امريكا هي امى .. كنتاكى هو عمى

[yacho]

وصلنى هذا المقال فى e-mail اليوم .

امريكا هي امى .. كنتاكى هو عمى

بقلم د . لميس جابر

من كام يوم كده وجه الخواجه "بوش" نداء .. مش نداء .. يعنى نصيحه .. لأ .. مش نصيحه زى ما تقولوا كده تعليمات .. معلش مش تعليمات هى من الآخر شكلها اوامر .. وجه اوامر " لكل الدول العربيه ان تعدل وتغير وتطور من مناهجها التعليميه لتتوافق مع الاصلاح الديمقراطى وكمان تبطل تحريض وبلاش يا عرب الحركات دى."

والمقصود بالتحريض هو بالتأكيد .. التحريض على كراهيه امريكا الحبوبه واسرائيل "النُغه" وانا من كتر ما ذاكرت لأولادى وولاد الجيران متابعه الى حد كبير المناهج الدراسيه ولم يلفت نظرى اى تحريض على اسيادنا الأمريكان .. قلت لا معقوله يبقى بوش غلطان لازم افكر فى الأوامر العليا دى يمكن يكون فى المناهج التعليميه عندنا "تحريضايه" مركونه كده ولا كده برضه .. مالقيتش ولا فتفوته من تحريض .. قلت لا بلاش نتساهل مع الأوامر ولازم نغير مناهجنا مادام مش عاجبه الخواجه "بوش" وهو ادرى مننا لأنه راجل امريكانى واكيد عارف ان فيه تحريض

بعد ما قدحت زناد فكرى قلت اعمل تصور للمناهج الجديده يمكن تساعد الساده اللى حيغيروا ولازم نرضى عمنا وتاج راس ابونا "بوش" ومش عاوزين مشاكل لحسن نلاقى لجنه جايه تفتش على مناهج دمار شامل ولا حاجه .. خلينا حلوين ونطور مانطورش ليه؟ ماهى المناهج بقالها تلاتين سنه بتتغير كل عشرين يوم .. يعنى هى جت على طلبات حبيبنا "بوش"

قبل المناهج لازم شكل المدارس يبقى مختلف يعنى التلامذه يبطلوا الزى المدرسى والمرايل والجاكتات والحاجات دى ويروحوا المدرسه ببناطيل جينز مقطعه وجزم كاوتش ماركه "نايك" واللى مايلبسش كده يروح على بيت اهله .

تانى حاجه نشيد الصباح لازم يتغير ويتلغى " بلادى .. بلادى "ده خالص لأنه نشيد محرض ونعمل نشيد تانى زى " أمريكا هى امى .. كنتاكى هو عمى "

او " ما تقولش ايه ادانا كلينتون .. قول هاندى ايه لبوش" يعنى تغييرات بسيطه كده تؤدى الغرض وعلى هذا المنوال تتغير كل اناشيد الصباح فى كل الدول العربيه المحرضه.

ولازم طبعا نحط العلم الأمريكى على سارى كل المدارس من المحيط الى الخليج عشان يرفرف على دماغ ولادنا ويجيب طراوه امريكانى وتكون تحيه العلم

" تحيا الكره الأرضيه الأمريكيه " وتتقال 3 مرات

نخش على المناهج

اولا : الجغرافيا.. اول حاجه ومن غير تحريض وكلام كتير تتشال كلمه فلسطين دى من على الخريطه ولازم يكون عندنا اصلاح وديمقراطيه ونحط بالبنط العريض بدلها اسرائيل

تانى حاجه اكيد الخواجه "بوش" متضايق من كلمه عربيه .. عربيه اللى مكتوبه على كل اسماء البلاد العربيه ودى لازم تتغير عشان دى بتحرض جامد قوى واسرائيل لما بتبص فى الخريطه بتشعر بغربه وجفاء ولازم نغير عنوان خريطه الوطن العربى نشيل العنوان ده خالص ونحط " خريطه الوطن اللى بالى بالك " وبكده محدش يزعل واحنا نبقى عارفين المقصود بالعنوان بس ايه بيننا وبين بعض بس .

بعد كده نحدد على خريطه الوطن "اياه" كل مناطق البترول اللى بتطلع جاز ومناطق الاحتياطى ونرسم عليها علم امريكا ونكتب عليها مناطق محظوره ديمقراطيه لزوم الاصلاح .. ممنوع الاقتراب

وبرضه لازم نرسم خطوط مواصلات جديده وسهله على خريطه كل الدول اللى بالى بالكم عشان نسهل عمليات التفتيش على اى حاجه دمار شامل كده ولا كده لما ييجى الدور علينا بلد بلد .

