نفسك في ايه ...؟؟؟

[واحد تاني]

نفسك في ايه ؟

قول اللى فى نفسك...

ياللا نحلم بصوت عالي...

ونفكر واحنا بنحلم...

[Cleo]

نفسك في ايه ؟

كماننا :)

[محمود الشاعر]

نفسي فى انشاء مجلس حكماء يكون فيه اكثر رجال ونساء البلد حكمة وكل واحد عنده فكرة او اقتراح يروح بيه المجلس وينقشوه والفكرة العبقرية يطبقوها

نفسي ان كل مبدع يلاقى له مكان على ارض الوطن

بحلم يجي اليوم اللي الواحد يصحى الصبح وهو حاسس انه بني ادم مش حمار

[Tafshan]

مش عارف ..

[hopsan]

نفسى يكون معايا 100 مليون جنيه

اتبرع بخمسين مليون لإخواننا الفلسطينين لأنهم يا حرام الفلوس مبتوصلهمش من الناس اللى فوق و سماسره الغذاء و اتبرع بعشرين مليون للغلابه اللى هنا فى مصر و يروحو يصيفو السنه دى بس اى حته تانيه وبلاش اسكندريه

و بالتلاتين مليون الباقيه اتبرع بيها لفقراء افريقا الغلابه اللى مش لاقين ياكلو

مين ده ؟؟؟؟؟ امش اطلع بره ...وكستنا

معلهش يا جماعه اصله مانمش من يومين علشان الراجل اللى باع له الموتورسيكل بيطالبه بالقسط الثانى و مش لاقى ..كأنه ماقلش حاجه...سورى...برضون

[واحد تاني]

نفسي دورة حياة الـ (رمضان) تتم كل 3 شهور بدل 12

[أسد]

قرأت مقال مكتوب في أحد المدونات .. منال وعلاء .. وحبيت أنقلها لكم ..

بس قبل ما أنقلها لكم .. أجاوب على سؤال الموضوع ...

الكلام ده كاتبه واحد إسمه ضاحي ..

ونفسي إللي حصل لضاحي مايحصلش في مصر تاني أبداً .. وطبعاً نفسي ما يحصليش حاجة زي دي أبداً ..

حراااان يا بشر حراااااااااان قومت وقلت الكلمة دي وأنا في المكتب وبدأت احكي فوائد البيت واعددها واقول يعني الواحد بقى لو في البيت مش الشغل دلوقتي كان زماني روحت قالع وقاعد قدام التليفزيون ومعايا قزازة مية ساقعة من التلاجة وقاعد تحت المروحة وما كملتش كلامي إلا ولاقيت اللي بيرد عليا وحتة جبنة وعنقودين عنب هو قال كده وأنا قلت بس هو كده يلا نجيب جبنة وعنب رد واحد زميل ليا يلا بس روح انت وانا ارد لا روح انت من هنا لهنا قلنا نروح احنا الاتنين ده طبقعاً كان في مستغربين ايه المجانين دول اللي عايزين يجيبوا عنب وجبنة الساعة 4 الفجر ربنا يشفي خرجنا وجبنا الجبنة ورايحين نجيب العنب وبنضحك وفجأة عدت قدامنا عربية تويوتا محملة ناس طبعاً بفكاكتي وذكائي عرفت انهم من مغاوير الشرطة الأبطال بصيت لصاحبي وقلت له محمد دي حكومة مالحقش يرد عليا وإلا وهم قدامنا ونطق البطل الهمام اللي في عرش القيادة فين بطاقتك روحت بكل أدب ذي ما اتعودت طلعت الباسبور واللي هو المفروض وثيقة تتقبل في الكون كله واللي يثبت اني أليف ومش مؤذي بص لي وقال هي كلها بقت تشيل جوازات سفر طبعاً مارديتش شغال ايه ياض!!!!!!!!!!! ياض-ابن ........... ده بيشتمني ماشي يا بني أدمين-

