سلسلة محاورات..!!

[صبح]

مين واقف هناك ؟؟

دة الملك والملكية

نص كلامه حلو

والباقى عصبية

بيقول مصر حلوة

بس خسارة جمهورية

لو نسمى مبارك خليفة

تبقى دوغرى ... اسلامية

وعجبى

[بنت شعنونة]

صبح

اييييييه المواهب دي بس :angry2: كنت مخبيها فين :D

نكمل,...

(حالة)

لا بس دايما توب الفنان

و ما تلاقيهوش في اي مكان

عشان على طول في بحور الشعر غرقان

وفي ردوده تلاقيه سايح وهيمان

مع انه لا بيعرف في الشعر ولا في البتنجان

ولو واحدة كتبت كلمتين فيهم حزن و انان

تلاقيه يجري ... يا خدها بالأحضان :angry2:

واسمع احلى طبطبة و تسبيل عيون الغزلان

امال دا البيه استــــــــاذ في الحنان..

حاجا تموع النفس وتجيب الغثيان.. :wub:

وعجبي...

تم تعديل 22 يونيو 2006 بواسطة بنت شعنونة

[بنت شعنونة]

نكمل...

(حالة)

غبي وبيستغبى!!

وهوا من الغباء اغبى؟!

تقوله يمين .. يقولك شمال

تقوله وانت مالك؟ يقولك امّال؟

تقوله يا حشري؟ يقولك ازاي الحال؟

عامل نفسه فهلوى و حتحوت

وهوا مجرد هلفوت

حروفه بقايا فتوت

احسنلك ما تقراهاش

بس برصه تيجي جنب ودنه وتقول

تووووووووووووووووووووووووت :P

[بنت شعنونة]

نكمل...

شنكاح و فشنكاح

كلامه يطلع عليه النهار يكون ساح

وان شنكاح راح

يجي بداله فشنكاح

ما تعرفهم واحد والا اتنين

كل واحد ليه بدل اللسان.. لسانين

تحس كدا اكنهم اسمين لكن لواحد مش ل اتنين ;)

ودا يطنطن ل دا

ودا يطبل ل دا

و زغرتي ياللي ما انتيش درياااااااااااااااناااااااااااااا

وعجبي... :P

[بنت شعنونة]

نكمل...

ياختي عليها وعلى جمالها

فراشة والهوا طيرّها mfb:

والكلام سكر معقود في لسانها

و وجودها زي عدمها :wub:

تدخل عليك الدخلة.. تقول بس الوحي جالها

تلاقي كلامها هفلطة ما تعرف اخرها من اولها!!

و الفتوة اساس في كلامها

لو بتتكلم في البطيخ.. ها تكلمك عن مكياجها؟! ;)

المهم انها تفتي وخلاص.. هيا مالها

الغلط على اللي يقرالها

او يرد على كتاباتها :P

و عجبي.....

[بنت شعنونة]

كعبور و مكعبر

ونص كلامه متكعبر! ;)

تكلمه بالادب .. يتعالى ويتكبر؟!!

وهوا من الفهم عقلة مكبر..

ان غاب او حضر.. يا عم كبّر

ماحدش بياخد باله..خليك مع الأكبر..

نص كلامه مجاملة.. و النص التاني محجر!

ها تلنا يا عم حاجا ساقعه خلينا نتصبر

وادي ارض المنتديات.. مكتوب ومقدر..

نقي يا ابني واختار.. قبل ما تتصدر

مش كل مين كتب فهمان.. ولا كل من قرا مقدر..

النت عاملة زي الفاكهة.. اشي بلدي و اشي يتصدر

اشي فرز اول.. واشي لازم يتدمر.. :P

وعجبييييييييييييي...

[محمود الشاعر]

شخصية محاوراتية

فنان وبحق جميل

ومصاحب صاحبه انشاله لفين

تلاقيه بيراقب من بعيد

وساعة الغلط تلاقيه ناطط عامل تحزير

طفل صغير الله على فكره

جدية واحترام وهزار والذي منه

فنان وبحق جميل

عاقل ورزين

تستنجد بيه تلاقيه

[الرافعي]

الراجل دة راجل بجد

فى الحق ما يخافش

تقوله يا حلاوة ..!

