موال لمصر - يا ريت محدش يقرأه

[ابو خليل]

موال لمصر ….

لا انا شاعر و لا كاتب و لا حتي اديب مغمور

انا ابراهيم

انسان بسيط و جرحي اليم

غمست القلم في بحور الالم

راح الكلام مسطور

لقيته موال …  يتقال

تحبي يا مصر تسمعي الموال ؟؟؟

الأولة : اه .. و الثانية  : اه .. و الثالثة : اه

الأولة  : الاسم بلدي و الفعل إني فيكي غريب

و الثانية : الاسم حبي والفعل انك ما ليكي حبيب

و الثالثة : وجعك في جنبي قتلني ولم لقيت له طبيب

الاولة : جابولي الطبيب المداوي لحد عندي

        و قال ايه بيوجعك .قلت له : بلدي

جس نبضي  و قال لي  : قول  أه

انا قلت : أه يا بلد ..و أه يا بلدي !!

الثانية : نجيب سرور و الديب و مليون اديب مجهول

وصفوكي يا مصر باحط وصف و قول

الا انا مهما جري ما اقدرش اقول فيك شيء

مش لانك عفيفة .. لا لاني خجول !

و الثالثة :

يا مصر ليه بتاكلي أولادك ؟

دا حتي حرام

و ليه خيرك .. من نصيب غيرك

يا ناس دا كلام ؟؟!!

وترجعي تقولي : إبراهيم ابني ؟

ازاي اكون انا ابنك

و طول عمرك عليه بتضني

لا بترحمي و لا تحني

و حضنك شوك بيجرحني

و نصيبي منك بحور ألام

يا مصر ..في دماغي علامة استفهام :

هو أنت صحيح ابنك ؟

من نسلك ؟

من صلبك ؟

و لا اكونش ابن حرام ؟؟!!

----------------

الأولة :

من قديم الازل

والي الأبد لم يزل

جدودي سايبين اثر ..

لحد يوم الدين …

روينا أرضك يا مصر

عرق و دم و أنين  

و يشهد ترابك و نيلك

و الأهرامات شاهدين

و أبو الهول

اللي شاف اهوال

وما نطقشي

لو تسأليه عنا

هيحكي  لك  .. بدمع العين :

من عهد مينا موحد القطرين

كان جد جد جدي

في جيش أحمس جندي

ويوم حطين

كان سيفه مع  سيف صلاح الدين

و كان في السخرة متسخر

في حفر القنال

و كان في خندق واحد مع جمال

في فلسطين

و كان وياه في الثورة

و دافع عن  بورسعيد

ومات شهيد

و في النكسة

فاضت روحه عالضفة

و عادت روحه

و اخد لك تارك

في اكتوبر تلاتة وسبعين

------------------

الثانية :

وقابلني في الطريق مخبر

قال لي: سايب دقنك ليه ؟

قلت له: يا حكومة حالكم حير !

واحد شايل دقنه ..انت زعلان ليه ؟

يا عم  بص في الشارع و فكر

نسوان ماشيين شبه عرايا !

و رجالة شكلهم  زي الولايا !

مين اللي مفروض تقبض عليه ؟!!

يا عم الحكومة ما تقدر !

قال لي : انت بتهزر

هاتوه تحري .

و في القسم لقيت الضابط كان صاحبي

جمعتنا زمان في المدرسة تختة

صحيح كان بليد تحفة

بس بعشرين الف جنية .. رشوة

بقي ضابط !

و حاطط

قدامه كتاب ربنا  مقفول

قال لي : اسمك ايه قول ؟  

قلت له : نسيتني

فال : انت تعرفني ؟

قلت له : يا احمد ..انجدني ؟

قال لي : انت هتشبهني ؟

و دير وشه

و انكر نفسه

و راح محولني

علي التحري !!

-----

الثالثة :

مصر مش بلدنا دي بلد  اللي الحظ ساعده ..

و سعده

و كان لاعيب كورة

او مطرب

او ممثل علي قده

اما الشقيان الغلبان

فمصر مش بلده

دي بلد ابراهيم نافع و صفوت و فيفي عبده

-------  

لا انا شاعر و لا كاتب و لا اديب مغمور

انا ابراهيم

و جرحي اليم

غمست القلم في بحور الالم

راح الكلام مسطور

يا مصر يا جرحي يا فرحي

انا ابنك

من دمك

و باهمس لك :

يا ريت يا مصر تصحي

يا ريت يا مصر  تصحي

يا ريت يا مصر تصحي  

الاولة : اه

و الثانية : اه

و الثالثة : اه

---------

[ragab2]

محاولة

شعرية ممتازة يا أبو خليل

وفاتحة خير

وأهم مايميزها تدفق الإحساس الصادق

آمل الاستمرار

رجب

Edited By ragab2 on Sep. 11 2002 11:43pm

[ســيد مرزوق]

كلامك عجبني أوي يابو خليل

أحاسيسك هي أحاسيس وأحاسيس كل مصري زينا

مش زيهم

كلام من القلب

يدخل القلب

ياريت تستمر وتكتب كتير .... كلامك مس الجروح

[متسائل]

الأولة : اه .. و الثانية  : اه .. و الثالثة : اه

رحم الله نجيب سرور

[ســيد مرزوق]

هشام باشا

وحشتنا ياراجل

بمناسبة المرحوم نجيب سرور

ماتعرفشي سكة أحصل منها على دواوينه خاصة ديوانه الشهير عن مصر .... الديوان المحظور

أنا عندي مسرحياته كلها

بس الشعر لأ

ياريت تساعدني لو تقدر

مع شكري وتحياتي

[متسائل]

موجود عندي يا باشا.. أبعتهولك بالإيميل.. :)

بس يا ريت كمان تبعتلي اللي عندك بالإيميل.

[ابو حلاوه]

هشام باشا

وحشتنا ياراجل

بمناسبة المرحوم نجيب سرور

ماتعرفشي سكة أحصل منها على دواوينه خاصة ديوانه الشهير عن مصر .... الديوان المحظور

أنا عندي مسرحياته كلها

بس الشعر لأ

ياريت تساعدني لو تقدر

مع شكري وتحياتي

نجيب سرور كانت كل اعماله علي الانترنت ابنه شهدي كان عامل موقع ممتاز فيه كل اعمال نجيب سرور حتي الممنوعه بس حكومتنا الرشيده حاكمت المسكين بتهمة اداب و اضطر انه يهرب قبل ما ياخذ حكم بسنه سجن

www.cairotimes.com/news/sorour.html

www.ahram.org.eg/weekly/2001/539/eg1.htm

www.ahram.org.eg/hebdo/arab/ahram/2002/7/10/egyp4.h