صـــــــــــــ النوبة ــــــــــــــــــوت

[Diab]

في رمضان اللي فات كنت أنا و العيلة في مكة بنعمل عمرة و بجوار الحرم كنا بنشتري حاجة من البقال وكان هندي

و سألنا أنتو منين قلنا له من مـــــــصـــــــر راح قايل الجملة دي

مصر كله أبيض أنت ليه أسمر

طبعا أحنا كلنا ضحكنا لأن طريقته كانت تلقائية جدا بس لما فكرت في كلامه عرفت أن في ناس كتير- الحمد لله مش كتير قوي- متعرفش حاجة عن النوبيين وأصولهم بالرغم من أن التاريخ المصري القديم يبرز مكانة الحضارة النوبية وأثرها علي الحضارة الفرعونية بالأخص عشان كده أحنا عملنا موقع علي النت موقع صوت النوبة

الدعوة عامة لجميع أعضاء المحاورات و برضه مستنين آرائكم

تم تعديل 24 يونيو 2006 بواسطة Diab

[hopsan]

شكرا عزيزى دياب النوبى ..المصرى

فأنتم جزء عزيز على مصر و المصرين و انتم فى القلب ولا تقلون درجه او معزه عن باقى المدن و إن كانت يد الإهمال الغير مقصوده تمتد لمنطقتكم الغاليه فلاشك من انكم قوم مسالم محبوب امين كريم مبتسم على الدوام و فيكم الروح و الشكل المصرى الأصيل و انتم بوابتنا فى مصر العاليا مثلما نحن بوبتكم فى الشمال ..فلا غيرتكم الظروف ولا اهمال حكومتنا و تنظرون لنا على اننا اهملناكم ...لا يا سيدى فنحن مهملون ايضا

بس ليه مبتخلوش البنت النوبيه تتزوج من مصرى غير نوبى ...السنا مصريون برضه ...مش عايز اقول اولاد عم ...لأن مافيش صله نسب بينا و بينكم ..اللهم احنا عايشين على ارض واحده و بلد واحده

و اللى تتزوج من حد غير نوبى ...يبقى الدم ولا غير الدم و اللى متساهل منكم يتبرأ منها

مع التحيه

[Diab]

أولا بالنسبة لموضوع وجود صلة دم فهي

النوبيون ينتمون إلي كوش بن حام و هو أخو مصراييم بن حام جد المصريين و الذي أشتق منه أسم مــــصــــر

و كوش يعتبر أبو ( نوبا) وهو أبو النوبيون الأعلي الذين هاجروا إلي إفريقيا بعد طوفان نوحو إستقرت في أجزاء منها ولذلك سميت بإسمهم

ولمزيد من المعلومات ستجدها في منتدي التراث النوبي بالموقع

أما بقي ليه ما بنجوز بناتنا ليكوا :) ف ده أنا كنت بأستغرب عليه زمان و أنا صغير

إنما دلوقت أنا حأعمل كده عشان أحافظ علي تراث أجدادي و أورثها لأولادي من بعدي إن شاء الله

[واحد تاني]

بتقولوا

نرموها للتمساح ...

ولا نجوزهاشي لفلاح...

مش كده؟ :)

[القرموطى]

على فكره يا عم انتوا الخسرانين انتوا لو فتحتوا موضوع الجوا من خارج النوبه يا عم هتلاقوا نوبى شعره اصفر ونوبى عينيه خضره وهتلاقوا نيو لوك زى العسل يا عم يالا شد حيلك وعوزين عنمل دعوه لاختلاط الدماء المصريه بالنوبيه وبعد عشر سنين هتعرف انكم كسبتم وهتدعيلى ....