فى الرد ما يهابش

فى الأول كان معلم

بس مقامه عالى

دلوقتى غير اسمه

بس الغالى غالى

الله يكرم أصلك يا أخي صبح .. اعذرني لست في مقدرتكم الفنية .. وربنا وزع الأرزاق والمواهب ... ربنا يزيدكم.. أنت فعلاً إنسان رقيق وأعتذر لم أر الموضوع إلا الآن

وعجبتني أيضاً حكاية (نصف كلامه مجاملات ونصفه محجر) في مداخلة د. شعنونة ... صحيح فيه ناس كده ؟؟

[سهيلة]

اية دة كلوووووووووووووووو

اية دة كلوووووو

واللة موضوع تحفة ولذيذ جداااااااااا ومستمتعة جدا وانا بقراة

رغم ان فية شخصستين تلاتة موش عارفاهم

ممكن الحل ف الاخر

[بنت شعنونة]

محمود.. :huh:

فوازيرك بقت صعبة اوي :angry2:

عروستي :D ؟؟

سهيلة..

شفتي المواهب

اصبري نقولك موال :D يييييييه قصدي فزورة...

كله لازم يجي دوره :blush:

[محمود الشاعر]

اجاوب يا شعنونة ولا استنى لللاخر

عموما هو هيخش الجيش قريب

عرستي

[بنت شعنونة]

وصلت يا فندم :angry2:

[سهيلة]

هادية ورومانسية

كلامها شجن وحنية

ورقيقة زى النسمة الصيفية

فيها حنان وطيبة المصرية

وشعرها قريب لقلوب كل المحاوراتية

ومعاها مادا ابو ضحكة شقية

معلش يا جماعة استحملو اول تجربة لية ف التاليف :rolleyes:

[وليد صفوت]

يا جماعة الخير ..... مساء الخير عليكوا جميعاً ....

استاذ محمود الله يكرمك دى مجاملة انا ما استحقهاش :ninja:

بس لى طلب صغير لكل الشعراء اللى هنا ...

الموضوع ده زى ما هيفرّح ناس كتير و يبسطهم ... هيزعّل ناس كتير و يضايقهم ...

ياريت نبتعد عن التلميح عن اشخاص بعينهم لأننا مهما كُنا ... فإحنا ما نعرفهومش على الطبيعة و لا متأكدين من الإنطباع اللى احنا خدناه منهم فى المحاورات او حتى خارج المحاورات ... علاوة على ان التلميح سهل جداً انه يتفهم زى ما استاذ صبح سأل شانا عن صحة صديقتها ... طبعاً الكل فهم شانا كانت بتتكلم عن مين :unsure: ....

رجاءً بس انا - شخصياً - هتتضايق لو عرفت ان حد زعل بسبب الموضوع ده .... خلينا نكمل الموضوع بنفس الروح الحلوة اللى عند الشعراء هنا ... و لو عندنا ذم يبقى نخلينا بعيد عن التلميحات .... مش كده و لا اييييييييييييه ؟ ( وش فؤاد المهندس )

:ninja:

[بنت شعنونة]

وليد..

عاوزة اعرفك معلومة صغيرة بس عني...

اني مش بخاف الا من اللي خلقني...

يعني انا لو كاتبا حد بعينه وعاوزة اسميه... ها اسمية ومش ها اخاف

ولو كان كلام الأستاذ صبح صحيح كنت قلتله ايوا صح

مش ذنبي ان صبح طبق الكلام على حد بعينه .. ممكن عوضين يطبق الكلام نفسه ويحلفلك انه على محمدين مثلا..

فاهم قصدي

انا قلت انه حالات بنشفها في المنتديات واظن انه ما فيش اكتر منها :)

ولو كملت كل مدخلاتي ها تلاقيني زعلت ان الموضوع خد منحى الفوازير و التحزير

ف قلبناها مدح وهوا كان اصله نقد

وفي المدح كل واحد سمى الشخص ب اسمه

وبعدين لما خلص المدح رجعنا تاني لنفس السكة...