قلت له مهندس كمبيوتر بص لي كده بصة مش عجباني وقالي ايه اللي مخرجك دلوقتي وبتعمل ايه طبعا لو حكيت له موضوع العنب والجبنة هيبقى يومي اسود وهيفتكرني بتتريق عليه اختصرت الموضوع وقلت بجيب عشا عشان سهرانين في المكتب وحتى علبة الجبنة أهه لو مش مصدق- مين يصدق يا عبيط يا ابن ........... ده بياخد على الراس التحري 3 جنية يعني مش هيسيبك-المهم قالي اركب مش عارف ليه غالباً عشان انا شكلي شيوعي شوية مربي شعري ودقني ومعلق ميدالية التشي جيفارا روحت راكب وكان كل همي صديقي اللي كان معايا وده عشان هو مش من القاهرة هو من المنيا وبطاقته من المنيا وهيتبهدل وانا لو اتمسكت هروح قسم الدقي وممكن اروح قسم العمرانية -بلدنا- وطبعاً هلاقي فيه حد من آل كشري أو من جيراني الكويسين وهعرف اعيش جوه الحجز أو حتى أقابل علاء وهو بيخرج من القسم وتبقى فرصة سعيدة انا متتاخد تحري وهو سياسة وتبقى فرصة سعيدة واخليه يجرب معايا عيش الإعاشة وطبيخ منال المهم ياحضرات مشيت عربية المغاوير بيننا وطول ماهم ماشيين يلموا عيال في ثانوية عامة شباب شغالة في فنادق وشباب جامعية وشغال صاحبنا يلم اللي نازل يصلي الفجر واللي نازل يضرب له سيجارتين واحد من الشباب قالوا له ياباشا مش هينفع احنا لازم نتصل بصادق فؤاد مين صادق فؤاد ده لحد الوقت ده ما كنتش اعرفه رد الباشا وقال له هو صادق هيمنعنا من اننا نشتغل هنا وحمر عينه ونفخ ودانة وبربر وقال القانون لازم ينفذ بيني وبينكم استرجلت الراجل ده وقولت انه بينفذ شغله وبقيت اقول للناس ده ياجدعان عبد المأمور مالوش ذنب واديه متكدر معانا وكأني شتمته ولا سبيت له الدين اتدير ونعكش شعره وقال هو انت شايفني عسكري مجند متكدر قلت لا ياباشا بس انت حضرتك تعبان معانا وعمال تلف بيننا وربنا يعينك راح باصص لي بصة زكي رستم وقال مالكش دعوة- بقى ابن ................ ده يقولي مالكش دعوة طيب يا بني أدمين ما هو انا برضه فيلسوف ايه جرني من لساني - العيال بتوع الثانوية العامة بيعيطوا عشان امتحاناتهم والشباب اللي واخد على كده مقضيها عادي وماشيين وانا بفكر واستعد وبقول دي تجربة كويسة عشان درب نفسي لو اعتقلت اكون عارف شوية من اي حاجة من اللي هتجرالي وفي أثناء ما انا بفكر والعربية كانت مهدية العيال اللي في العربية صرخوا كلهم صادق فؤاد - هو صادق فؤاد ده مين - وبدأ يشاورا ويندهوا ناحية مجموعة قاعدين بكراسي في نص الشارع بتاع جامعة الدول وبالظبط قدام محل درامر وهنا فهمت الدنيا صادق فؤاد ده واحد مسنود وذي ما بيتقال ليه دلال على الحكومة وهو صاحب أو مستأجر المحل ده قام سوبر صادق واتحرك ناحية البوكس ونده أمين الشرطة اللي طلع امين شرطة مش ظابط- يافضيحتك يا ضاحي ده أمين شرطة اللي مسكك- المهم يا أحمد يا عبد التواب انت رايح فين واتلفت ليه أحمد عبد التواب وقال "عم صادق" !!!!!!!!!!!!!!!!!!!!!!!................. يا .................... مش صادق ده هو اللي كنت بتقول عنه ماحدش بيقف قدام القانون قام صادق ومعاه واحد وسلم على المغاوير واحد واحد ونزلو له وبالأحضان وشغل تختيث ليه صاحبنا بص في العربية عارف بقية العيال قاله أيه يا احمد انت واخد المنطقة كلها -منطقة شغلي مش العمرانية- ياباشا انت مين يخصك فيهم بس وانا انزلهولك قال له صادق ده وده وده نزلوا ده وده وده بس الأمين عامل مقموص عشان في واد منهم برطم فيه وهو - ابن الست المش كويسة- ماحدش فتح بقه معاه غير الولا المجنون - أنا طبعاً- ومن هنا لهنا قال صادق لا ياعم انت سيبك وتعال اسهر معايا وينزلوا كلهم وتعال انت ورجالتك انا سمعت كده وقلبي انطرب الحمد لله ربنا ستر - يروح ......... ابن .......... يقول له خلاص راضي انت سواق العربية وخليه يرجع بيهم بين السرايات وبالفعل صادق فؤاد اللي ما اعرفهوش يراضي السواق اللي ماكانش راضي يتراضى عشان هو قال احنا شباب ذي بعض وربنا ما يرمي حد في ضيقة وبالفعل ناخد بطايقنا ونمشي ضحك هستيري محدش مصدق حاجة من اللي حصلت وصلنال الحكومة وراجعين بالعربية وخد سيجارة وهات سيجارة وانت اسمك ايه وانت مين وفي غمرة فرحنا واحنا راجعين وفي نص الطريق تقابلنا عربية تويوتا تاااااااااااااااااااااااااااااااني............................................. دي حكومة ياض تاني ,,,,,,,,,,,,,,,,,,,,,,,,,,,,,,,,,,وإنهيار تام ماحدش عارف يقول لهم احنا كنا فين ولا جايين منين ولا يقول احنا مين صدمة عجيبة بدأنا نلتقط انفساسنا وبدأنا نفهمهم اللي حصل والناس واحمد بيه نزلنا البيه شعبان اللي هو الجديد هو اللي ذي احمد بيه ما اقتعش فتش العربية ولم البطايق وخدنا في عربيته تاني حكــــــــــــــــــومة تاني ونلف تاني "عزبتهم ولاد ...................... " مش بلدنا بدأنا نحاول نفهمه تاني مش بيفهم منقينه مش عارف منين..... المهم الولا السواق ابن بلد قوي قوي وقال ياباشا ممكن حد يتصل بالباشا احمد عبد التواب واعرف منه قبل ما يرد كنا بنضور على تليفون ولاقينا تليفونات بس كلها مش فيها رصيد.............................. يا ....................................... المهم الولا السواق ابن البلد الأصيل قال انا عارف سنترال وحود بالعربية وبالفعل أخدهم في دوكة ووقف قدام السنترال وجاب تليفون للباشا والباشا اتصل بالباشا اللي كان في المحل بيسكر وسلموا على بعض واحنا قلوبنا بتدق وقلقانين لحد ما سمعنا ماشي ياباشا هينزلوا يالــــــــــــــــــــــــــــــــــــــــــــــــــــــــهوي ايه ده مش مصدق الحمد لله أخدت بطاقتي وهاتك يا جري في وسط الشارع عايز اوصل المكتب واطمن الناس زمانهم خربوا الدنيا عليا..... وجيت المكتب طمنت الناس خلصت الشغل اللي ورايا واديني بكتب لكم واحكي ايه حصل يعني خرجت الحمد لله

