اللي مرباش كلب ميعرفش الوفاء على أصله

[MZohairy]

طلعت في دماغي اكلمكوا عن أوفى المخلوقات

الكلب!

مش عارف عاملين اسمه شتيمه ليه؟ :happy:

انا ربيت انواع كتير

جيرمان شيبرد و سان بيرنار و دالميشن و لولو

مش حقدر احكيلكم ايه الكائنات دي لما ترتبط بيها

طبعا في ناس حتقول عليا معقد نفسيا أو مش لاقي بني ادمين يربيهم ! :blink:

كنت لما اغيب عن البيت يوم او يومين مكانش الكلب يرضى ياكل مهما حطوله من اكلات مغريه

و أول ما أرجع ياكل مباشرة

ولما سافرت السعوديه مكلش لغاية ما مات

معلومه كده على الماشي عشان تعرفوا ان الكلاب دي حاجه راقيه...

كتير من البني آدمين بيعيا من الرمرمه في الأكل ولما يعيا كمان مبيبطلش أكل

الكلب مجرد ما يعيا يتوقف عن الأكل تماما حتى لو جابوله كباب الى ان يشفى

حبيت بالمداخله دي انصف كائنات كثير ما نظلمها و نقتلها في مجتمعاتنا الشرقيه والعربيه

شكرا

[احمد هادي]

حبيبي زهيري

مع احترامي الشديد لك ولكلابك ولكل الكلاب

إلا اننا كمسلمين لا بد ان تكون لنا وقفة -_-

فمن المعلوم شرعا ان الكلب لا يربي إلا للصيد أو للحراسة

وكلاهما من مقتضيات المصلحة

طبعا من المعروف ان ريق الكلب -أعزكم الله- من مصادر النجاسة :wub:

مما يجعل وجود الكلب داخل المنزل شبه مستحيل

كمان ان إطعام الكلب عمليه صعبه - حيث ان غالبية المصريين يجد صعوبه في إطعام نفسه وعيالة :happy:

لاحظ ايضا ان معظمنا خبراته مع الكلاب غير ساره علي الاطلاق

لانها تقتصر في الغالب علي الكلاب الضالة التي كانت تخيفنا ليلا ونحن عائدون الي منازلنا :blink:

علما بأني اتفق معك في ان كثيرا من الحيوانات - وليس الكلاب فقط - اصبحوا افضل من بعض البشر في هذه الايام B)

واخيرا أهديك الأغنية الشهيره :)

آل جاني كلب لولو

ابيض زي أمه وأبوه :D

تحياتي

[hopsan]

عم mzohairy

احب اصحح لك معلومه عن حكايه الوفاء

انا كنت فشبابى عاشق الكلاب و دى صفه متأصله فالعيله

فقد وصل عدد الكلاب عند لإحدى عشر كلب و كلهم وبلا إستثناء جيرمان شيبرد ( بلاك كوت )

و لم يحدث مره انى بعت كلب لأنهم كانو اولادى قبل ما يكون عندى اولاد و انما كنت بعمل بحث عن الشخص اللى بديله كلب و لن احكى لك عن ما هو الكلب وصفاته و علاقته بالبشر لأنه معروف و مكرر

و انما احب اقول لك ان الوفاء شيىء اساسى و متأصل فى البشر و عدا ذلك فهو شاذ و لا يعتد به كأساس

و انما علشان الإنسان عاقل و مدرك فإنه يتكيف على المعطيات التى حوله فلا هو ملاك لأن الملاك أقل فى المرتبه عن الإنسان عند ربنا ورغم كده لابتلاقيه بيخطأ و لا يتكيف على الأمور و لا يكذب ..اذا قلأساس فى الإنسان هى الصفات الحلوه مع شويه عقل و امامه معطيات الحياه بما فيها الصعبه و السهله ..فعلشان كده بيتحول لأشياء كتيره انت بتشوفها ...فأرجوك لا تقارن الإنسان بحيوان مثل الكلب

ماتخدلك كوزين درا من عندى قبل ما اروح..؟؟

[MZohairy]

