جلطات الوطن .. والمآسى والمحن ..!!

[achnaton]

5]بسم الله الرحمن الرحيم

من اول امبارح حاسس ان بعض الاسلاك فى راسى ضربت .. فكلما قمت من النوم انام تانى او بمعنى ادق مش نوم نوم ولكن سرحان وغيبوبة فى احلام اليقظة كما يقال .. معظمها يدور حول سحر العلوم الحديثة وفكر الانسان فى التغلب على مشاكل الحياة .. وتذكرون عندما بدأت مناقشة ما قاله مليادير القرن الحادى والعشرين اللى جمع خلال سنوات قليلة 40 مليار .. وكيف كنت يومها وقد تورمت قدمى فاضررت الى لبس شبشب فى رجلى تمام كما وصف اخونا ابو عمر " س.س " شبشب السيد بوش عندما فتح الباب لجيمى فى الزيارة الفجائية .. وحرمنى الورم من لبس حذاء أدخل به التاريخ زى طلعت السادات .. !!

وعندما زارنى الطبيب قال " جلطه " وممنوع الحركة و اخرج من شنطة يده حقنه اقل من عقلة الصباع ولم يمضى وقت طويل وبدأ الالم يزول .. والورم ينصرف .. ولكن الصعب والاشد ..هو الالتزام بالبقاء فى الكرسى - لأ .. دا كرسى تيفال مش زى بتاع الجماعة اياهم – واثناء الجلوس الطويل .. ولاغفاءات المتكررة .. مرت امام عينى صور الجلطات التى تعرض ويتعرض لها بلدنا الحبيب .. وتخيلت وجود حقنه تذيبها او تزيلها .. وبدأت استعرض تلك الجلطات فى شريط متواصل وكانه عرض سينمائى متواصل .. وعادة تبدأ تلك الافلام باستعراض اسماء المنتج والمخرج والمؤلف والممثلين .. الغريبة بقى ان فى الافلام التى مرت أمامى اثناء التزامى بالكرسى ان جلطات الوطن كلها من اخراج مخرج واحد وتأليف مؤلف واحد وتمثيل فريق واحد .. وكلها جلطات تودى فى داهية يتعمد المخرج ان يربط بها المواطن الى كرسى مقطوع الارجل ..

واسمحوا لى استعرض معاكم بعض الجلطات التى مرت برأسى وانا مربوط بالكرسى رغم انفى .. تمام زى شعب المحروسة اللى ربطه "المماليك الجدد " تتار الكاكى منذ عام 52 فى كرسى من غير قاعده ولا مسند .. وكل ما يحاول يصرخ يؤلفوا له " جلطه " .. مسرحية تشغله عن دنياه وتحول صرخاته الى آهات .. وشوفوا الاخراج الرائع لمسرحية " الاصابع الذهبية " للتغطية على مهازل ما اطلقوا عليه الانتخابات الرئاسية او الانتخابات النيابية .. وشوفوا " الجلطات " وعددها بداية بحبس ايمن نور .. والاطاحة بحزب الوفد الجديد بعد ان استولى عليه النهمان .. وعندما بدء الاعلام الحر يكتب بعيدا عن مقر الفساد فى ماسبيرو .. شوفنا " جلطات " الضرب فى العريان عندما خطفوه ليؤدبوه حتى لا يتكلم عن اسياده !!!!!! الاكابر ؟؟؟ ومش حتكلم عن " جلطات الصحافة " .. ولا جلطات النقابات .. دى مش محتاجه لبيان .. اكبر جلطه شغلوا يها الشعب بالكامل .. الجلطه التى اصابت القضاه .. !! ..

وحكاية " الجلطات " دى ممكن ان نسميها بالاسم الصحيح وهو " الازمات " والازمات دى هى الاسس الرئيسية فى تأليف مسرحيات " اللهو الخفى " اللى ابتكروها " المماليك الجدد " منذ ايام هيئة التحرير ومنظمات الشباب .. !!

تصوروا بقى معى اثار احد " الجلطات " المنيلة بستين نيلة اللى الفها واخرها تتار العهد الناصرى للقضاء على الثروة العقارية فى المحروسة .. تلاها القضاء على الثروة الزراعية وايامها لجأ الفلاح لتجريف الارض وبيع ناتج التجريف لمصانع الطوب ثم بعد ذلك صدروه لبعض الدول الصحراوية فحولوها الى دول زراعية ..!!