المقال منشور في المدونة ولكني حذفت بعض الكلمات التي خرجت عن الحدود من شدة غضب الكاتب .. أو بسبب تلقائيته الشديدة ..

نفسي مصر تبقى أفضل ..

[hopsan]

نفسي دورة حياة الـ (رمضان) تتم كل 3 شهور بدل 12

عندى فكره منخليها كل شهر ..ايه رأيك ؟؟

و اشمعنى 3 شهور؟؟

[واحد تاني]

كل واحد يقدر يظبط المدى بتاع حلمه زي ماهو عايز ...

مش كده والا ايه يا قبطان ؟ :wub:

نفسي اسمع حكايات اكتر ... من جدي (الله يرحمه)

[bentmasria]

:wub: :) ;)

نفسى حماده يكبر ويتعلم كويس ويكون ولد حنين وطيب ومتربى واحسن واحد في الدنيا وربنا يقدرنى اراعيه ويدينى العمر لما اشوفه عريس قولوا آمين

ده منتهى احلامى

موضوع جميل احييك عليه

[سهيلة]

نفسى اصحى من النوم الاقى مصر دولة متحضرة

النظام رقم1 ف كل شىئ والناس تعمل كدة عشان بتحب كدة بتحب النظام موش خايفين من العقاب او غرامة او اى حاجة

النظافة رقم 2 النظافة ف الشوارع والمكاتب والهيءات الحكومية والمستشفيات والنظافة ف القلوب

الحب

الحب بين البشر من غير مصالحى ومصالحك

بحبك ف اللة عشان ربنا امرنى بكدة حتى لو انت موش مسلم واختلفنا ف الدين لكم دينكم ولي دينى واعاملك بالحسنى

الاتقان ف العمل

نفسى كل واحد يتقن عملو بجد من غير رقيب وكفاية رقابة ربنا علينا

احترام الصغير للكبير وعطف الكبير على الصغير

نفسى كل واحد عندو خبرة يعلمها للصغير بحب

يعنى مثلا بدال الناس ما يخرجوا معاشات على سن الستين وهوة ف الوقت دة وصل لقمة الخبرة والفهم لشغلة

لية الحكومة ما تحاولش تعطية دخل بسيط ف مقابل انو يعمل دورات للشاب الصغير اللى داخل مجال الشغل دة

ويبتدى الشاب من حيث انتهى الكهل وبكدة نتقدم ف اى مجال

نفسى ونفسى ونفسى.......

