عايز تتعلم ربطات مختلفة للكرافته - أدخل ما تتكسفش

[se_ Elsyed]

من مميزات منتدى محاروات المصريين إننا بنؤمن السرية التامة مع مستوى عالي من السكعورتي لمرتادي المنتدى

يعني مثلاً عمري ما أشوف " ياسو " أو " موديست " أو حشيش .. داخلين يتسحبوا بالليل ويفتحوا الموضوع ده ويطبعوه كمان على ورق A4 عشان ليزقوه على دولاب أوضة النوم عشان يتعلموا رابطة الكرافته .. وأجي بعد ده كله وأعملهم سياحة وأقول عليهم ما بيعرفوش يربطو الكرافته .. عمره ما هاتحصل

وكمان إحنا كنا كده لما كنا في نفس سنهم

لذا .. إطمئنوا خالص .. ما فيش فضايح .. واللي عايز يتعلم رابطة الكرافتة .. يتفضل عندنا

1- الشكل الأول

2- الشكل الثاني

3- الشكل الثالث

4- الشكل الرابع

5- الشكل الخامس

إنتظرونا في الموضوع القادم

وده هايكون مفاجأة

وهو بعنوان

" كيف تربط رباط الجزمة ... من غير ما تعمل أزمة "

[nancy]

حلوة يا س س شفلنا ربطات الفولار وحياتك يمكن تلاقيها فى سكتك :D

[محمود الشاعر]

اشكرك بشدة و بعنف علشان انا عندي فعلا مشكلة مع الكرافتة وكل مرة بتطلع بشكل حسب ما اكون صاحي ومجمع او مركز هزاكر كويس بس ليا سؤال بجد انا سمعت ان كل ربطة بتكون لمناسبة معينة يعني الصبح و الليل فرح عزا وكمان حسب نوع الكرافتة

الله يخليك يا س س تقولنا عليهم وربنا يبركلك ويجعله عامر

[وليد صفوت]

فى ربطة عنق انا شوفتها فى سيتى ستارز و كنت هتجنن ازاى بتتعمل .....

مش عارف اوصف بالضبط هى عاملة ازاى ... بس هى كانت مختلفة عن كل الصور دى ....

كانت راس الكرافت طالعة شوية فوق مكانها الطبيعى و مفتوحة لفوق بشكل قريب شوية من الببيون و بعدين اسفل قليلاً زى ما يكون فى جزء من الكرافت ماسك على راسها و بعدين بقية الكرافات نازل على واسع ....

شكلها مببببببببببببببهر ...بس هى تليق اكتر للسهرات عشان شكلها قريب شوية من الببيون .... انا هحاول ادور على اى صور ليها فى النت يمكن الاقى .....

[se_ Elsyed]

بس ليا سؤال بجد انا سمعت ان كل ربطة بتكون لمناسبة معينة يعني الصبح و الليل فرح عزا وكمان حسب نوع الكرافتة

الله يخليك يا س س تقولنا عليهم وربنا يبركلك ويجعله عامر

عزيزي محمود

عدي عليه في الديفيليه وأنا أشرحلك الموضوع بالتفصيل

( هو الراجل ده فاكرني إيه ؟... ده أنا بأقضي بقيت عشايا نوم )

فى ربطة عنق انا شوفتها فى سيتى ستارز و كنت هتجنن ازاى بتتعمل

أولً مش من حق أي مُجند يتكلم على رابطات العُنق .. لإني هاحضرلك كرافته جاهزة من أم أستك زي اللي كان بيلبسها طه حسين في فيلم الأيام وتبقى شكل بتوع الكشافة ...

إضحك على القصة دي يا وليد .. كان لي واحد صديق في الشركة وزمان قوي من 45 سنة لما كُنا عزاب .. كان ييجي يقولي : الله يخليك يا سين سين خد أربط لي الربطة بتاعت عمرو موسى .. ولا أقولك أربطلي الربطة بتاعت الكرافتة اللي بتبقى شبه محشي ورق العنب ...

حلوة يا س س شفلنا ربطات الفولار وحياتك يمكن تلاقيها فى سكتك :wub:

يادي النور يادي النور الباشمهندسة نانسي سايبه الموقع وصبة الخرسانة وجايه مشرفاني في الآتيليه .. حصلت لنا البركة

حضرتك قولتي إيه : ربطة الفول مين ؟ .. الفولار ..

