إهداء الى عمو داروين و ابيه موديســـت

[وليد صفوت]

ابيه موديست و عمو داروين الأثنين عُزاز عليا اوى ..... :D

و قبل كده وعدت عمو داروين انى اهديله مزيكا من تأليفى و توزيعى ..... و الحمد لله خلصت تماماً منذ يومين و كنت رايح جاى على الإستوديو عشان المكساج يخلص و اخيراً زست

اما ابيه موديست بقى ..... فأنا بتلكك عشان اهديله الهدية دى ... مش عارف اهديهاله بمناسبة ايه و لا ايه و اييييييييييييييييييه ..... ممكن كـ رد لطوفان الهدايا اللى مغرقنا بيه ... و ممكن عشان خدماته اللى لا تُعد لكل من يريد خدمة ( مزيكا عنده ... ايميلات مجانية و عنده .... شرح بالصور و عنده :angry2: .... )

بس انا ههديهاله لأنى مُعجب بالشخصية الرائعة دى .... اللى الناس بتحبها من اول تعامل بينهم ..... :D

اهيديكما .... موسيقى من تأليفى و توزيعى :

حنيـــــــــــــــــــــــــــــن

ارجوكوا بلاش تحدفوا بالشربات :sad: .... طماطم و بيض مسلوق بس لو سمحتوا :sad: ..... آه ... انا ابن ناس برضو و مش بتاع شربات :)

[yasovinas]

الله ينور يا وليد

سيمفوكيه ولا اروع

بس هو انت مش قلت انك جايب هدية لعمامك ؟؟؟

انا مش لاقي لا تورته ولا بسكويت ولا اي حاجه ولا حتى باكو مناديل كلينكس

تصدق يل وليد انا كنت زعلان من عمك س س علشان كل شويه يقولك هتروح الجيش

بس بصراحه وبعد اللي حصل دا

انا بنفسي هوصي عليك الشايش عبد الصمد بتاع مركز التجنيد يوزعك عسكري طُلبه حمامات

[وليد صفوت]

:sad: :sad:

لا و الله انا اقصد اهداء ليكوا كلكوا .... اومال انا جايبها هنا ليه :D

طب بلااااااااااش ...

إهداء الى عمو داروين و ابيه موديست ... و كل عضو معنا هنا .. واللى يحبنا مايضربش نار :angry2:

[ATHENA]

حلوة جدا يا وليد من غير مجاملة...

شد حيلك و شكلك هيكون ليك مستقبل حلو في المجال ده...

و ابقى اعد اعزف للشاويش عبد الصمد عشان بيحب المزيكا :sad:

[محمود الشاعر]

شغلت المقطوعة

غمضت عنيا وشفت السناريو ده

واحد واقف على الكورنيش بالليل بتدور حكايته كلها فى راسه

لحظة وداع الحبيبة

لحظة الانكسار

التوهة والدوامة اللي وخدانا معاها لفين معرفش

وفجاة بتختلط كل الاوراق بكل النغمات

تنويعات على الحزن

ببساطة قصة حياة انسان

الله عليك يا وليد

مش عارف اقول ايه لاني مش عاوز كلامي يتقلب مجاملة بس احنا قدام فنان حقيقي مكتمل الموهبة وله رؤيا وفكر حافظ على نفسك

انا واحد من الناس هحسدك على فنك ( متخفش والله العظيم قلت بسم الله ما شاء الله وصليت على النبي عليه الصلاة و السلام )

كمل ومتعنا بالفن الجميل

[وليد صفوت]

اثينا ....

ميرسى يا فندم .... يا رب يوفق الجميع :sad:

و ياريت الشاويش عبـالصمد يكون بيحب المزيكا .... لو كده يبقى ضمنا مركز التدريب :sad:

---------------

محمود ....

ميرسى يا باشا ده من ذوقك :D .... و يارب اكون ربع كده :angry2:

انا قسمت المقطوعة دى ثلاث اقسام :

الأولى لحظة الفراق

الثانية الحياة تمضى

الثالثة قرار النسيان

و الأولى هنا لحظة فراق الحبيبين و هى بتتمثل فى دخول خط الوتريات و القانون .... و حتى لحظة تحول المقطوعة بالكامل الى التخت الشرقى بدون اى إيقاعات غربى ....و هى تمثل الحزن اللى اكتنف الحبيب فى لحظة الفراق .

