فتوى تحريم البيبسى

[abaomar]

السلام عليكم

وصلنى اليوم هذا الايميل فاحببت ان ارسله للجميع ليقرأه و ليحذر ان كان ما فيه صحيح

(احذروا

أحببت أن انقل لكم فتوى مجمع البحوث الإسلامية بمصر في حكم شرب البيبسي

بعد الاطلاع على مكونات البيبسي الشركة الأمريكية الصنع

تأكد العلماء بعد التحليل لمكونات مادة الكولا والبيبسي المكون منه هذا المشروب

قاموا بإصدار فتوى موحدة بتحريم تناول هذا المشروب ( البيبسي ) لاحتوائه مواد خنزيريه

لمشاهدة الفتوى والتي تم نشرها في الصحف .

نرجوا من الجميع نشر هذه الفتوى دون تأخير

لمقاطعة هذا النوع الخنزيري والذي يتناوله الكثير وهم لا يعلمون مكوناته الحقيقية)

[سهيلة]

الاخ ابو عمر

معقول الكلام دة :) :)

حقيقىىىىىىىىى؟؟؟؟؟؟؟

مواد من منتجات الخنزيييييييييييييير

يل ريت حد يحط لنا الرابط بتاع الفتوى دى عشان نتاكد

[abaomar]

السلام عليكم

ارجو من الاخوه لمن لديه معلومات عن هذا الموضوع الافاده لو سمحتم .

[MZohairy]

بالمناسبه انا غاوي قراءة جرايد قديمه

وقريت في الأهرام في فترة الأربعينات انه كان في فتوى بتحريم بيبسي او كوكا كولا مش فاكر.......... لنفس السبب

واتضح ان شركه من الاتنين هي صاحبة الاشاعه

لضرب مبيعات الشركه المنافسه

[Hammer]

علي فكرة الضربات اللي تحت الحزام دي متبادلة بين الشركتين منذ نشأتهم ... زي الكاريكاتير اللي سربته بيبسي عن كوكاكولا و فيه المسلمين علي شكل زجاجات بيبسي و الإعلان الأخر و فيه كل زجاجة كوكاكولا تساعد بها حلفائنا في إسرائيل .

بس العيب مش عليهم ... العيب علي الثقافة المهيأة أصلاً لإستقبال مثل هذه الهراءات .

[صبح]

علي فكرة الضربات اللي تحت الحزام دي متبادلة بين الشركتين منذ نشأتهم ... زي الكاريكاتير اللي سربته بيبسي عن كوكاكولا و فيه المسلمين علي شكل زجاجات بيبسي و الإعلان الأخر و فيه كل زجاجة كوكاكولا تساعد بها حلفائنا في إسرائيل .

بس العيب مش عليهم ... العيب علي الثقافة المهيأة أصلاً لإستقبال مثل هذه الهراءات .

طبعا كل الكلام دة صح... ولكن هناك شيئان

1- الأول أن أضرار البيبسى أكثر بكثير من فوائده كما نوقش هذا فى الفضائيات وأن السبب الرئيسى لمرض السكر

2- بغض النظر عما تحتويه يجب علينا مقاطعته تماما وذلك لأن البيبسى والكوكاكولا من أكبر مدعمى اسرائيل وأمريكا

[se_ Elsyed]

فعلاً أنا قرأت فتوى زي دي قبل كده

حتى بالأمارة نص الفتوى يبقول " من شرب البيبسي بغير صودا .. فليلة اللي جابوه سودا "

----------

يا جماعة عيب إحنا ناس كبيرة ومتعلمة

فلا يجب أن ننساق إلى كل ما يُرسل لنا فتوى أو موضوع ديني بالإيميل وهو غير موثق ومن نوعية قيل وقال وسمعت وجاءني عن طريق الإيميل

أولاً الكلام ده قديم جداً

ثانياً الواحد وبشكل شبة شهري بيجيله إيميلات زي دي إما عن البيبسي أو الكوكاولا اللي يقولك لو جبت مرايا وحطيطها قدام الكلمة بالإنجليزي هاتظهر لك كلمة " لا مكه ولا مُحمد "

وإيميل جالي من حوالي شهر عن ستاربكس كافيه اللي صاحبه متخذ شعار مش عرف مين الصهيوني

وواحد تاني يقولك ماكدونالد قرر يشتري جميع المنتجات الدنماركية اللي راجعه من الهايبرز .. فقاطعوهم لعنهم الله

-----

فرق كبير بين إني أقول أنا هاقاطع الناس دي عشان أمريكان مثلاً أو عشان البيبسي مُضر .. وبين إني أحلل وأحرم

علماء الدين في السعودية وقعوا في مأزق هنا منذ فترة عندما حرموا البلوتوث وحرموا كاميرة الموبيل .... ولما صدر قرار من الدولة بحرية تداولهم .. بقى شكلهم وحش وما بقوش عارفين يودوا الفتوى دي فين ...

