاربك السلك ومش حمل صابع كفته نضيف ...

- ولو كنت والعياذ بالله عندك شقة ولسه عالمحارة ومحتاجة توضيب يبقى عندك حتتين :

- الرويعي : ودي في قلب السوق بس متفرعه منه بشارع جانبي واحد على اليمين وإنت داخل من شارع الجيش .. وهناك هاتلاقي مستلزمات الأواب والشبابيك من أول المفصلات .. لحد العين السحريه .... وبرضوا لو كنت فنان ومرهف الإحساس هاتلاقي لوح من اللي بتتعلق على الحيط في أوضة المسافرين .. ولو عايز تعمل بارتيشن في الشقة وربنا موسعها عليك هاتلاقي البرفانات بمحتلف الأشكال والأنواع .. ولو المساحة مش مساعداك وعايز توفر الحيز اللي بياخده الباب في الفتح والقفل .. يبقى هاتلاقي هناك برضوا أبواب أوكردوين لها العجب .. ولو كنت عايز تحس جوه شقتك إنك قاعد في صالون حلاقة .. فممكن تشتري ستراة تتحط على الباب وهي على شكل خرز معقود في بعضه زي اللي نشوفها على ابواب صالونات الحلاقة ...

- شارع عبعزيز : ولو خلصت وناقص لك حاجة الكهربا .. يبقى روح شارع عبد العزيز بس مالكش دعوة بالشارع الرئيسي ... فادخل من أول داخله يمين هاتلاقي هناك العديد والعديد من محلات الأدوات الكهربائية من أول السلك الـ 2 مللي إلى وش الكهربا الإيطالي اللي بالشيء الفُلاني وفي محل كبير هناك للسويدي اللي عنده مصنع مشهور للوازم الكهربائية وإبقى اقرأ الفاتحة لذكرى وجوزها أيمن السويدي ..

خليك معانا وإوعى تغير المحطة إحنا لسه كل ده في محطة العتبة ..

تشاهدون بعد الفاصل وصف لحاره اليهود و مشاهد حيه من بوسطه العتبة و و

كفايه كده تشويق

نزل يابني إعلان شركة المحمول ( مع سين سين ... إتكلم براحتك ... شغال شغال .. والعشج حلال دوابتني دوب .. خليتني خيال )

[واحد تاني]

لأ… فسحتووونا صحيح يا ولاد مصر … :wub:

بقى يا راجل يا مفتري لما تنزل عندنا اسكندرية, ناخدك فى اليخت نلف بيك البحر المتوسط ونفرجك على اشي مكتبة واشي منتزة و اشي خيال يا ناس … ونروحوا من كافيهات على كازينوهات

واخرتها لما نيجوا بلدكوا تودينا العتبة الخضرا ؟؟؟ :P

وتقعد تلف بينا ف شارع عبعزيز وتدخلنا من رويعي لمناصرة؟ :o

ايه يا عم ؟؟؟ في ايه ؟؟؟ هو احنا جايين الصفحة دي نتفسح والا نشتري نابوليا ومفصلات؟ :angry2:

وبعدين تعالى هنا … هدوم ايه اللى (مايد ان عاتابا) اللى انت جايبنا نشتريها من هنا ؟؟؟ بقى احنا نبقى طول السنة بنشتري اشي من عند (جيوردانو) واشي من (اتش بي اس) واشي من (اتش اس بي سي) عشان يوم ما ننزلوا الاجازة نبقى حاجه كده تفرح و (ألا مود) تقوم تاخدنا تلبسنا فى العتبة؟ واخرتها تأكلنا عند واحد اسمه "سحس" .... :D

لا ويرجعوا يقولوا عيش كايزر وربع رغيف وكلام من الرمادي اللى مليان حكد تبكي بتاعهم ده .... عجبتو لك يا زمن mfb: !!!

العتبة الخضرا لو جيت القاهرة وما روحتش العتبة .. يبقى اسمح لي أقولك hard luck

بس تصدق انا اول مرة اعرف ان العتبة الخضرا دي من معالم الكاهرة السياحية ... اللى لازم اول ما ننزلو مصر نقومو نزوروها ....

تخيل طول عمري كنت فاكر اننا اول حاجة لازم نعلمها لما نيجوا عندكو اننا نخلع لامؤاخذة الكوتشي وننزلوا بوس ف الحديد بتاع شباك السيدة .

صحيح يا ولاد ...مصر ام الدنيا

انزل يابني بالاعلان بتاع ... نورت مصر :D

[nancy]

خلاص كفاية كدة على س س يا واحد تانى

ولهى انت قلت كل الى فى قلبى

مودينا سوق الكانتوا فى عتبة انت فاكرنا اية :angry2:

نجى نتفسح عندكوا تزحلقونا كدة

ولا انت يا س س باقيت غاوى حلاقة

على الله تهوب ناحية اسكندرية

انا لازقت على كل شجرة صورة ليك

وكاتبه تحتها ابحث مع الشرطة :wub:

[se_ Elsyed]

واشي من (اتش اس بي سي) عشان يوم ما ننزلوا الاجازة نبقى حاجه كده تفرح

اللي عطاك يعطينايا عم

بقى بقيت تشتري هدومك من عند ؟!!!!

