هاتشجع مبين في كاس العالم ؟

[se_ Elsyed]

كل سنة وإنتو طيبين ياولاد .. أيام قليلة وتبدأ معمعة المونديال لمدة شهر بالتمام والكمال

وهايكون الإفتتاح يوم الجمعة الجاية ... وبعد كده الدور الأول كل يوم 3 ماتشات على الريق

وبما إننا ما بنوصلش النهائيات إلا كل 60 سنة مرة ... فسنكتفي كالعادة بالفُرجة والتحليل والتهجيص .. وده احسن من حرقة الأعصاب ودموع العين ...

فياترى هاتشجعوا مين يا حلوين ؟

نبدأ بإبننا سين سين .. هاتشجع مين يا سين سين ؟

س س : بسم الله الرحمن الرحيم ... أنا الطالب سين سين ... طصالب بالصف الأول بمدرسة المحاورات الثانوية بنين ... وأنا مُتعصب لكل ما هو عربي .. وبالتالي هاشجع المنتخب الأخضر السعودي ... ومعه نسور القرطاج المنتخب التونسي ... ومن بعدهم إيران .. ومن بعدهم جميع الدول الأفريقية المُتأهلة ما عدا أنجولا عشان بقيت أكره كل اللي ييجي من ريحتها بسبب فلافيلو لاعب الأهلي المكسح

نيجي بعد كده للحلويات .. وإذا قولنا الحلويات .. يبقى البرازيل .. يبقى التروبيكال .. يبقى الكورة الصح زي ما بيقول الكتاب صفحة خمسين " كيف تلعب الكورة " .. يبقى مشجعات السامبا المجانين الصواريخ ... يبقى الولا رونالدينهو الفزززززززززززيع والكابتن ورونالدو - مع إنه بطرخ وسمن وبقى عامل زي البطة المتزغطة ... بس حريف .. يبقى روبيرتو كارولس .. يبقى ديدا ... وأنا عن نفسي لو منتخب مصر لاعب البرازيل - بعد الشر .. والشر بره وبعيد - في الخباثة ومن جوايا هاشجع البرازيل .. لكن عشان لا أُتهم بالعمالة والبيمبريالية هاشجع مصر ظاهرياً ..

ييجي بعد كده منتخب الأرجنتين اللي بحب طريقة لعبه برضوا ... ومعاه منتخب فرنسا عشان زيزو ( زين الدين زيدان ) اللي هايبقى خسارة لما يعتزل ... ومعاه الساحر تيري هنري ...

والطواحين الهولندية البرتقالية قليلي الحظ في تلك المسابقة

والبرتغال عشان حبيبنا مانويل جوزية والولا كريستانا رونالدو ولويس فيجو

والفرق المُكافحة الأسيوية كوريال الجنوبية واليابان

و أحب أسمع رأيكو

[سقراط المصري]

السعوديه والمانيا

[wagdi]

معلش أنا بطيخ في الكورة وأخر ماتش أتفرجت عليه كان ثابت البطل واقف فيه جون... بس أنا سامع سين سين بيقول أنجولا والسعودية... هم دخلوا كاس العالم وإحنا لأة ؟؟؟؟؟؟؟؟؟؟

[se_ Elsyed]

معلش أنا بطيخ في الكورة وأخر ماتش أتفرجت عليه كان ثابت البطل واقف فيه جون... بس أنا سامع سين سين بيقول أنجولا والسعودية... هم دخلوا كاس العالم وإحنا لأة ؟؟؟؟؟؟؟؟؟؟

اخي الحبيب وجدي

اخبار الشيلين ايه ؟

السعودية ايها الدوق عملت رقم قياسي عربي ودي رابع مره توصل على التوالي منذ 94

اما انجولا فبتسلم عليك وبتقولك انها كويسه هي و توجو ومبسوطين قوي من اكل الهامبورجر

تصور توجو وصلت هي كمان ؟

تصور بقى - ده انا هاخليك تتصور شوية صور - ان ترينداد وصلت ؟

ما بقاش فاضل الا دولتين بس وهما ماكرونيزيا و جُزر سليمان

ودول لو وصولوا نقوم جايبين جركن جاز ونولع في اللي بالي بالك

[yasovinas]

عموا سيد عموا سيد

خالتي نزاكة الله يرحمها بتسلم عليك وبتقول لك ان انا وباقي العيلة كوووولنا هنشجع

الزمالك:)

[مصرية الهوى]

بلدي حبيبتي ...

هو فيه غيررررررررررررره

الاخضرررررررررررررررررررررر :P ..

فاصل موسيقي من القناة الرياضية السعودية :wub:

(الله الله يا منتخبنا ترلم ..

الله الله حقق أملنا ترلم ..

باسم الوطن ترن ترن ..