[hopsan]

دياب قال

أما بقي ليه ما بنجوز بناتنا ليكوا ف ده أنا كنت بأستغرب عليه زمان و أنا صغير

إنما دلوقت أنا حأعمل كده عشان أحافظ علي تراث أجدادي و أورثها لأولادي من بعدي إن شاء الله

ايه ...؟؟؟ تراث ؟؟

معلهش يا عم دياب و خودنى على قد عقلى احسن سمعى تقيل حبيتن

تراث ايه بقى اللى انتم عاوزين تحافظو عليه؟؟؟

دنا كنت فاكر حترد عليا و تبرد قلبى و تقولى معلهش يا هوبسان عادات و تقاليد و دقه قديمه و انت رافض الكلام ده بعد ما اتنورت و اتعلمت و شفت الدنيا ..( اتابى ) على رأى المصاروه انت كمان حتعمل كده ..

تعالى بقى وحده وحده و نتكلم ..اصلى اسكندرانى دوغرى و اللى على لسانى كان موجود فى قلبى ..تقولش نيتنا صافيه زى بحرنا ؟؟ ..انا عارف الحاجه كيلو حتقول ايه ...بس احنا حلوين برضه

شوف يا عم دياب ..يعنى لو اتجوزت نوبيه بواحد من اخوانها المصرين ضاع تراث الأجداد..؟؟؟

يعنى لو اتجوزت مصريه قبطيه بمسلم مصرى ضاع التراث القبطى فى مصر ؟؟

هو التراث ديما بيكون فى ايد الحريم؟؟؟

و التراث النوبى حيضيع لو دخل بينكم دم غريب ؟؟؟

ده انت بالطريقه دى عامل جمهوريه داخل جمهوريه

و تقوللى مصرين !!!!

و بعدين عايز اقول حاجه انتم متماسكين و مع بعض و ده شىء حلو و جميل ..بس لما بشوفكم بلاقيكم كلكم نوبين و بتمشو جماعات و مافيش حد غير نوبى معاكم و كأنكم فى بلد غير بلدكم و نادر اشوف نوبى لوحده لازم يكون معاه خمسه سته ..بتدونى إحساس انكم مش معانا و انكم لوحدكم ..يعنى مافيش تجانس او اختلاط .....ليه كده؟ دحنا يا راجل بلد واحد

و بعدين خللى كلامنا هنا فى المحاورات دى وعرفنا اكتر ..يمكن انا مقدرش ادخل المنتدى بتاعكم ده و انتم معتبرنى غريب و مقدرش اقول اللى فى نفسى لحسن تكلونى و انا لسه يادوب حبتدى انبسط من وجودى فى مصر

انا عارف ان قلبك ابيض من اسنانك و انت عارفنا بقى احنا المصرين بتوع قفشات .يجى واحد تانى ..( ده غير واحد تانى بتاعنا اللى نعرفه ) يقول ايه

فيها ايه مالبنات ماليه البلد سيبو النوبيات فحالهم..فأرد عليه و اقوله ايوه احنا كده نيجى على النوبيه و نتصدر عندك مانع ؟

تحيا جمهوريه النوبا ال ( انتم عايزينها ديموقراطيه ولا شعبيه )

تم تعديل 24 يونيو 2006 بواسطة hopsan

[Diab]

أنت عمال تهزرو و أنا سايبك براحتك خاااااااااااالص :) - سيبوني أنا مش حأضربه أنا حأفهمه غلطه بس ههاهاهاهاهاهااها - وش واحد بيضحك علي طريقة س س

أولا بالنسبة لموضوع التراث ف ده مش ذنب النوبييين أن الدولة بتحاول تحصر تراث النوبيين في مجرد فرقة الرقص و بس عشان السياحة و تراث النوبيين عريض و قديم و عميق بجد

للأسف الإهتمام بالنوبيين في مصر صفر بالرغم من أن الغرب بيتابع أخبارهم بل بيتتبعها وهم عارفيين عننا أكتر منكم

سؤال تعرف

عـــــلي كوبان أو حمزة علاء الدين و غيرهم وغيرهم

دول أساسا مطربين نوبيين كانت لهم شهرة طاغية في الغرب وخصوصا ألمانيا و فرنسا كنا بنعرف أخبار حفلاتهم من الجرايد الأوروبية للأسف

هذ الخبر من موقع bbc

موقع بي بي سي

الخبر بيقول

رحيل موسيقار

عودة إلى صحيفة الجارديان التي نشرت تحقيقا عن حياة الموسيقي المصري حمزة علاء الدين الذي وافته المنية في الثالث والعشرين من هذا الشهر.