فولار .. وربك الستار

فولار في التنك ولا فلوس في البنك

والله يا فندم أنا أعرف السولار بس .. إنما الفولار ماوردش عليه

طب يمكن ده نوع جديد من السولار بس خالي من الرصاص ؟ يعني سولار 94 مثلاً

[Hammer]

أعتقد أن الفولار ده عامل زي الإيشارب اللي الطيارين في الحرب العالمية التانية كانوا بيلبسوه حوالين رقبتهم في طياراتهم الكابورليه دي .. و لما يطيروا يهفهف مع الهواء الطلق .

صح و لا مش صح ... :wub:

[Modest]

ليه المواضيع اللي بتسبب مشاكل أسرية دي يا سين سين :D

ابني الصغير بيعايرني إني مش باروح شغلي بكرافتات .... بيقول لي أنكل طارق (جارنا) كل يوم يلبس دي و حضلتك لأ :wub:

طيب أنا شغلي ما ينفعش غير بالجينز و ساعات أروح بالشورت لو هاطلع شغل في البحر.

آخر مرة قال لي كده طلَّعت له كرافات من عندي في الدولاب و لبستها على البيجاما علشان ما يفقدش الثقة في أبوه ;)

حلوة يا س س شفلنا ربطات الفولار وحياتك يمكن تلاقيها فى سكتك :wub:

سيب لي انا الطلعة دي يا سين سين و فوّت لي 10 جنية.

[nancy]

مرسى يا مودست انت بس الى فاهمنى

مش س س ال سولار ال

فولار ايشارب بالفرنسى

وبعدين ربطة صبح اية وباليل اية

دة تلاقى س س

لاقى الربطات دى بطلوع الروح نزلهم وقال يكسب ثواب :wub:

[Modest]

أعتقد أن الفولار ده عامل زي الإيشارب اللي الطيارين في الحرب العالمية التانية كانوا بيلبسوه حوالين رقبتهم في طياراتهم الكابورليه دي .. و لما يطيروا يهفهف مع الهواء الطلق .

صح و لا مش صح ... :wub:

صح مسيو هامر

[كمبورا 6]

الله يمسيكو بالخير

يعنى اييييييييييييييييييييييييه كرافته ؟[]

[se_ Elsyed]

شكراً لكل أولادي الصغار المُشاركين في الموضوع

والآن إليكم المفاجآة الكُبرى

فبعد عودتك العالم الروحاني سين سين من رحلة العلاج الطبي بمرتفعات التبت ... وبعد ان كُللت العملية الرجاحة التي أجراها بنجاح وهو الآن على وشك أن يفك السلك ...

فيسعده أن يُقدم لكم موضوع " شخصيتك من ربطة كرافتتك "

يعني إبعت لي وقولي إنت بتربط كرافتتك أنهي رابطة من الخمسة .. وأنا أحلل شخصيتك وأقولك بإختصار إنت مين ....

[عادل أبوزيد]

طالما أنك تبحث هذه الأيام فى موضوع "رباط العنق" فأرجو أن تجيب على سؤالى هذا ... و لا تضحك

كيف أعرف مقاسى فى رباط العنق أو كيف أحدد النقطة من الكرافتة التى أبدأ منها ربط الكرافتة و لا تكون النتيجة إن الكرافتة طويلة أو قصيرة يعنى توصل لمستوى الحزام فقط .

من سنوات طويلة مر علينا بائع كرافتات هندى و كان يحدد هذه النقطة بطريقة سريعة و لكنى لم أنعلمها منه.

أظنك بهذا السؤال ستضيف صفحات و صفحات لرسالة الماجستير التى تكتبها عن "رباط العنق"

[لخبطه]

لأا أنا بجد محتاج شويه بدل ياعمنا سي السيد ومش عارف اجيب منين ولا أيه الموديلات الجديده ألقيش عندك شويه نصايح سواء في مصر أو هنا في السعودية لاني مش لابيس اوي بدل مع اني البدل أو ادوات المحامي بس انا محامي فاشل :)

[nancy]

فية موضوع عن البدل برضة كان كاتبة س س من كام شهر حتلاقى فيها حاجات عن البدل

الموضوع الجاى عند س س اكيد حايبقى عن انواع الشربات والاحذيه

علشان الطقم يكمل :)

[سمـ مصر ــا]

موضوعك ظريف يا س س ونقلتها عندى للإستفادة

بس انت عارف إن فية اتنين وسبعين طريقه لربط الكرفته ولكن الاناقه ان أنت تربط الرابطة الثالثه والسبعين .

