أنا والله كبرت .. واتخرجت !!

[مصرية الهوى]

( احترت أشكي والا أحكي والا أبكي :) )

الله ينور يا أليسا كلامك في الجوووووووووووون ..

امبارح وما أدراك ما امبارح ..

كان آخر يوم امتحان عندنا ..

طلعت من الامتحان وزغرطت زغروطة .. مش عارفه زغرطتها من الفرح .. مش عارفه ..

فرحت شويا اني برتاح بعد التعب ..

بس على رأي وحده صاحبتي كانت قرفانة من الكلية بشكل رهيب .. ومستنية اخر يوم بفارغ الصبر .. تقول .. مكنتش اتخيل ان فرحتي هتكون كده .. كنت فاكرة اني هأخرج من الكلية وانا مبسوطة اوي .. ومش هأحس بأي حب والا وحشة للكلية ..

بس دلوقتي كل ما اجي افرح الاقي جوا قلبي جانب مظلم .. جانب الفراق .. ومفرحش ..

بجد رجعت البيت وأنا متنكدة عالاخر :huh: ..

شعوري مقدرش أوصفه .. حاجه كده غريبة .. مفتكرش انه حد جاله الاحساس الغريب ده ..

بس كان فيه أمل .. انه هنعمل حفلة من بكرى .. اللي هو يوم الأربعاء النهارده ..

النهارده بقى .. وما أدراك ما النهارده ..

عارفين لما بيقولوا يوم فاصل أو يوم انتقالي ... يوم تاريخي في حياتي بجد بجد بجد ...

اجتمعوا تلاتة أرباع الدفعة من الساعة 7 الصبح تقريبا لحد الساعة 12 الظهر ...

أول حاجه كنا مبسوطين ونضحك .. وجتلنا تخمة .. تورتات على جاتوهات على قهوة على عصاير على شوكولاتات وكل حاجه تتخيلوها ..

زي ما نكون عمرنا ما أكلنا طول الاربع سنين اللي فاتوا ...

والاتوجرافات رايح جاي .. كل وحده تكتب للتانية .. عشان الذكرى ..

وضحكنا وانبسطنا وهيصنا وغنيتلهم .. " يا أولاد يا حلوين اشربوا الحليب "..

بس جالهم شبه طرش يعني .. عارفين محدش يستحمل جمال صوت الست .. عظمة على عظمة يا جيجي :) ..

المهم ..

اللحظة الفاصلة ..

الساعة 11 تقريبا .. كان فيه بنات هيخرجوا ..

المولد اتقلب مأتم ..

احضاااااااااااااان وعياااااااااااااااااااااااااط ودمووووووووووووووووووووع ..

ساعتها قلت الله يلعن الدنيا .. فعلا حقيرة جدا جدا .. حسيت فعلا بحقارتها وتفاهتها ..

ازاي تعمل فينا كده .. حرااااااااااام .. ازاي تفرق بينا بالشكل الوحش ده ..

مش معقول بجد ..

اكتشفت اني بمووووت في كل بنات الدفعة .. بجد كل وحده أطيب من التانية وأروع من التانية .....

كلهم كلهم .. بحبهم بحبهم اوووووووووووووووي ..

حسيت فعلا .. انه زي ما يكون قلبي هيوقف من شدة الموقف ...

ووحده صاحبتي وانا بعيط تقوليلي خلاص يا بنتي متعيطيش نبقى نتجوز راجل واحد .. ونبقى سوا طول العمر .. بأضحك وانا بأعيط ..

ياااااااااااااه اشوف البنات حواليا .. كان ليا زمايل كتير .. من كل السنوات وكل الاقسام ... وكل وحده من بلد ..

يعني مفيش امل ولا واحد في المليوووون اشوفهم كلهم ...

صحيح أغلب البنات معايا في الماسنجر والموبايل ... بس جو اللقاء مش هيبقى زي اللقاء في الكلية خااااااالص ..

ياااااااارب زي ما جمعتنا في الدنيا تجمعنا في الجنة .. وده عزائي الوحيد ..

الله كانت أياااااااااااااااااام .. ولا أحلى ولا أروع ..

أربع سنين من الجنة .. كل يوم فيها أحلى من التاني ...

حتى أيام التعب .. والامتحانات والبهدله.. حسيت قد ايه كانت جميلة ..

رحت أتمشى في الكلية .. كل مبنى .. كل ممر .. كل قاعة .. كل سلم .. كل معمل .. كل حتة .. حتى الحمامات .. كان ليا فيها ذكرى حلوة :blink: ... ( أنا مبدخنش )

افتكرت أيام راحت ..

أيام بجي فيها الكلية مبسوطة .. وأيام بجي فيها حزينة ..

وأيام تعبانة .. وأيام قرفانة .. وأيام عايزه أطير من الفرح ..

أيام نفسي أحضن كل بني آدم .. وأحضن الكلية .. وأقولهم بحبكم ..

وأيام بقول الله يخرب بيت اللي عمل حاجه اسمها كلية ..

أيام الحر .. والشمس .. والقرف .. ونروح ندور على القاعات المكيفة الفاضية .. والايسكريم وقزازات الميه الساقعة ..

وأيام البرد .. والمطر .. وشاي الزنجبيل ..والفول والتميس :) ..

ونروح ندور على الحتت اللي فيها شمس ..

واكتر حته مشمسة كانت في الساحة اللي في قلب الكلية عند النافورة ...

بعدين نلاقي أكوام من البنات متجمعين حواليها ..

اوقات الصبح وريحة القهوة ودونات الشوكولاته اللي تنعنش الواحد ..

محاضرات الصباح الهادية والدماغ تكون رايقة ..

الزحمة في البوفيه .. والزحمة على جداول الامتحانات والنتايج ..

الشجر اللي في الكلية .. والظل اللي تحته اللي كنا نقعد فيه ..

المسرح وحفلات أول السنة واخر السنة ..

المصلى .. والهدوء والروحانية ..

الساحة الخلفية اللي قاعدين فيها والطربيزة اللي نقعد عليها ..

الشلة .. أحلى شلة في الدنيا .. هايدي .. توته .. لولا .. فدّو .. تبولة .. مشمشة .. زيزي .. عجيبة .. أمونة .. -_-

ضحكنا وهزارنا وكلامنا اللي مبيخلصش ودردشاتنا ودموعنا وخناقاتنا وصوتنا اللي يجيب اخر البلد ..

المكتبة .. والهدوء .. وبعدين نضحك فجأة وتقولنا أمينة المكتبة .. انتوا في مكتبة مش في شارع .. (اكتشفت ان المكتبة جميلة في رابعة بس)

الامتحانات ..

تصوير الملازم والمحاضرات الناقصة ..المذاكرة والسهر.. وزميلات الامتحانات .. زميلات الامتحانات دول .. معرفش اسمهم ولاحاجه .. كل الحكاية اننا بنكون بنذاكر في مكان واحد .. كل يوم اشوفها وتشوفني .. نبتسم لبعض.. وكل وحده تبدأ تذاكر .. لحد ما الامتحانات تخلص .. ومبنشوفش بعض ..

الرعب والتعب .. التوتر والقلق.. الامتحانات السهلة والفرح .. والصعبة والعياط ..

التقادير اللي في الطالع واللي في النازل ..

وحطة الايد على القلب .. لحد ماالنتيجة تظهر ..

مشوار الكلية والطريق الزراعي ومزارع النخيل اللي على مد البصر ..

في قاعات المحاضرات ..

لحظات بحس بالعبقرية .. وأني أكتر وحده بتفهم في الدنيا ..

ولحظات بحس بالغباء وإني ازاي جبت سادسة ابتدائي أساساً ..

لحظات بحس بالتقدير والاهتمام ..

ولحظات بحس بأني كم مهمل ملوش وجود ...

لحظات بغتاظ من الدكاترة .. وأحس انهم شايفينا ولا حاجة .. وأقول حرام .. الحاجة للتقدير من أهم الحاجات اللي يحتاجها البني آدم .. ساعتها عينيا بتدمع .. لما بحس اني اللي قدامي .. بيحطمني .. بيكسرني .. بيشوفني ولا حاجه ..

