ماذا تفعلين لو اكتشفت أن زوجك يعرف امرأة أخرى؟!

[المدهش]

هل أنت غيورة جدا .. هل أنت من هواة تفتيش جيوب زوجك..وماذا لو اكتشفتي بالصدفة على طريقة الأفلام المصرية ..بقايا روج في منديله أو عثرت على شعراية غريبة على كم القميص..وهل تتنصتين على مكالماته ..واذا لاحظت مكالمات غريبة أصحابها يغلقون السماعة بمجرد أن يسمعوا صوتك على التليفون ..ولاحظت أن زوجك يهمس بصوت منخفض وهو يتحدث في الهاتف..هل ستتقمصين شخصية شارلوك هولمز كما يحدث أيضاً في الأفلام وتراقبيه..طيب من الآخر ..ماذا تفعلين لو اكتشفتي أن زوجك يعرف امرأة أخرى..وماذا لو واجهتيه وقال لك أنه يحبها وسيتزوجها عليكي؟!!

[bentmasria]

المدهش

ادهشتنى فعلا

لو هو كذلك وناوى يتجوز فعلا موش بيقضى شوية وقت وراجع يتفضل ونروحوا نخطبوا له بس من غير وجع قلب يعنى يدخل بيوت الناس من بابها ويقول واحنا نختار يا نكمل يا نتوكل على الله بدون مشاكل لكن بقى لو كل يوم حكاية واشياء اخرى يبقى هو اللى يتفضل برضه بدون مشاكل بشرط مايكونش العيب من الزوجة يعنى لا يفتقد الرجل اشياء يبحث عنها فى سواها كحسن السلوك او المظهر وربما اشياء بسيطة وهامة كافتقاد حسن التوقيت فى الحديث مثلا

موضوع صعب جميل وغالبا ما يحدث لان الزوج يريد دائما وردة متفتحة متجددة تنثر عطرها فى جنبات البيت طول الوقت (ودى صعبة احيانا على الستات) بس هى الحل الوحيد كى لا تعثرى يوما ما على شعرات ما على قميص سى السيد

وللحديث بقية

البنت المصرية -_-

[khedr]

موضوع كما قلتم جميل وصعب

طيب ايه رأيكم ندخله مع موضوع ازواج وزوجات والحياه الزوجيه

ونكمل حواركما الممتع

ونفيد ونستفيد من تجاربكم ووجهه نظركم

ازواج وزوجات ...والحياه الزوجيه

[nancy]

بصراحة يا مدهش الموضوع دة مش سهل وبيحصل مع زوجات كتير جدا ومش بتعرف تتصرف كويس

اولا لازم الزوجة تكون عندها ثقة فى نفسها وتكون شخصية قوية جدا لمواجهة دة بشكل موضوعى

ولازم نحط فى الاعتبار ان الراجل له نزوات وممكن عينة تزوغ

بسسسسسس

لما تزوغ لازم الزوجة متقولش اصلة شخص بايظ وخلاص

لا .. لازم تفكر انة راح لاحتايج ناقصة ويكون دماغها كبيرة

انا اعرف عائلة صديقة

الزوج متدين جدا ومراتة بتموت فيه بس عصبية شوية

الراجل راح رحلة رجالى مع اصحابة فى طابة تقريبا

وكان معاه كاميرة فيديوا صور المكان والناس ومن ضمن واحدة يهودية بتعمل حمام شمس

والراجل ركز تركيز فريد وضيع 10 دقايق من الفيلم فى تصويرها

ونسى خالص ورجع ورانا وورى مراتة الشريط عادى هى التخنقت وزعلت وعملت مشكلة

مع انى شفت حاجة تانية خالص انها كان لازم تحلل الموضوع بطريقة تانية خالص

وتتكلم معاه كانها واحد صحبة وانها حلوة واية رايك فيها وعادى جدا

وتحاول تشوف اية الى عجبة وتصلح نفسها

لانة مش معتاد على التصرف دة فاكيد فية حاجة هى الى دفعتة لدة

اهم حاجة ان الزوجة تفكر بدماغ جوزها مش بدماغها تنسى البيت والولاد وتفكر بدماغ الحبيبة الى عاوزة تكسب حبيبها