أرد الأول على اخويا الصغير و شريكي في الغربه احمد

:blink: اولا ياحمد انا محتطش الموضوع في من هدي الاسلام انا حطيته في موضوعات خفيفه لأني بتكلم في جوانب معينه

و على فكره مفيش اي دراسه طبيه او علميه اثبتت ان لعاب الكلب فيه شيئ غير طبيعي او مختلف عن باقي الكائنات و اللي يقدر يثبت العكس يتفضل (مش بتكلم من الناحيه الدينيه)

وبعدين موضوع معظمنا خبراته مع الكلاب غير ساره انا مش مقتنع بيها لأن انا مصادري بتقول العكس :happy:

و حهديلك اغنية... عبد الحليم حافظ

يا كلبي خبي ليبان عليه ويشوف حبيبي دموع عينيه

اما اخي هوبسان فبالله عليك يا شيخ وقبل ما تديني كوزين الدره بتوعك

عمرك سافرت و سمعت ان ماتلك بني آدم من حزنه على فراقك؟

هه؟ :wub:

عمرك سمعت ان بني آدم يبطل ياكل عشان خاصمته؟

اذا سمعت قوللي عليه -_-

شكرا

[احمد هادي]

أرد الأول على اخويا الصغير و شريكي في الغربه احمد

:happy: اولا ياحمد انا محتطش الموضوع في من هدي الاسلام انا حطيته في موضوعات خفيفه لأني بتكلم في جوانب معينه

و على فكره مفيش اي دراسه طبيه او علميه اثبتت ان لعاب الكلب فيه شيئ غير طبيعي او مختلف عن باقي الكائنات و اللي يقدر يثبت العكس يتفضل (مش بتكلم من الناحيه الدينيه)

هل تقصد بكلامك هذا وجود تعارض بين العلم والدين؟ أم وجوب الفصل بينهما ؟

أما عن مسألة فصل الدين عن الموضوع

فأنا شخصيا لا أستطبع ان أفصل تعاليم ديني عن أي موضوع اتناوله حتي لو كان موضوعا خفيفا يا عزيزي

بس عندي سؤال برئ والله

إنت علماني يا زهيري ؟

تحياتي

﴿عن أبي قلابة عن النبي صلى الله عليه وسلم قال: لولا أن الكلاب أمة لأمرت بقتلها فاقتلوا منها الأسود البهيم﴾ (الخالص السواد) مختصر سنن أبي داود/ المندري م:4 ص:132-133

المصدر: الإعجاز الطبي في السنة النبوية تأليف الدكتور كمال المويل دار ابن كثير

وَحَدَّثَنِي عَلِيُّ بْنُ حُجْرٍ السَّعْدِيُّ، حَدَّثَنَا عَلِيُّ بْنُ مُسْهِرٍ، اَخْبَرَنَا الاَعْمَشُ، عَنْ اَبِي رَزِينٍ، وَاَبِي، صَالِحٍ عَنْ اَبِي هُرَيْرَةَ، قَالَ قَالَ رَسُولُ اللَّهِ صلى الله عليه وسلم ‏"‏ اِذَا وَلَغَ الْكَلْبُ فِي اِنَاءِ اَحَدِكُمْ فَلْيُرِقْهُ ثُمَّ لْيَغْسِلْهُ سَبْعَ مِرَارٍ ‏"‏

يقول الدكتور كمال المويل:

داء الكلب مرض خطير ٌ ينجم عن الإصابة بحمةٍ راشحةٍ، هي حمى الكلَّب، هذه الحمة لها انجذاب عصبي في حال دخولها للجسم، كما أن نهاية المرض مميتةٌ في كل الأحوال.

تحصل الإصابة عند الإنسان من عضِّ الحيوان المصاب و ذلك بدخول لعابه إلى الجرح، أي: حتى يصاب الإنسان يجب أن يلامس لعاب الكلب و كذلك أن توجد سحجة ٌ، أو جرح في الجلد ، و في هذه الحالة تنجذب الحمة إلى الأعصاب ،و تنتشر في كل الجملة العصبية ، مؤدية إلى التهاب دماغ مميت .

مدة الحضانة (أي: الفترة بين دخول الحمة و ظهور الأعراض ) تتراوح بين (10ـ 90) يوماً، وسطياً (40ـ 50) يوماً، و تختلف هذه المدة حسب مكان الإصابة ، فهي أقصر كلما كانت المنطقة أقرب إلى الدماغ و تطول في إصابة الأعصاب البعيدة عن الدماغ .

يمر المثاب بثلاث مراحل:

1. مرحلة انتشار الحمى: و مدتها( 2ـ 3) أيام، تتصف بتغيّر نفسي في المريض، فيصبح كئيباً متشائماً، ينشد الوحدة، و يتبع ذلك حكة في منطقة الإصابة مع أعراض تنبه ٍ حسية ٍ ، أو حركيةٍ ،و الحاجة الملحة لشدة الحركة و التجوال.

2. مرحلة التنبه و عمى الماء: و تتصف بظهور اهتزازات ارتعاشية ذات مظهر كزازي ، مع تشنج الحنجرة ، وآلام مبرحة لأقل لأصوات ، و حتى لرؤية الماء، و يتبع ذلك أعراض نخاعية كالتشنج الكزازي ،و الضزز ( هو إطباق الفكين على بعضيهما بقوة ).

3. المرحلة النهائية الشللية: حيث يموت المريض بشلل حركي مترقي.

نعود إلى ألفاظ الحديث النبوي: " و لغ في إناء أحدكم " أي شرب، و بشكل أدق أدخل لسانه في الإناء ليشرب، حيث ينقل لعاب الكلب إلى الإناء مم يعرض الإنسان للإصابة بهذا المرض.

أما لماذا الغسل بالتراب ؟

إن الحمة المسببة للمرض متناهية في الصغر، و كلما قلَّ حجم الحمة ازداد خطرها، لازدياد إمكانية تعلقها بجدار الإناء، و التصاقها به، و الغسل بالتراب أقوى من الغسل بالماء، لأن التراب يسحب اللعاب و يسحب الفيروسات الموجودة فيه بقوةٍ أكثر من إمرارالماء، أو اليد على جدار الإناء، و ذلك بسبب الفرق في الضغط الحلولي بين السائل (لعاب الكلب ) و بين التراب، و كمثال على هذه الحقيقة الفيزيائية إمرار الطباشير على نقطة حبر.

تم تعديل 1 يونيو 2006 بواسطة احمد هادي

[mohameddessouki]

عتقد من سمى هذا الحيوان كلب .... اخطاء !

ان الكلب نوع من البنى آدمين .... بعد ما تربية ميتمرش فية ويصبح هذا الطبع فيه

لكن معنى كدة اننا لانتعامل مع هذا النوع من الكلاب ؟

انا شايف ان كانوا يصرون على ان يكونوا كلاب فيجب ان نفخر باننا بنى آدمين ولا يجب ان نكون فى تعاملنا معهم كلاب

[صبح]

و على فكره مفيش اي دراسه طبيه او علميه اثبتت ان لعاب الكلب فيه شيئ غير طبيعي او مختلف عن باقي الكائنات

توجد بالفعل العديد من الدراسات التى أثبتت بالدلبلأن لعاب الكلب يوجد به من الجراثيم الخطيرة ولا تموت الا بالتراب وسابحث عنها وأضعها ان شاء الله

نقطة أخرى....

لا يعنى عدم اثبات الضرر... عدم وقوعه (وخصوصا ان كان من الحديث والسنة)

لا يعنى أن المداخلة ليست فى هدى الأسلام أن الأسلام لا يدخل فيها

[hopsan]

عزيزى mzohairy

اما اخي هوبسان فبالله عليك يا شيخ وقبل ما تديني كوزين الدره بتوعك

عمرك سافرت و سمعت ان ماتلك بني آدم من حزنه على فراقك؟

هه؟

عمرك سمعت ان بني آدم يبطل ياكل عشان خاصمته؟

اذا سمعت قوللي عليه

انا اقولك ...بس اسمع الحته دى ...انا لما اتخرجت فى الأكادميه و بعد 48 ساعه كان لازم ابتدى حياتى العمليه و اسافر للكويت لأخذ اول مركب و ابدأ اول يوم بحر فى حياتى ووالدى الله يرحمه مكنش عنده حاجه اسمها دلع و استعمل علاقاته و كنت متعين على المركب قبل تخرجى ...طيب اعمل ايه فى اولادى ( كلابى ) و كانو 3