كلها احلام ف زمن ضاعت فية الاحلام

[واحد تاني]

نفسي bentmasria تحقق حلمها ده :wub:

نفسى حماده يكبر ويتعلم كويس ويكون ولد حنين وطيب ومتربى واحسن واحد في الدنيا وربنا يقدرنى اراعيه ويدينى العمر لما اشوفه عريس ...

ونفسي اخرج اصلي الفجر مع جدتي ... وانا عندي خمس سنين

او يمكن نفسي اصحي ابني ينزل يصلي الفجر معايا ... وهو عنده خمس سنين

[nancy]

ماشى ;)

مع ان فى حاجات كتير مضيقانى ومش عاوزة اتكلم فية

بس حاكتب شوية حاجات نفسى فيها

بقالى يومين نفسى اضحك

نفسى اعمل زيارة لقبر الرسول قبل ما سافر بعد اسبوع

نفسى محدش يظلمنى ولا اظلم حد

مقلتلك بلاش انا :P

[hopsan]

كل واحد يقدر يظبط المدى بتاع حلمه زي ماهو عايز ...

مش كده والا ايه يا قبطان ؟

واحد تانى00000 واحد تانى 00000 دى معناها خليك فى حالك؟--- اقصد فى حلمك؟

[بنت شعنونة]

نفسي اصحى من النوم الاقي ناس معينة جالها مرض جلدي ما يتعالجش غير عندي

ويجولي لحد عندي عشان اعالجهم

وما اعرفش اعالجهم كمااااااااااان و يموتوا واخلص منهم :P

قولوا امين ;)

تم تعديل 24 يونيو 2006 بواسطة بنت شعنونة

[hopsan]

نفسي اصحى من النوم الاقي ناس معينة جالها مرض جلدي ما يتعالجش غير عندي

ويجولي لحد عندي عشان اعالجهم

وما اعرفش اعالجهم كمااااااااااان و يموتوا واخلص منهم

قولوا امين

إكزيما , بهاق . صدفيه , ثعلبه حمراء , جرب , جدرى بأنواعه الأربعه , سفلس , جذام . تنيا , هيربس

تحبى ارميهملك على مين؟؟؟

بس و النبى متقوليش حرام و الشغل الحنين ده0000

[بنت شعنونة]

hopsan

لو قلتلك الشخوص مش ها تصدق :P

ناس كانوا قريبين اوي

اتاااااااااااااااااريهم ثعابييييين اوي ;)

ارمي .. ارمي

بس ارمي على اللي في نيتي mfb:

بس مافيش حاجا اقوى من كدا شوية؟ :wub:

[hopsan]

و الله يا بنتى ده كل اللى عندى فيما يخص امراض جلديه

انما عندى بلاوى تانيه يعنى امراض سرطانيه و امراض منيله بهباب بس ليه القسوه دى دحنا عارفين عنك رقيقه و شعنونه و مش بتاعه انتقام 0000000يا مامى 000!! دنا حتى ياللى معروف عنى شرانى و اعز المصايب ابتديت اخاف من انتقامك 0000 يا ستار 00 صحيح انتقامكم يودى فداهيه

اقولك00000 عندى سرطان فى الدم ( لوكيميا ) انما ايه عجب 000 بس شايله للحبايب 00 ميغلاش عليكى و الله000 شوفى ابعتهولك فين و انتى اتصرفى

[بنت شعنونة]

;)

متشكرين يا فندم

نردهالك في الأفرااااااااااااااااااااااااح :P

[واحد تاني]

واحد تانى00000 واحد تانى 00000 دى معناها خليك فى حالك؟--- اقصد فى حلمك؟

يا قبطان...

لا يافندم ... طبعا مقدرش اقول كده...

قصدي اني ممكن اظبط اموري مع رمضان في 3 شهور غيري ممكن شهر او 6... كابيش ؟؟؟ كابيتو ؟؟؟

نرجع للموضوع...

نفسي كل العمارات اللي في شارعنا ... ترجع فيلات تاني

آه صحيح ... وكمان

نفسي كل الناس تعمل بكلام ربنا ده ... { : يا أيها الذين آمنوا لا يسخر قوم من قوم }

وده كمان...{ : ولا تلمزوا أنفسكم ولا تنابزوا بالألقاب } :P