الله يرحم " أزياء توحيده " بتاعت زنقة الستات واللي كنت لما تعوز تشتري منطلون تروح تاخد قرض من بنك القرية فاكر ولا نسيت ؟ !!!

ماشي يابا

وحتى أنت يا نانسي بتتريقي على العتبولي ؟!!!

طب إيه رأيك بقى إني صرفت نظر عن مشروع مكتب الديكور اللي كان هايبقى شراكه بيننا ، انا بالأفكار وإنتي بالمجهود والمال ... لعلمك أنا الشركات الأجنبية بتجري ورايا وتتمنى فوكيرة من أفكاري

أنا عارف الإسكندرانية حاكدين علينا وعلى أماكننا السياحية .. وكما قالت الرحالة الشهيرة " كليو بطه " الشهيرة بـ ( بنت بطوطه ) - إسكندرية دي تتلف في ربع رغيف يا رجاله .. ورغيف من ابو بريزة المُدعم يعني كمان مش الطباقي ...

وبالعند فيكوا أنا هاكمل

إحنا وصلنا فين ؟

آه عند حارة اليهود

[nancy]

ماشى يا س س يا بو الافكار

دة انا فضلت اعيط اعيط اعيط

علشان مش حتعمل معايا الشركة وتخسرنى الجلد والسقط :unsure:

ياعم رووووووووح خليك ف الاحلاقة

باة اسكندرية تتاخد فى ربع رغيف

طب وحياة ... مش عرفة احلف بمين

بس ماشى

خليك فى حارت اليهود حتعرف تشرحها ولا احكيهالك انا

واكلمك على الشوارع الضيقة والبيوت الى تشبة بيوت الواحات (دة لو كنت شفت الواحات)

ولا المعبد اليهودى الى كان متجدد من 15 سنة على ايد يهود المان

احكى ولا تحكى انت :lol:

ورينا شطرتك ياحلاق عصرك واوانك :wub:

:P

[Tafshan]

ايه ده :wub:

مال الاسكندرانية شادين حيلهم على المصاروة كده ليه :lol:

ده احنا كتبنا 5 صفحات عن الاكل و لسه ما خلصتش باقى محلات الرمرمه القاهرية :P

ماشى :unsure:

خليني افضا لكم و نبتدى .. و نشوف مين ح يزهق الاول

[واحد تاني]

ده احنا كتبنا 5 صفحات عن الاكل و لسه ما خلصتش باقى محلات الرمرمه القاهرية :unsure:

:wub:

[Tafshan]

لعشاق القاهرة : من كلمات سيد حجاب و الحان عمار و غناء على الحجار

http://elaghani.com/AliEl7aggar/hona-elqahera.mp3

هنا القاهرة الساحرة الآسِرة الهادرة الساهرة الساترة السافرة

هنا القاهرة الزاهرة العاطرة الشاعرة النيّرة الخيّرة الطاهرة

هنا القاهرة الساخرة القادرة الصابرة المنذرة الثائرة الظافرة

صدى الهمس في الزحمة و الشوشرة

أسى الوحدة في اللمة و النتورة

هنا الحب و الكدب و المنظرة

نشا الغش في الوش و الإفترا

هنا القرش و الرش و القش و السمسرة

هنا الحب و الحق و الرحمة و المغفرة

و انا ف قلب دوامتك الدايرة بينا

بصرّخ بحبّك يا أجمل مدينة

يا ضحكة حزينة .. يا طايشة و رزينة

بحبّك و اعفّر جبيني في ترابك

و اعيش في رحابِك و أقف جنب بابك

جنايني أروي بالدم وردة شبابك

يا زينة جنينة حياتنا اللعينة

بحبّك يا بنت اللذين

بحبّك

[se_ Elsyed]

يــــــــــــــــــــاه أنا رجعت بالموضوع ده تلاتين سنة ورا

( إحترس السيارة ترجع إلى الخلف )

قريت 3 مواضيع من كلاسيكيات المحاورات

موضوع القاهرة وحلاوتها

وموضوع الأخوة الأشقاء في إقليم الريف السكندر النائي .. دايماً أقول لواحد تاني .. إن أي حد مش من القاهرة بنعتبره من الأرياف .... مش عيب والله ...

وبأفنش دلوقت في موضوع دليل الرمرمة الخفية

[HDarwish]

وموضوع الأخوة الأشقاء في إقليم الريف السكندر النائي .. دايماً أقول لواحد تاني .. إن أي حد مش من القاهرة بنعتبره من الأرياف .... مش عيب والله ...

حتى لو كان من الشرقية؟!

[se_ Elsyed]

وموضوع الأخوة الأشقاء في إقليم الريف السكندر النائي .. دايماً أقول لواحد تاني .. إن أي حد مش من القاهرة بنعتبره من الأرياف .... مش عيب والله ...

حتى لو كان من الشرقية؟!

ده الشرقية بالذات هي اعماق معاميق الأرياف والجبنة القريش

[se_ Elsyed]

للرفع

موضوع أكثر من رائع للحاضرة الغائبة كليو

[الغريب]

كمان رفع على رفعك يا س س

موضوع جميييل بمناسبة بعد موسم الصيف والإجازات :P

للتشويق يعني