وساعات بقول يا سلام .. التعب كله بيروح لما اللي قدامك بيقولك .. شغلك كان جميل جدا وذكي جدا .. لو فيه حاجه اكتر من الفُل مارك كنت اديتها لك ..

محاضرات كنت بنط قبل الوقت بساعة عشان متفوتنيش ولا كلمة من شدة ما انا بنبسط اووووي من المادة وبحبها ..

ومواد كنت بروح عشان اكتب الكلام عشان الامتحان بس .. من غير نفس ..

الضحكات المفاجئة اللي في قلب المحاضرة .. بعدين الدكتورة بتبصلنا بصاااااات ..

الرعب لما نتأخر على محاضرة لدكتورة مرعبة .. لدرجة مرة نضارتي وقعت واتكسرت .. وانا بجري ..

يا سلام .. سنين جميلة ..

أولى .. دخلت الكلية وانا معرفش ولا بني ادم .. واتعرفت حبه حبه على البنات ..لحد ما الشلة الحلوة تكونت ..

شهر بالكتير وعرفت الدفعة كلها ..

وكنت مهتمة بالدراسة اوووووووووي ..وخايفة مش عارفه نظام الكلية ...

تانية ..

أكره سنة في الكلية .. مع انها دلوقتي وحشتني ..

كرهتها عشان البرمجة .. كلها كورسات برمجة .. وانا في البرمجة تور الله في برسيمه ..

أغلب المحاضرات كنت بنام فيها .. وياما نمت عالكيبورد .. ولما أصحى وشي كله زراير ..

تالتة بقى ..

دلع ما بعده دلع ... كانت سنة في منتهى الجمااااااااااااااااااااااال ..

والتيرم التاني .. نزلنا تربية عملي اول مرة .. كانت تجربة جميلة جدا في حياتي ...

رابعة ..

ياسلاااااااااام .. صحيح انها اكتر سنة تعبت فيها عشان التربية العملي مرة تانية والمشروع .. وعشان المواد التربوية فيها كثيرة ....

بس فظييييييييييييعة ... وذكرياتها بتجنننننن وتعور القلب من شدة حلاوتها.. ياااااااه ..

بس كل تعب المشروع راح ..

لما قالنا الدكتور يوم المناقشة ... بجد أنا بقالي أربع سنين عمري ما شفت بنات فاهمين هما بيعملوا ايه زيكم ...

بمناسبة الدكتور ( برعي على رأي س س ) رحت النهارده عشان هأديه سي دي طلبه مني عشان المشروع ..

وكنت جبتله الهدية كتاب قاموس مصطلحات الكمبيوتر .. وكتبت في أوله إهداء .. إلى الدكتور الفاضل برعي ..

عسى أن أرد لك شيئاً من الجميل .. طالبتك : وجدان ..

وغلفتها ببتاع يلمع ( وليد بيعرفه )

قالي ايه ده يا وجدان .. قلتله حاجه بسيطة يا دكتور.. قالي شكرا ربنا يوفقك ياستي ..

هيوحشني اوي .. كان عبقري بجد ..

حتى العاملات اللي في البوفيه .. قلتلهم هتوحشوني اوي .. مفيش حد كل شويا هينط لكم ميه .. عصير .. سندويتشات .. ايه ده انتوا معندوكش غير الحاجات دي .. اكلكم مش حلو .. اسعاركم كل يوم في الطالع .. احنا طلبة غلابة ..

قالوا ليه هتروحي فين ؟؟ .. قلت : انا رابعة يعني مش هتشوفوا وشي تاني .. قالتلي بجد ربنا يوفقك ...

ورحنا بقى للدكتورات عشان نسلم عليهم ونقولهم سامحونا .. استاذة قالتلي معليش اذا كنا بنشد عليكم عشان مصلحتكم والله .. ووحده استاذة اللي بقولكم اني اتأثرت بيها جدا كانت بتدرسلي طرق تدريس حاسب .. قالتلي : متنسيش يا وجدان .. انتي وعدتيني تبقى استاذة طرق تدريس .. قلت ان شاء الله انتي ادعيلي بس ..

اه بس ..

يا ترى الدنيا مخبيالنا ايه ..

ان شاء الله الايام الجاية احلى من الرايحة ..

بس مهما كان ايام الدراسة بشكل عام الكلية بشكل خاص متتعوضش .. ايام ذهبية ..

مفيش في دماغي غير الكلية والدراسة وبس ..

لا مسئوليات ولا بيت ولا شغل ولا حاجه ..

يااااااارب سهل .. وجمد قلبي يارب عشان اقدر اواجه الدنيا المرعبة دي ...

قعدت اقرأ الكلام اللي البنات كتبوهولي .. بجد بيخلي اجمد واحد بيعيط ..

هأبقى أفرجكوا على أجزاء منه ان شاء الله...

لما حد انت بتموت فيه يقولك بحبك .. هتوحشني .. ربنا يوفقك .. ربنا يسعدك .. عقبال العريس اللي في بالك ( أحلى الدعوات :P ) .. هيكون شعورك ايه ؟؟!!

واكتر كلام أبكاني .. وحده بنت معانا .. كذا مرة بتشخط فيا قدام البنات شخط جامد من سنة أولى لحد رابعة .. وكنت بصراحة شايلالها في قلبي .. بتضايق منها جدا ..

تخيلوا كتبتلي ايه .. (أنا آسفة والله عشان شخطت فيكي قدام البنات كذا مرة بس سامحيني مكنش قصدي انتي غالية والله وليكي معزة بقلبي وبتخشي القلب ببرائتك وأسلوبك الطفولي ) قلتلها يا بنتي دي شتيمة يعني 22 سنة وشهادة بكالوريوس جبناها بطلوع الروح وتقولي طفولي ..

الله يسامحها بجد .. كلامها مسح كل اللي في قلبي عليها ..

وعلى فكرة كتير كتبولي بلهجة مصرية عارفين اني مصرية الهوى ..

مش عارفه بصراحة انا كتبت الكلام ده كله ازاي .. صدعتكم .. بعد ماارتحتوا من رغيي اللي مبيخلصش الفترة اللي فاتت ..

بس بجد أنا ارتحت اوي دلوقتي .....

على فكرة .. انتو وحشتوني كمان .. والمحاورات وحشتني اوي ( قولوا صباح الخير الحب الحقيقي بان :rolleyes: )..

أسبوع يكفي للنوم ؟؟!! .. مفتكرش ..

أغنية الأماكن - محمد عبده ..

[se_ Elsyed]

معليش أنا عايز أغير عنوان الموضوع لــ " والله كبرت ... وأحلويت " :rolleyes:

هي الدُنيا كده يا جيجي

مراحل مختلفة

طفولة

شباب

جامعة

زواج

خلفة عيال

شيخوخة

وهكذا

بس الجدع بقى اللي يعرف يستمتع بكل مرحلة وياخد منها حلوها ويستحمل مرارة مُرها

عارفه أنا مش غايظني ومحيرني إلا حاجة واحده في الموضوع ده

إنتوا بجد عندكو فول وتميس جوه الكلية ؟

إوعي تقولي آه .. أحسن أقولك يبقى ضحكوا عليكوا ودخلوكي " كلية القرموشي الثانوية بنات "

------

جرشي بقى يا حلوه جنب إخواتك وإستني عريس الغفلة ... وستبدأ مرحلة جديدة مننننننننننن الحياة

[مهيب]

أولا : ألف ألف مليون مبروك يا جيجى

و ثانيا : وحشتينا بشكل مرعب .. لدرجة ان أنا فكرت أروح أبلغ عنك الشرطة و أقولهم سرقت الموبايل بتاعى بس علشان يدوروا عليكى و يجيبوكى ... بجد وحشتينا

وثالثا : غيابك أثبت ان المنتدى فى وجودك له طعم تانى ... ماشى يا ستى .. أثبتى لينا انك مهمة و (فى آى بى)

نيجى بقى لرابعا :