و الثانية هى الحياة تمضى و تلك المرحلة تتمثل فى دخول الإيقاع الغربى و البيز جيتار و الإليكتريك جيتار مع الحفاظ على خط الوتريات حتى اوضح ان الحبيب مازال غير قادر على نسيان لحظة الفراق تلك .... فنجد ان الوتريات تحافظ على الخط الحزين بينما الجيتارات و الإيقاع ماشيين بتتابع و نوت ممكن نقول عليها روتينية عشان الحياة كده فعلاً ...

الثالثة و هى قرار نسيان لحظة الفراق و المُضى فى الحياة ..... و ده بيتمثل فى لحظة دخول خط جديد هو خط الـDistortion Guitar و هو يمثل حالة من الضغط على النفس لنسيان الماضى ..... و مع الحفاظ برضو على خط الوتريات و القانون عشان ابين انه مازال - و حتى انتهت المقطوعة - يقاوم و و يحاول ان ينسى ثم لا يلبث ان يتذكر مرة اخرى .. و هكذا ..... فى حالة صراع حتى تنتهى المقطوعة ....

ميرسى ليك يا محمود و ربنا يكرمك ... :)

[محمود الشاعر]

مش بقولك فنان

انا طبعا مش هعرف احلل زيك انواع الالات الموسيقية

لكن ده بالظبط هو اللي انا حسيت بيه

موقف انساني رائع ( انساني مش يعني متعاطف لكن انسان بمعنى كلمة انسان احساس وفعل ورد فعل ) معرفش ليه علشان اكون صادق معاك الموسيقى دى خدتني لنفسي وانا واقف هناك وكأني فعلا سمعتها ساعتها ربنا يوفقك يا صديقى العذيذ

[صبح]

جميلة جدا

ولكن لى سؤال أرجو انك ما تزعلش منه وسوف أساله بطريقة أخرى

أفتنا فى الموسيقى؟

وعلى فكرة أنا باتكلم بجد لأنى أريد قول فصل فيها

[وليد صفوت]

ميرسى كمان مرة يا محمود .... الحمد لله مافيش بيض مسلوق و لا طماطم :sad:

--------------

استاذ صبح .....

انا مش اهل للفتوى ... و لكن ممكن تسأل فى إسلام اون لاين و هما يفتولك ... لأنى فعلاً لا افتى فى شيئ زى ده .. و إن كنت احتفظ برأيى لنفسى....

تحياتى ...

[صبح]

و إن كنت احتفظ برأيى لنفسى....

ممكن أعرفه لو سمحت؟

[Modest]

وليد :wub:

انت حقيقي فنان و إحساسك راقي ده بالإضافة إلى ذوقك الرائع.

قبل ما أسمعها قررت إني أنسى إنها من تأليفك (و قدرت "نوعاً ما" أقنع نفسي بكده B) ) علشان أقدر أحكم عليها بحياد.

بمجرد سماعي لها و بدون أي مجاملة حسيت إني باستمع لموسيقى من تأليف موسيقار كبير.

في بدايتها جه في بالي عمر خيرت و بعدين عمار الشريعي و بعدين اتلخبطوا على بعض :D

بعد تحليلك لتقسيمها مش هأقدر أضيف لإني شعرت بنفس ما قصدته أنت و هذا دليل على إنها وصلِت صح ;)

كان المفروض أبدأ بشُكرك على عنوان الموضوع الذي بقدر ما أسعدني جداً جداً :wub: بقدر ما أحرجتني المقدمة :lol:

شكراً يا وليد ... حقيقي أشكرك من كل قلبي و في انتظار المزيد :wub:

.

