ماتش أسبانيا .... هي الكولة فييييين

[Hammer]

خسر منتخب مصر أمام نظيره الإسباني بهدفين نظيفين مساء السبت على ملعب مارتينيز فاليرو في مباراة ودية جاءت نتيجتها معبرة عن فارق السرعة والمهارة بين الفريقين.

أحرز هدفي إسبانيا قائد الفريق راؤول جونزاليس في الدقيقة 14 ، وخوسيه أنطونيو رييس في الدقيقة 56.

واطمأن الإسبان - رغم أخطائهم العديدة - لما يمكن أن يواجهونه في نهائيات كأس العالم عندما يلعبون ضد منتخبي تونس والسعودية في المجموعة الثامنة من المونديال.

وفاجأ منتخب مصر الجميع بارتداء قميص أبيض مزدان بأربع نجوم فقط ، بدلا من خمس تعبر عن ألقاب مصر في بطولة كأس الأمم الأفريقية.

وكان الإسبان الأفضل على مستوى سرعة الارتداد الهجومي والدفاعي والأكثر قدرة على استغلال الفرص التي سنحت لهم ، بعكس منتخب مصر الذي فشل لاعبوه في ترجمة الفرص التي تهيأت لهم خلال شوطي المباراة.

وظهر خط الدفاع المصري متماسكا خاصة من جانب وائل جمعة ، فيما بدا الحارس عصام الحضري متوترا في الدقائق الأولى للقاء مما دفعه لإبعاد أكثر من كرة بالـ"بوكس" بدلا من إمساكها واشتراكه في تحمل مسئولية الهدف الأول مع خط الدفاع.

-----------------------------------------------------------------------------------------------------------

الحقيقة إن ما رأيناه بالأمس من الفريق المصري لا يمت لكرة القدم بأي صلة .

تحس إن فريق كرة قدم بيلاعب فريق بولو ...

و علي رأي سمير غانم كانوا بيلعبوا بطريقه ( هي الكولة فييييييين )

لعب عشوائي بلا خطة و لا هدف و لا تحركات ولا تمركز و لا أيتها حاجة .

حالة من الذعر إنتابت كل الفريق بما فيهم الحضري و تلاعب الأسبان بهم كما يتلاعب القط بالفار قبل أن يلتهمه

تجربة فاشلة و غير مفيدة بالمرة ...

اللهم إلا شوية الشوبنج اللي عملوه اللعيبة و الجهاز .

[se_ Elsyed]

يا هامر ياخويا الموضوع مش موضوع أسبانيا

لكن الحكاية أكبر من كده بكثير ..

فلقد أنكشفنا وأنكشفت حالة الإغراق في المحلية اللي إحنا فيها منذ أن اشترك الأهلي في بطولة العالم للأندية التي أُقيمت في اليابان في ديسمبر الماضي

وأنا لا ألوم الاهلي أو منتخب مصر أو أي فريق كرة قدم مصري يخرج خارج شرنقة المحلية أو العربية أو الأفريقية التي عشن فيها طويلاً وبالتالي ينصدم صدمة عمره بالوقع وبتلك اللعبة الغريبة اللي إسمها كرة القدم مش الحوكشه اللي عندنا

والأسباب هي : هالخصها في نقطتين :

1- عدم وجود تخطيط طويل المدى للمنتخبات المصرية للإحتكاك بالكرة العالمية ... حد يفكرني كده أخر ماتش لعبناه مع فريق أوروبي محترم إمتى ؟ وهل نكتفي بلعب مباراة كل كام سنة ونشيل خمسات وستات من الدتمارك أو فرنسا وخلصت العملية ؟ ولماذا دائماً مصيرنا مرتبط بوجود الأفراد .. يعني سمير زاهر لو أتفق على ماتش كمان كام شهر .. ومشي تاني يوم .. يبقى خلاص فِركش .. وهو حال الإدارة في مصر .. فرعون هو اللي بيعمل كل حاجه .. راح فرعون يبقى ييجي فرعون تاني ولازم يهدم ما بناه من سبقه ويبدأ على ميه بيضا ....

الغرابة بقى إن في العشر سنين الأوخارى فُزنا بكاس الأمم 98 وبعدين 2006 ولم نستفد مطلقاً من تلك الدفعة بإننا نلعب مباريات محترمة ونوفر إحتكاك قوي أوروبي أو غير عربي أو أفريقي في حين تلاقي تونس والجزائر والمغرب حتى لو مستواهم متدحدر تلاقيهم عاملين أحلى علاقات وكل شهر والتاني تلاقي المنتخبات الأوروبية بتتهافت للعب معهم .. وإحنا في البطاطس ومقضيين اليوم بيومه ... يبقى ما تلومش اللاعب المصري لما يتخض لما يشوف راؤول جونزاليس أو كاسياس قدامه وجهاً لوجه حتى لو كانوا على كراسي متحركه زي إمبارح كده .. فمستوى الأسبان بالمنظر ده لا يؤهلهم لتخطي الدور الأول ...

2- الإحتراف الوهمي للاعب المصري .. داخلياً وخارجياً

- داخلياً : اسد علينا وفي الحروب نعامة ... يعني أبو تريكة وبركات ومتعب وعبد الحليم علي والأشكال دي ما يتشطروش غير على بعض وكل واحد يدخل جون في فريق مركز شباب بلبيس يبقى خلاص دخل التاريخ .. وتلاقي الأندية الكبيرة بتجري وراه بالمشوار وتنثر الملايين تحت أقدامه .. أما بقى أخلاقه إيه .. او لياقته عاملة إزاي .. أو ملتزم خططياً وعنده ثاقفة كرويه كافيه ولا لأ ... معليش أعذرني

- خارجياً : كل اللعيبه بيلعبوا في فرق مغموره أو نص كُم .. وفي لعيبه عندنا بيجيبوا فرقهم الأرض زي حسني عبد ربه وأحمد ابو مسلم لما نزلوا ستراسبورج الفرنسي درجة تانية ... والللي نطل فيهم شويه زي ميدو أو زيدان بتلاقيه يتنطط علينا وعامل فيها ماردونت زمانة وهو ما يسواش تعريفه ومع فريقه بيبقى عامل زي الكتكوت المبلول اللي ما يقدرش يفتح بقه أو يقول تلت التلاته كام لمدربة .. حيث إن هناك بتاخد فلوس تبقى لازم تكون مؤدب غصبٍ عنك ... تشوف نفسك وتعمل فيها بورم وفريكيكو يبقى هاتشوف أيام سودا وتتركن لح دما تحمض أو يتم بيعك لفريق درجة ثانية زي ما عمل " كومان " في ميدو لما كان محترف في أياكس بهولندا وراح اشترى عربية فيراري بأول مبلغ مسكه في حياته وشاف نفسه عليه راح راميه وبايعه وأستافد من فلوسه مهما تكون مهاراته وحرفنته ...

وبالتالي المحترف اللي بينضم للمنتخب بيتخض هو راخر لإن ما بيتوفرلوش مباريات قوية برضوا .. عكس المحترفين المغاربة اللي منتشرين في كل جميع أنحاء أوروبا وبيحتكوا بفرق جامده وبالتالي لعيبة المنتخب لديهم خبرة كروية كافية تؤهلهم للمواجهات الثقيلة

[Hammer]

أتفق معك يا عزيزي في تحليلك للعك اللي شفناه إمبارح

فعلاً تحس إن العيال جاي لها فزع نفسي و عضوي ...

و تحس إنهم كانوا عاملين زي الأطفال اللي أول مرة يروحوا المدرسة من غير مامتهم :lol:

و أعتقد إنهم لم يظهروا بمستواهم الحقيقي نتيجة هذا الفزع المفرط .

[جليد البركان]

نتيجة متوقعة على حسب راى الخبراء الكروين بس المشكلة يا اخوان القدرة العجيبة الى بنمتلكها احنا كمنتخبات عربية فى نسيان الاخفقات الكثيرة .

يعنى بالمونديال ما بتوقع ان تكون الفرق العربية المشاركة على قد الحدث وبرغم ها الحكي بنحكى كتير عن انجاز بالوصول والمشاركة (( تعبنى من الحكي بدنا فعل ))