جوكى و جينا و جينو فهدانى تفكيرى ان ارسلهم لصديق لى ابوه عندة عزبه كبيره فى الصحراوى ...و مقلكش قد ايه هما حاسين بأنهم لن يرونى مره ثانيه و حانت حالتهم تصعب على كل من يراهم حتى صديقى قال لى مينفعش آخدهم دول حيموتو عليك و انت بتحطهم فى العربيه ...و مطولش عليك الثلاثه ماتو بعد اسبوع من ذهابهم هناك بعد ان جائتهم هاله هياج و صرع و حرنو على الأكل لحد ما ماتو

ما علينا ..انا عايز ارد عليك بحكايه البنى آدميين

طبعا و انت سيد العارفين ان بعد الأم لا يوجد شخص عزيز كان ام غريب يمكن البكاء عليه بحرقه

امى كانت الله يرحمها و يغفر لها هى حياتى و مستقبلى و عمرى و نفسى اللى بتنفسه حتى كنت احيانا بهرب من رحلاتى علشان اكون بجانب امى فى ما لو جاها زكام و لما تزوجت و الله العظيم وفى اول يوم زواجى من زوجتى قلت لها قدام اهلها و قدام الجميع ان امى تحتل فى حياتى المرتبه الأولى و انت تأخذين الثانيه و لما يجى الأولاد يأخذون المرتبه الثانيه و انت الثالثه ..فما كان من امها قولها انا كده اقدر اموت و انا مرتاحه و مطمئنه على بنتى و عليه كانت حياتى تسير بنفس الحال الى ان وافت المنيه امى و هى بين يدى زوجتى و ذهبت لأمى و حمدت ربنا الحمد الكثير ان امى ماتت و هى بتدعى لى و لإخوتى ( هذا عن لسان زوجتى ) و بكيتها البكاء الأسود و حمدت ربنا الحمد الكثير و انا ابكى ...و لم اموت و لم انتحر وفكل صلاه لابد و ان اختمه بالدعاء لأبى و امى ...و انا زى ما بيقولو الصدقه الجاريه اللى بيسيبها المتوفى لما يموت و آدينى عايش قدامك اهوه ابيع فى الدرا .....تجيش تاخدلك كوزين درا بقى عالكلام الحلو ده ...؟؟؟؟؟

توجد بالفعل العديد من الدراسات التى أثبتت بالدلبلأن لعاب الكلب يوجد به من الجراثيم الخطيرة ولا تموت الا بالتراب وسابحث عنها وأضعها ان شاء الله

نقطة أخرى....

لا يعنى عدم اثبات الضرر... عدم وقوعه (وخصوصا ان كان من الحديث والسنة)

لا يعنى أن المداخلة ليست فى هدى الأسلام أن الأسلام لا يدخل فيها

انا اقولك .....بس نقطه هامه حتى لا اكون افتريت على كلام رسول المحبه ...بمعنى انا لا اذكر عمن نقل منه الحديث و لكنى اعتقد انى اعلم الحديث ولا اجزم بقوله حرفيا

إذا لغ كلب فى طبق احدكم فليغسله سبع مرات احدهما بالرمل ....هذا ما اعلمه عن قول رسول الله و لا اجزم به جرفيا

نعم هناك نجاسه فى فم الكلب ولا تعالج إلا بالتراب هذا ما اعلمه منذ نعومه اظافرى

الدرا المشوى .....قرررررررب

[nancy]

معلش يا زهيرى انا احب كل الحيوانات وهى بيبي

انما لما بتكبر مش بحبها

بس عموما مش باحب اربى اى حاجة عندها اسنان او بتطلع صوت

علشان كدة مش باحب اربى غير سمك وبس وممكن اهتم بالزرع

زهقت من العصافير والاختراع الجديد الى اسمة هامسر (حد يربى فار فى البيت مع العلم عندى واحد علشان بناتى بس بكرهه موت ونفسى ساعتة تيجى بس من غير تدخل منى)