[Modest]

الله ينور يا وليد

سيمفوكيه ولا اروع

بس هو انت مش قلت انك جايب هدية لعمامك ؟؟؟

انا مش لاقي لا تورته ولا بسكويت ولا اي حاجه ولا حتى باكو مناديل كلينكس

تصدق يل وليد انا كنت زعلان من عمك س س علشان كل شويه يقولك هتروح الجيش

بس بصراحه وبعد اللي حصل دا

انا بنفسي هوصي عليك الشايش عبد الصمد بتاع مركز التجنيد يوزعك عسكري طُلبه حمامات

معلش يا ول ... علشان السمّيعه اللي زي أبيه ياسو يتمزّجوا و همّا بيسمعوا السيمفوكيات

إبقى المرة الجاية حط مع الموضوع كام كوز درة و شوية لب و سوداني و ياسلام لو عربية بطاطا تبقى ميه ميه :lol:

[Cleo]

ولو إن المقطوعة دى مش مهداه ليا :lol:

اسمحلى أنقدككككك.... وأشكركككككككك ((وش واحد مش بطيقه... ربنا يجعل كلامنا خفيف عليه :wub: ))

ويللو... أنا بالظبط كنت داخلة أقولك الكلام اللى قاله موديست فوق... وفعلا اتصدمت لما سمعت أول 20 ثانية فيها.. B)

وأنا بسمعها حسيت إنها موسيقى تصويرية بتاعت فيلم أو مسلسل.... وحسيت كمان بشبح ياسر عبد الرحمن يحوم فى المكان :wub: بس الفرق أن نبرة الصراخ فى أعمال ياسر عبد الرجمن عالية جدا، بالإضافة إلى القفلة العنيفة المكررةاللى بيقفل بيها الجمل بتاعته.. انت بكل مهارة ورغم نبرة الحزن الشديدة فى المقطوعة دى، بس قدرت تهرب من المطب ده...

وبعدين ما ترسيلك على بر... شكسبير ولا المزيكا؟ مش لازم تعقدنا فى الاتنين يعنى !! إففففففف مليتوا البلد :wub:

:D ;)

[وليد صفوت]

ابيه موديست ..... :D

الحمدددددددددددد لللللللللللللللله انها عجبتك .... كنت خايف من كرتونة البيض و قفص الطماطم :lol:

و على فكرة انا قولت اللى حاسس بيه فعلاً ... و من غير ما اجاملك خالص يا ابيه ... ربنا يخليك لنا ... انت تستاهل هدايا اكبر من كده بكتير بس ده اللى انا اقدر اعمله دلوقتى B)

و ميييييييييرسىىىىىىىىىى على الإتصال الجميييييييييييييل الغير متوقع خااااااااااالص ده :wub:

----------------------------------

كليوووووووووووو

و الله يا كليو انا بهديها لكل اللى بحبهم ( عدى انتى بقى ) ;) و كل عضو هنا انا بحبه بجد .... و صعب اتعرف على ناس زيكوا فى الحياة ...

فعلاً الوتريات متأثرة فى عزفها فقط بمؤلفات ياسر عبد الرحمن و ده لسبب بسيط و هو ان العازفين معظمهم شغال مع ياسر عبد الرحمن ( فرقة محمد ظهير ) ....

و على فكرة المزيكا دى اتعملت بفضل ربنا سبحانه و تعالى اولاً ثم بمساهمة الفريق كله معايا و اللى معظمهم ( مش كلهم :wub: ) رفض يأخد أجر مقابل الإشتراك فى المزيكا دى و تحملتها انا و اصدقائى العازفين .....

و على فكرة برضو .... انا ليا مقطوعات غربى شوية عن دى هبقى اسمعكم كل جديد ... انتظرونا على صفحات المحاورات المصريين :D

وبعدين ما ترسيلك على بر... شكسبير ولا المزيكا؟ مش لازم تعقدنا فى الاتنين يعنى !!