ثانيا : التاريخ ..يعدل تاريخ اكتشاف القاره الامريكيه الشماليه من 1400 ميلاديه الى 1400 قبل الميلاد .. وعلى هذا الاساس تكون حضاره مصر القديمه من ايام احمس وتحتمس والعمارنه واخناتون ورمسيس واللى بعده واللى بعده اصلها امريكان .. كذلك باقى حضارات الشام والآشوريين والسومريين والبابليين فى العراق وبالمثل حضاره اليمن والجزيره العربيه والمغرب العربى وطبعا هذا سيسرى على الحضاره الاغريقيه والرومانيه والاسكندر الاكبر

كله يبقى مصدره امريكانى حتى هايكون اسهل فى المذاكره والتلخيص والاسئله والنماذج .. وهتبقى امتحانات اخر حلاوه.

نعدل ايضا معلومه الهنود الحمر اللى ابادهم الامريكان لان هذه المعلومه بتغذى الاطفال فى المدارس بمشاعر الكراهيه للامريكان اللى ابادوا جنس بحاله من على ظهر الدنيا .. عشان يعرفوا يقعدوا على راحتهم ويكتشفوا الديمقراطيه على على رواقه .. يعدل ازاى .. يعدل ازاى ؟

قولتولى .. نقول فى كتب التاريخ ان الخواجه فاسكو دى جاما اللى اكتشف امريكا لما وصل لقاها متأجره مفروش ايجار جديد من الهنود الحمر وبقالهم كتير ما دفعوش الايجار قوم ايه .. رفع عليهم قضيه طرد واجر لناس تانيين ديمقراطيين .. اللى هم مين؟

امريكان صح ؟ .. سهله جدا

مساله بقى تجاره الرقيق وخطف افارقه من سواحل افريقيا فى الشباك بتاعة الحيوانات وحشرهم فى سفن والسلاسل فى رقابهم ورجليهم وايديهم على امريكا عشان يزرعوا الارض اللى فضيت بعد الهنود الحمر ما انطردوا منها .. دى ممكن نخليها رحلات من الشباب والبنات والعيال لامريكا عشان يتفرجوا على تمثال الحريه اللى رافع ايده .. قوم لقوا امريكا مليانه ديمقراطيه وحريه وقالوا مش راجعين افريقيا تانى خالص مالص.

ثالثا : اللغه العربيه .. المشكله الصعبه شويه هى تدريس اللغه العربيه من غير "تحريض" انما ممكن برضه نطعم اللغه العربيه بشويه مفردات امريكانى عشان نفسيه الاطفال الصغيرين تبقى حلوه وما يكبروش وهم شايلين فى نفسهم حاجه من الامريكان ويبقوا ارهابيين .. ممكن نغير وبدل ما نقول

" عمر يلعب مع امل " يبقى " بوش يلعب مع كوندا "

وبدل " احمد ذهب الى السوق " يبقى " جيرى ذهب الى المول "

وبدل "شربت اللبن فى الصباح " يبقى "شربت البيبسى الدايت ان ذا مورنينج "

وبدل " عمت صباحا يا والدى " تبقى " هاى داد "

طبعا التعديلات فى المدارس الحكوميه فقط لان مدارسنا الخاصه قايمه بالواجب وكل العيال فى المدارس الخاصه بيتكلموا انجليزى ولله الحمد والشكر

اه .. نسيت .. فاضل حاجه لازم تتعدل فى المدارس الحكوميه " الشتايم" المدرسين لازم ياخدوا كورس مكثف فى الشتايم الامريكانى وبدل المدرس ما يقول

" اخرس يا جزمه منك له " يقول " شات اب يا شوز يا ابن الشوز " او " يا بوبى يا بن البوبى "

ولازم طبعا المجمع اللغوى يغير شويه مصطلحات عربيه لزوم عدم التحريض ويكون مثلا معنى كلمه ارهابى فى المعاجم هو

" الرجل الوطنى العربى المسلم او المسيحى اللى بيتكلم عربى ويرفض يدى الجاز لاسياده .. الذى يكره اسرائيل .. الذى

يطالب بحريه بلده او يتجرأ او يحاول بس تحرير وطنه "

