عربى لاتينى

[ezzat afifi kotb]

                  عربى لاتينى

قالوا غير اسمك جون ---- واشطب على اسم المأمون

سعرك ح يزيد كام مليون --- وتسيب القايمة السوداء

اسمى العربى نهايته عرابى ---- انزل ف الحاسب ارهابى

مع صورتى وشق ف اكعابى --- تتوزع على كل ميناء

سفارات الغرب تحقر شأنى --- تقبض منى وتهزأنى

يا حكومة باشكى مين يلحقنى --- استلم الرد كلام انشاء

مين فات داره هبط مقداره --- وقل كرامته وزاد من عاره

ليه يحملنا بقى بأوزاره ---- مصالح الدولة فوق الاهواء

خليك قاعد جوة البيت ---- ح ندعم لك فول بالزيت

وجنازة حارة لو اتوفيت --- موت العزة ولا استجداء

قلت اروح سفارة اعمامى --- واقدم الباسبور قدامى

شافه القنصل قال يا حرامى --- عينك ع البترول والماء

كان القنصل محمود خان ---- عربى مكسر م العنوان

أشر وبكل الالوان ---- نرفض تدنيس الاجواء

جدك خان عليه الرحمات --- قال ف عكاظ الشعر ومات

ارباب مال واحد شحات ---ابنه الشيكو احتاج لدواء

سابك عيان جوة الاوضة ---كاره وسع العين السوده

اصل عنيك شرطة وممدوده ---عاشق ف العين الزرقاء

لما يهل الشعر الاصفر --- نلقى جنابك رحت مخدر

ع العميانى تمضى المحضر --- تصريح ابدى معاه اعفاء

قاعد جنبى الانكل سام --- مرة ف عمره اخد حمام

شافه القنصل فز وقام --- ادى الختم اختم ما تشاء

خواجة ريحته زاكمة الانف --- وعلى هدومه زنخ ميت صنف

مقابلة اميرى بلطف وعطف ---- والترحيب قصائد عصماء

يا ابن الانكل وابن الانط --- ادى فروع شجرتنا السنط

فرعك من قحطان اتمط --- طالعه جذوره م الاحشاء

يعنى اسم الله عليك م العيلة --- تدخل تخرج احنا وسيلة

دمنا واحد نوع وفصيلة --- عربى لاتينى عصب ودماء

تبقى بلادنا سداح ومداح --- ولا فيها حدود وعليها سلاح

ظهرى بسوستة اقعد وارتاح --- البيت بيتك واحنا الغرباء

خليك ايزى اياك تتأسف --- شوارعنا بلاج والكل اتكشف

انت طابيبنا ح نقلع واكشف --- ابتر واكوى اهه كله دواء

قمت قعدت ف بيتى اتسرح --- جانى خواجة جى يتفسح

ومعاه كاميرا داخل بيبجح --- ويصور حوشى باستعلاء

صور ع الجدران صرصار --- وكمان صور جحر الفار

واوضة نوم فيها ست انفار --- صورهم بدون استحياء

صور برضة حجاب البنت --- وعيل بيحموه ف الطشت

ومقهى ف قبر وفوقه الدست ---وحريم ف الترعة بتملا وعاء

صور زفة بنت بنوت --- ومعاها رقاصة بورقة توت

وحجاب ع العرى وكله نقوط ---اموال مسروقة تضيع ف هباء

وكمان صور ف الاهرام --- موكب حاج لابس احرام

ومعارض مخنوق بكلام --- لسانه ع القرمة كان اشلاء

طيب فين اعمال المثل --- طعنه بطعنه ونصل بنصل

وصلف الجهل نقابله بجهل --- العين بالعين والكل سواء

عزت عفيفى قطب

[girl from alex]

مش عارفة اقول غير انها جميلة قوي مؤثرة قوي قوي قوي

تسلم ايديك حقيقي

[ragab2]

سواء عربى أو عرابى

تبقى فى قاموسهم ارهابى

وان  كنت  قمحى  أو عنابى

أو حتى هندى تبقى مسلم ارهابى

ولما تقول توكلت على الله

قالوا  عبد الله من الانتحاريين

والبسملة تبقى  اخوان  مسلمين

الدين عندهم مجرد  فلوس وملايين

واللى يعبدوا ربنا غيرهم منشقين

سواء كان اسمك كوهين أو جون

لونك أسمر وكله  شجون

وان كنت معاهم وقدمت العون

برضه فى نظرهم ارهابى ومجنون

وعشان توكلت على الله أساءوا الظنون

داقوا العذاب والارهاب من كل لون

[حسن ابراهيم حسن]

حكم و الله ياسى عزت تعبر عن الواقع المرير و فى تقديرى انها لا تتأتى الا لحكيم مثلك ممن حلبوا الدهر أشطره كما تقول العرب و ربك يسلم على الدوام و الله المستعان يا حبيبىو لقولى

و من كان الإله له نصـــيرا      أصاب الخـــير فى يســـر و لين

و ربنا معانا جميعا , انه على كل شيئ قدير

رب ان شئت فالفضاء مضيق     و اذا  شئت فالمضيق فضـــاء