العب بفن ترن ترن .. )

بس يا رب يا رب يارب منتفضحش :blink:

يا رب أنا اتعقدت من رقم 8 :wub:

واتعقدت من حاجه اسمها ألمانيا :wub:

لا والمشكلة انهم بكل الثقة رايحين يلعبوا في ألمانيا نفسها ..

شوفتوا احنا واثقين من نفسنا ازاي :)

خلوكوا معانا .. اللي هيشجع السعودية

هيبقى صاحبي وحبيبي وكفاءة :D ..

واللي مش هيشجع السعودية ..

هيبقى مش صاحبي ومش حبيبي ومش كفاءة ;) ..

يعني س س وسقراط اصحابي واحبابي وكفاءة :D ..

بس يا س س يوم 14 هتشجع مين ؟؟ :)

[فولان بن علان]

أنا طبعاً ها أشجع مصر ;)

ياريت ما حدش يقولي إنها مش ها تلعب في كاس العالم :)

الماكينات الألمان يستحقوا التشجيع

صحيح لعبهم يفتقد للجمال لكن بيلعبوا جد ومفيش هزار

تونس والسعودية مستواهم قبل البطولة يخوف

رغم عشقي للعب البرازيل لكن حاسس الفريق عجز وعايز تجديد

الأخوة الأفارقة ربنا يكون معاهم

يمكن دروجبا يكون سره باتع

[مسافر زاده الخيال]

نفسي ومنى عيني ان البرازيل ماتاخدش الكاس ...........................لييييييييه

عشان الكورة حتفقد بريقها تدريجيا لانها حتصير تحصيل حاصل ومحصول

وياريت انه حتكون دوله لاول مره هي اللي حتاخد الكاس

اما منتخبنا السعوووووووووووووودي ف......................... ولا بلاش

[se_ Elsyed]

بس يا س س يوم 14 هتشجع مين ؟؟

السعودية X تونس

بدون مجاملة هاشجع السعودية

المنتخب السعودي لما كان بِكر ولعب كوره من أجل الكورة في 94 عمل شغل هايل وطلع دور الـ 16 بجدارة

ومن بعدها لما بقى يخاف على إسمه وتاريخه وجغرافيته .. بقى يخرج بالمستريح من الدور الأول وكان في أخر مره زي كيس الصامولي ( الفينو ) اللي بيشيل 8 حبات lol...

تونس أو دول شمال أفريقيا لما بيلعبوا قدام فريق عربي بيبقى كإنهم بيلاعبوا منتخب تل أبيب وبتلاقي كمية غِل وعنف مالهمش حل وبيعرفوا يموتوا الماتش وتلاقي العملية تحولت إلى عك كروي وما تستفدش حاجة من الماتش ... في حين لو لعبوا فريق أفريقي أو أواوربي بتلاقيهم مستأنسين وولا بيهشوا ولا ينشوا ... ولاحظوا كده إن معظم الإنجازات الكروية لهذه الدول ما بيعلموهاش إلا على حساب العرب .. وخير مثال هو إن تونس صعدت للتصفيات على قفا المغرب .. والمغرب مذا مره توصل على قفا مصر .. وإحنا ما وصلناش إلا على قفا الجزائر .

[Sherief AbdelWahab]

ألمانيا وكل الأفارقة ..وإن خرجوا ح أشجع اللي يطلع البرازيل وفرنسا من كاس العالم!

خلص الكلام

[زعلان]

السعودية ثم ايران وتونس والفرق الافريقية والاسيوية :angry2:

[MZohairy]

السعوديه ضد تونس ؟

موقف صعب أوي :wub:

ربك هو الستار بقى

محدش بيموت ناقص عمر

حشجع الأخضر :angry2:

[م الغزالى]

إبنى إشترى علم ألمانيا و حيشجعها

أنا أعتقد أنها ستصل المربع الذهبى ليس أكث وذلك بقوة الدفع الجماهيرى و الإلتزام الخططى ولكن ينقصها اللاعب المهارى و الفكر الإبتكارى للهجمات كما أنها لآول مرة تعانى فى الدفاع لذا لن تصل للنهائى ولو أنها تستحقه لآنها لم تنظر لهذا المونديال بمنطق تجارى وهى لن تكسب كثيرا من الناحية المادية كاش يعنى ولكن من نواحى أخرى جايز

أتمنى أن تلعب هولندا فى النهائى مع الأرجنتين أو البرازيل وتكسب لانهم بالفعل فريق غير محظوظ

لن أشجع تونس لآن الكرة هناك أفسدت كل شئ و تستخدم لأقصى الحدود لاغراض سياسية

ولن أشجع السعودية لآنها فضحتنا المرة الماضية و كل شوية يفكرونا بالموضوع ده فى التليفزيون الألمانى ... بجد كانت حاجة تكسف