ويتحدث التحقيق عن مسيرة الفنان منذ ولادته عام 1929 مرورا بانتقاله إلى العيش في إيطاليا في الستينات وبعدها إلى طوكيو في اليابان عام 1981 وتنقلاته اللاحقة في كثير من البلدان.

كما تحدث المقال عن إسهامات المؤلف والموسيقي العالمي المعروف وخصوصا ألبومه عن موسيقا منطقة النوبة وأشكال الموسيقا الفولكلورية التي اهتم بها، بالإضافة إلى إبداعاته الفنية الأخرى

أفتكر كل الناس عارفة أيه هيه صحيفة الجارديان البريطانية

في مصر بقي مين نشر الخبر مفيش غير جريدة الأهرام المسائي و جريدة الدستور اللي الخبر فيها كان عبارة عن رسالة عتاب للتجاهل المصري للفنان جمزة علاء الدين

ــــــــــــــــــــــــــــــــــــــــــــــــ

يعد "حمزة علاء الدين" (1929-2006) أبو الموسيقى النوبية التي كانت قد بدأت في الاندثار والشتات بعد بناء سد أسوان في مطلع القرن العشرين. ولد في النوبة عام 1929 في قرية "توشكى"، وكان من المهجرين الأوائل مع أهله بعد بناء السد. في القاهرة درس الهندسة في جامعة الملك فؤاد (جامعة القاهرة)، وكان يهوى العزف على آلة الطار الإيقاعية والغناء. درس الموشحات في معهد خاص للموسيقى يدعى معهد إبراهيم شفيق، وبعد فترة من عمله بالهندسة، درس آلة العود والموسيقى العربية في معهد الملك فؤاد للموسيقى الشرقية (معهد الموسيقى العربية حالياً).

في إيطاليا، وتحديداً في أكاديمية "سانتا سيسيليا" في روما، حقق حمزة الدين ما كان سيد درويش يطمح في تحقيقه ذات يوم، إذ حصل على منحة لدراسة الموسيقى الغربية الكلاسيكية والجيتار. عاد بعد هذه البعثة إلى مصر باحثاً عن جذوره، فكانت جولته فيما تبقى من القرى النوبية على ظهر حمار، ليجمع الأغاني النوبية من على لسان الجدات والأعمام والخالات، فكان دون أن يقصد باحثاً موسيقياً وصاحب مبادرة سيحفظها له التاريخ.

عام 1964 صعد حمزة الدين على مسرح بالولايات المتحدة الأمريكية ليقدم عرضاً أمام عشرات الآلاف من الجماهير في مهرجان نيوبورت للموسيقى التراثية، وحقق نجاحاً كبيراً كان كفيلاً بتغيير مجرى حياته؛ إذ هاجر بعدها إلى الولايات المتحدة وعمل كعازف ومؤلف موسيقي وأستاذ للموسيقى العرقية (ethnomusicology) في عدة جامعات أمريكية. استخدمت موسيقاه كموسيقى تصويرية لبعض الأفلام السينمائية، كما قدمتها فرق باليه شهيرة مثل فرقة باليه أوبرا باريس، وفرقة باليه سان فرانسيسكو.

في الثمانينيات استقر حمزة علاء الدين باليابان، حيث حصل على منحة دراسية لدراسة أوجه الشبه بين آلة العود الشرقية وآلة "بيوا" اليابانية التي تشبه العود ويقال أن أصولها تعود إليه. ثم عاد حمزة مجدداً ليستقر في سان فرانسيسكو بالولايات المتحدة الأمريكية يعزف ويؤلف ويُدرّس، محتفظاً بجدول مشغول من الحفلات حول العالم، وضيفاً دائماً على مجموعة من أهم المهرجانات الموسيقية في العالم، حتى وافته المنية في أحد المستشفيات الأمريكية في شهر مايو الماضي، وسط حفاوة إعلامية غربية، وتجاهل إعلامي مصري لم يعد غريباً، حتى أن جريدة الأهرام المسائي التي طيرت خبر وفاته عبر وكالات الأنباء - ضمن مصادر قليلة اهتمت بالخبر- وصفته بأنه عازف ناي مهم!!

