المخروطة ...... و نهاية التاريخ !

[عادل أبوزيد]

صباح الخير يا مدام سلوى ...

الله لا يسيئك ما تفتحيش جروح قد اوشكت ان تندمل ..

بقى انا ما صدقت احاول انسى التجربة وحضرتك بتقولي هات ماكينة تدخل فيها العجين من الناحية دي يطلع لك سوسيس من الناحية الثانية ... وعشان بدل ما ناكل إحنا لوحدنا نقوم نصدر لدول الجوار ..

وبعدين الماكينة دي عندنا من ييجي أكثر من 5 سنوات بس أنا أشتريتها لوالدتي عشان بتعمل حاجة كده في الفلاحين بيسموها مخروطة ... هي زي الشعرية بس اتخن شوية وبيتحط عليها لبن سخن وسكر وبعدين تتاكل .. بس عمري ما أكلتها ...

يا حاجة سلوى إحنا أخرنا محشي ورق العنب وكفى الله المؤمنين القتال أنا ما عنديش إستعداد أروح شهيد التجارب النووية دي ...

أكلة المخروطة هذه أكله أظنها صعيدية الأصل و الذين يستطيعون عملها فى أسرتنا كلها قلة بمعنى قلة .... لأنها تصنع باليد و بالنشابة و الطبلية تعجن العجين و تفرده على الطبلية بالنشابة و بعدين تطبقه ثم بالسكين تخرطه ثم الطهى لا أعرف كيف.

و كان آخر من يمكننى أن أطلب منها ذلك زوجة عمى فوزية التى توفاها الله من شهرين و قبلها كانت زوجة عمى علية (والدة سيدة أبوزيد) و التى توفاها الله من أكثر من سنة.

و فقدت الأمل فى مجرد الكلام على المخروطة

ما سبق كان إستهلالا لابد منه

اليوم عن لى أن أتصفح الموجودين على الموقع و ماذا يتصفحون ووجدت من ضمن هؤلاء عدد يتصفح موضوع اللازانيا و بكل كسل دخلت على الموضوع و أستغرب لتصفح موضوع قديم مثل هذا ووجدت مداخلة الفاضلة سلوى و التى تنصح بشراء ماكينة لصنع المكرونة ............

ثم ... و فجأة وجدت الفاضل سى السيد يتكلم على المخروطة !!!!! "أنا فى حلم و الا علم "

إذن ........ إنها ليست نهاية التاريخ ( مع الإعتذار ل فوكوياما) سيجدد التاريخ مرة أخرى و هناك أمل أن تعود الحياة إلى حلم جميل طبق المخروطة ( بالمناسبة نحن فى الصعيد نستعمل العسل الأسود بدلا من السكر و لذلك فلون المخروطة يميل إلى اللون الصفر الغمق أو العسلى الفاتح)

مناشدة : يناشد آل أبوزيد السيد س س و أهل "ربعه" الكرام سرعة عرض أى تفاصيل عن عمل المخروطة.

نسيت أن أقول أنى لم أطلب المخروطة من سيدة بنت عمى على إعتبار أنها من الجيل الجديد الذين إنتهى التاريخ بالنسبة لهم و لكنى سأحاول و أوجه إليها نفس المناشدة.

ملحوظة خبيثة : "إشمعنى الناس كلها ب تناشد السيد الرئيس ؟ إحنا ما لناش نفس نناشد بعضينا ؟"

[se_ Elsyed]

إحنا لا مؤخذه مش هانعمل زي الناس اللي بتتلقى مُناشدات على أجهزة اللاسلكي وتنام وتسيب الناس تغرق وتقول الصباح رباح

ليك عليه يا آبيه لو الوالدة كانت بصحة جيدة هذه الأجازة أخليها تطلع ماكينة الخياطة .. قصدي الماكينة بتاعت المخروطة ونعملو لك زيارة جامدة .. وأشيل السبت على راسي وأوصلك المخروطة لحد البيت