كالعادة .. طوفان هادر من المشاعر الصادقة ... معرفش ازاى بتاخدينا معاكى كده من غير استئذان .. طوفان هادر .. صاخب .. مليان أحضان و دموع و ابتسامات و شقاوة و ضحك بصوت عالى .. طوفان هادر ميقدرش عليه الا اللى بيمتلك روح طفولية ... كم كبير من البراءة و الجنون و الرقة و المشاعر .. ايه يابنتى ده .. فى حد كده ؟؟ أحلى حاجة الذكريات .. لكن و بالرغم من نبرة الحزن الباهتة ... متنسيش ان زى ما قال س س .. حياة جديدة هتبدأ ... و الرائع اننا بجد مش عارفين ايه اللى مستخبى ... ودى المتعة للى يحس بيها

ذكرياتك رقيقة كالنسيم ... صاخبة كحفلات ميتالكيا .. حلوة كمذاق التوت البارد .. ذكرياتك بريئة كقصص الأطفال .. شقية كقطة صغيرة ... محببة للنفس كالصحبة ... ذكرياتك عذبة كموسيقى عمر خيرت .. عشوائية كقبلات الأحبة

تحياتى ليكى ... و ألف مبروك مرة تانية .

مهيب

[واحد تاني]

مبروك يا جيجي على انتهاءك من المرحلة دي من الطريق ... :blush:

واجمدي عشان المرحلة الجاية ... اثناء قرايتى لموضوعك ده مرت فى دماغي السطور الرائعة اللى كتبها الاستاذ مهيب عن يوم حفلة التخرج واحاسيس الوداع وفراق الزمن الجميل ... كنت مستنى منه يحط الوصله فى تعليقه عشان نرجع نقراها مرة تانية ويمكن نحزن وندمع بس اكيد هنبتسم تاني واحنا بنفتكر ذكريات مستحيل تتنسى ...

[Modest]

ألف مبروك على التخرج و إن شاء الله من نجاح إلى نجاح

حبيت أبارك لك و أنكّد عليكي (بدون سابق معرفة :blush: ) بجملة قالها لي رجل حكيم و مازلت أتذكرها إلى الآن :huh:

يوم ما اتخرجت من كلية الهندسة و أنا فرحان و مزقطط و جايب جيد جداً و متهيألي إني بقيت حاجة كبيرة :blush: ....... قال لي طبعاً مبروك و قام لحقني بالجملة اللي بعدها على طول .. تذكّر يا موديست يا إبني إن دي "البداية".

إن شاء الله يكون تخرجك من الجامعة هو البداية الجميلة لتحقيق كل ما تتمنيه :)

[Hammer]

ألف مبروك يا جيجي علي ترك حياة السعادة... و الإنبساط...

و الإنطلاق ... و المرح ...

والصحبة الحلوة... و الزقططة ...

و الفرفشة...و المخ الرايق ...

والدماغ الفاضية ... و التفكير في اللحظة فقط ....

مع تحيات هامر .... أخصائي تشجيع الشباب و تحميسهم للحياة :blush:

لأ نتكلم بجد علشان إنت أكيد بتعيطي دلوقتي من كلامي المشجع ده ...

علي الرغم من إن أيام الدراسة فعلاً أحلي أيام العمر و ده طبعاً مش بنعرفه غير ما نخلص ... بس الإنسان الناصح هو اللي بيعرف يتمتع بكل مرحلة من مراحل عمره و بالفعل كل مرحلة ليها جمالها و أسباب سعادتها الخاصة بها

ربنا يوفقك يا رب و من نجاح إلي نجاح :blush:

تم تعديل 31 مايو 2006 بواسطة Hammer

[مهيب]

بس كده ؟؟ انت تأمر يا (واحد تانى) .. و شكرا بجد على كلامك الرقيق

اتفضل يا سيدى ... (حفلة تخرج)

[احمد هادي]