حمزة الدين سجل عبر حياته الفنية حوالي 20 اسطوانة، كلها سجلت وتباع خارج مصر للأسف الشديد، من أهمها (اسكالاي) وتعني الساقية، و(كسوف)، وآخر ألبوماته (أمنية) عام 1999. ويتميز حمزة الدين بأنه صاحب مدرسة خاصة في الموسيقى تجمع ما بين التراث النوبي والموسيقى العربية، خاصة وأنه وظف العود بشكل مختلف، كآلة شرقية لم تكن تستخدم في الموسيقى النوبية من قبل، فجمعت أغانيه مزيجاً من الأغاني النوبية التقليدية والموشحات والأغاني العربية، ميزها صوته العذب الشجي، وأسلوب عزفه الخاص جداً في العزف على العود.

بوفاة حمزة الدين، ومن قبله "علي كوبان" و"أحمد منيب" وغيرهم، فقدت الموسيقى النوبية المعاصرة – إن جاز التعبير – روادها وباعثيها، في ظل غياب مشروع قومي لتسجيل وحفظ التراث الموسيقي المصري في مجمله وليس النوبي فحسب، خاصة وأن التراث النوبي تحديداً يواجه خطراً أكبر، حيث انخرط النوبيون في المجتمع المصري من الشمال للجنوب، وبدأت اللغة والفنون والثقافة عموماً في الاندثار مع الزمن، ليظل تراثنا وكنوزنا الثقافية معلقة بحياة أفراد يعيشون ويموتون في هدوء، ودون حتى أن نودعهم، وهذا حديث ذو شجون

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ثانيا بلاش نبرة الشعوبية بأن النوبيين مبيدخلوش أي حد وسطهم أحنا بنحب بلدنا

بس بصراحة أحنا شوفنا كتير علي إيديها :wub: بس برضه بنحبها

تم تعديل 24 يونيو 2006 بواسطة Diab

[عصفور طاير]

بصراحة يا عم دياب إنت اللي في كلامك نبرة مش مريحة، على سبيل المثال، الجملة دي:

للأسف الإهتمام بالنوبيين في مصر صفر بالرغم من أن الغرب بيتابع أخبارهم بل بيتتبعها وهم عارفيين عننا أكتر منكم

وأنا أسألك هنا، هل النوبيين جالية أجنبية في مصر، واللا مصريين من أحد أقاليم مصر، زي أهل مطروح وسينا والمنوفية والشرقية؟

وبعدين إيه موضوع (عننا)، و(منكم) ده؟ إنتو مين واحنا مين؟

وبعدين موضوع الجواز ده، فكل القبائل والعائلات المنغلقة بتعمل كده، من أول النوبة لغاية بحيرة المنزلة.

ياريت توحد الله يا عم دياب، وبلاش أسلوب انتم واحنا عشان ده مش حلو وبيوحي بالتمييز.. وبالنسبة للتراث فكل المصريين بيحبوا التراث الشعبي لكل أقاليم مصر، صعيدي وفلاحي وبدوي ونوبي.. ولو أغاني أحمد منيب انحصرت في النوبة بس، ماكانش محمد منير بقى أشهر مطرب في مصر، وأكثر المطربين توزيعا إلى الآن.

بلاش فكرة الجهوية والقبلية، عشان دي فكرة ليها وصف مش جيد.. وبعدين بيني وبينك من كتر الواحد ما شاف ناس بيحاولوا يزرعوا فتن انفصالية وشقاقية في مصر، بقى الواحد حريص جدا في تمرير أي كلام ممكن يبقى له ظلال غير بريئة.