وتكون كل ست مدركة ان النزوات دى امر بيحصل مع كل الرجالة وتكبر دماغها

ومن وقت للتانى تكلمة زى راجل صاحبة ويتتكلم معاه عن الستات عادى

مش تتناشن وتقولة يعنى انا مش عجباك ولا اية

تستمتع بانها راجل صاحبة -_-

[yasovinas]

في فرق كبير بين العين الزايغه او الباحثه عن الجمال في كل مكان ودي حاجه موجوده في اغلب الرجال مش هقول كلهم علشان ما يبقاش خطأ في التعميم

اما حكاية الخيانه واني اعرف واحده على زوجتي فهو امر له شقين

• اما اني بكون ناوي على زواج يعني مش بتسلى ولا بهيص وخلاص ودي بتكون لها اسباب يعني الزوج ازو الرجل عموما لا اظن انه ممكن يقدم على فكرة الزوجة الثانيه لمجرد الزواج او لمجرد نزوه عبيطة ولكن يجب ان تكون هناك اسباب حيوية ورئيسية كما تفضلت ام محمد (اللي هي البنت المصريه مش مرات البواب ) ما قالت
  
• اما حكاية اني اكون بتسلى وبهجص فدي بقى شيء مفروض تماماً ولو ان احيانا الواحد بيحتاج يشحن بطاريه الحب والشباب في قلبه علشان يقدر يكمل الحياة مع زوجته الحبيبة (15 سنة حواز)
  

[Hammer]

المشكلة في الموضوع ده إن كتير من الستات عند التعامل مع مثل هذه المشاكل ما بتعرفش التركيب النفسي للراجل و بالتالي بتكون ردود أفعالها غير مفيدة لحل المشكلة .

و كون العاطفة هي المكون الأساسي لشخصية الزوجة ...فهي تتخيل إن نزوات الزوج ذات مرجعية عاطفية و إنه خلاص ما بقاش بيحبها و بقي بيحب واحدة تانية و هنا الخطأ .

فكثير من الازواج ذوي الصولات و الجولات مع نساء أخريات بالفعل يحبون زوجاتهم و لا يتخيلون العيش بدونهم ... و تكون مشكلته هي الحنين إلي الأنثي و ليس الزوجة .... و هناك فرق بينهم في عقلية الرجل .

و طبعاً ربنا يكون في عون الستات , فشخصية الرجل المحيرة تريدها أن تتلون عشرميت لون في نفس الوقت ... ست بيت هايلة مع مربية محترفة لأولادها و بالإيد التانية بتتزوق و تبقي علي سنجة عشرة ... لأ و كل يوم بشكل علشان الملل و كل ده غير شغلها و حياتها المهنية :P

بس أرجع و أقول .. الست فعلاً المفروض تكون أعقل فيما يتعلق بكيان البيت و ديمومته و تعامل راجلها زي ولادها و تاخده علي قد عقله بس بعد ما تفهمه طبعاً و ما تاخدش المواضيع دي علي كرامتها بس .

بنت مصرية كتبت :

لو هو كذلك وناوى يتجوز فعلا موش بيقضى شوية وقت وراجع يتفضل

عين العقل ... يا ريت كل إخواتك كانوا زيك كدة :P

نانسي كتبت :

وتحاول تشوف اية الى عجبة وتصلح نفسها

يا نانسي خليك واقعية ... و إذا أردت أن تطاع

بتقولك واحدة إسرائيلية بتاخد ( تان ) علي البحر ... فاهمة يعني إيه ؟ :P

تصلح نفسها إزاي بقي علشان توصل إن جوزها يصورها هي كمان 10 دقائق ؟؟

ده كده الموضوع عاوز هد و بناء من أول و جديد

[nancy]