انما انا معاك ان الكلب بيكون وفى جدا

وكمان الاعتماد علىالكلب فى مساعدة فاقدى البصر واكتشاف الامراض عند اصحابهم زى السرطان

[yasovinas]

سؤال بسيط

هل من العقل ان يموت انسان من الحزن على من فارقه اظن ان هي دي الميزة اللي بتميز الانسان عن الحيوان العقل وامكانية تقدير الامور وقياسها صح

انا قلت "الميزة" لان وبصراحه موضوع ان الكلب بيموت حزناً على صاحبة انا شايف انه عبط ولا مؤاخذه من الكلاب ,,,,, طيب سؤال للاخوة مربي الكلاب والذين قصوا حكايات عن موت الكلاب بسبب فراقهم لهم لماذا لم تنتحروا انتم بسبب موتهم ؟؟؟؟ مجرد سؤال

[MZohairy]

:angry2: هذا ما لم اريد الدخول فيه

انا بتكلم عن العلاقه الفريده بين انسان و نوع من الحيوانات الأليفه

بدون الدخول في اي تفاصيل دينيه

وانا لا علماني و لا اي حاجه!!!! و بحكي على اللي بيرددوه الساده البيطريين على لعاب الكلب !! هل بيتعارض او لا يتعارض مع الرأي الديني فأنا لست بيطري لأكذبهم و لست رجل دين لأثبتلك ضعف الأحاديث !!!

بس احمد للاسف مفهمش كلامي و جبتلي 7 جرايد ترد بيها عليا و رديت على نفسك في الجمله التاليه :

تحصل الإصابة عند الإنسان من عضِّ الحيوان المصاب و ذلك بدخول لعابه إلى الجرح،

اللي بيمشي على الكلب بيمشي على غيره من الحيوانات يعني زيه زي الذئب مثلا

شكرا لنانسي على التزامها بحدود المقصود من طرح الموضوع

اما ياسوفيناس......... حبقى انتحر في اقرب فرصه يا سيدي عشان خاطر موت الكلب بتاعي و عشان انت كمان متزعلش :o

[hopsan]

انا قلت "الميزة" لان وبصراحه موضوع ان الكلب بيموت حزناً على صاحبة انا شايف انه عبط ولا مؤاخذه من الكلاب ,,,,, طيب سؤال للاخوة مربي الكلاب والذين قصوا حكايات عن موت الكلاب بسبب فراقهم لهم لماذا لم تنتحروا انتم بسبب موتهم ؟؟؟؟ مجرد سؤال

عمنا ياسو ...انت لو قريت اللى انا كاتبه فوق شويه كنت حتعرف الرد على سؤالك

و بعدين موت الكلب على صحبه ده مش عبط دى حقيقه مجربه و مش انا لوحدى جربت الكلام ده تقريبا كل الناس اللى كانت مربيه كلابها صح....... يعنى ( واخده منها اهتمام شويه )

لم انتحر بسبب موت كلبى ....كان اولى انتحر لموت امى ......اومال امى سابتنى ادعى لها فى صلاه ليه؟؟؟؟

تاخودلك كوزين دره سوخنين؟؟؟؟؟

Nancy

انا كمان كنت مربى سمك محترف و لو عايزه اى معلومه عن تربيه الأسماك بس اطلبى و انا حاضر

خوديلك كوز درا كمان

[yasovinas]

زهيري يا غالي والله انت راجل عسل

يا عم اوعى تنتحر علشان الكلب

وعلى راي المثل {الجنازة حارة والميت ولا مؤاخذه كلب }

عمنا ابو سكندر يا غالي انا لم اقصد عبط في الحالة التي حكيتموها ولكن قصدي انه عبط ولا مؤاخذه من الكلاب ككل ؛؛؛ يعني قصدي ان اللي بيعمله الكلب دا مش وفاء لا دا عبط هات يا سيدي كوزين الذرا بس يكونوا مشويين صح مش متسلوقين ولا محروقين

[احمد هادي]

:angry2: دينيه

وانا لا علماني و لا اي حاجه!!!! و بحكي على اللي بيرددوه الساده البيطريين على لعاب الكلب !! هل بيتعارض او لا يتعارض مع الرأي الديني فأنا لست بيطري لأكذبهم و لست رجل دين لأثبتلك ضعف الأحاديث !!!

بس احمد للاسف مفهمش كلامي و جبتلي 7 جرايد ترد بيها عليا و رديت على نفسك في الجمله التاليه :

تحصل الإصابة عند الإنسان من عضِّ الحيوان المصاب و ذلك بدخول لعابه إلى الجرح،

اللي بيمشي على الكلب بيمشي على غيره من الحيوانات يعني زيه زي الذئب مثلا

عزيزي زهيري

أنا أيضا أقرا وأسمع من أطباء بيطريين عن لعاب الكلب -غير ما تقول -لكني وللأسف لا آخذ الأمور علي عواهنها بحجة انني لست عالم دين

لأنه ببساطة ان لم تكن تعلم فمن واجبك ان تعلم خاصة وإن الموضوع عشرة عمر مش مجرد يومين ثلاثة

ام أن الموضوع لا يستحق ؟

وأنا لم اقدم 7 جرايد يا صديقي العزيز

بل حديث شريف من أمهات كتب السنه (سنن أبو داوود)

ودراسة علميه قام بها طبيب فاضل ( أصدرتها دار نشر محترمة -مكتبةابن كثير ) وسهل جد الحصول عليها في الرياض

أما مسألة كون الحيوان مصاب من عدمة - فالكلام كان عن لعاب الكلب بصفة عامة - راجع آخر سطرين

أما موضوع قياس الكلاب علي الذئاب... فنحن يا صديقي لا نربي الذئاب في بيوتنا ولا نصاحبها

وبالتالي فهو قياس في غير محلة

وفي النهايه أهديك أغنية

طبعا أحباب

حتي لو إختلفنا في مسألة الكلاب

لك مني كل الحب التقدير

[MZohairy]

أحمد كتب :

وفي النهايه أهديك أغنية

طبعا أحباب

حتي لو إختلفنا في مسألة الكلاب

لك مني كل الحب التقدير

ــــــــــــــــــــــــــــــــــــــــــــــــــــــــــــــــــــــــــــــــ

اكيد ياحمد

حنخلي كلب يفرق بينا؟؟ :angry2: :o

والأغنيه اللي حهديهالك ردا على هديتك أغنيه.... تنبح.... من منطلق الصداقه وهي

الكلب يعشق كل جميل :o

[NoorJehan]

بصراحه يا جماعه أعترف إنى كنت من هؤلاء الفئه اللى لما تشوف كلب، وكأنها شافت الشيطان بسبب موضوع الصلاه والطهاره :wub:

وبرضه يمكن علشان كما قال الأخ أحمد إن خلاصه تجربه معظمنا مع الكلاب هى الكلاب الضاله اللى بيثيروا الرعب والهلع :) . لما أحكيلكوا

آخر تجربه لى مع الكلاب الضاله :P

كنت ماشيه فى شارع وقت المغرب ولقيت مجموعه منهم لما كنت هتسرع...ففضلت أبعد أبعد أبعد قدر المستطاع وعينى منزلتش من عليهم علشان أتأهب للجرى لو الموقف إستدعى ذلك...المهم فضلت ماشيه وعينيه عليهم ولما إنتبهت للشارع أخيرا، أتارينى كنت متجهه ناحيه واحد قريبهم وأنا مش واخده بالى :D لدرجه كنت خلاص هتكعبل عليه ...الحمدلله إن ربنا ستر وبكتبلكم المداخله دى خاليه من ال21 حقنه B)

عوده للموضوع...