وحرموا أيضاً قيادة الست للسيارة ... لا لشيء إلا أنهها تتعارض مع عادات المجتمع لا أكثر ولا اقل

فهناك فرق بين العادة والعبادة

يعني شيء تمنعه عشان مُضر أو عشان أمريكي أو عشان يتعارض مع عادات مُتأصلة في المجتمع .. ماشي أوكي

لكن تقوم حشروا في الدين وتقول ده حرام ولا يجوز ... بدون دليل أو سند شرعي لا من الكتاب ولا من السنة .. فهذا هو الهُراء بعينه .. وده اللي بيضحك الناس علينا ..

هذا الكلام ليس موجهاً لأخي أبو عمر .. ولكني أتحدث بشكل عام عن هجمة الإيميلات والإفتاءات اللي محاصره الواحد من كل ناحية ...

[صبح]

فعلاً أنا قرأت فتوى زي دي قبل كده

حتى بالأمارة نص الفتوى يبقول " من شرب البيبسي بغير صودا .. فليلة اللي جابوه سودا "

حلوة قوىىىىىىى :D :)

[بنت شعنونة]

الموضوع دا عمل ضجة من فترة واعتقد لو ذاكرتي ما خانتنيش كانوا بيقولوا مادة البيبسين مأخوذة من دهن الخنزير

ولما السعودية ابتدى ينتشر فيها الكلام دا جت شركة البيبسي ونزلت بيان بمحتويات منتوجها وانها خالية من الكلام دا

دا لو ذاكرتي لسا شغالة يعني :)

انما المهم بقى انهم دلوقتي بيقولوا فيروز حرام عشان فيها كحول ومش مكتوب على العلبة خالية من الكحول زي البيريل!!

وفيه اساتذه على النت حاطين اسمائهم وشخوصهم و تلفوناتهم و ذو مراكز علمية مرموقة عملوا ابحاث وقالوا فعلا فيها نسبة كحول؟ :D

دا غير انهم بيقولوا حرام نشرب منتوج بتاع شركة اساسها بيع الكحوليات اصلا

حد سمع الكلام دا زيي؟

ورايكم ايه؟ :D

[محمود الشاعر]

اصدقائي الاعذاء

دمتم لنا بس نقطة احب اوضحها

أولا انا مش بدافع عن اي شركة من شركات المشروبات الغاذية أو منتجاتها

ثانيا يثار هذا الموضوع كل فترة ولست اعرف السبب الحقيقي سوى هدم شركات وطنية عربية لا تملك كمية الدعاية التي تملكها الشركتين بيبسي و كوكاكولا

ثالثا مادة البيبسين و الكولا هى مواد من العصارة الهاضمة فى المعدة تفرزها معدة الانسان ومعدة الحيوان لذلك تستخدم فى المشروبات الغاذية لتعطي شعور بالراحة والهضم

رابعا هذه العصارة تستخرج حسب كل دولة وحسب الجدوى الاقتصادية لكل بلد فمثلا فى بلادنا العربية أكثر الحيوانات ذبحا واستهلاكا هى الابقار و الغنم لذلك تأخذ هذه العصارة منهم لانها ذات جدوى اقتصادية ولذلك فى بعض الاوقات تختلف مذاقات نفس المنتج الواحد تبعا لنوع العصارة الهاضمة المستخدمة ويختلف مذاق البيبسي فى الخليج عنه فى مصر لاستخدام عصارة الابل الاكثر حلاوة ( بمعنى الاكبر فى نسبة السكر ) وفى مصر تستخدم الابقار و الجاموس وفى أوروبا فأن الجدوى الاقتصادية ستكون مختلفة تبعا لكل بلد ومحتمل ان تحوى عصارة خنزير لانه يذبح هناك بكثرة

خامسا اثيرت تعليقات كثيرة حول المشاكل الطبية للبيبسي والكوكاكولا وقد يكون بعضها صحيح والبعض الاخر مجرد شائعات ولست ذو خبرة طبية تسمح لي بأدلاء دلوي فيها

هذا للعلم وشكرا لكم

[المدهش]

أشكر الشاعر على المعلومات المهمة حول استخراج مادة البيبسين من العصارات الهاضمة للحيوانات وأعده باني لن أعود لشرب الكولا والبيبسي أبداً لهذا السبب..

وأحيي هامر على جملة أننا نعيش في بيئة قابلة لاستقبال وترويج مثل هذه الهراءات..فنحن سيد من يصدق الشائعات ويروجها..

