الفيلم دة قصة ولا مناظر؟

[Sherief AbdelWahab]

كلنا بنشوف أفلام..

بنقول الفيلم دة حلو .. وحش .. قصة .. تافه ..

فيه رأيين في المسألة دي: رأي بيقول إن الفيلم عبارة عن فكرة ووجهة نظر لازم نناقش فيها مؤلفها ، يعني الرأي بيقول إن الفيلم عبارة عن قصة في الأول والآخر ، ورأي تاني بيقول إن الفيلم مناظر (محدش يفهمني غلط) ، بما إن السينما فن بصري يعتمد على تقديم صورة حلوة (برضه محدش يفهمني غلط) وصوت حلو وتقنية سينمائية عالية..

إيه مقياس الفيلم عندك؟ إنه قصة حتى لو اختلفت معاها؟ ولا مناظر؟

خلص الكلام

[زعلان]

الفلم صورة ....اي كميرا (حركة وزوايا وكادرات) ...واماكن تصوير و ديكور ....وقصة ..وسيناريو.. احداث وتسلسل وسياق درامي ...وحوار متين معبر ... واداء تمثيلي وتعبيري.... ومنتاج جيد.. وصوت جيد ... وصورة جيدة ...ومخرج وطاقم مساعد وفني بيفهم

[Tafshan]

الفيلم السينيمائى بالنسبه لى هو حلم جميل متكامل ليس مهم فيه الموضوع على الاطلاق و لكن المهم هو تناول الموضوع بحيث يستمر الفيلم طوال فترة عرضه دون ان انظر الى ساعتى ... و حين انظر اليها يكون ذلك علامه ان الفيلم لم يعجبنى ...

[nancy]

الفيلم مجموعة من العناصر فقد اى جزء منها بيعمل خلل فى التلقى

يعنى القصة والتصوير والكدرات الناجحة والموسيقى التصورية المعبرة والممثل الى لابس الشخصية صح والديكورات ودراسة الملابس

حتى تتر البداية لازم يكون مرتبط بالقصة

كل العناصر مرتبطة ببعض

بس الى ينجح كل دة هو المخرج الى يعرف يضفر كل الخيوط ببعض صح

[Sherief AbdelWahab]

كل اللي قلتوه لغاية دلوقت هايل..

بس ح ألخصه وأزود عليه بطريقة أقصد منها إثراء النقاش لا أكثر ..

ركزتوا جداً على الجانب البصري في الفيلم ، الكاميرا والمونتاج والموسيقى والممثلين وتوجيه الممثلين والديكور .. الخ..

دي بقى الحرفية السينمائية اللي بتتدرس في معهد السينما..

والمخرج الشاطر بيبقى عنده من المعرفة والجرأة إنه يخرج أي حاجة ، سواء فيلم طويل روائي أو تسجيلي أو وثائقي أو إعلان (رغم وجود تخصص في المجالات الإخراجية دي).. لأن عنده من الموهبة والدراية اللي يخلوه يتصرف في المواقف دي وينقدها..

لكن غالباً ما يبقى وراء كل هذا الجهد البصري مخ بيدوره ، وأفكار عايز يوصلها هو أو منتجي الفيلم من خلاله..

إيه اللي بيوصل لنا :

1-صورة جيدة (زي ما قلتم وأسهبتم)..

2-أفكار بتظهر من خلال الصورة : الراجل دة كان عايز يقول إيه؟..

وممكن تاخد من الصورة اللي بتجيلك انطباع عن مؤلف ومخرج الفيلم وأفكارهما .. (مؤلف زوجة رجل مهم ناصري متشدد وبان دة في الفيلم من عدة مناطق في الحوار ومن طريقته في سرد الأحداث وربطها بالوقائع التاريخية- صلاح أبو سيف ولينين الرملي في البداية قصدوا مناقشة قضية الحكم الديكتاتوري ومساوئه...وبان دة في مشهد كذا وكذا.. الخ)...

المخرجين أربع أنواع :

1-نوع حريف قادر على توصيل أفكاره بشكل احترافي(عاطف الطيب)

2-نوع حريف ولكنه غير قادر على توصيل أفكاره بشكل احترافي..

3-نوع غير حريف ولكنه قادر على توصيل افكاره بشكل احترافي..

4-نوع غير حريف وغير قادر على توصيل أفكاره بشكل احترافي (هشام أبو النصر في فيلمي المواردي والعصابة)

إزاي تعرف إن المخرج قادر يوصل الفكرة من عدمه؟

يبان لك دة من الصورة ومن الحوار..

مثلاً : في العصابة يبان لك هشام أبو النصر مباشر وفج وهو بيتناول قضية معاهدة السلام والتطبيع ، جايز تتفق معاه أو تختلف لكن مش كدة ..

ملحوظة : فيه مخرجين بيحبوا توصيل كل حاجة مباشرة وع الجاهز ، وفيه ناس بيخبوا آرائهم تماماً جوة الفيلم ، يعني مبيظهرش شخصية ما أو حركة ما تبين رأيه هو اللي عايز يوصله.. والهدف من دة خلق موقف عندك ، وعمل حالة من التفكير عن الفيلم ، بس المشكلة إن الكلام دة بيتفهم غلط..

وللحديث بإذن الله بقية .. بس فكروا في اللي اتقال وردوا عليه..

خلص الكلام