أنا أتفق فى الرأى عن مغالاتنا ضد الكلاب بسبب موضوع النجاسه والصلاه..وكمان حديث سمعته عن ان المنزل اللى فيه كلب لا تدخله الملائكه...ولكن ألا يمكننا التعامل مع الكلب وفقا لهذه الضوابط بدون تفريط ولا إفراط؟؟؟ وذلك لأن شخص نبهنى - ربنا يباركله - ان الكلب حيوان وديننا الجميل حثنا على الرآفه بالحيوانات والرحمه والأحاديث الشريفه مليئه بهذه النماذج....ولكن للأسف معظمنا بيتعامل -كما كنت أفعل - على إن الكلب ده خنزير مثلا ولا صرصار...وكما قال الاخ زهيرى، فلا ينكر أحد صفه الوفاء فى الكلب..وأتذكر قصه شهيره كلنا نعلمها عن العائله التى كانت خارج البيت وحين عادت، قتلت كلبها علشان لقوا دم على فمه فظنوا إنه إفترس البيبى...وبالعكس طلع انه إفترس لصا كاد أن يسرقهم...او شئ مثل هذا القبيل..

المهم اننى تغيرت...ومن كام أسبوع كنت ماشيه لقيت حاجه مش باينه من الأرض ماشيه ورايا..بتدور.. لقيته أصغر كلب شفته فى حياتى :P ..أتاريه ساب أصحابه ومشى ورايا..وكان زىىى السكررر...وكانت الدنيا بتمطر فكان لابس حاجه كده مضاده للمطر... :D

لقيتنى تلقاءيا بشيله وبلعب معاه لغايه ما أصحابه أخدوه..وإستغربت اوى إنى شيلته -_- لأن لا يمكن ده كان يحصل أبدا..ومظنش هيحصل كتير ولكن الفكره هنا ان الواحد بعدها تطهر عادى خالص علشان الصلاه وبس خلاص..دون مغالاه فى التصرف..

وأحب أنهى المداخله بأغنيه أنا كمان أهديها لكم، إشمعنى إنتم :P

"الكلب يحب مره ميحبش مرتين"

:P

[MZohairy]

يا سلااااااام يا نور جيهان.....

اهو انتي اثبتيلي انك عظيمه

مش زي...........الناس التانيه... :P

على فكره رغم اني مش عايز ادخل الجانب الديني في الحكايه الا انه تعقيبا على كلامك فان الشيخ خالد الجندي قال ان الكلب نجس انما لا ينقض الوضؤ

و ده احد الآراء

ورأي تاني انه بينقض

و رأي تاني انه شيطان و علينا قتله

و رأي رابع انه حيوان و علينا معاملته برحمه و رفق

اللي يعجبك خديه

انما اهنيكي على روحك الرقيقه :P

[احمد هادي]

الشيخ خالد الجندي قال ان الكلب نجس انما لا ينقض الوضؤ

: :P : ؟؟؟؟؟؟؟؟

تم تعديل 2 يونيو 2006 بواسطة احمد هادي

[MZohairy]

والله العظيم قال كده

تحب احلفلك بالطلاق؟ :P

قال انه نجس في حد ذاته انما نجاسته لا تنتقل اليك لتفسد وضؤك

و كلامه كان واضح ولا مجال فيه لعدم الفهم

و أكد على السائله انها تستطيع الصلاه بعد مس الكلب دون وضؤ اذا لم تنقض وضؤها بأي من المنقضات المعروفه

[hopsan]

اختى نوور جيهان

عندى ليكى حته نصيحه صغنونه علشان تقدرى تمشى فى الشارع من غير ما تخافى ايد

اولا انك تبصى للكلب و انتى فى حاله رعب ده خطأ ما بعده خطأ فإذا خفتى و نظرت للكب اى كان نوعه فده يثره بصوره او بأخرى ...فأفضا شيىء طالما مالكيش فى معامله الكلاب و اول ما تلمحى واحد او حتى عشره ولا كإنك شيفاهم و امشى فى طريقك عادى ولا كإن فيه كلب ماشى جنبك او قدامك و بكده حتمرى قدامه او هو حيمر قدامك بسلام

اما الكلب اللى انت شفتيه ده كلب اسمه تشى واوا و ده بيبقى عامل زى جرس الباب ...يعنى لا بيهش ولا بينش و اول حد ما يقرب من باب الشقه يعمل ازعرينه مش اكتر ...عندى ليكى كوز دره مشوى معتبر و بشلن بس

ايوه......الدره المشوى ..ما يقول هات ؟؟؟؟