مع خالص المودة

[Diab]

يا عم عصفور يا طاير والله ما في دماغي أي حاجة من اللي بالك دي خالص

بس الواحد صعبان عليه نفسه

[عصفور طاير]

يا باشمهندس دياب ماحنا كلنا في الهوا سوا.. يعني انت شايف المشكلة في أهل النوبة بس؟ واللا انت بس اللي صعبان عليك نفسك؟ المشكلة طايله أهل مصر كلهم.. وكل المصريين صعبان عليهم نفسهم.. الجميع في نفس المركب.. ونفس الأزمة.. بس ما ينفعش كل واحد يتكلم عن نفسه بس.. مصر والمصريين كلهم في أزمة، والله أعلم هتنتهي إمتى، أو هاتنتهي واللا لأ أصلا؟

لكن المهم إن إنت منور سيبك إنت.. تآمن بالله أنا باعشق النوبة وأهل النوبة وتراث النوبة وفن النوبة.. وحتى أغنية وسماح النوبة :wub:

إنتو أطيب وألذ وأرق ناس عاشرتهم في أقاليم مصر كلها.

مع خالص مودتي

[محمود الشاعر]

منذ ايام الملك والاحتلال البريطاني عمل الاثنين معا على فصل الدلتا والمصريين عموما عن بلاد النوبة وعن بلاد السودان ونظرا لبعد المسافة فكان هناك جهل واضح لدى الطرفيين بعادات وتقاليد بعضهم بعض وكان ان استغل الملك و الانجليز هذا الوضع وكونوا فرق الهجانة والتي كانت معروفة بالقسوة او هكذا روجوا لها واصبح هناك خوف متبادل بين اهل النوبة واهل مصر وكأنهم ليسوا من اهل مصر ثم جأء جمال عبد الناصر واكمل القطيعة مع السودان والتي انفصلت عن مصر بعدما كنا بلد واحد طوال اللاف السنين وتم عزل النوبيين وتهميش دورهم السياسي اما عن قصد او عن جهل واصبح النوبين شعب غريب فى بلده كما اصبح المصريين شعب غريب فى بلده ايضا

كلنا فى الهم مصريين

[nancy]

دياب اهلا بيك

انا اخويا اسكندرانى ومتجوز نوبية يعنى بنا نسب اهه

بس هما كندين الاتنين

عموما اشكرك على موقع التراث النوبى احب اقراءه بتانى

ثانيا مش النوبة بس الى مهملة فى مصر الصعيد كلة عاوز ناظرة تانية وناهضة تانية

انا فى راى ان كانت مصر شجرة اكيد جدرها النوبة

وبعدين مفيهاش حاجة يا جماعة ان النوبين يتجوزا من بعض

بس معلش لازم يكون فية استثناءات برضة

يعنى متحبكهاش اى يا دياب

بس انا اعرف ان قلبكم طيب اوى

واكيد مدام انت نوبى تبقى اسمر ابشرة ابيض القلب:P

[Diab]

يا جماعة بعد الكلام الجميل اللي انتو قلتوه انا معنديش كلام أقولوه

يا رب يبعد عن بلدنا شر الفتن

آمــــــــــــــــــــــــــــــــــــــــــين

[Hamdi Soliman]

النوبه والنوبيين لهم خصوصيه وتميز ثقافى وحضارى, فلماذا نحاول خلط الاوراق؟!!

ان طالب الغرب بالعولمه يعترض المصريون, ويدعوا الخصوصيه!

وان تحدثنا نحن عن الخصوصيه, قالو انفصال ومؤامره!!!

غريبه!

[طارق منير]

بداية ارحب بكل الاخوة الموجودين ودى اول مشاركة لى فى هذا الموقع المتميز

اتمنى ان نتوصل الى صيغ مشتركة وجميلة بيننا جميعا كى نستفاد ونفيد فى هذا

المنتدى الرائع اخوكم طارق منير - مبرمج اتصالات بدولة الكويت

نوبى مصرى 0

[Diab]

طيـــــــب مــــــمـــــــــــــــــــــــــــــــــــــــــكن نستغل ضعف الثقافة دي

ونسأل سؤال حلو

كيف دخل الأسلام بلاد النوبة و متي ؟ :D

تم تعديل 26 يونيو 2006 بواسطة Diab

[Hamdi Soliman]