من كام اسبوع التقيت فى النادى هنا براجل طيب من القاهرة عنده عماره من مبانى الخمسينيات الجميلة .. السلم كما يقول من الرخام الكرارة الذى لا يعوض ولا تبعد كثيرا عن مجلسى الشعب والشورى .. بها 11 شقة واسعه وجميلة ايجار الشقة الواحده لا يتعدى الخمس جنيهات بعد قوانين ناصر لتخفيض الايجارات .. الرجل بيحكى ودموعه تغطى وجهه .. ايجار الشقة فى عام كامل لا يكفى لشراء كيلو وربع لحمه .. وحاليا لا يكفى لشراء مائة بيضة او ثلاث فرخات

ثلاثة ارباع شقق العمارة مورث من الاجداد وعندما لجأ الرجل للقضاء منذ خمس سنوات صرف على المحاماة والرسوم اكثر من الف ضعف ما يحصله من الشقق الباقية .. وفى العام الماضى فوجئ بتحويل كل القضايا الى ادارة الخبراء لتحصل وزارة العدل رسوما جديده على كل قضية مقدما ؟؟؟ الرجل اسقط فى يده .. معاشة قليل ودخله من العقار لا يذكر .. حزم شنطه وجاء الى برلين ليعيش مع ابنته على حساب زوج ابنته ..

وعاوز أسأل .. فين قانون حماية الثروة العقارية اللى الحكومة بتتكلم عنده منذ سنوات انه فى مجلس الشعب ؟؟

آهى دى مثلا احد " الجلطات " اللى بتحرص حكومات المحروسة المتعاقبة على رعايتها منذ سنوات .. وجعلتنى وانا افكر فى كلام هذا الاخر الهارب الينا .. وفى حلقه غصه .. فالعمارة الجديدة بجوار عمارته التى تم بنائها منذ خمس سنوات ايجار الشقة فيها بنفس المساحة 800 جنيه وده غير مصاريف البواب والصيانه !! قلبى وعقلى وكل جوارحى مع هذا المالك المظلوم ..

انا طولت .. وتعبت .. ولكن حنكمل الحكايات ونعدد الجلطات .. فقط دعونى اناشد طلعت السادات .. واقول له .. الورم راح ..هات الجزمة هات !!

يتبع

تم تعديل 16 يونيو 2006 بواسطة achnaton

[achnaton]

بسم الله الرحمن الرحيم

اتكلمنا امبارح عن احد الجلطات الكبيرة .. التى زرعها تتار الكاكى فى جسد البلد فلم تتسبب فقط فى ضياع ثروتنا العقارية والزراعية وبالطبع الصناعية وحولتنا من شعب كنا نزرع لنأكل ونلبس بل ونصدر الفائض للجيران .. انقلب الحال واصبحنا ننتظر الاحسان .. وحصص الزكاة التى فرضها علينا الاسلام .. وتقلص بشكل رهيب الانتاج الزراعى وتخصصنا على يد وزير المسرطنات فى زراعة الكنتالوب والبطيخ المسرطن .. ونسينا فى زحمة الازمات التى يفرضها علينا المماليك الجدد ان بيننا ما قد يكون صانعا ماهرا وفضل الشباب الوقوف على النواصى لترديد الاغنيات .." والواد قلبه بيوجعه .. عاوز حد يدلعه " وبدل ما الشباب يشغل نفسة ويناقش تزوير الانتخابات .. فضل يمتع نظره بمغنيات القنوات .. والرقص بدون صاجات ..

وكنت انوى النهارده اتكلم على جلطة " طبيب الاطفال " الى سرحت فى كل جسم الدولة من رياض الاطفال حتى مدارس الكبار .. وضاعت على البلد عدة اجيال .. من الشباب والاطفال ..

وكنت ناوى امر مرور الكرام على حكاية المليادير رقم 2 اللى ملأ جيوبة على مر السنين من اموال ابناء الشعب اليتيم .. الاستاذ ابراهيم .. وانتم طبعا عارفينه .. اللى كان بيقبض حوالى ثلاثة مليون جنيه كل شهر مرتب وحوافز ومكافآت حضور اللجان .. وحكاية الارض اللى اشتراها بملاليم لزراعتها فحول جزء منها لبناء القصور .. ونجح فى تحويل الفدان ابو كام جنيه الى امتار للبناء .. ومش آى مبانى .. !! الراجل ده بعد ان غطى الشك كل تصرفاته .. وتم رفع الحصانه عنه لتواصل النيابة التحقيق معه .. وضل القرار طريقه الى النائب العام .. ولا احد يدرى القرار راح فين .. وفى درج مين ؟؟ واكيد التحقيق ده لو بدء واستمر حيكشف عن حاجات كثيرة مش ممكن تتلم ..

وكله كوم .. والجلطة الفظيعة اللى قرأت عنها فى جريدة المصرى اليوم فى صفحة 3 عن تصريح لوزير الاسكان المغربى اللى كان وزير للسياح واتضح انه مهندس – فيه حد يعرف ده مهندس فى ايه ؟؟ - قام رئيس الوزارة الالكترونية اراد الاستفاده من خبرة الباشمهندس المكتشف حديثا فى الوزارة القديمه قام رشحه للآسكان

الراجل ده يا سياده طلع مش مهندس وبس .. لا دا احد كبار العلماء اللى حظنا " المنيل " فى المنحوسة لم نستعين بعلمه الواسع .. تصوروا انه بتصريح وزارى واحد مسح كل الخبرات العالمية فى موضوع الاسبيتوس الى كل الدولة المتقدمة حظرت حظرا تاما على استخدامه .. شوفوا معايا " جلطة " معالى الوزير شكلها ايه وقد ايه ما ينفعش معاها اى نوع من الحقن ولا الحقن الشرجية .. معالى الوزير المهندس بيقول للمصرى اليوم إيه ..:

" أكد المهندس احمد المغربى وزير الاسكان ان مجرد سريات مياه الشرب فى مواسير " الاسبيستوس " لا يصيب بمرض السرطان وان الخطورة تكمن فى تقطيع هذه المواسير وتطاير الغبار الذى يسبب سرطان الرئة . "

واعتقد ان هذا التصريح الوزارى الفنى .. اذا تمت ترجمته الى الالمانية ونقلته وكالات الانباء الى برلين حيولع البرلمان هنا .. وحيحصل فيضان هادر لطلبات الاحاطة ويمكن تروح فيها رقاب .. فالعلماء والفنيون الالمان عندما تأكدوا من خطورة مادة الاسبستوس اضرت الحكوم لاغلاق عدة مصانع لمنتجات الاسبستوس .. وحفروا شوارع لاستخراج مواسير الاسبستوس وتغيرها .. بل .. تم اغلاق مئات المدارس التى استخدم فى واجهاتها او داخلها مادة اسبستوس .. تم اخلاء مجمع اذاعة المانيا وصوت المانيا - مجمع رهيب – فى مدينة كولونيا .. لان الواجهة كانت من الواح الاسبستوس وتم تجريف اراضى الحدائق المحيطه واعدامها بعد ان افسدتها مياة الامطار الساقطة على الواجهة .. والقانون صريح وواضح هذه المادة ممنوعة حتى ولو استخدمت للتجميل ؟؟

معالى الوزير .. نصدق مين .. نصدقك ولا نصدق علماء العالم .. ؟؟؟ عاوزين الدليل ؟؟ وعاوزين نعرف انت مهندس فى ايه .. واشتغلت بشهادة الهندسة دى فين .. واخشى أن تتحرك الجلطة .. الى الدماغ .. شد حيلك ورد علينا .. ربنا يخليك لينا ..

يتبع

تم تعديل 16 يونيو 2006 بواسطة achnaton

[Abdulaziz Omar]

ألاخ الكريم اخناتون

لقيت بلصدفه مداخلاتك عن الجلطه و اولا و قبل كل شئ سلامتك

ثانيا برغم عدم سابق معرفه بينا الا ان كرم اخلاقك شجعني ان اطلب منك طلب خاااااااااااااااص جدا

فحيث اني شايف ان الطب حداكو في المانيه اتجدم جوي جوي و خاصه في علاج الجلطه

بالله عليك ياشيخ تسال الدكاتره حداكوا عن علاج للجلطه اللي قافله علي شريان مصر بقالها خمسه وعشرين سنه-لحسن البلد بتفرفر ياولداه

قوللهم اي علاج........حبوب وللا ابر...... وللا حتي لبوس شرجي.........(دستور ياجماعة الاداره-اللبوس علاج معترف به دوليا ولافيهش الة ادب)

واللا اقولك انشالله شربة ملح انجليزي.....واهي بلاد الانجليز قريبة منكم.....فركة كعب يعني....وكوللتها وحده اروبيه

صحيح الموضوع موش سهل وحنحتاج كده قد خمسين مليون دشليون كيلو شربة ملح عشان البلد تنضف لكن معلش.......الانجليز جدعان و حيساعدونا.......وكمان فيهم علما وايدهم طايله

ورحمة راس جدك الشيخ حسن ياخويا ما تنسي

يمكن ربك يزيح........ قادر ياكريم

عمر

تم تعديل 10 أبريل 2007 بواسطة Abdulaziz Omar