طب فاكر السبت بتاع العرايس في الصباحية ... هو حقيقة ما كانش سبت واحد وكنه كان موكب من الأسبته .. وبصراحة وأنا صغير كنت بأقر على الناس اللي متجوزين جداد وأقول " أه يا ولاد الذين بقى هاتاكلوا ده كله ؟ " اتاري العريس والعروسة ماكانش بينوبهم من الحب ده كله إلا نقول 25 % .. وباق الحمام والبط والفطير اللي غرقان سمنه لازم أهل العريس يوزعوه على الجيران والحبايب ويتمنظروا عليهم ... أصل أهل العروسة عندنا في الفلاحين هما اللي بيأكلوا ويسمنوا العريس ييجي إسبوع وأكثر .. وأهل العريس هما اللي بيستقبلوا الحاجات دي ويصادروها قبل ما تروح للعريس ..

طب إرجع بالذاكرة لورا كده 90 سنة يا عادل بك ... فاكر أكله - ماعرفش عندكو في الصعيد ولا لأ - كان إسمها " مفروكة " علىوزن مخروطة وشكلهم كه ولاعم .... يــــاه تصدق بالله إن بقى لي ييجي ربع قرن ماكلتش البتاعة دي بس لسه فاكرها ... هي يا سيدي لافاضل عبارة عن خبز مُعين كده بيتعمل بدقيق الذرة ودقيق القمح ولونه يميل إلى البياض ... وبعدين يتقطع كده حتت صغيرة ونسخن اللبن ونحليه بالسكر وبعدين هوببببب نروح دالقينه على العيش ده ... وبتطلع حاجة كده عبقرية ...

----

في حاجة عندكو في دولةالصعيد الجنوبية مجنناني يا عادل بك .. عارف إيه ؟

العيش الشمسي .. أو زي ما الصعايده بينطقوه " العيش السمسي "

شكله غريب جداً ..

ومليان لبابه من جوه .. وغالباً بيكون ناشف وممكن تبطح حد بالرغيف وتعمل له 10 غرز ..

ومش عارف ليه كل ما اشوفه أفتكر أنواع من الخبز مُنتشرة في الدول اللي فيها صقيع وثلج زي روسيا .. فتلاقيهم عايشين على تك الأنواع من الخبز بالإضافة إلى البطاطس .. دي أساسي مهروسة بقى ولا بورية مش هاتفرق ..

يا ترى لسه موجود وأخباره إيه ؟

ولو موجود .... يا ترى لسه الستات بتخبزه برضوا على حرارة الشمس وتلاقيه متنشر فوق السطوح أو في الوسعاية اللي قدام الدار ؟

يــــــــــــــــاه إنت رجعتني بالذاكرة لعصر ما قبل الثورة .. حيث كنا نعيش في رغد من العيش وأمان نفسي وراحة بال

[nancy]

انا مرة رحت الواحات ورحنا قرية ممرتها رملها عالى اوى والابواب قصيرة جدا

وحطين على الاسقف العيش الشمسى بس معرفش طعمة اية هو حلو اصلة فى الهوا والشمس كل حاجة عايشة حياتها علية

انا اخر حجاة كنت باشوف جدتى بتعملها الكسكسى و(القورص )او الاورس معرفش بتتكتب ازاى بس كان جميل اوى

[se_ Elsyed]

انا مرة رحت الواحات ورحنا قرية ممرتها رملها عالى اوى والابواب قصيرة جدا

وحطين على الاسقف العيش الشمسى بس معرفش طعمة اية هو حلو اصلة فى الهوا والشمس كل حاجة عايشة حياتها علية

انا اخر حجاة كنت باشوف جدتى بتعملها الكسكسى و(القورص )او الاورس معرفش بتتكتب ازاى بس كان جميل اوى

و(القورص )او الاورس

مين ده ؟

قصدك القرص جمع قًرصة ؟

عامة أنا سعيد يا بنت الديرة إنك رجعتي معانا 50 سنة لورا .. حاسبي من الحجر اللي ورا العربية وإنتي بتجيب ريوس

[doha]

واوو رجعتوا لي الثقة في نفسي وفي اكلات اسرتنا الشعبية ..