كيف دخل الأسلام بلاد النوبة و متي ؟

كيف تم فتح بلاد النوبة ودخولها الإسلام؟

تم فتح مصر عام 640م بقيادة عمرو بن العاص بأربعة آلاف جندي في ظرف خمسة أشهر فقط في حين أنه حاول فتح بلاد النوبة لمدة عشر سنوات من عام «640 650م» فلم يستطع لشهرة النوبيين برماة الحدق أي رمي السهام من الأقواس من أعلى الجبال والنيشان في حدقة العين ومثبت تاريخياً أن هناك حوالي «150» قائد عربي فقدوا عيونهم في هذه المعارك أما الذي سهل فتح مصر كان وقوف المصريين إلى جانب القائد عمرو بن العاص لكرههم حكم الرومان الذين كانوا يعذبونهم عكس بلاد النوبة التي كانت تشهد استقراراً في حكمها.بدأ العنصر العربي الوافد في بلاد النوبة منذ القرن الثالث الهجري فقد أثبتت الأبحاث الأثرية في منطقة مريس أن جاليات عربية قد استقرت فيها ووضح اثرها في القرن الثالث الهجري وقد عثر في بعض الاماكن بأرض مريس على كثير من الكتابات العربية يرجع تاريخ أقدمها إلى هذا العصر كما عثر على شواهد قبور تحمل أسماء عربية بتاريخ 217 هجرية 813 ميلادية والأبحاث التي قام بها دي فيار في جهة مريس تؤيد هذا القول. ومن المرجح ان العنصر العربي توافد إلى المنطقة النوبية عن طريق ممارسة التجار العرب نشاطاً تجارياً في المنطقة حيث كانوا يجلبون من بلاد النوبة الذهب والزمرد وبعض المعادن الثمينة من وادي العلاقي بالصحراء الشرقية وبلاد البجا والعاج من غرب السودان وجنوبه الغربي ومن اثيوبيا وتنزانيا والتمر هندي واللبان والصمغ العربي من كردفان وريش النعام والابل من البجا وأعواد البخور وبعض البهارات من الصومال والمسك من النوبة.

* كيف استوعب النوبيون اللغة العربية مع وجود لغتهم النوبية؟

إن اللغة العربية تأخرت في انتشارها وحتى في مصر انتشر الدين الاسلامي واللغة العربية بعد 500 سنة حيث كانت اللغة السائدة هي اللغة القبطية واستعان عمرو بن العاص بمترجم عند دخوله مصر ولنشر الدين واللغة قام الوليد بن عبدالملك بفرض بعض الشروط منها الذي يريد الاحتفاظ بارضه عليه ان يسلم والذي يريد رخصة معينة عليه تعلم اللغة العربية واما في النوبة فان اللغة العربية وتعاليم الدين الاسلامي كانت تتم عن طريق التجار العرب ولكن الانتشار الحقيقي للاسلام فكان في عهد الفاطمية فعندما فتح المعز لدين الله الفاطمي مصر اتجه الى النوبة واختار احد الكنوز كداعية اسلامي هو عبدالله بن احمد بن سليم الاسواني الذي وجد الجميع مسيحيين وقابل ملك علوة فوجد فيها عددا من المسلمين فنشر بها بعض الدعاة وجدد معاهدة البقط والعصر الفاطمي شهد قيام امارة عربية نوبية اتخذت مدينة اسوان مركزا لها وامتد نفوذها جنوبا في ارض مريس هذه الامارة اسسها عرب ربيعة بزعامة ابي مروان بشر بن اسحق وقد خلفه على زعامة القبيلة ابن عمه ربيعة من النوبيين وقد تزوجوا من بنات رؤسائهم والراجح ان هذه العشيرة كونت طبقة حاكمة خضع لها النوبيون من اهل مريس الذين زال عنهم السلطان الفعلي لملك النوبة المسيحي ولاسيما بعد ان تحول معظمهم الى الاسلام.