بطريقتك انت :)

مودست مادام شغلك لا يتطلب لبس الكرافتات يبقى علشان خاطر ابنك ينبسط ممكن وانت فى البيت تلبسهم

يعنى حلو قوى خليك بالبيجاما والكرافتة بيتهيئلى حتى يبقى تجديد مش كل يوم فى البيت بيجامات :D

[Modest]

مودست مادام شغلك لا يتطلب لبس الكرافتات يبقى علشان خاطر ابنك ينبسط ممكن وانت فى البيت تلبسهم

يعنى حلو قوى خليك بالبيجاما والكرافتة بيتهيئلى حتى يبقى تجديد مش كل يوم فى البيت بيجامات :D

من حوالي شهر سافرت لمدة يوم واحد لحضور اجتماع مهم و كان من الضروري أكون لابس بدلة كاملة و طبعاً كرافات ... قلت بس الولد هايشوفني أخيراً خارج بالبدلة :) و هاننسى اللي فات و نبتدي صفحة جديدة و ينسى معايرته ليّا إني أب بلا كرافات :happy:

لكن علشان مفيش نصيب تتغير هذه النظرة .. ميعاد الطيارة كان الساعة 6 الصبح قبل ما يصحى من النوم و العودة الساعة 12:30 بعد منتصف الليل.. يعني بعد ما نام و شبع نوم :blink:

و هكذا ضاعت فرصة تربوية نادرة ... الأمل دلوقتي في فرصة أخرى علشان ألحق الولد .. يعني لو عندكم أي اجتماعات أو أفراح أو أي مناسبات اعزموني علشان ألبس الكرافات... بس تكون المواعيد مناسبة B)

و إلا هاسمع نصيحتك يا سمـا و أمشّيها كرافتات على البيجامات في البيت :angry: .. المهم عندي ألحق الولد :huh:

[yasovinas]

يا حلاوتك يا جمالك يا س س يا اجدع حرفين متشابهين في العالم يعني لا تقول لي ص ص ولا ض ض ولا حتى وو بصراحه فرحت قلبي واسعدت ايامي رووووح يا شيخ الهي ربنا يوعدك ببياع كرافتات هندي يقول لك على الموضوع اللي قال عليه عمنا عادل وتيجي تشرحه لنا هنا كمان

انا بعرف اربط الكرافتة بطريقتين ودا بعد عشرين سنة تدريب واول مرة لبست الكرافت كان يوم خطوبتي وطبعا واحد ابن حلال هو اللي ربطها قوووم في نص الحفلة زوغت اضرب لي سيجارة حاكم انا ايامها كنت لسه بدخن وبشراهه قوووم ييجي واحد ابن #$$@ يقف معايا ويضرب انفاس وبص لي بصه انا حسيت منها انه فاهم وانه خبير صراحه ايوة اصل انا افهم الخبرا بسرعه من بصيتهم ودا موضوع اقترح انك تنزلة قريب في انواع البصات ،،،، ما علينا قوووم اخونا الخبير دا قال لي الكرافت دي مش مظبوط طبعا انا وبكل بلاهه قلت له اذاي يعني قال لا لا مش ربطة خطوبة ابداً استمرارا في البلاهه وامعانا في الجهل قلت له انا قلت كده برضه بس كنت مستعجل ،،، قووووم صاحبنا الخبير ماسك في زمارة رقبتي انا ربك والحق اتخضيت قلت الراجل من انصار الموده ومن المتشددين وجايز يكون ارهابي من بتوع تفجيرات ايف سان لوران اياهم وهيموتني علشان ربطه كرافت وابقى شهيد الكرافت قوووووم لاقيت الراجل بيفك الكرافات وبيقول لي ما ينفعش لازم تتربط صح انت هتتصور والصور دي اولادك هيشوفوها

طبعا انا سمعت الكلمتين دول وانشكحت وراحت من على وشي علامات البلاهه وحل مكانها علامات العبط الاسري وسرحت في دنيا تانية هخلف بقى وعيالي يبقوا حواليا وبعدين سرحت كمان شويه وانا رايح اخطب للواد الكبير بعد ما اتخرج من الجامعه وبعت بيت سيدي جابر علشان اجيب له الشبكه وبعت العربيه علشان امه تفصل فستان تروح تخطب له بيه وبعت الواد الصغير علشان اجيب علبة شيكولاته من كوفرتينا اموووووه وبعدين افتكرت ان الواد رابط الكرافت غلط فبلديت اعدلها له ومن انفعالي بدات اخنق الواد ابني وهو بيصرخ ويشد في ايدي وفجأة صحيت من الحلم الجميل بهذا الخبير بيقول لي معلش بقى انا اتاخرت والعيال عايزين يروحوا وسابنى والكرافت مفكوك و!!!!!!!!! احكي لكم لما ارجع من مصر بقى