[محمود الشاعر]

عذيذ المدهش والله العظيم بجد البيبسين مادة موجودة فى المعدة فعلا

[المدهش]

وانا مصدقك والله يا شاعر ..وتوبة من دي النوبة اشرب بيبسي تاني ..يا أخي كفاية ان اسمها غازية,,يعني وهيه ناقصة؟!!

[محمود الشاعر]

وانا مصدقك والله يا شاعر ..وتوبة من دي النوبة اشرب بيبسي تاني ..يا أخي كفاية ان اسمها غازية,,يعني وهيه ناقصة؟!!

[مريوم المصرية]

فعلا يا طنت شعنونة انا سمعت زمان عن حكاية الفيروز حرام دي :)

لا مؤاخذة أنا برضع فيروز طول عمري،وعمري ما سكرت،او خرفت(بتشديد الراء)

لو هنقول حرام عشان الشركة نفسها بتصنع خمرا،يبقى اسمها نقاطع،مش حرام؟

إيه حرام دي؟؟؟ربنا بس اللي يحلل ويحرم،والتشريع خلص من زمان

تم تعديل 3 يوليو 2006 بواسطة مريوم المصرية

[ابو محمود]

اعجبنى رد الاستاذ الشاعر لما بة من مدلول منطقى وصحيح لك منى التحية وانا من عشاق المياة الغازية بعد جراحة المريْ وباشرب سفن اب هههههههههههههههههههه مع خالص تحياتى

محمود مصطفى

[the sad man]

اخوانى الاعزاء: :ninja:

ان ما يحزننى ليس تحريم ليس تحريم البيبسى او تحليله ففى النهايه و كالعادة لن نصل الى قرار.....

سوف يكون حرام و ملعون فى نظر الكثير من علماء الدين و يكون حلالا و لا شبهة فيه فى نظر كثير اخريين ونحن سوف نظل حيارى بينهم ..

لما لا يكون لنا مشروب و طنى او عربى مشابه له فى المكونات و لكن من انتاج بلادنا او تكون علامته التجارية خاصة بنا ابتداء من الاسم الى التصنيع و الى الاستهلاك بدلا من المليارات التى تذهب الى امريكا و غيرها من البيبسى و غيره و نحن غلرقنين فى البيبسى و الكولا.

اننى اعيش فى احدى دول الخليج و اعتقد ان البيبسى هنا ارخص من الماء و لذلك فهو يشرب قبل الاكل و بعده وقبل النوم و اثنائه و طبعا انا واحد من الذين يتوبون عن شرب البيبسى لمدة و نستبدله بالكولا و لكن الشيطان شاطر فسرعان ما نعود الى البيبسى تانى و دواليك

و لا عزاء للمشروبات الوطنية :D

و دمتم سالمين و حياكم الله

:unsure:

[Hamdi Soliman]

قريت من يومين, ان 3 موظفين كبار فى شركة الكوكاكولا, قاموا بالحصول على اسار صناعة الكوكاكولا, وتم عرض هذه المعلومات لبيعها للشركه المنافسه البيبسى كولا

الشركه ابلغت الشرطه وتم القبض على هذه المجموعه, وتم ابلاغ شركة الكوكاكولا بعملية السطو على الاسرار.

كان بالطبع السبب رفض شركة البيبسى اضرار منافستها الكوكاكولا

يعنى التنافس موجود ولكن انه تنافس شريف, وليس كما يقال انها حرب!

اما عن حرمة البيبسى كولا, فلا ادرى اين هى الحرمه؟ واى مواد هى التى تستخدم فيها؟

اعرف فقط ان هناك حلوى للاطفال تستخدم فيها مواد تدعوا لتماسك الحلوى وهى من عظام الخنزير

وهى بالمناسبه موجوده وبكثره فى غالبية الحلويات الخاصه بالاطفال!

الماده اسمها (جيلاتين)

[مريوم المصرية]

اعرف فقط ان هناك حلوى للاطفال تستخدم فيها مواد تدعوا لتماسك الحلوى وهى من عظام الخنزير

وهى بالمناسبه موجوده وبكثره فى غالبية الحلويات الخاصه بالاطفال!

الماده اسمها (جيلاتين)

الجيلاتين مادة بتستخرج من عظام الحيوانات كلها عموما،مش شرط الخنزير

تم تعديل 8 يوليو 2006 بواسطة مريوم المصرية

[Hamdi Soliman]

الجيلاتين مادة بتستخرج من عظام الحيوانات كلها عموما،مش شرط الخنزير

صحيح انه بيستخرج من عظام كل الحيوانات, ولكن الشركات بتشوف الارخص لها, وهى الجيلاتين المستخرج من عظام الخنزير للاسف الشديد!