اهل والدي في البلد بيعملوا المخروطه دي باستمرار الى يومنا هذا .. زوجي ميعرفهاش ولا عمره سمع عنها .. اهل والدتي ميعرفوهاش برضه وبيعملوا بدلها حاجه اسمها ( المسروده ) هي نفسها تقريبا المخروطه بس مقطعه قطع اصغر بكتير ..

الي اعرفه في عمايل المخروطه لما كنت بشترك معاهم وانا صغيره في تلك المتعه التي لا تنتهي انهم بيجيبوا عجين ويفردوه رقيق جدا بعدين ( يتنشر ) يعني يترك معرضا للهواء فترة لغايه ماينشف حاجه بسيطه بعدين بمخرطة الملوخيه زمان وبماكينة المكرونه دلوقت بيقطعوه لشرائح رفيعه جدا وطويله .. بعدين يتسوى على البخار ويرش عليها سكر وفي ناس بتاكلها بالشوربه بس انا بحبها اكتر بالسكر ..

باذن الله يااستاذ عادل وطالما اوشكت على الانقراض عندكم لما انزل البلد هطلب منهم المخروطه واصور الطريقة فيديو واجربها وانزل لحضرتك الطريقة المظبوطه بالظبط ..

بس اديني كده سنتين تلاته من دلوقت وربنا يسهل :D

[عشق الكلمات]

انا هموووووووووووووووووت واعرف بتتعمل ازاى

وكل ما اسال حد يدينى طريقة

وجربت كذا مرة وفشلت

ياريت بجد تجيبلنا الطريقة

[rewsha]

الي اعرفه في عمايل المخروطه لما كنت بشترك معاهم وانا صغيره في تلك المتعه التي لا تنتهي انهم بيجيبوا عجين ويفردوه رقيق جدا بعدين ( يتنشر ) يعني يترك معرضا للهواء فترة لغايه ماينشف حاجه بسيطه بعدين بمخرطة الملوخيه زمان وبماكينة المكرونه دلوقت بيقطعوه لشرائح رفيعه جدا وطويله .. بعدين يتسوى على البخار ويرش عليها سكر وفي ناس بتاكلها بالشوربه بس انا بحبها اكتر بالسكر ..

انا بقه بصراحه ..عمري ما شوفت المخروطه دي ولا سمعت عنها .

لكن من وصفك كده ياضحى اقدر اقول ان ماما كانت في الشتا بتعمل لنا حاجه كده مودرن (جديده يعني) متهياْلي انها شبيهه بالمخروطه دي

ومافيهاش غلبه ووجع دماغ

وماكينه عجين وله خياطه (على راْي س س)....الطريقه هي كالاتي:

كيس شعريه ...اي نوع ...(بس يكون جيد مش بيعجن)

المهم

ناخد كيس الشعريه ونحمره في شوية سمن بلدي.....ولما لونه يبقى ذهبي مايل للبني شويه ...(بس مش محروق يعني)

نحط عليه قد كوباية ميه يتسلق فيهم ..بحيث يتشرب الميه زي الرز كده ....يعني الميه اول ما تغلي ويتبداْ الشعريه تتشربها نوطي النار عليها ونقلبها كل شويه ولو احتاجة قد ربع كوبايه ميه تانيه .....مافيش مشاكل

وتبقى شعريه مفلفله كده وبالسمن البلدي

وبعدين بنرش عليها السكر

وبالهنا والشفا ....ولا وجع دماغ وعجين ونشابه وندور على الخبراء علشان نستعين بيهم يعملوا العجين .

مهو الجيش قال ايه؟؟؟؟

قال اتصرف .

وفي الاخر الشعريه برضو عجين ومتقطع لقطع صغيره

ابقى جربيها يا ضحى ...ولو طلعت حلوه ...ليه الحلاوه :D

[ozoozo]

علي فكره في الصعيد اسمها (راشده

كانت تصنعها لي جدتي رحمها الله وانا صغير قبل الذهاب للمدرسه في الصباح الباكر

[ozoozo]

ودي صوره الماكينه اللي كنا بنعمل عليها الراشده

[الغريب]

علي فكره في الصعيد اسمها (راشده

كانت تصنعها لي جدتي رحمها الله وانا صغير قبل الذهاب للمدرسه في الصباح الباكر

لأ يا 'ozoozo' العزيز المخروطة غير الراشده

المخروطة زي ما شوفت أمي وهي بتعملها بتبقى عبارة عن فطير صغير يوضع داخل المكينة ثم يسوى على النار بالبخار ويأكل بعد ذلك بالمش أو العسل أو اللبن بالسمن والسكر

أما الراشدة فعبارة عن فطير مفرود وبه دقيق يتم لفه ثم تقطيعه بالسكين ثم وضعه في الحلة وبها لبن ليتم تسويته مع اللبن وأكله..