مش طريقتي ابدا الهمز و اللمز يا وليد اظن انت جربتني مرة..انا زي القطر بقول اللي عاوزاة واللي في قلبي بصراحا واجري على الله ;)

ملحوظة...

كلامك ضايقني و نرفزني جدا على فكرة... بس ماشي.. :lol:

[وليد صفوت]

مش طريقتي ابدا الهمز و اللمز يا وليد اظن انت جربتني مرة..انا زي القطر بقول اللي عاوزاة واللي في قلبي بصراحا واجري على الله :lol:

كملى يا شانا و اجرك على الله ;)

[Modest]

بعد إذنكم أخد الميكروفون :D

موديست في أولى تجاربه الشعرية "بالرز" :excl:

ناس لُطاف و مثقفين

رجالة و ستات

لو تبعد عنهم شوية

إلا و بعد البعد آت

فيهم أخوك و أختك

و أولاد حلوين و بنات

منهم اللي طفشان

و اللي في المحروسة يبات

قلبهم على بلدهم

خايفين تروح في سُبات

تتمنى تفضل معاهم

عايش في تبات و نبات

من غير ألغاز أنا أقصد

أهل المحاو*** :wub:

.

تم تعديل 2 يوليو 2006 بواسطة Modest

[Tafshan]

ايه الشقاوة دى يا مودست :D

[الرافعي]

يا جماعة الخير ..... مساء الخير عليكوا جميعاً ....

استاذ محمود الله يكرمك دى مجاملة انا ما استحقهاش :excl:

بس لى طلب صغير لكل الشعراء اللى هنا ...

الموضوع ده زى ما هيفرّح ناس كتير و يبسطهم ... هيزعّل ناس كتير و يضايقهم ...

ياريت نبتعد عن التلميح عن اشخاص بعينهم لأننا مهما كُنا ... فإحنا ما نعرفهومش على الطبيعة و لا متأكدين من الإنطباع اللى احنا خدناه منهم فى المحاورات او حتى خارج المحاورات ... علاوة على ان التلميح سهل جداً انه يتفهم زى ما استاذ صبح سأل شانا عن صحة صديقتها ... طبعاً الكل فهم شانا كانت بتتكلم عن مين :D ....

رجاءً بس انا - شخصياً - هتتضايق لو عرفت ان حد زعل بسبب الموضوع ده .... خلينا نكمل الموضوع بنفس الروح الحلوة اللى عند الشعراء هنا ... و لو عندنا ذم يبقى نخلينا بعيد عن التلميحات .... مش كده و لا اييييييييييييه ؟ ( وش فؤاد المهندس )

:wub:

الله يخليك يا وليد .... كلام جميل .. لأن من كان يؤمن بالله واليوم الآخر .. فليقل خيراً أو ليصمت

وهذا موضوع جميل أصلاً .. طبعاً ليس المطلوب من الأخوة والأخوات المشاركين إنهم يبالغوا أو ينافقوا الناس .. لكن الكلام اللي على وزن

(وزنه تقيل، وديله طويل..) طبعاً تفسد ولا تصلح أو تقرب بين الناس

فأرجو إننا لا نترك فرصة للشيطان يدخل بيننا وتكون هناك احتمالية لأن ده اختلف مع فلان أو فلانة ... فأكيد هو المقصود بالكلمتين دول .. أو دول

هناك مشاركات فعلاً رائعة وزادت المحبة بين الأعضاء .. لكن هناك أيضاً كلام يحتاج إلى مراجعة ووقفة .. والكلمة مسئولية .. مش كده ولا إيه ؟

[Modest]

ايه الشقاوة دى يا مودست :D

بقالي 12 يوم بألّف فيها يا طفطف :)

حالياً شغّال في تأليف بيت شعر أقوله لمراتي في عيد ميلادها :) ... إيدك معايا يا طفطوفة بأي أفكار قبل سبتمبر اللي جاي الله يكرمك :D