:D

و انا بعمل ده ليه ؟ مش عشان الشعب ! :wub: ( وش محمد صبحى فى تخاريف لما كان عامل دكتاتور :D )

[كمبورا 6]

العزيز المبدع وليد

كنت متأكد ان عندك مواهب تانية

الحمد لله

معنديش سبيكر

[DARWEEN]

ياسلاااااااااااااااااااااااااااااااااام

ميرسي يا وليد على ذوقك ... بجد بجد تحفه

انا ماكنتش فاكر انك موهوب للدرجه دي ... ولو أن ده مش حيعفيك من التقدير بتاع الكليه اللي اتفقنا عليه

وتقديرا مني للمعزوفه الرائعه دي أنا بافكر انتج لها مسلسل مخصوص علشان احطها في المقدمه

وبعد تفكير عميق غميق متوتر ... قررت

قررت

أرمي الأسبيكر :wub: :wub: B) :D ((( باهزر أوعى تاخدها جد )))

حقيقي ياوليد منتهى الأحساس والجمال

بس انت واعدني بقطعة الموسيقى دي لوحدي ... ( وش واحد بيتخانق مع طوب الأرض )

بس على العموم أنا ممكن أقبل أسمعها مع موديست وأحنا بنسمعها ........... لما يعزمني على ..... الكابتشينو ( هو فاهم وأنا فاهم ) :lol: :wub:

شكرا مرة تانيه يا وليد وربنا يوفقك في الجيش مع كل الصولات والشاويشيه والأومباشيه

[وليد صفوت]

ميرسى يا عمو داروين ... ربنا يخليك لينا :wub:

و بمناسبة المسلسل انا اقترح نعمله على طراز لن اعيش فى جلباب ابى ....و ناخد معانا كليو فى دور ( نحمده ) بتاعت الكشرى .... B) :D و س س فى دور اخوها الكبير و جيجى تعمل دور عربية الكشرى :lol:

و فداك الإسكبيكر يا عمو اجيبلك غيره ( اهم حاجة انه نسى الطماطم و البيض المسلوق .. الحمد لله ;) ) .... :wub:

بس ممكن ابيه موديست ياخد نصها الأولانى و حضرتك تاخد نصها التانى :D او ممكن بالإتفاق :wub:

ربنا يخليكوا و لا يحرمكوش منى :D

[nancy]

وليد انا مكنتش اعرف انك جميل اوى كدة

انا سمعتها مرة وباكتبلك وانا باسمعها تانى

فعلا اولها حزين اوى كان واحد بياخد قلبة فعلا الى كان شايلة عند حبيبة

والجزء التانى انة بيلم قلبة فى ايدة ويحط علية دموعة وكل زكريات حبه الى فات

وبعدين بيقفل ايدة عليهم وبيتحول قبة لعصفور ملون بيطير حوالية

ويمنية بسعادة ودنيا جاية ورغم الكسره الى فى الفرحة كل شوية انما مع كل لفة العصفور بيقوى ويرفرف اكتر

ويعلى ويعلى ويسحب صاحبة معاه للامل والدنيا الجديدة رغم ان عصفورة مصنوع من المة وزكرياتة وحزنة

بس الامل بيخلية يبتسم للى جاى

انا مش عرفة باكتب اية بس دة احساسى

[وليد صفوت]

ميرسى يا نانسى على المجاملة الجميلة دى ربنا يكرمك :unsure:

و انا فاهم كل كلمة قولتيها .... و ميزة المزيكا انها بتتفهم بكل اللغات و كل الأشخاص يفهموها و يحسوا بيها لأنها ارقى من اللغة المنطوقة ....

ميرسى كمان مرة ... و الله انا حاسس انى وصلت للهدف من كل التعب اللى عملته فى المقطوعة دى من تعليقاتكم الجميلة و من اول اتصال من ابيه موديست بجد فرحت جداً :P ;) ;) :D :D :D

ربنا يخليكوا ليا ....

[Modest]

بس انت واعدني بقطعة الموسيقى دي لوحدي ... ( وش واحد بيتخانق مع طوب الأرض )

بس على العموم أنا ممكن أقبل أسمعها مع موديست وأحنا بنسمعها ........... لما يعزمني على ..... الكابتشينو ( هو فاهم وأنا فاهم ) :unsure: :P

يادي الكابوتشينو ;)

وعدتك قبل كده اعزمك على كابوتشينو أول ما الزمالك يكسب الأهلي .. يعني هانِت خلاص .. هاعزمك يوم الجمعة بعد الماتش

وليد .. المرة الجاية اهدي المقطوعة لكل واحد فينا في موضوع لوحدُه .. مش عايزين مشاكل الله يكرمك ;)