مبروك يا جي جي

أحلي حاجة في كلامك العفوية والتلقائية

يااااااااااااه فكرتينا بأيام

كإن كل اللي بيتخرجوا بيحسوا بنفس الاحاسيس وانا مش واخد بالي

تصدقي اني لحد النهارد لما بعدي من جنب الكليه بفتكر الشريط من أوله

حافظي علي الذكريات دي في اعماق الذاكره

عشان ترجعيلها كل شويه

وتعيشي نفس الاحساس مرة تانيه

بس بطعم مختلف

مبرووك ياجيجي

عقبال

ما

يتخرجوا

عيالك

قولي انشالله

تحياتي

[متفائل]

ألف ألف مبروك يا جي جي

والله انتي انسانة رائعة وألبك جميل ولا أزكيكي على الله وانا متابع كل مداخلاتك

أنتي مش بس مصرية الهوى أنتي مصرية الروح

أنشاء الله تبدأي مرحلة جديدة من حياتك ربنا يوفقكك فيها ويرزقك بزوج صالح وأطفال صالحين

بس خدي بالك أنتي محتاجة زوج متفتح العقل وعنده نفس روحك الوثابة

أتفضلي وردة من تصويري

تم تعديل 31 مايو 2006 بواسطة متفائل

[khedr]

حمد الله علي سلامتك

وبعد كده نقرا و عليكي نرد

ركن كبير في المحاورات كان مغلق

احنا اللي كان ناقص لنا كتير

ياللا اتفضلي وشاركي

وامتعي الجميع

حمد الله علي سلامتك

[elhondos]

الله يجازيكى يا وجدان قلبتى عليا المواجع ...ليه كده بتفكرينى بايام الكلية :blush:

كانت أيام ....على فكرة انا لسة مخلص السنة اللى فاتت يعنى الايام دى فى بالى لسة وبحاول انساها من حلاوتها لانها لاتقارن بالايام الصعبة اللى احنا عايشينها دلوقتى...ربنا يستر بعد كده :blush:

[nancy]

جيجى وحششششتينى بجد بجد سعيدة برجوعك وحوارك الى مكتوب بسرعة وكانى سمعاكى بتحكية بكل حماس وحب

الدموع بتلمع فى عنيكى من الانفعال

التخرج دى مرحلة مهمة بس اثبات الوجود فى الحياة العملية اهم

ودى بروفة صغيرة على الفراق الدايم عن الى بنحبهم

ديما بفتكر اغنية الدنيا ريشة فى هوا طايرا من مين جناحين احنا النهاردة سوى وبكرة حنكون فية فى الدنيا

ودى الحقيقة

اهم حاجة يا جبيجى عندى ليكى شوية نصايح من اختك الكبيرة

بصى يا توتا (دة اسم الدلع لبناتى لما انصحهم )

حبى الدنيا والناس وبطلى تدخلى بقلبك اوى خلى عقلك الى يشتغل اكتر

خطتى لحياتك ومستقبلك بشكل جادى لان العمل يعتبر مرحلة حتحدد موقعك فى الحيز الى انت فية

لو حد زعلك تقولى متشليش فى قلبك لان واضح ان لو حد زعلك ودمع قدامك وكلمة حلوة بتنسى

فتعودى تقولى للى بيدايقك انت ديقتنى ومتتكسفيش

اتعملى مع شغلك زى صلاتك بمنتهى التركيز والاستغراق

اتمنى ان نصايحى تنفعك

ولما يجى العريس اقولك نصايح العريس

جيجي حبيبتى ابعتيلى موبيلك على االخاص لانى عوزة ابركلك

ومبررررررررررررررررررررررررررررررررررووووك

[محمود الشاعر]

عزيزة جيجي

كل سنة فى نفس التوقيت تقريبا وبالتحديد يوم 20/6 باعد اتفرج على شريط فيديو كنا صورناه اخر ايام الدراسة والشقاوة والجدعنة والصياعة والبهدلة والحب والقيل والقال وكل حاجة حلوة ووحشة بأعد أفتكر اد ايه الواحد كان جميل قوي من جوا ه حتى وان كان سبب مشاكل لحد بفتكر كل الوشوش واد ايه كانت جميلة ومختلفة عن الوشوش الموجودة دلوقتي وليها طعم مختلف امتى الواحد قال اول كلمة حب صادقة وامتى لعب وامتى اتلعب بيه صدقيني بيوحشني الانسان اللي هو انا زمان