المماليك وتجديد معاهدة البقط

تم تعديل 26 يونيو 2006 بواسطة Hamdi Soliman

[عليـ***ـاء]

اولا انا بشكر دياب صاحب الموضوع علي الموضوع الجميل ده اللي اضاف لمعلوماتي الكثير والجديد

ثانيا ..... انا عايزة اققولك حاجتين .......

1- مسألة التفرقة او التمييز اللي استشفتها من كلامك دي مش موجودة بينا احنا المصريين لاننا كلنا مواطنيين في بلد واحدة علي ارض واحدة ....... التمييز اللي بتتكلم عنه ده نابع من احساسكم انتم النوبينن ورغبتكم في الانغلاق علي نفسكم والدليل انك بتقول انكم بترفضو زواج بناتكم عشان تحافظو علي التراث ........ انا فاكرة موقف كان للاسف من دكتورة عندنا في الكلية سألة طالب نوبي بتقوله انت مبتحسش بالحرج عشان انت نوبي واسمر وكده قالها كنت الاول ساعات بحس بكده بس زمايلي بيعاملوني عادي وكدهومفيش فرق ...... بصراحة كل الطلبة استهجنو ونقدو الدكتورة علي موقفها ده ............

2- قصور الثقافة النوبية اللي عندنا للاسف .....نابع من تقصير الاعلام ولبعد المسافة يعني مش كل يوم واحد يقدر يروح للنوبة في الاجازة او يحب يرفه هناك وكده

وافتكر دايما ان النوبة مش منطقة مستقلة عن البلد او النوبيين لاجئين او اقلية في البلد

وشكرا لرحب الصدرك في الحوار

[Hamdi Soliman]

التنوع الثقافى لاى بلد كان, لهو الغنى الثقافى نظرا لتنوع الراوفد الثقافيه, وان كان النوبيون احد مصادر الثقافه المصريه , فلهذا تميز مصرى ثقافى

اما ان يقوم المصريون بمحاولة طمس الثقافه النوبيه, والتعتيم الثقافى وعدم وضع الثقافه النوبيه تحت مجهر وعيون واضواء الاعلام, لهو عار على من يدعى الثقافه وحضارة(مش عارف كام الف سنه)!!!!

عدم تزويج او خروج الفتاه النوبيه للزواج من غير نوبى, لهو احد حصون الدفاع عن الهويه النوبيه من التذويب, واوجه سؤالا الان لمن يعارض هذا:

هل توافق زواج اختك المصريه من مسلم هندى؟ او مسلم من الصومال؟

* اما من (يستظرف) ويدعى اننا نخسر لاننا لا نزوج بناتنا, حيث يبشرنا بالاطفال اصحاب العيون الخضراء والشعر الاشقر!!! اقوله له,,, من اين اتيت بهذا التى تعتقد انه مميزات بالنسبه لك؟ المعروف ان مصر افريقيه الملمح حتى لو كان اللون ليس غامقا بشده!!! وهل هى عقدة الخواجه؟!!! نحن لم نخسر ولن نخسر فنحن اصلاء ونعتز باللون الاسود لوننا الذى نشكر الله عليه, ان العقده المصريه فى شراء والتكالب والاندفاع لشراء كريمات مفتحات البشره لهى عقده , انتم اصحابها وليس نحن, ويكفى ان تعيش فى اوربا لتعرف كم نحن محبوبون نظرا لجمال لون بشرتنا والاكثر لجمال الخلق والخلقه تأتى بعدها.

اما عن اجابة طالب الجامعه النوبى على السؤال السذج من استاذه, فهذا يدل على تخلف الاعتقاد باننا نخجل من بشرتنا, وليتنى كنت هذا الطالب النوبى لكنت اسمعت هذا الجاهل السائل ما لذ وطاب.

