الجزمة عاملة ازمة!!!

[achnaton]

بسم الله الرحمن الرحيم

انا مش عارف إيه حكاية الجزمة اليومين دول .. وانا أذكر اننا فى هذا المنتدى اتكلمنا عن حكايات ازمة الجزمة من حوالى خمس سنوات .. أيام حكومة " غراب الخراب " عندما شاركنا فى تشييع جنازة الضمير فى المحروسة سابقا .. واللى اصبحت بعد مماته منحوسة .. ثم مخروصة ..!!

وقلت أيامها فى احد المقاطع ..:

مات الضمير .. وسبب لنا فى البلد أزمة ..!!

أجدع موظف شريف .. مش قادر يجيب جزمة..!!

ويوم ما يفكر يجيب للمدام فستان أو للولد بدله ..

تبقى مصيبة وحطت على دماغه م الشعر .. للجزمة !!

ثم فوجئنا ايامها .. ايام ما كان " خبير تدمير الاقتصاد " بيرأس حكومة الخراب الميرى .. بداية بوزير القرع والكانتلوب الاسرائيلى ووزير حرق القطارات التدميرى .. ووزير الخيبة النايحة .. والمليارات التايهة .. والقصور الرايقة .. وقصر او اثنين لكل حرامى ..على وزن المقولة شقه سكن لكل مواطن !! واوامر التشييد المباشره .. وغيره وغيرة ومش عاوز اطول عليكم .. بس الامر الذى لا يمكن نسيانه انه فى عهده الميمون ايضا استوردنا عدة ملايين من "جزم البيادة " عشان الجيش المرابط الجديد .. والعصيان الكهربية صناعة ألمانية وامريكية .. ولم ينسى السادة الوزراء ايامها استيراد كمية من اوسمة " الصباع الذهبى " لتشجيع بلطجية الحزن الوطنى .. هتيفة الرصيف .. بالاصبع الوسطى الظريف ..

المصيبة الاكبر .. والتطور الأعظم إستخدام الجزم المستورده فى اثبات الوجود .. والضغط بها على الرؤوس .. واحيانا استخدامها فى الضرب المبرح لمواطنين افاضل .. وزمان حصلت فى مصر عندما وقف الدكتور السنهورى الله يرحمه .. استاذ وعالم القانون الدستورى و عارض عصابة تتار الكاكى اثناء تغيير الدستور .. ضربوه برضه بالجزمة فى الشارع .. ومات الرجل محسورا مع كل القيم الدستورية .. والكلام ده كان فى بداية حركة المماليك الجدد عام 1952 ..!! وتكررت المأساه .. ايام مشكلة القضاه الاخيرة .. وواحد منهم كما سمعت ذاق طعم الحذاء الميرى ؟؟ .. وبرضه فى الشارع ومش فى المكتب او فى النادى !! ؟

ويبدو لى ان علم إستخدام الجزم فى التعبير .. أصبح فى عهدنا الحالى احد اشكال الموضه فرأينا .. وقرأنا .. عن مأمور احد المراكز وهو يعبر فى فخر عن الرؤية الجديدة .. والموضه الحديثة .. فى حديث صحفى .. قائلا انه " سيسحق الفلاحين بالجزم " ...{ مأمور مركز دكرنس : الفلاحون شوية رعاع وسنسحقهم ب " الجزم " .. !!! }

وكانت الموضة القديمة انهم يسحقوا المواطن اللى يقع فى ايدهم بالتعليق على الابواب .. والكى باسلاك الكهرباء !! والضرب على القفا .. حتى ينتفح ويصرخ .. كفى .. كفى .. وحامضى على كل ما تكتبوه ؟؟ وأعترف بكل ما تطلبوه !!؟؟

الغريب بقى فى هذه الموضة الجديدة خبر جاء بجريدة الفجر يوم الاثنين 5 يونيو بالصفحة 8 .. بيقول :

" الاخوان يقبلون يد المرشد .. والمرشد يتوعد المصريين بالجزمه "

ده كان العنوان بجانب صورة لمرشد الاخوان وواحد بيقبل يده .. أما الخبر .. فالعن واطين .. وكمان حرام .. !! أمال الشعب حيعتمد على مين ؟؟ لما يفقد جبهة زى الاخوان المسلمين بقالهم اكثر من سبعين سنه عاوزين يوصلوا لكرسى العرش الغير تيفال .. يقول الخبر :

" طوال السنوات الماضية وجماعة الاخوان المسلمين تحاول ايهام القوى السياسية المختلفه بانها طلقت العنف وتزوجت الديمقراطية .. وطاف رموزها على جميع وسائل الاعلام كى يروجوا للحوار وقبول الاخرين الذين بنوا تاريخهم على رفضهم . لكن ما ان فازوا ب 82 مقعدا فى مجلس الشعب حتى كشفوا عن الجوهر الحقيقى

لجماعتهم وهو السمع والطاعة وظهر ذلك واضحا فى صورة شهيرة نشرت فى ذلك الوقت لنواب الاخوان وهم ينحنون ويقبلون يد مرشدهم العام محمد مهدى عاكف ..

وما زاد الطين بلة ما نسب الى المرشد من شتائم مسجله وصلت الى حد السخرية من الشعب المصرى والكلام عن ضربه بالجزمه إذا ما صل الاخوان للحكم .. "

ومعنى هذا فى تصورى .. انه قريبا جدا سيشتد الاقبال على شراء الجزم كسلاح .. مما قد يرفع سعره اكثر واكثر .. وقد تصدر التعليمات بتعميم الحفاء .. ومنع دخول المؤسسات بالحذاء .. وقد نكتفى فى المصالح الغلبانه بشبشب زنوبه .. وللمرأة الشبشب ابو ورده المنزلى ؟؟!! وتخيلوا بقى معى احد عضوات المجلس اياه عندما تهدد زميل لها باستخدام ابو ورده .. وابو ورده هذا يا ساده له سمعة واسعه فى منازل الاكابر أثرياء عصر المماليك .. والحريم بتستورده مخصوص من باريس !!

ونفسى أعرف قبل ما اختم .. هل سيسطيع حذاء طلعت السادات الكشف عن الطريقة الحديثة .. كيف وصل على بابا وحده خلال أربع .. خمس سنوات الى اربعين مليار ولا كان معاه الاربعين حرامى .. !! ؟؟ ومين هم العصابه ؟؟ الف فى المائة حنحتاج لأبو ورده الفقران .. عشان تظهر الصورة واضحة .. والعصابة تبان .. ولا الامر سينتهى الى تساؤل زى تساؤل عادل حموده فى جريدة الفجر عن مصير 187 مليار دولار دخلوا الخزانه المصرية خلال 30 سنه منهم 50 مليار تم خصما من الديون الاجنبية طبقا لاتفاقية نادى باريس .. !! وآهو عادل حموده بيقول ان الموضوع تم مناقشته فى مؤتمر شيكاغوا الذى ناقش الاتفاقية الدولية لمكافحة الفساد والزم الدول المانحة بتدقيق الرقابة على الحكومات المتلقية للمساعدات بما فى ذلك الحكومات المصرية .. وانت فين يا آمه تصوتى معايا ؟؟

وكفاية كده النهارده تعبت !! ونكمل فى المداخلة الجاية الحديث عن الجزمة البياده والجزمة ام نعل كريب .. لزوم التسلل للبنوك .. دون ازعاج للديوك ..

تم تعديل 5 يونيو 2006 بواسطة achnaton

[Abofady]

مفيش نص نعل للغلابة ؟