وطبعا الدراسه من غير اعلام ديمقراطى غير محرض ما تنفعش ولازم الاعلام المصرى يغير من لهجته المعاديه للحريه والديمقراطيه والاصلاح وممكن بشويه تغيرات بسيطه نعمل شغل يعجب ان شاء الله يعنى ممكن البرنامج الجديد اللذيذ " البيت بيتك " نغير اسمه ونخليه " البوش بوشك "وينتج التليفزيون مسلسلات تغذى روح المحبه فى قلوب المصريين للسياسه الامريكيه وعم اسامه انور عكاشه يكتب لنا ملحمه " ليالى كاليفورنيا " و " الرايه الامريكانى "

وعم جلال عبد القوى يكتب لنا مسلسل " الدولار والبنون " و " نصف ربيع الاخر فى فرجينيا " وعم صفاء عامر يكتب لنا " الضوء الامريكانى الساطع " عن الصعيد الامريكانى .

وعلى هذا المنوال تنتشر محبه امريكا فى القلوب الشابه العربيه خصوصا بعد تغيير النشيد القومى للكوره وبعد كل ماتش للفريق القومى نكسب فيه لا سمح الله نذيع نشيد " الامريكان اهمه .. بيبسى وماكدونالدز وهمه " وتشب الاجيال الجديده على حب الامريكان وحب التحريض على الدول اللى بالى بالكم وعلى كراهيه الدول التى لا تاكل اللبان ولا تشرب الكولا يا خبر ابيض انا نسيت " جامعه الدول " لازم نغير اسمها اقولكم نخليها " جامعه الدول الديمقراطيه المتصلحه تصليح امريكانى "هو الاسم طويل شويه بس ها ناخد عليه شويه شويه وها نحفظه .

على فكره الكلام ده مش هزار .. ده بجد ولو معملناش كده .. وبطلنا تحريض فى المناهج "بوش " هاييجى بنفسه هو ومراته ويسلم علينا بالجوانتى .. نفر .. نفر .

"وحد يسلم لى على الدول اللى بالى بالك "

[المدهش]

مقال رائع..نشكرك يا ياشو على إتاحة الفرصة لنا لقرائته ..وبالمناسبة كاتبة المقال د. لميس جابر هي زوجة الفنان يحي الفخراني ..وبالمناسبة أيضاً هي كاتبة بعض سيناريوهات مسلسلات منها سهرة نونة الشعنونة التي لعبت بطولتها حنان ترك..ود. لميس مسيحية.

[فولان بن علان]

شكراً ياشو على المقال الجميل الظريف

وربما نحتاج وفقا للمقال أن نشير في المحاورات إشارة تدل على رفض التحريض

فنقول محاورات المصريين حبايب الأمريكان

ويا عزيزي المدهش أنت فعلا مدهش

من أين تأتي بالأخبار المستخبية

عندك أرشيف من المعلومات غير عادي

[المدهش]

فولان بن علان

كلك ذوق..شكراً يا صديقي على الاطراء وأرجو أن أكون دائماً عند حسن ظنك

[nancy]

اشكرك يا ياشو على المقال دة فعلا دكتور لميس دى ست هايلة جدا

انا لفتت نظرى فى فيلم تقريبا كان بطولتة الفخرانى وابنة كان صغير فية

لما قال لابوة ان قصة على بابا دى غلط لان على بابا طلع حرامى زى الحرمية ومش معنى انة سرق من الحرمية يبقى طيب فلفتت نظرى انها بتفكر مش زى الناس العادية

اشكر مرة تانية ولو جاتلك اى حاجة من النوع دة باصيها على طول(على راى بتوع الكورة) :P

على فكرة يا فلان انت لو كنت قاريت مداخلات المدهش السابقة حتعرف انة كان بيشتغل فى التليفزيون وفى مجالات فنية

فاكيد يكون عارف لان دى هى دائرة تعاملاتة .. مش صح كدة :P

[المدهش]

أيوه صح كده يا باشمهندسة..

وبالمناسبة دي أحب أقول لك إن الفيلم التليفزيوني اللي بتتكلمي عنه هو عن قصة للكاتب الصحفي الساخر أحمد رجب وليس من تأليف لميس جابر.

[yacho]

عزيزى المدهش جدا

ميرسى على مرورك اللى اسعدنى جدا .. ودكتوره لميس فعلا زوجه يحيى الفخرانى .. وهم الاتنين من العقليات

اللى بحترمها جدا لان كلاهما مبدع فى مجال عمله سواء اعمال د. لميس الهايله او يحيى الفنان الجميل .