ياسلام عليكم الأكلات دي أنا أفتكرت أنها إلى زوال ولكن فعلا بتبقى ممتعة جدا

في أكلة كمان جميلة جدا يعرفوها الصعايدة أسمها "بسيس" ياترى فاكرينها

:blush2:

[fatfouta]

علي فكره في الصعيد اسمها (راشده

كانت تصنعها لي جدتي رحمها الله وانا صغير قبل الذهاب للمدرسه في الصباح الباكر

انا فاكرة ان جدتى كانت بتعملها زمااااااان

بس لو كانت هى اللى انا اقصدها احنا بنسميها الادوسية او القدوسية وبيحطوا عليها عسل أسود ولبن ساعات وبتبقى دسمة جداااا بس لذيذة

لو هى دى انا كمان فاكرة ان مامتى كانت بتعملها يا ازوزو بس كانت بتعملها بالماكينة بتاعة البسكويت اللى هى الحديد القديمة دى

الماكينة اللى انت حاطط صورتها دى حديثة جدااا ماعتقدش ان جدودنا كانوا بيستخدموا دى لان الماكينة دى بيتعمل بيها كمان اللازانيا

[doha]

لاه انتم كده دخلتم في اكلات تانيه خالص .. لا بتتحمر في سمنة ولا بتنطبخ في لبن .. بصوا عشان تعرفوا المخروطه المظبوطه ..

فالماكينة الي حط صورتها ازوزو هي دي بالظبط الي بيعملوا بيها المخروطه دلوقت في البلد عندنا والعجين الظاهر في الصورة هو بالظبط شكل المخروطه قبل ماتتحط في مصفاه على حلة فيها ماء مغلي عشان تتسوى على البخار ..

كده حمستوني اني بجد لازم اوثق الطريقة الرسمية قبل ماتندثر .. باذن الله هحاول اجيبها لكم عشان تستمتعوا معانا باكله تستاهل فعلا التجربة . .

[doha]

جبت لكم الطريقة المظبوطه من كبيرة الطهاة في عائلة والدي بعد تقاعد عمتي طبعا الي كانت هي الشيف الكبير خالص بس بما اني مش هعرف اجيب منها الطريقة دلوقت قلت مش مشكلة مساعد الشيف هيوفي بالغرض خاصه وانا متاكده انها بتعملها كويس اوي ..

بصوا بقى

هتعملوا عجينة من الدقيق وعليه رشة ملح وشويه مية صغيرين .. قالت بان العجينة لازم تبقى ( لابسه ) وهو مصطلح يعني عكس الطرية بمعنى ان المية الي هنحطها على الدقيق يادوب تخليه يمسك في بعضه مش كتير عشان ميعجنش

سألتها يعني نفس عجينة الفطير المشلتت اجابت في تاكيد لااااا الفطير بتكون عجينته طرية لكن دي لابسه جدا والا هتتقطع اثناء الفرد ..

قالت باننا نعجن العجينة الاول بعدين نلتها كويس اوي ( عشان تمط ) بعدين نقطعها قطع صغيره ونتركها ترتاح شويه ..

هناخذها ونفردها بالماكينة لسمك الرقاق ( او سمك عجينة السمبوسه كده ) .. طبعا هي بتبقى دوائر كبيرة بس لو عاملينها بالماكينة هتبقى شرائط عريضه زي شرائح السمبوسه الي بنشتريها جاهزه ..

بعدين هنحطها ( تتنشر ) يعني نفردها على قماشه نظيفة او طاوله تنشف شويه في الجو الطبيعي طبعا مش هنسيبها لما تنشف خالص وانما يادوب حاجه بسيطه ..

هناخذها بعد كده ونقطعها بالماكينة او بالسكينة قطع رفيعه جدا بس طويلة ..

لما نعمل كمية مناسبة هنجيب حلة مخصوص ( حلة الكسكسي ) وهي عباره عن حلة من تحت عاديه وفوقها مصفاه مثبته عليها كويس .. هنملأ الحلة مية ونتركها لما تغلي بعدين نحط المصفاه وفيها المخروطه عليها لما تستوي ..

بس نسيت اسأل على حاجتين مهمين .. بتقعد قد ايه على النار . . وياترى بنحط لها زبده ولا حاجه لما تقرب تستوي زي مابنعمل مع الكسكسي ولا لاه .. على العموم جربوها كده وكده وشوفوا الاحلى هيطلع معاكم ايه . .

[pink rose]

اغيظكم بقىىىىىىىىىىىىىى(وش حد مطلع لسانه)

لسا واكلاها لما كنت في اسكندرية الشهر اللي فات

بنت عمة ماما عملتها وجابتهالي مخصوص

باموت فيها باللبن و السكر

السوى بتاعها نفس طريقة سوى الكسكسي و بيتحط عليها سمنة او زبدة زيه بالظبط

في مصطلح دايما خالتي (مسؤولة الكسكسي عندنا في العيلة ) بتقوله انها بتسيبه على النار لحد ما يبوخ يعني يطلع منه البخار يمكن كمان المخروطة بيسيبوها على النار لحد ما تبوخ

[عشق الكلمات]

doha

انا بعمل زى ما بتقولى بالظببببببببببببببط

وبرضه مش بتتطلع مظبوطة

المية بتنشف وبسيبها ع النار لما تقول يا بس

وفى الاخر تطلع بتشد ونية

مش بتستوى

ياريت تجيبلنا السر الخاص اللى بيخليها تستوى

وكمية المية اد ايه والمفروض كام ساعة وتتقلب ازاى

[رضوي]

ياااااااااااااااااااااااااااااه أنا تعبت أوي لما قريت التوبيك دة

يانهار الواااااااااااااااااان

مين الناس دي !!!! مش فاهمة يعني بس حيست اني فاتني حاجات كتير اوي مالحقتش اعرفها ........ ياخسارة

:D

طيب ياريت بقي حد شجاع كدة ينزلنا صور المخروطة اللي عليها الجدل والخلاف يمكن نتعلم ....... أو أكون عارفاها ومش واخدة بالي

ربنا يخليكي ياضحي

الاكلة الوحيدة اللي فهمتها في الموضوع كله وحسيت اني لسة مافقدتش الوعي

السمبوسة

احمدك يارب

يلا بقي حد يغامر وينزلنا صورها ............ جزاكم الله خيراً عنا

[عادل أبوزيد]

الفاضلة doha أشكرك على إعادة الحياة لهذا الموضوع و لقد أثبتت المشاركات أن التاريخ لم ينتهى .. و لن ينتهى

ما سبق كان إستهلالا لابد منه

من قرائتى هنا تذكرت أكلة أحببتها جدا و لم آكلها فى حياتى إلا مرة واحدة أو مرتين و هى "القدوسية" و كانت تصنع ب "دولاب الشعرية" و هو عبارة عن مكبس يدار باليد ليكبس الجينة عبر وش معدنى به ثقوب تخرج منه الشعرية ... نفس نظرية المفرمة اليدوية.

و رأيت هنا تطويرا كبيرا فى صناعة المخروطة بإستخدام ماكينة المكرونة ..... ألم أقل أن التاريخ يبعث من جديد !

لا أذكر أن المخروطة كانت تطهى على البخار و لكنى سأتأكد من طريقة عملها على الطريقة الصعيدية القديمة.

ملحوظة بالنسبى للكسكسى فهو الوجبة الرئيسية فى المغرب و فى الشمال الإفريقى عامة و لقد دخلت عليه التقنية الحديثة و يمكنك شراء نصف كيلو كسكسى من أى سوبر ماركت كبير و تضعى كوب من المسحوق "تقريبا كسكسى مجفف" و عليها مثلها من الماء الساخن و قطعة صغيرة من الزبد و تقلبى ...تجدين نفسك أمام أشهى طبق كسكسى و ضعى عليه السكر حسب الرغبة ، بالمناسبة إسمه "كسكس" و هناك الكثير من الطرق لطبخه سواء كطبق حلو كما أشرت أو مع اللحم و الفواكه فى كثير من الأطباق المغربية.

[doha]

doha

انا بعمل زى ما بتقولى بالظببببببببببببببط

وبرضه مش بتتطلع مظبوطة

المية بتنشف وبسيبها ع النار لما تقول يا بس

وفى الاخر تطلع بتشد ونية

مش بتستوى

ياريت تجيبلنا السر الخاص اللى بيخليها تستوى

وكمية المية اد ايه والمفروض كام ساعة وتتقلب ازاى

تصدقي اسئلة في الجون

حمستيني بجد اني اعمل المخروطه اليومين دول

باذن الله في اقرب فرصة هتصل بقريبة لي اجيب منها تفاصيل الحاجات دي ..

على فكره ممكن البعض يفتكر الموضوع مش مهم او انها مجرد اكله بس احد اسباب حماسي غير انها اكله لذيذة فعلا وكل الي بيدوقها بيحبها اني اصلا مهتمه اوي بتوثيق التراث المصري وبيصعب علي جدا لما بشوف حاجه منه تندثر او الكبار يحكوا لنا عليها واحنا منعرفهاش ..

احنا طلعنا شفنا اهالينا في البلد بتخبز وتعجن وتعلمنا منهم ولو ظاهريا ازاي بيعملوا الحاجات دي بينما الاجيال الجديده الي معندهاش غير النت مش هتشوف الي شفناه فاقل واجب نعمله لهم اننا نحط لهم الحاجات دي عليها وبالصور والفيديو كمان لو امكن .

[jasmin hamed]

و الله يا اخوانا انا محرجه منكم جدا

عشان انا اول ماشفت الموضوع ده افتكرته عن الملوخيه من مخرطه يعنى

بس هوه انا ليا ملوحظه صغيره على المكنه الى صورها الاستاذ اسوزو و الى هيه بتستعمل فعلا لعمل المكرونه

مره كنت بتفرج على برنامج طبخ و اذ ان المذيعه كانت بتقول ان المعجنات ذى المكرونه اصلها مش ايطاليا ذى ما العالم فاكر لنما اصلها قدماء المصرين و انهم وجدوا معجنات محفوظه

بتسمى فى الصعيد مفتله و لسه الناس بيكلوها فى الصعيد ذى ما كانوا قدماء المصرين بيكلوها و مكونتها هيه هيه مكونات المكرونه بس الشكل بيختلف

مش عارفه اذا كانت المفتله ديه هيه المخروطه و لا ايه لانى لا شوفت ديه و لا ديه رغم انى صعيديه

بس كلمه على جنب للاستاذ سي السيد العيش الشمسى ده احلى عيش ممكن تاكله فى حياتك فيه منه طرى على فكره بس التنشيف ده عشان يعيش لفترات اطول

و بعدين يا سلام لما تقطع الرغيف الشمسى اتنين و تصب فيه الملوخيه ........ الله يرحمك يا عمتى ........ ماتفكرنيش انا كالته فى حياتى مرتين بس بجد تحفه

[kazabaza]

جدتي رحمة الله عليها كانت بتعمل المسروده بنفس الطريقه الي الاخت ضحى قالت عليها و بنفس المكنه الي في الصوره.

الملاحظات الي فاكرها:

لازم الفجوه بين الحله و المصفه تتقفل من الخارج كويس بالعجين داير ما يدور علشان تمنع تسرب البخار.

العجين بيتلف في قماش خفيف زي جزء من ملايه او كده قبل ما نضعه في المصفه و كمان علي ما اتذكر بنغطيه بفوطه وجه من فوق.

عندي لكم خبر كويس يمكن شراء المسروده و الكسكسي من اسواق فتح الله و بتكون في اكياس جاهزه و تتسخن على النار مع السمن و بس علي كده.