سر التحول من shinercorner الى سيزيف

[سيزيف]

بدات الحكايه بانضمامى الى المنتدى

فاخترت تلقائيا اسم shinercorner

فهو الاسم الذى اتخذته منذ فتره طويله فى عدد من المواقع

ولكن بعد فتره من انضمامى الى المنتدى

احسست ان الاسم يبدو صعبا للكثيرين

" وخصوصا الاستاذ عادل ابوزيد " (:

وفكرت اى الاسماء اختاره ؟؟

و اخيرا استقر رايى

على سيزيف

ان سيزيف و اعتقد ان كثيرين منا يعرفون قصته

يعد رمزا للتصميم و الاصرار

او هذا على الاقل المعنى الدارج للقصه التى ربما لا تعبر حقيقتها عن ذلك

ولكن كثيرا من المثقفين يحبون ان يعتبروا سيزيف رمزا للصبر و الاصرار

و على كل حال

ها هى القصه بشكل مختصر

اسطوره سيزيف هى اسطوره يونانيه قديمه

وكان سيزيف ملك احدى مدن اليونان

و قبل ان يموت اوصى زوجته بالا تدفنه

وعندما نزل الى العالم الاسف طلب من هاديس اله العالم السفلى بان يدعه يعود الى الحياه مره اخيره ليودع اهله و يدفن بالشكل اللائق و يقيم مادبه اخيره ثم يعود الى العالم السفلى

وكان سيزيف رجل ماكر

فما ان عاد الى الحياه حتى اخذ يقيم مادب متواصله لاتنتهى حتى لا يعود الى العالم السفلى

وظل فى الدنيا اعواما كثيره حتى هرم و مات

فما كان من اله العالم السفلى الا ان عاقبه على خداعه له

وكان العقاب

ان يدفع حجرا ضخما ثقيلا الى اعلى جبل وما ان يصل الى القمه حتى يهبط الحجر الى سفح الجبل فيعاود سيزيف دفعه الى القمه و هكذا دواليك الى مالانهايه

--------------

المهم

ماقولتوليش

ايه رايكم فى الاسم الجديد ؟؟

(:

[hopsan]

مش انت شايفه حلو يبقى اكيد حلو ...خدلك يا عم سيزيف كوز درا هديه معتبره من عمك hopsan تطرى بيه على قلبك بمناسبه الإسم الجديد

هات شلن بقى....

[سيزيف]

الله يخليك يا عم هوبسان يا اسكندرانى يا جدع

بس قوللى

ايه حكايه الدره المشوى اللى انت سارح بيها فى المنتدى دى ؟؟

عموما انا نازل اسكندريه قريب

قوللى انت فارش فين عشان اجى اخد الكوز بتاعى

-_-

[الأفوكاتو]

عزيزى سيزيف,

الأسماء لا تعبر بالضرورة على الشخص, و تغيير إسمك لن يغير من تقديرى لك كأخ, و صديق, و محاور متزن.

تحياتى لك , و تهنئتى بالإسم الجديد.

[khedr]

سيزيف كوز درا

الله يكرمك يا hopsan

انا الاول ما كنتش عارف اقرا كوز درا

افتكرته الاسم الثلاثي بتاع سيزيف

بالمره انت اسمك يعني ايه.......

......................................

كما قال استاذنا الكبير الافوكاتو

الأسماء لا تعبر بالضرورة على الشخص, و تغيير إسمك لن يغير من تقديرى لك كأخ, و صديق, و محاور متزن

....................................

لكن انا شايف انه مش رمز للصبر والمثابره بس

ده رمز كمان للمكر والخداع وحب الدنيا

وانت رايك ايه............

بس كده كده انت .....حبيبنا وجوه قلوبنا

الراعي الرسمي

.......................................

[ايهاب سالم]

أنا أفضل إستخدام الأسماء الحقيقيه

[NoorJehan]

بصراحه أنا برضه زعلت من سيزيف علشان كان ماكر B)

وده بشهادتك شخصيا :P

لا يفتحالله، عاوزين A shiner corner :wub:

ان سيزيف يعد رمزا للتصميم و الاصرار

فين ده -_- بعد قصه الحجر والجبل، متهيألى بقى رمزا للبؤس والشقى :P

لكن منكرش إن "سيزيف" إسم موسيقى :D ، وشاكرين إنك عرفتنا عليه من باب العلم بالشئ :P

[yasovinas]

ممتاز جداً اصبح عندنا في المحاورات "سي السيد" وكمان "سي زيف" وصديقي الغالي "ابو مراخير" واللي اختفى في ظروف غامضة اشك انه يكون اتخطب او اتجوز ؟؟؟ كان بيحب يقول لي انا كمان يا "سي ياسو" وربنا يزيد ويبارك