[bakeer22]

فية موضوع عن البدل برضة كان كاتبة س س من كام شهر حتلاقى فيها حاجات عن البدل

الموضوع الجاى عند س س اكيد حايبقى عن انواع الشربات والاحذيه

علشان الطقم يكمل :wub:

سلام على احلى ناس

الموضوع جميل قوى ودمة خفيف جدا

بس الخوف بجد ان الموضوع يتطور اكتر من كدة

[se_ Elsyed]

كيف أعرف مقاسى فى رباط العنق أو كيف أحدد النقطة من الكرافتة التى أبدأ منها ربط الكرافتة و لا تكون النتيجة إن الكرافتة طويلة أو قصيرة يعنى توصل لمستوى الحزام فقط

آفوتر سيرفيس مسيو أبو زيد ( خلي بالك سيرفيس يعني أي خدمة .. مش السيرفيس بتاع أول فيصل )

لا محتاجة ساحر هندي ولا دياولو

بص يا مون سير .. الكرافتة فيها جزء عريض وجزء رفيع

العريض بيبقى في اليمين والرفيع في اليسار

فقبل ما تربط الكرافتة .. بتكون ملفوفه حوالين الرقبة زي الكوفيه كده .. فخلي الجزء الرفيع بدايته عند توكة الحزام ( قولي بقى ولو ماكنتش لابس الحزام ومقضيها أستك منه فيه ؟ ) وبعدين تبدأ العقدة والشنيطة بمحاذاة أعلى القلب كده ... وعيش

-----

لأا أنا بجد محتاج شويه بدل ياعمنا سي السيد ومش عارف اجيب منين ولا أيه الموديلات الجديده ألقيش عندك شويه نصايح سواء في مصر أو هنا في السعودية لاني مش لابيس اوي بدل مع اني البدل أو ادوات المحامي بس انا محامي فاشل

لخبطه

إنت وقعت من السما يا بني .. وأنا سيبتك تقع عشان تقف تاني لوحدك

بص يا لخبطة إنت جيت للإنسان المناسب في الوقت المناسب

ومحلات الأسطى سين سين الترزي ترحب بكل شباب الطلائع

طب تصدق بالله ... إنت أوحيت لي بفكرة بمليون جنية

يعني العبد لله عنده صالونين حلاقة في مصر .. فممكن أجمع كل ده في مكان واحد " بيوتي سنتر رجالي " وله بابين .. يعني الراجل من دول يدخل الباب الخلفي مقشف .. ويطلع من الناحية التانية " تايجر وود " في زمانه .. تيجر وود ده شاب أسمر أمريكي في منتهى الاناقة وهو من أبطال لعبة الجولف ... ما علينا

هات يالا يا فتله المازورة وإرفع مقاسات المتر لخبطة

الشياكة أو اللبس إحساس يا متر لخبطة .. وعلى رأي واحد صاحبنا شغال في مجال الحاسب الآلي هنا .. وعلى فكرة هو سوداني بس دمه زي السكر لما بيقول " الراجل ... جذمه " يعني تعرف الراجل الآنيق من جزمته التي تدل على رجولة طاغية .. وبوزها ونعلها يدل على شهامة متناهية ..

بداية يعني في حاجات لا يختلف عليها الكثيرون ..

مثلاً مثلاً

لو واحد مبتدأ في مجال البدل .. يبقى عليه وعلى الألوان والتصاميم الكلاسيكية الرئيسية

هابدأ بالألوان

المبتدأ لازم ياخد السلم من أوله وما يدخلش على الألوان اللي قد تكون غريبة .. يعني يركز على الإسود والكُحلي والرمادي والرصاصي والبيج .. ودي ألوان لا يختلف عليها الكثيرون زي ما قولنا

بالنسبة للتصميمات .. فعليه بالحاجة السيمبل والشيك في نفس الوقت .. وأنسب شيء له هو البدل أم صف واحد وفتحة أو فتحتين في الخلف .. لإنه لو مبتدأ في كار البدل وبدأ مع أم صفين ( بتاعت العرسان ) فهايبان قوي إنه مُحدث بدل ..

ده بالنسبة للبدل وتصميمها في " سنة أولى بدل "

لبس البدلة لا يُستكمل ويظهر شكله النهائي إلا بالقميص المناسب والكرافتة المناسبة

وإحنا إتفقنا على البساطة .. يبقى القميص اللي هو بيُمثل خلفية اللوحة لازم يكون برضوا من الألوان الأساسية وإوعى تلغوص في اللي ما تعرفوش أو تحود على الألوان الغريبة

كذلك الكرافتات .. لازم تبعد عن الالوان الزاعقة أو الغير مريحة في البداية .. وخليك في الكرافته اللي يقترحها عليك عامل المحل اللي بتشتري منه البدلة على أساس إنه بيبقى خبرة .. وما تعرفوش إنك لسه خًشن أو مبتديء يعني ...

تنجح وتعدي سنة أولى بأي مجموع ... ممكن تدخل على البدل المقلمة والحاجات الشفتيشي ... بس خلي بالك إن ألوان البدل بتبقى فيها شيء مُشترك مع فساتين السوارية الستاتي

بمعنى .. ما أنفعش أبقى محامي ورايح أترافع في قضية وأروح المحكمة ببدلة بنفسجي أو خضرا أو فزدقي .. كده المتهم هاياخد إعدام ومن غير إستئناف وإحتمال يتنفذ فيه الحكم من بره بره في المحكمة نفسها وفي نفس الجلسة .. وده لإن الألوان دي إستفزت القاضي وقرر ينتقم من المحامي في المتهم نفسة

يبقى لازم نتفق إن لكل مناسبة لون بدلة شكل .. والألوان الجريئة اللي زي دي ما بتنفعش إلا لو كنت رايح أسهر في حته شيك أو رايح فرح واحد صاحبي .. وخلي بالك برضوا النوع والديزاين ده بالذات ما أنفعش ألبسه وإمشي في الشارع أو أركب ميكروباص ... وإنت عارف الباقي

بس خلي بالك .. بدل الصيف تنفع صيف وشتا .. لكن بدل الشتا الصوف أو أم وبره واللي لما تشوفها تحس إنك في الأسكيمو .. لو لبستها في الصيف . ااعيال الصغيرة هاتحدفك بالطوب ....

يبقى لما تدخل على المقلم والألوان الغير رئيسية .. لازم تقعد مع نفسك وتشوف إنت محتاج تلبس البدلة دي لأي مناسبة .. ويا ترى اللون من ألوانك المفضلة وهايليق على شخصيتك ولا لأ

لو إنت في الرياض يبقى عليك وعلى عقارية العليا . الدور الثاني .. وعيش

ولنا تكملة ( الحلقة الجاية هانتكلم من تحت لتحت .. عن الأحذية .. مع الأسطى سين الإسكافي .. شعارنا " راحة الجسم . تبدأ من القدمين " )

-----

مدام نانسي

شرفتي الأتيلية يا فندم .. مش عايزة حاجة للباشمهندس ( بًدل .. سويترات .. شيرز ) ؟

------

مادموزيل سما

عندنا في الدور التاني تاييرات حريمي تجنن وأخر صيحة ... وكله مستورد من مقديشيو

----

باشمهندس موديست .... عايزك تسيبلي نفسك لمدة 3 شهور وهاعمل منك ستيفن سبيلبرج تاني .. وهاخلي الولا كريم ما يعرفكش ( شوفت برنامج Swan ؟ يعني مع شوية نفخ وبوتكس وبوتاس على لحسة زهرة زرقا ... هاتبقى إنسان تاني خالص )

----

الخواجه ياسو .. الشهير بزيزو ملك الأناقة ... صيتك مسمع في إسكندرية يا باشا والناس بتلبس من وراك

-----

أ بكير إتنين وعشرين ... منور المحل يا باشا ... نزل بيبسي كان هنا يالا

[نانو]

الموضوع ده بقه انا انشكحت منه جدا :wub:

لاني مره بصيت لجوزي كده ايام الخطوبه بقه و كنا رايحين فرح و قلت له ربطه الكرافته عايزه تتظبط شويه يعني تبقي زي ال7 كده

قالي ليه هو انتي شايفاني رابطها 25

بس و من يوميها و انا شايلاها في قلبي

و جه اليوم الموعود النهارده..... و انا ببحث في الموقع علي غير هدي لقيت الموضوع ده

فقلت بس هيه ديه النهارده جوزي نبطشيه و انا لوحدي في البيت ....و دخلت جبت الكرافتات بتاعته و قعدت ادام النت و بدات اربط زي الصور بالضبط

بس المفاجأه بقه اني حسيت انهم كلهم شبه بعض في الاخر :wub:

عامه هاسيبهم بقه مفاجاه ليه لما يرجع بكره من الشغل .... :wub:

و اشوف ايه رايه؟؟؟؟؟؟؟؟