لكن مع ذلك دي مرحلة وليها طعمها وجملها و حلوها ومرها وعدت

وفى مرحلة جديدة عليك فكري كويس انت هناك كانت اسوار الكلية بتحميك وادين الاصدقاء هتلقيها حواليك دلوقتى طلعتي للفراغ مفيش اسوار مفيش حماية غير ايمانك بربنا و بنفسك وبعقلك

[MZohairy]

الف مبروك يا جيجي

خلاص خدتي المسامحه ؟

:blush: طبعا انا متأكد انك مش حتفهمي يعني ايه المسامحه :blush:

[khedr]

ولا تعليق

يكفي الا ان نقول واحنا كلنا كان ناقصنا اخت حنونه

وانت وباق الاخوات في المنتدي تكملوا لنا عقد من لؤلؤ جميل

فهنيئا لنا جميعا بكم

[nancy]

زهيرى انا عرفة المسامحة جدى هو الى كان بيقلهالى

هو انت من ايام الجاير الكتريل ولا اية

جيجي المسامحة دى يعنى خلصت الامتحانات وخدتى اجازة الصيف

[Cleo]

ألف مبروك يا جىجى وعقبال الدكتوراه :blush:

[NoorJehan]

الأخت العزيزه جيجى،

ألف مبروك على التخرج وتمنياتى لك بالمزيد من النجاح والتوفيق.

تأثرت بشده وأنا أقرأ ذكرياتك التى أخذتنى لمراحل تنقليه مختلفه بالحياه..

يا له من ألبوم رائع لخص هذه المرحله الهامه من حياتك تستطيعين أن ترجعى إليه كلما أردتى...فلقد فعلت مثلك ودونت ذكريات هذه المرحله وكم أسعد كلما قرأتها خاصا لأنها سجلت مواقف جميله كادت أن تتلاشى مع الزمن..

جيجى..لا تحزنى على إنتهاء هذه المرحله.. لأنها جزء منك ستأخذيه معك أينما أخذك درب الحياه بعد ذلك...

لا تقولى وداعا ..ولكن قولى مرحبا للخطوات القادمه التى ستجدين بها نجاح أكبر وذكريات أكثر وأجمل إن شاءالله...

مبروك التخرج مره أخرى.. :happy:

[NoorJehan]

لا تقولى وداعا ...ولكن قولى مرحبا للخطوات القادمه التى ستجدين بها نجاح أكبر وذكريات أكثر وأجمل إن شاءالله...

وأنا بكتب السطر أعلاه القافيه حكمت وكنت هكتبلك:

لا تقولى وداعا ..ولكن قولى أحبك كى تزيد وسامتى فبدون حبك لا أكون وسيما (مع الإعتذار لكاظم الساهر) :wub:

ولكن قلت خلينى جد علشان الدور يتظبط وأنا بشارك خبرتى حول هذه المرحله (وش عماد حمدى) :blink:

:happy:

[مصرية الهوى]

سي السيد ..

الله يسامحك احلويت كده برضه .. أصلي في مستوى حلاوة بعدها الميزان يضرب ويقلب على الوحاشة :P ..

ايه رأيك في ثانوية القرموشي بنات ؟؟!! .. يعني اللي بتتخرج منها تبقى معلمة في الفول :D .. مشروع مش بطال ..

لا ياعم .. بناخد كل حاجه معانا من البيت .. يعني البنات بيخشوا الكلية وهم شايلين حلل :P ..

الأديب الطبيب مهيب ..

الله يبارك فيك يا مهيب وانتوا وحشتوني اكتر والله ..

ميرسي على كلماتك الرقيقة دي ..

أصلي اتلخبطت في الرد بقرأ موضوع التخرج بتاعك مرة تانية ..

ورديت عليك تاني هنا ..

برايفت بقى خارج الموضوع ..

ايه الصورة المرعبة دي يا مهيب .. بتخوف ..

واحد تاني ..

الله يبارك فيك يا واحد تاني ..

