كمين لإبن زاهية - عم الشيخ أمين يكتب لكم من المعتقل

[صبح]

كمين لا بن زاهيه

بعد حَبس الشيخ أمين

رُحت أشوفه جا له مين

التقيت الواد سلامه ابن ابراهيم

عند باب السجن فارش له يومين

العيون حمرا وخايف

والمرار فوق الشفايف

وفْ إيديه ماسك كيسين

كيس جوافه وكيس هدوم

والسجاير داستتين

قلت له جاي لمين ؟

قال لعم الشيخ أمين

قلت له : عَمى الدبب !!

فز قوم .

اِمشي غور ما انتو السبب

داهية تخدك انت وامك

يا ابن زاهية الله يغمك

وديتوا الراجل في داهية

وفْ طـُره له جمعتين

التقيت الواد سلامه انتطر

والدموع ع الخدود زي المطر

صابني منهم دمعتين

قولت له : إيه ياسلامه

شدة وتزول يا ابن والدي

قال دا كان ناوي يناسبنا يا افندي

كات عينيه ع البت خضره

اخر العنقود لابويا اسماعين

قولت له : شوف ياسلامه

بالسلامه بكره يطلع .

بكره يرجــع . والفرح يعلى

ويبقى فرحتين

فرحة برجوعه لصباه

فرحة لرجوعه الحياه

وبلدكو هتخش التاريخ

ونكله تبقى بدولارين

علشان عيون الشيخ أمين

قال لي : عارف يا لافندي

مين يكون الشيخ أمين ؟

قولت مين ؟

قال دا واحد مننا

ياما دافع عَـننا

شال حمولنا وهمنا

قول زعيم الفلاحـين

والغلابة المطحونين

فلاح فصيح وكشف لنا

سر الفساد

اللي انتشر وملا البلاد

وشرح لنا عن التقاوي

والكيماوي والمبيد

وعن سي (والي) واللي جابه

من حبايبه اليهود .

وم الهباب

خلا المرض واقف لنا

على كل باب

والخيبة كانت من سنين

والكامب ديفيد له سنين

لا دُقنا يوم طعم السلام

ولا شوفنا يوم منهم سلام

غير تفجيرات

وسرطانات

والفتنة بين المسلمين

وعرب ياافندي مأمركين

عرَّفنا مين شارون وبوش

ومعاهم المغدور بلير

وكشف لنا سَـتر العروش

وازاي راكبها ناس هاموش

ما بيساووش .

ولا يختشوش

ولا يستحوش

إشناب ولكن ع البنات

ديابة يا آبا ع الغـلابة

طغاة ولكن ع القضاة

حبة ْ فيران قـُدام شارون

خـُدام لبوش

لا والعجيب

قاعدين سنين

ع الأسمُه إيه

ومأبدين

وبعد كل الأسمه إيه

ناووين كمان يسلموها

لأسمُه إيه

قولت له : يا ابن ابراهيم

بطل كلام

أحسن تروح ع الأسمٌه إيه

ويجرجروك

ومن قفاك هيسحبوك

وتخش ويّا الشيخ أمين

قال الجدع وفيها إيه

طب هو يعني الشيخ امين

كان عَامل ايه

هو جاب سيرة جماله

والا ماله أو عياله

أو جماعة ْ المحظوظين

والا ممدوح اسماعين

قلت مين ؟

قال : بتاع العبَّارات

اللي سافر من سكات

بعد كام يوم واربعين

والحكومة والنيابة والرقابة

وكمان المجلسين

عنه يا آبا مغمضين .

ومطنشين

وأما القضية تروح هناك

بتخش ثلاجة السكات

واحدة تفوت

واحدة تموت

وكل حاجة بتعليمات

وبالريموت

للنايم العام من سنين

ماهو برضه واحد منهم

ولا عُمره يعصى أمرهم

وديع مطيع .. مخلص أمين

ايه يعني لما الشيخ

بقى قال كلمتين

والا بعبع حبتين

هو يعني كان كفر

لما شاور ع الخطر

واللي باعوا سي عمر

فيها أيه الفضفضة

ويّا شاي ع المصطبة

يعني حبة ْ لخبطة

ما الوزير عمَّال يشخبط شخبطة

ويقولوا له

دا انت سيد الفنانين

هو يعني مين بيسمع

مين بيقرا ومين يحقق

النظام مش فاضي لنا يا لافندي

عينه ع القاضي

والمعارض والمعاند

والمثقف لو عجوز في عُمر جدي

هيسحلوه

من هدومه يقلعوه

ويعلقوه

سين وجيم وكام قضية يلبسوه

قولت له : يا ابن ابراهيم

هو فاكر نفسه مين

والا ابن مين

في البلد دي وضهره مين

هو كان قريب سرور

والا كات بلده الباجور

والا واحد م الطابور

والا لِفت في (برطمان)

يعني خلل في النظام

لما يغلط فى القانون

والطوارئ يا غشيم

التقيت الواد سلامه

بعلو صوته قام زَعق :

قال لي ميت ملعون أبوه

القانون واللي جابوه

واللي وافقوا يمددوه

كل حاجة فى البلد دي

اتمصمصت

كل حاجة يا لافندي

اتخصخصت

ليه كمان ما يخصصوه ؟

رحت لزقه بضهر ايدي

كف فوق حنطور عينيه

والتقاني شخطت فيه

فز قوووووم !!

فز قوم يا ابن ابراهيم

قال لي هتوديني فين ؟

ـ جوه عند الشيخ أمين

ـ انت مين ؟

ـ أنا مخبر من لاظوغلي

وانت موالي وشـُــغلي

كنا ليك مستنيين

دا احنا ناصبين لك كمين

فـز قوووووووووم !!!

فز قوم يا ابن الحزين !!

اقوم افز اروح فين

هي البلد دي مفهاش قانون

......

انا هنا رجل القانون

انا الطوارئ في البلد

من سنين كتير مالهاش عدد

من قبل حتى ما تتولد

[عمر عباس]

يا ســـــــــــــــــــــــــــلام من مدة وأنا بدور على أى حاجة لعمنا الشيخ أمين الديب الله يحفظه ويرعاه

لو تعرف اسم موقع عليه اى حاجة منه ياريت تقول عليه ..... وشكرا جزيلا لك على ما تفضلت بيه

اخوك / عمر

[mickey_egp73]

فك الله سجن الشيخ ووفقه الي ما يحب و يرضي

[صبح]

أعتقد أن الشيخ أمين قد لخص كل ما يحدث فى مواله الرائع

[لخبطه]

اروع ما قرأت في السكه دي من فتره كبيره شغل كدا على طريقة فؤاد نجم حتى اسلوبه واستعاره لبعض تعبيراته

بس دا لا يعني أنه مستقل وافكاره وتعبيراته حكاية

[علاء زين الدين]

اللهم فك أسره وأسر جميع المظلومين.

عبقرية هذا الرجل هي بالفعل قدرته على جمع كمّ كبير من القضايا في قالب شعبي روائي وبسيط يفهمه الجميع ويتفاعل معه.

لا شك أن تداول أشرطة بها هذه الأشعار لا يلقى قبولا شديدأ عند "اسمهم إيه" و"دول ودول"!