وزارة الداخلية تنفي وجود سجون تحت الأرض في مصر

[se_ Elsyed]

فاكرين زمان وإحنا في سنة أولى رابع في المدرسة الثانوي كنا بناخد قاعده إسمها " نفي النفي تأكيد "

أهو إحنا القاعدة دي تُعتبر شعار الحكومة بتاعت مبارك .. ولما تلاقيهم يقولوا لك إن الأسعار مُستقرة ولا مساس .. وإن الزيادة الرهيبة في مرتبات موظفين الحكومة في شهر يوليو مش هاتأثر على الأسعار .. يبقى تجري على طول وتخزن لك قد شكرتين رز على 5 كيلو سكر على قزازتين زيت لإن الدنيا هاتولع

ولما تلاقيهم يقولوا لك إن الإنتخابات نزيهه وشريفة وعفيفة وعزيزة ... يبقى بالصلاتو عالنبي بنلعب في 90 % تزوير - يادوب يدخلونا صيدلة -

إقرأوا معايا الخبر ده من جريد ة المصري اليوم .. وإمنعوا الضحك على الكلام اللي مكتوب بالأزرق - لون الشغل اللي بتشغله الحكومة للشعب -

نفي اللواء د.أحمد ضياء الدين مساعد وزير الداخلية وجود سجون تحت الأرض في مصر، مؤكدا أن جميع المودعين في سجون مصر تحت إشراف النيابة العامة ويتم إحاطتها بقدر كبير من العناية والاهتمام.

جاء ذلك خلال جلسة مجلس الشوري بعد ظهر أمس، برئاسة صفوت الشريف أثناء مناقشة مواد مشروع قانون تعديل بعض أحكام قانون الإجراءات الجنائية، حيث ورد في تعقيب للنائب ناجي الشهابي رئيس حزب «الجيل» أن هناك سجونا تحت الأرض في مصر يذهب إليها بعض المحكوم عليهم.

وقال اللواء أحمد ضياء الدين إن هذه العبارة «غير مقبولة» لأن السجون في مصر تشهد تطورا مستمرا من حيث الأبنية والمعاملة والتنظيم والفلسفة ويوليها وزير الداخلية قدرا هائلا من اهتمامه وعنايته.

وطلب صفوت الشريف من الأعضاء الموافقة علي حذف كلمة «سجون تحت الأرض في مصر» من مضبطة الجلسة ووافق النواب علي ذلك.

ومن جانبه، رحب النائب ناجي الشهابي بتوضيح اللواء ضياء الدين ونوه بجهود وزارة الداخلية في مصر لتوفير الأمن والسلام للمواطنين.

خدتو بالكم من حتت الفلسفة دي ؟

عشان تعرفوا إحنا كنا أدبي ليه ... طبعاً بتوع علمي ما يعرفوش حاجة عن ديكارت ولا جان بو سارتر ولا الغزالي :wub:

والشهادة لله .. الواحد بس عشان يقول كلام ويخلص ضميره قدام ربنا .. وزير الداخلية بيشرف على كل حاجة بنفسه .. أصله كان ظابط أمن دولة والسجون والمعتقلات والنفخ لعبته

[bashmohandes]

و هو كده برده نفى

دى اجابته كلها ليس فيها جمله واحده تنفى وجود السجون تحت الارض

وطبعا صفوت بيه امر بحذف الكلمة من المضبطه

ملعوبه

[khedr]

واحنا بندور علي اللي تحت الارض ليه

ماهي علي الارض.......... وعيني عينك

ايه لزوم تحت الارض والتعب ده كله

[الأفوكاتو]

هذا الخبر يتضمن " نكتة" بايخة, فهو كمن يقول أنه لا يوجد فقر فى مصر,

الذين أستحوا, ماتوا