السؤال الذى اطرحه الان, لماذا تصرون على اعتبار ان النوبيين لديهم نزعات للانفصال؟

هل لاننا نختلف عنكم؟ هل لاننا اقليه مضطهده فعلينا ان نصمت ونعيش تحت الظلم الذى انتم تعيشون فيه ثم علينا ان نشكرا الله عملا بمقولة المساواه فى الظلم عدل؟

هل توجد محاربه وتجاهل للتاريخ النوبى ام لا؟

شكرا

تم تعديل 29 يونيو 2006 بواسطة Hamdi Soliman

[hopsan]

وحده وحده علينا يا عم حمدى ..ياواش ياواش

براحه كده و امسك نفسك

انت ليه مصر على نغمه الإنعزاليه و نظام احنا و انتم ..يعنى كده انا عرفت انت بتفكر ازاى لما بقيت عصبى

الواضح انه مقدر لكم التقوقع و الإنعزاليه و باين من كلامك انه جزء من التراث النوبى و احنا اللى فاكرين غلط ...ان الحكومات المتعاقبه هى اللى اهملت الجزء الجنوبى من مصر ( اتابى ) على رأى المصاروه ( كلاكيت 52 مره ) انكم اللى رافضين الذوبان فى المجتمع اسوه ببقيه المجتمعات ...

اما ان يقوم المصريون بمحاولة طمس الثقافه النوبيه, والتعتيم الثقافى وعدم وضع الثقافه النوبيه تحت مجهر وعيون واضواء الاعلام, لهو عار على من يدعى الثقافه وحضارة(مش عارف كام الف سنه)!!!!

كلامك غريب ....من هم المصريون ( مازلت مصر على نحن و انتم ) و لمصلحه من تدعى ان المصريون يحاولون طمس الهويه المصريه ( وثقافه وحضاره النوبه التى هى جزء من الثقافه المصريه بمفهومها الأعم و الأشمل ).....اليست مصر هى البوتقه التى تنصهر فيها كل الثقافات لتكون فى النهايه مصر ذات الثقافات المتعدده ..اعتقد هذا ادعاء لا اساس له من الصحه

عدم تزويج او خروج الفتاه النوبيه للزواج من غير نوبى, لهو احد حصن الدفاع عن الهويه النوبيه من التذويب, واوجه سؤالا الان لمن يعارض هذا:

هل توافق زواج اختك المصريه من مسلم هندى؟ او مسلم من الصومال؟

اوافق يا اخى ان ازوج اختى لصومالى مسلم طالما هذا يسعدها و يخلق معها بيت سعيد و هذا افضل عندى من ان يتزوجها ابن عمها و يسىء لها ولا يحسن معملتها و تأتينى مطلقه ..سؤالك ليس فى محله

ان العقده المصريه فى شراء والتكالب والاندفاع لشراء كريمات مفتحات البشره لهى عقده , انتم اصحابها وليس نحن, ويكفى ان تعيش فى اوربا لتعرف كم نحن محبوبون نظرا لجمال لون بشرتنا والاكثر لجمال الخلق والخلقه تأتى بعدها.

كلامك هذا يعد بالنسبه لى خطير جدا ...لسبب انتم و اسف لتلك الرؤيه متقوقعون و فى نفس الوقت تمتد أياديكم خارج الوطن لتصل لأوروبا و تلك الجمله سمعتها اكثر من مره و آخرها مرتان فى هذا المنتدى ...مدى خطوره هذا الكلام انكم لستم افرادا و انما جماعه و بمعنى ادق سننتظر الوقت لتطلبو من الغرب فى مؤازرتكم فى الإنفضال عن الوطن الأم و التفاصيل الدقيقه معروفه لدى الجميع فيما سوف يحدث ..الغرب منتطر منكم فقط الإشاره ...كلامك هذا يعطى هذا الإنطباع و قل ما شئت

السؤال الذى اطرحه الان, لماذا تصرون على اعتبار ان النوبيين لديهم نزعات للانفصال؟

هل لاننا نختلف عنكم؟ هل لاننا اقليه مضطهده فعلينا ان نصمت ونعيش تحت الظلم الذى انتم تعيشون فيه ثم علينا ان نشكرا الله عملا بمقولة المساواه فى الظلم عدل؟

هل توجد محاربه وتجاهل للتاريخ النوبى ام لا؟

شكرا

كل كلامك ما هو إلا دعوه صريحه للإنفصال ...فبمجرد ذكر كلمه نحن و انتم ..ذلك الإنفصال بعينه