وعلشان احفاد ريا وسكينه بنات حوا ما يزعلوش ونلاقي واحده منهن بتقول عالم ذكوري وتفرقة ومشاوة والبنت زي الولد ما هيش كمالة عدد حسب العالمة العلامة سعاد بنتحسني طيب الله ثراها فهناك الغاليه على قلوبنا جميعاً خصوصا مخضرمي المحاورات الغالية "ست امينه" -_- لها مني مليون تحية وسلام وكمان صاحبي ابو مراخير قال على روح الشرق "ست اصول " وربنا يجعلة عامر :wub:

تم تعديل 2 يونيو 2006 بواسطة yasovinas

[bentmasria]

مبروك يا سيزيف

الاختيار جيد ولو كنا حنفتقد الجزء المضىء لنكتسب الاصرار وووجه التحدى

ربما يكون مخادعا بشكل ما

لكنه مخادع حسن النية اليس كذلك؟؟؟؟

ياسى ياسو ولا تزعل ابو مراخير غايب احنا مكانه انا اصلى واثقة ان موضوع سى بيسعد الناس كلها ولا يهمك يا سي ياسو

شاين كورنر او سيزيف

اختيارك فلسفى وواثقة ان له معنى عميق فى نفسك والاسماء الحقيقية زى ما قال ايهاب موش مشكلة تقريبا كتير منا اتقابلوا واتكلموا وبينهم جسور تواصل تانية طيبة وعلاقات اخوه وصداقة

احنا موش هنا عشان نخدع او نزيف شخصياتنا

احنا هنا عشان الحوار الراقى والفكر والثقافة

وكلنا بنحب مصر

ولا ايه

مرحبا بسيزيف وشاين وكل المتحاورين

البنت المصرية والارهابى(محمد ابنى)(مادا سابقا) -_- :wub:

[khedr]

البنت المصرية والارهابى(محمد ابنى)(مادا سابقا) :P :P

يا استاذه.....هل هذا تحول مرحلي في النضال

ام هي مناوره للانقضاض علي اعداء الوطن

ام هي ....رغبات مكتومه ام مكبوته ام مادا سابقا

[yasovinas]

يا خضر انت مش واخد بالك

مادا كبر وبقى راجل محترم واكيد كيد بدء يمارس رجولته في البيت بداية من الشخيط والعفرته مرورا بتحطيم كل ما يقف في سكته واكيد اكيد حكاية ارهابي دي سببها بوكس طايش في عين تانت ام محمد {اللي هي بنت مصرية مش مرات البواب }

[الرافعي]

الأخ الكريم سيزيف أو شاينر أو ....

أنا أيضاً غيرت اسمي ، ومررت بنفس التجربة من يومين، ولا شك أن الاسماء تشكل مراحل معينة، وقد تعكس انفعالات معينة لدى صاحبها .. وأنت من اخترت، وأنت من انفعلت بشخصية معينة، قد تكون مجهولة لكثيرين منا، لكن في النهاية أنت من تأثر . ونقلت لنا تأثرك .. كما تأثرت أنا بالرافعي وأردت أن أحيي ذكراه ...

أما نحن .. فما يهمنا هو أن شاينر أو سيزيف هو أنت .. بفكرك، وقلبك ومشاعرك، وفهمك، وأخلاقك ... كما هي

تحياتي

[khedr]

اكيد حكاية ارهابي دي سببها بوكس طايش

يا مادا ياحبيب الكل

خف من بوكساتك

احسن البوكس يلم الكل

الاسماء تشكل مراحل معينة،

وهذا متفقين عليه...ومرحبين معكم بتلك المرحله

بفكرك، وقلبك ومشاعرك، وفهمك، وأخلاقك

وهذا هو بيت القصيد

وتحياتنا بكما وترحيبنا بكل ما يناسبكما

[المدهش]

فعلاً ..الاسم الجديد اسهل وأسلس ..وإن كان سيزيف مرتبط دائماً في ذهني باليأسٍ وعدم جدوى أي شئ في الحياة .. لكن أنا لاتفرق معي الأسماء والمهم أن نظل نستمتع ونستفيد من مداخلاتك ومشاركاتك الرائعة وآرائك التي تعجبني وأتعلم وأستفيد منها بالفعل..لك تحياتي ومبروك على الاسم الجديد يا سيزيف.

[hopsan]

شوف يا سيزيف

لما بإذن الله تنزل اسكندريه و انت بتتمشى على الكورنيش حتلاقى نصبه مودرن شويه جنب القهوه

اللى واقف على النصبه او الفرشه ده العبد لله ..و ممكن اعملك ديسكونت محترم يعنى الكوز اللى بشلن اديهولك بتلاته ابيض ( جمله كنا بنسمعها زمان و التلاته ابيض يعنى ب تلاته تعريفه على اعتبار ان التعريفه فى ذاك العصر الذهبى كان من خامه الألومينيوم على ما اعتقد )

أما اخى khedr

الله يكرمك يا hopsan

انا الاول ما كنتش عارف اقرا كوز درا

افتكرته الاسم الثلاثي بتاع سيزيف

بالمره انت اسمك يعني ايه.......