نورت

فولان ابن علان

انت موتنى من الضحك بجد :blush: .. اقتراحك تحفه .. محاورات المصريين حبايب الامريكان

يمكن يرفعوا المراقبه عن الموقع

تحياتى لك

اختى وصحبتى وحبيبتى نانسى :blush:

الفيلم اللى انتى بتحبيه ده اسمه " محاكمه على بابا " وعلى فكره انا بموت فى القيلم ده بسبب الولد الصغير ابن

يحيى ولميس اللى كانت اسئلته تحفه فى الفيلم

الغريب ان انا كمان عندى اعتقاد تام من يوم ما شفت الفيلم لغايه ماقريت مداخله المدهش ان الفيلم قصه لميس

جابر بص برضه لما المدهش قال انه قصه احمد رجب ما استبعدتش لان الاسلوب الساخر والخروج عن المالوف

هو من علامات احمد رجب فى الكتابه .. بس ليه انا وانتى عندنا نفس المعلومه ان الفيلم قصه لميس جابر

تكونش هي السيناريست واحنا اختلط علينا الامر ؟ مش عارفه

والله يا نانسى انا بقرا حاجات كتير لذيذه بس انا فعلا مابيبقاش عندى وقت اكتب .. بس حاحاول والله .

نورتينى بجد

[nancy]

ادة دة احنا طلعنا اصحاب حتى فى المعلومات الغلط :blush:

جميل اوى كدة :blush:

[Abofady]

ليس كل ما ياتينا من الغرب خطأ , وكنت اتمنى من الدكتورة لميس او الاخ/ ياشو ان يناقشوا لماذا انهار التعليم فى بلدنا , وفى جميع المجالات , بل ان طالب الجامعة الان لا يستطيع ان يعرب جملة اسمية او فعلية او حتى يكونها . واذكر فى سنة 1978كنت فى باريس وكنت خارجا من مدرسة الاليانس فرنسيس لتعلم اللغة الفرنسية ووجدت المظاهرات تملآ الشوارع عن بكرة ابيها وكنت اريد ان اعرف لماذا كل هذه المظاهرات فسألت اخا مغربيا فقال ان سبب هذه المظاهرات هو تردى اوضاع التعليم الفرنسى وانهياره بجانب التعليم اليابانى والامريكى والانجليزى , الطلبة يتظاهرون من أجل تحسين التعليم ورقية ورفعته وليس من اجل التسهيل كما يحدث عندنا .

هل تستطيع ان تقارن الطالب فى الثانوية العامة عندنا بزميلة الفرنسى او اليابانى , لقد انشغل ابناؤنا بالمسلسلات والافلام الهابطة والاغانى الرديئة مثل( الواد قلبه بيوجعه..مش لاقى حد يدلعه)

اذن لا نريد ان ندخل السياسة فى هذا الموضوع , تعليمنا منهار وبايظ وفاشل, حتى لو قالت سيريلنكا ذلك وبلاش امريكا علشان ما تزعلوش , واتمنى من الدكتورة لميس ان تناقش الموضوع من هذا الجانب

[Abofady]

ليس كل ما ياتينا من الغرب خطأ , وكنت اتمنى من الدكتورة لميس او الاخ/ ياشو ان يناقشوا لماذا انهار التعليم فى بلدنا , وفى جميع المجالات , بل ان طالب الجامعة الان لا يستطيع ان يعرب جملة اسمية او فعلية او حتى يكونها . واذكر فى سنة 1978كنت فى باريس وكنت خارجا من مدرسة الاليانس فرنسيس لتعلم اللغة الفرنسية ووجدت المظاهرات تملآ الشوارع عن بكرة ابيها وكنت اريد ان اعرف لماذا كل هذه المظاهرات فسألت اخا مغربيا فقال ان سبب هذه المظاهرات هو تردى اوضاع التعليم الفرنسى وانهياره بجانب التعليم اليابانى والامريكى والانجليزى , الطلبة يتظاهرون من أجل تحسين التعليم ورقية ورفعته وليس من اجل التسهيل كما يحدث عندنا .

هل تستطيع ان تقارن الطالب فى الثانوية العامة عندنا بزميلة الفرنسى او اليابانى , لقد انشغل ابناؤنا بالمسلسلات والافلام الهابطة والاغانى الرديئة مثل( الواد قلبه بيوجعه..مش لاقى حد يدلعه)

اذن لا نريد ان ندخل السياسة فى هذا الموضوع , تعليمنا منهار وبايظ وفاشل, حتى لو قالت سيريلنكا ذلك وبلاش امريكا علشان ما تزعلوش , واتمنى من الدكتورة لميس ان تناقش الموضوع من هذا الجانب