وعقبال تخرجك :P

موديست ..

الله يبارك فيك يا موديست .. ميرسي جدا جدا على الكارد الجميل ده .. كلك زوق والله..

فعلا زي ما حضرتك قلت .. انها البداية لحياة جديدة وحاسه كمان انها صعبة و محتاجه تخطيط جيد .. بس ان شاء الله ربنا يعينني واحط رجلي على الطريق الصحيح .. اصل انا اتعقدت من البدايات -_- ..

هامر ..

الله يخليك يا هامر ويبارك فيك ..

بس انت فكرتني بمثل عندنا بمثل عندنا يقول (معزّي سويلم :D ) رايح يعزيه وقعد يعيط أكتر منه ...

أحمد هادي ..

الله يبارك فيك يا أحمد ..

إن شاء الله وأجي أقولكم على تخرج عيالي واحد واحد ..

متفائل ..

الله يخليك يا متفائل ويبارك فيك .. أنت الأروع والله ..

بس حكاية الزوج دي .. وحده صاحبتي بتقولي أنا هأنزلك إعلانات في الجرايد .. أريد زوجا بيحب المذاكرة .. قلتلها يا حلوة ما اسمهاش مذاكرة اسمها يقدس العلم والفكر .. يؤمن بالحكمة المصرية القديمة القائلة " افتح قلبك للعلم وأحبه كما تحب أمك فإنه لا يعلو على الثقافة شيء " ..

يا خوفي يجيلي واحد آخر اهتماماته متابعة الأسهم صباحا مساء ...

وميرسي جدا على الوردة الجميلة دي .. يسلم زوقك ..

خضر ..

الله يسلمك يا خضر ويبارك فيك ..

كلامك عسل والله .. الله يخليك ..

بجد وحشتوني كلكم ..

elhondos

لا بص الله يخليك بلاش التخويف ده ..

قولي أيام الكلية .. دنتي بعدين هتقولي الله يخرب بيت الايام دي .. أصل الدنيا هتحلو أكتر وأكتر .. يعني .. إيحاء بس .. لان الإيحاء بيمشي معايا ..

نانسي ..

وانتي وحشتيني أكتررررررررررر والله ... الله يبارك فيكي يا روحي ..

ايه رأيك في المفاجأة النهارده .. على فكرة اصلي كنت لسا مصحصحة من النوم .. فالكروان يعني لسه مظبطش السلم الموسيقي بتاعه ...

ما هو يا نانسي مشكلتي إني لما بشرب من حاجة بشرب منها حتى الثمالة واتعلق بيها اوووي ...

و ميرسي على النصائح الجميلة .. ياريت اقدر عليها والله ..

محمود الشاعر ..

الله يخليك يا محمود ..

دايما الأيام الجميلة اللي راحت بتبقى ذكريات نفتكرها في الأيام الصعبة ..

زهيري باشا ...

الله يبارك فيك يا خالي ..

خلاص خدنا المسامحة وخرجنا لدنيا الله الواسعة ..

كليو ...

الله يبارك فيكي يا كليو .. يسمع من بقك ربنا ..

نور جيهان ..

الله يبارك فيكي يا نور و يخليكي .. شكرا على الصور الحلوة ..

فعلا أنا ناوية أعمل ملف أجمع فيه كل ذكريات الأيام الحلوة دي ..

عشان أرجع أشوفها من وقت للتاني ..

الآن قوليها ولا تتردي ..

بعض الهوى لا يقبل التأجيلا ..

:wub:

بجد ميرسي ليكم كلكم .. كلامك بلسم والله .. خصوصاً إنه عن تجربة ومن ناس بأحبها ويهمني رأيها ..

بس فيه كلمة في زوري كده لازم أقولها ..

كلمة " مبروك " دي .. أصرفها من انهي بنك إن شاء الله ؟؟ ..

مفيش حد قال .. عنوان بيتكم يا جيجي .. رقم حسابك يا جيجي .. نفسك في ايه يا جيجي .. بتحلمي بايه يا جيجي B)

تم تعديل 2 يونيو 2006 بواسطة مصرية الهوى