انا اسميت نفسى تيمنا بقبطان مسمى بهذا الإسم

هل تذكر فيلم كان يحكى عن الحوت الأبيض و كان ربان سفينه الصيد اسمه هوبسن ..hopsanلا أذكر اسم الفيلم و لكن مضمون الفيلم يتلخص فى ان هذا الربان كان عنيدا مع الحوت و كرس حياته لصيده حتى ان طاقم السفينه تركوه بعد أن نعتوه بالمجنون و لم يرضى احد من البحاره الذهاب معه فأعلن فى الميناء انه تنازل عن نصيبه فى الحوت للبحاره و الذى كان نصيبه هو نصفه فذهب معه بعض المغامرين الى ان قام بصيده بنفسه و من سؤ حظه ان الحبل التى صاده به التف عليه ايضا واصبح فى مشهد مثير ملتصق بالحوت وهو يهرب

ما اعجبنى فى تلك الشخصيه هو الثبات على المبدأ و طريقه تعامله مع البحاره و صفه النبل و الشجاعه و المغامره و قد اجادها الممثل و المخرج معا فقد جسد شخصيه الربان بصوره جيده و لم ارى فى فيلم آخر تجسيد لصوره الربان الذى يجب ان يكون فى الحقيقه....و انت كمان يا عم خودلك كوز بتلاته ابيض

شكلى كده حغير اسمى من هوبسن لبياع الدرا ابوبتاع الدرا او الدرواتى

بس انا حابب hopsan اكتر ...على الأقل ده بيفكرنى بالبحر بس من بعيد لبعيد

[مصرية الهوى]

سيزيف

خسارة شاينر كان جميل جدا :P

بحسه هادئ اوي واضائته خافتة :P

بس ولا يهمك طالما عاجبك الاسم الجديد اكيد هيبقى حلو ..

انما الرافعي بقى ..

من اللحمة للقلم ..

ومن غذاء الجسد لغذاء الروح ..

تطورت منفوحة :P :P

[فولان بن علان]

مش عارف يا شاين أنا مش بالع تغير الأسامي وخاصة إن كلها أسماء افتراضية

لكن أنا عرفتك شاين من أيام زغاريد

ومن أيام اسكت لا تتكلم

حتى اسم سيزيف ده تقيل بالعربي

طبعاً حقك تغيره ما دمت حاسس بيه أكتر

لكن التغير عايز وقت عشان نتعود عليه

بس برضه شاين أحسن :P

[هادي]

مبروك التحول يا استاذ شاين

وعقبال البكاري :wub:

الاخت جيجي بتقول ..

تطورت منفوحة :P :P

دي بقى تحولات ميعرفهاش غير اللي عاش ف الرياض

فاهم يا " رافعي " يا خويا

ماهي " منفوحة " دي مش تجمع المصريي نف الرياض وبس

دي تجمع بتوع اللحمة كمان

ياللا :blush:

حصل خير ان شاء الله

:blush:

:wub:

رافعي .. رافعي

المهم مش " رفاعي " من بتوع التعابين والحاجات دي :lol:

[الرافعي]

مبروك التحول يا استاذ شاين

وعقبال البكاري :wub:

الاخت جيجي بتقول ..

تطورت منفوحة :P :P

دي بقى تحولات ميعرفهاش غير اللي عاش ف الرياض

فاهم يا " رافعي " يا خويا

ماهي " منفوحة " دي مش تجمع المصريي نف الرياض وبس

دي تجمع بتوع اللحمة كمان

ياللا :blush:

حصل خير ان شاء الله

:blush:

:wub:

رافعي .. رافعي

المهم مش " رفاعي " من بتوع التعابين والحاجات دي :lol:

أولاً .. نبدأ بالست جيجي ..

بلاش إنتي ... وخليكي على جنب .. ماشي ؟؟؟ خليكي إنتي في منفوحة شارع الخزان والقصر إياه اللي بيقصوا عنده الرقاب .. عارفاه مش كده .. :o

أما إنت بقى يا هادي ... وبعد ما نقلت المسائل اللي بيننا من الحلول الودية .. بلاش نخليها تنزل جنحة في محكمة تورنتو الجزئية ... (إنت في نفر سديق .. أنا ما يريد سوي جنجال مع نفر سديق) وش واحد هندي :D والأخت جيجي تترجم .... ما انتي بتشتري منهم في السوق وبتطلعي عينهم :P

[مهيب]

ماشى يا عم شاينـ .. قصدى سيزييف .. ولو ان الاسم ده دائما بينضرب بيه المثل فى شدة أو قسوة العقاب كأن يقال : "تلقى عقاب سيزييف"

لكن على العموم الأسماء اللى بتتكتب بالعربى أفضل علشان سياق الكلام يبقى متجانس .. وعلى العموم شاينر كورنر ولا سيزييف ... احنا مبسطوين بشخصك و رقيك و أفكارك برضه

مهيب