ياهمر مانا اتفرجت على الفيديوا انا كمان وعرفه كويس :P

بس ولهى انا لو جوزى عجبتة واحدة حاسمعة اوفهمة واعرف منة هو شايف اية العيب الى فيا

واعمل الى يخلية يرجع حتى لو كان نيولوك لانى بحبة اولا ولانى لا اقبل الهزيمة ثانيا

وبعدين انا مقتنعة ان 99% من الرجالة بتكون عنهم زايغة بس الزوغان دة لة درجات

يعنى فية الى يبص ويسكت والى يبص ويتندم والى يبص ويتخيل والى يبص ويدخل دنيا تانيا والى يبص ويحاول يعمل رد فعل بكلمة او ضحكة

والى يبص ويعمل رد فعل اقوى فيدخل فى حب جديد وجواز تانى

فكل واحد واخرة مرحلة من دول

انما مش حننكر ان نزوات الراجل بتحى جواة جنان المراهقة اونتعاشة الحب

فالزوجة الشاطرة الى تستغل الانتعاشة دى وتحولها لتجديد الى بنهم تانى

[bentmasria]

عاقلة يا نانسى بس النيولوك للاسف عندنا جميع المصريات ومعظم العربيات وانا منهم بعد اول طفل او اول طفلين بيتحول لنيو خالص ومع ثورة اللبنانيات الفيديوكلابية وحالات اللاملابس المستشرية الزوجة حتدخل فى منافسات لا جدوى منها وانا اقترح بقدر الامكان الزوجة حافظى على وزنك واتفرجى معاه وقوليله يا حبيبى ده صناعى كله ومفيش مانع تغيرى او تجددى مظهرك اول بأول والرجالة برضه قللوا من قنوات زووم وميلودى وحاولوا تتخيلوا لو اليسا مثلا لا حصرا غسلت وشها حتشوفوا مين اجمل ام العيال ولا هى

محدش يزعل منى انا طرف محايد جدا يعنى الله يرحمه زوجى كان عاقل يارب يسكن موتانا جميعا الجنة

ربنا يسعدكم جميعا يارب :P :P

[yasovinas]

حذفت للتكرار

تم تعديل 2 يونيو 2006 بواسطة yasovinas

[sendrella119]

يا جمااااااااااااااااااااااااااعة

الموضوع مش موضوع ان الراجل يبص

الاستاذ مدهش بيتكلم عن ان في علاقة فعلا وموجودة

اما ان تستمر

او تنقطع وتيجي غيرها

ولو علي مجرد البص فدعه من رأيي عادي جدا جدا جدا

خصوصا لو الراجل موجود ببلد اجنبي

هنا مثلا في كندا

الصيف .....................ما اقولكوش عليه

مجرد ما شهر مايو يهل .....خلاص ما فيش حاجة اسمها ....اقول ايه :sad: ؟

فطبعا لكم ان تتخيلوا ......ان الامور هنا بتبقي مختلفة تماما ..........وياريتها تيجي علي اللبس :blush: :wub:

التصرفات كمان....

المهم

انا حا اقول رايي عن نفسي

من الاول بيكون في اتفاقات بين الزوجين عن كل شئ في حياتهم ....اتفاقات بتؤدي الي التفاهم ..والتقارب ..وتوطيد العلاقات :)

وعرف واحدة تانية

تصرفي حيكون ................

اني حا اعمل الللي ....واللي ما اتعملش علشان ارجعه تاني ...........ويعرف ويتأكد من انه كان ....اهوج في تصرفه

وبعد كده

انا اللي حا اسيبه ;)

ليا رأي ولازم يكون واضح .انا مش ضد ان الزوج يتجوز مرتين او اكتر طالما لاسباب...جوهرية او مظهرية ...احنا مش احسن من السيدة خديجة او عائشة رضي الله عنهم

بس ضد ....الخيانة :wub: