حصريا للمحاورات .. مبارك على الماسينجر

[لخبطه]

لم انتخبه .... وأنا برئ منه:

صباح الخير سيادتك

أبو علاء :

صباح الخير

لم انتخبه .... وأنا برئ منه:

ألووووووو

أبو علاء :

معلهش استحمل شويه لأني بطىء في الكتابة

لم انتخبه .... وأنا برئ منه:

مش مشكله استحمل ماحنا مستحملين كتير

لم انتخبه .... وأنا برئ منه:

على فكرة لغاية دلوقتى أنا حاسس أني بحلم مش مصدق موضوع انك معاي على الماسينجر

أبو علاء :

ليه يابنى عادي هو أنا مش بنى أدم زيكم صحيح هموم البلد ومشاكلها بتخليني في دوامه حتى الناس بيظنوا إني في برج عاجي لكن دا مش صحيح طبعا

لم انتخبه .... وأنا برئ منه:

سبحان الله .......... تعرف حضرتك إني شوفتك أكتر من مره في أحلامي وللأسف كلها كانت أحلام سلبيه وحشه يعني

أبو علاء :

مانا عارف أنكم كلمكم بتشوفوني عفريت

لم انتخبه .... وأنا برئ منه:

لا مش الفكرة بس يعني انته عارف الأحلام هواجس وعقل باطن

لم انتخبه .... وأنا برئ منه:

سكتت ليه

أبو علاء :

مافيش تليفون طوارئ

لم انتخبه .... وأنا برئ منه:

صحيح على ذكر التليفون هو حضرتك معاك موبايل ؟

أبو علاء :

ليه السؤال ؟ لم انتخبه .... وأنا برئ منه:

يعني أنا دايما كان في مخيلتي ان حضرتك أكيد عندك نمرة شديدة وعدة ( 6600 فنلندي )

أبو علاء :

هههههههههههههههههههه للأسف ما عنديش موبايل أنا الوحيد في الشعب المصري اللى ممنوع من الموبايل لم انتخبه .... وأنا برئ منه:

غريبه ليه ؟؟

أبو علاء :

من غير ليه ........... ممكن نتكلم في موضوعات عامه أحسن

لم انتخبه .... وأنا برئ منه:

طيب بس أغلب الموضوعات العامة هتخليك تعمل على بلوك بدري بدري وانا بيني وبينك ماصدقت لقيتك يعني أهو الواحد يبقا له ظهر ومش أي ظهر وأمشى في المطار بنظاره شمس كدا ولا يهمني حد زى ما كنا بنشوف الناس بتعمل أيام ما كنا في طبقة العامة و الغوغاء

أبو علاء :

لا عادي اتكلم في أي حاجه أنا مادخلتش البتاع دا إلا لما زهقت من التقرير المكتوبه وقولت اكلم حد من الناس العادية بس حظي السىء وقعني في واحد كلامه كتير شويتين

لم انتخبه .... وأنا برئ منه:

دا انا ماشي

لم انتخبه .... وأنا برئ منه:

طيب هقولك على حاجه شاغلاني من زمان

أبو علاء :

ايه هيا

لم انتخبه .... وأنا برئ منه:

أنت بتنام كويس

أبو علاء :

اكيد طبعا

لم انتخبه .... وأنا برئ منه:

غريبه

أبو علاء :

ليه غريبه

لم انتخبه .... وأنا برئ منه:

دايما كنت بعتقد أنك مش بتنام كويس

أبو علاء :

ليه

لم انتخبه .... وأنا برئ منه:

لأني لما بيكون عندي مشوار البندر الصبح مش بعرف أنام من القلق يعني بكون شايل الهم وقلقان لأنه مشوار البندر مرتبط بالمسئوليات و المسئولية دي حاجه صعبه وببقا دايما خايف لا قدر الله تحصل حاجه يعني مش اقدر اروح لأي سبب وتضيع المصلحة اللى انا رايح أخلصها وخصوصا لما تكون لحد تاني مش لي بتكون المسئولية أصعب لذلك توقعت انك مش بتنام من حجم المسئولية الكبيرة دي

أبو علاء :

كلامك فيه شىء من الصح بس دا بيكون لفترة في الأول لما مسكت الحكم حسيت أنه مسئولية كبيرة لكن مع الوقت بتمشي الامور وساعات بتمشي في عدم وجودي كمان وبنفس الكفاءه

لم انتخبه .... وأنا برئ منه:

سبحان الله يعني حضرتك شايف أن كل الامور ماشية تمام

أبو علاء :

أكيد طبعا

لم انتخبه .... وأنا برئ منه:

غريبه تصدق أن حضرتك الوحيد في السبعين مليون اللى متصور كدا

أبو علاء :

ههههههههههههههههه أيوه مانا عارف أن بحكم شعب من الفلاسفة ماحدش فيهم عاجبه أي حاجه والكل متصور أنه ينفع رئيس جمهورية ودا سبب خيبتنا والدليل على كدا شوف ماتشت الكورة تلاقي كل الجماهير مدربين وفاهمين كوره اكتر من المدرب لكن الناس متعرفش الأمور بشكل صح لأنها مش شايفه كل حاجه كل واحد شايف الجانب اللى ظاهر له بس ومش شايف النواحي التانية لكن لو الناس عرفت اللى نعرفه وشافت اللى بنشوفه هيفهموا أن الحقيقه مختلفه تماماً عما يتصوروا

لم انتخبه .... وأنا برئ منه:

مش عارف ليه دايما لما حد مسئول يواجه بالحقيقة المرة يرجع الأسباب لأمور خفيه لا يعملها إلا العلية ودا طبعا بيخرص الللى قدامه

أبو علاء :

لأنها دي الحقيقه

لم انتخبه .... وأنا برئ منه:

تعرف عمر بن الخطاب

أبو علاء :

أها انته بقا من الجماعه اللى مكفرين كل الخلق وبيقولوا على كافر

لم انتخبه .... وأنا برئ منه:

لا سمح الله ليه بتقول كدا

أبو علاء :

سؤالك اللى بيقول كدا

لم انتخبه .... وأنا برئ منه:

لأ والله أبدا أنا بفتح حوار بس مع حضرتك

أبو علاء :

طيب افتح

لم انتخبه .... وأنا برئ منه:

أنا أقصد بتقرا عنه عن حكمه الراشد

أبو علاء :

أكيد طبعا

لم انتخبه .... وأنا برئ منه:

غريبه

أبو علاء :

ليه غريبه

لم انتخبه .... وأنا برئ منه:

لأني زي ناس كتير ببكي لما أقرأ عن حكمه وأقارنه اللى بنعيشه دلوقتى

أبو علاء :

طيب انته غبي أعملك ايه ؟

لم انتخبه .... وأنا برئ منه:

انا :blink:

أبو علاء :

افهم بس

لم انتخبه .... وأنا برئ منه:

اتفضل

أبو علاء :

الغباء في أنك تقارن بين شيئين مالهومش علاقة ببعض

لم انتخبه .... وأنا برئ منه:

أزاى

أبو علاء :

يعني إزاى تقارن فترة الحكم الراشد ب القرن ال21 الوضع مختلف و الظروف مختلفة والحياه مختلفة و الناس مختلفة دي فترة وعدت ومش هترجع تاني حتى الجماعة الدراويش اللى بيضحكوا عليكم وبيقولوا لكم عايزين نطبق الشريعه دا كلام فاضي للأستهلاك المحلي بس وأنا حذرت كتير منهم

لم انتخبه .... وأنا برئ منه:

معاك بس أكيد فيه طريقة لتطبيق ولو الأساسيات بتاعتها

أبو علاء :

طبعا أكيد ودا حاصل

لم انتخبه .... وأنا برئ منه:

حاصل ازاى ؟؟؟؟؟؟؟؟؟؟؟؟؟ :blink: :blink:

أبو علاء :

إيه اللى إزاى أحنا بنطبق أساسيات الحكم الإسلامي ؟

لم انتخبه .... وأنا برئ منه:

فين دا ؟

أبو علاء :

معقوله أنته ب الجهل دا ؟

لم انتخبه .... وأنا برئ منه:

طيب فهمني حضرتك ؟

أبو علاء :

يابنى دي واضحه أوي الدستور نفسه بينص على أن الشريعة الإسلامية هيا مصدر التشريع في بلدنا دا خلاف الإنجازات الكبيرة في مجال الدعوة وبناء المساجد ويكفي إن الأزهر هو منارة الإسلام في العالم

لم انتخبه .... وأنا برئ منه:

هو حضرتك متصور أنه بكدا أننا بلد بنطبق الإسلام

أبو علاء :

أمال إزاى ولا انته عايزيني أربي دقني وألبس جلبية بيضا قصيرة

لم انتخبه .... وأنا برئ منه:

لا أنا بتكلم على روح الإسلام نفسه

أبو علاء :

يا بنى لاحظ إننا بلد فيه ديانات تانية ولازم كل دا يوضع في الاعتبار وإلا هتكون فتنة مالهاش أول من أخر وأنا حذرت من الفتنه دي كتير وقولت نعمل مؤتمر ونعرف الأرهاب بس محدش سمع الكلام

لم انتخبه .... وأنا برئ منه:

سؤال ثاني محيرني

أبو علاء :

أتفضل إسال

لم انتخبه .... وأنا برئ منه:

حضرتك راضي عن نفسك وعن البلد ؟

أبو علاء :

نفسي أه البلد لا ؟

أبو علاء :

بمعني ؟

لم انتخبه .... وأنا برئ منه:

يعني أنا راضي عن نفسي لما بتذكر أيام الطفولة بلاقي نفسي وصلت لأعلى درجه وسط كل زملاء الدراسة كمان على المستوى الشخصي حققت كل اللى كنت بحلم بيه وزيادة كمان على المستوى العالمي لما بشوف ذكري وتقديري في الصحف العالمية بحس بفخر بحياتي وإنجازاتي لم انتخبه .... وأنا برئ منه:

سؤال عائلي ممكن

أبو علاء :

اتفضل

لم انتخبه .... وأنا برئ منه:

بتحصل خلافات بينك أنت ومراتك يعني تقولك رايحه عند أمي النهارده تقولها لا جاي لنا ضيوف من بنما لازم تجهزي لهم غدا تقولك لازم أروح علشان بيعملوا سبوع بنت اختي تقولها لو طلعتي من الدار تبقي طالق وكدا

أبو علاء :

هههههههههههههه اكيد فيه خلافات احنا بشر بس مش بالشكل السافل بتاعكم دا

لم انتخبه .... وأنا برئ منه:

سؤال اقتصادي ممكن

أبو علاء :

اتفضل ياعم عصام يارفعت

لم انتخبه .... وأنا برئ منه:

هاهاهاها ظريف والله امال مكشر في وشنا طول الوقت ليه دانت طلعت مسخره ياجدع

أبو علاء :

ولد احفظ مكانك وحافظ على المقامات

لم انتخبه .... وأنا برئ منه:

حاضر سيادتك

لم انتخبه .... وأنا برئ منه:

ساعات بتتزنق في فلوس يعني يكون عندك قسط مروحه مثلا مثلا اخر الشهر ومايكونش معاك فلوس تدفعه

أبو علاء :

الحاجات المالية دي مابعرفش عنها أي تفاصيل بتتم بعيد عني وأنا بحاول أفرغ نفسي للأمور الأهم ودا حاصل في كل دول العالم

لم انتخبه .... وأنا برئ منه:

تقصد شبرا والتحرير وإمبابه

أبو علاء :

ازاى مش فاهم

لم انتخبه .... وأنا برئ منه:

لا ماتشغلش بالك دا تعليق لللمبي في اللى بالي بالك

أبو علاء :

أها

لم انتخبه .... وأنا برئ منه:

بس جميل الإسم بتاعكأبو علاء :

شكراً

لم انتخبه .... وأنا برئ منه:

واضح أنك معتز بعلاء ابن حضرتك أبو علاء :

اكيد طبعا وما تنساش أني راجل ريفي يعني بردو مستقر في ذهني إن الرجل بتكون كنيته بأبنه الأكبر

لم انتخبه .... وأنا برئ منه:

أها مشاء الله

أبو علاء :

وانته بقا أسمك دا معناه أيه ( لم أنتخبه وأنا برئ منه ) لم انتخبه .... وأنا برئ منه:

أسمي :blush: :blush: :blush: :blush: :blush: :blush: :blush:

أبو علاء :

الووووووووووو

تعذر تسليم الرسالة التالية لكافة المستخدمين الووووووووووو

أبو علاء موجهاً كلامه لللى حواليه

ولا هو يقصد أيه ابن .............. هاتوه الواد دا

هو مين سيادتك

الواد اللى كان معايا دلوقتي

هنجيبه من تحت الارض سيادتك

مع الاعتذار للاخ اسد استعنا باللوجو بتاعه

تم تعديل 21 يونيو 2006 بواسطة لخبطه

[الأفوكاتو]

حلـــــــــــــــــــــــــــــــــــــــوة

[وليد صفوت]

جميلة يا لخطبة ..... :blink:

بس عشان الموضوع فكاهى انا هنقله باب دعوة للإبتسام ...

ميرسى كمان مرة :blink:

[مهيب]

بصراحة لذيذة قوى يا لخبطة ... و ممكن تطلع منها مليون فكرة ... دمك خفيف و متمكن

مهيب

[لخبطه]

كبيرنا الاستاذ افوكاتو

تسلم

المشرف الكبير الصغير ليدو <_< البيت بيتك تصرف كيف شئت

عمي وعم عيالي من بعدي مهيب

إنته الاحلى ياعمو خفة الدم دي شربناه منكم هنا في المحاورات

[yacho]

حلوه يا لخبطه .. دمك خفيف بجد <_<

[لخبطه]

كلك زوق yacho

وخفة الدم دي زي ما قولت بنشربها كلنا هنا في المنتديات من نخبه من الذ واجمل ناس في مصر

[سمـ مصر ــا]

حلوة يالخبطة

بس انت ضفت ابو علاء امتا

<_<

[المسروق]

الموضوع ظريف جدا

لكن انا حصل معاى موقف مع سياده الريئس على الماسينجير مش ممكن انساه فى حياتى

كان اول ماطلع منتدى الاخبار كتبت مشاركه لبخت شويه فى ابو علاء والمشاركه عملت صدى جامد

فى المنتدى لدرجه وكان ده شئ جديد على المنتديات فى نفس الايام ابن خالى لاسع شويه غير اسمه على الماسينجير الى سياده الريئس محمد حسنى مبارك المهم انا فاتح الماسينجير لقيت شاشه زرقاء من جنب الساعه مكتوب فيها

السيد الرئيس محمد حسنى مبارك يرغب فى التحدث معك

طبعا انا اتخضيت جيت اقفل الكومبيتور من زر التشغيل مش راضى يقفل شديت الفيشه بعد شويه فكرت ايه الهطل اللى انا فيه خايف ليه بعدين هو حا يعوز منى ايه

فتحت الجهاز ثانى وفتحت الماسينجير لقيته الواد ابن خالى مسمى نفسه كده بس بعد ما وقع قلبى شويتين

[لخبطه]

سما هو اللى ضافني انا مش اضفته تعرفي دايما انا اللى بنضاف داحنا ثقال اوي عدم اللامؤاخذة

الاخ المسرق

انا لو مكانك ولقيت مبارك داخل معاي على الماسينجر هروح اسلم نفسي علطول واعترف :wub:

[على عينه]

جميلة يا اخ لخبطه

بس ياريتك تكمل جميلك وتدينا العنوان علشان نضيفه احنا كمان ونديلهم كام كلمه فى عضامهم يمكن يحوأ فيهم رغم اننى على يقين ان الناس دى مافيش حاجة بتحوأ فيهم مش عارف مخلوقين من ايه

[last_Samurai]

بجد فظيعه هههههههههههههههههه انت بجد دمك خفيف شكرا يا لخبطه

[لخبطه]

عمنا : على عينه

اانته الاجمل ياجميل

بخصوص العنوان صدقني مش عارف ليه واثق اننا كلنا على كرهنا للراجل دا لو جه يوم وبقينا وجها لوجه معاه مش هنقدر نقوله على كل اللى في بالنا يعني بردو هيفضل شىء من الرهبه جوانا واكبر دليل اننا مثلا ساعات نتخلف مع رؤسائنا في العمل ونقعد نجهز محاضره هنقولها لهم أول ما نشوفهم وساعة المواجهة للاسف بنتراجع وبتتحول الكلمات السامه لكلمات اخف في التعبير و اكثر ميوعه مش عارف هو دا طبع فينا كبشر ولا خيبه

سفيرنا في الصين الشعبيه last_Samurai

شكرا على التقدير الجميل ياعمنا وردك الراقي

بقولك ايه مافيش ساعه كدا كاسيو صناعه صيني :blink: