اثبت انك مصري؟؟!!

[بنت شعنونة]

بقالنا فترة بنكتب في مواضيع عن الوطنية واحساسنا بيها...

فجأة النهاردا جه في بالي سؤال غريب واجابته ( من وجهة نظري) اغرب...

ناخد مثال بس الأول...

لو حد سالك دخلت الجيش

وقلتله ايوا

ها يقولك اثتبتــــــــــــــــــــــلي

ها تطلع له ورق "يثبت" انك "خدمـــــــــت" في الجيش فترة كذا من الوقت ف انت بكدا تثبت انك دخلت الجيش...

نموذج تاني

انت دكتور؟

- ايوا

- اثـــــــبــــــــت..؟

- ها تطلع ورق تثبت انك " خدمت" ست سنين في كلية طب منهم 3 سنين "خدمة" للمرضى وسنة امتياز عشان تبقى دكتور

يعني الأثبات مرهون بالخدمة....؟؟

صح والا ايه؟

طب اثبت انك مصري بقى؟

حاولت اطبق السؤال على نفسي لقيت اجابته غلبانا اووووووووووووووووي

خدمت سنة امتياز و سنتين تكليف لمرضى الشعب المصري

فقط لا غير

ف على منظوري يبقى انا وطنيتي او مصريتي مدتها 3 سنين عشان هما دول اللي "خدمت" فيهم بلدي متمثلة في شعبها ( العيانين)

اسمحلي اسألك انت بقى السؤال بنفس الطريقة وتجاوب على نفس المنهج..

اثبت انك مصري؟ :blink:

[ابو محمود]

سؤال غريب انا مصرى طبعا لية اثبتلك

اول ماصحى من النوم بسمع اخبار فى الراديو

وبفطر فول

وباكل عيش مليان رمل

وبشرب شاى مغشوش بنشارة خشب وصبغة

وبشرب ماء من حنفية ميتها ملوثة وفيها كلور يجيب فشل كلوى

وانزل امشى ملقيش رصيف

واركب مواصلات جواها مطبات وبندالج جواها

واروح شغلى عندى صداع من تخبيط الناس فيا

وبدفع رشوة علشان امشى مصالحى

وبدفع الكهربا ومعاها النظافة مع انى انا اللى بشيل الكيس اللى مايتسمى الصبح

وبدفع للتليفون اشتراك 200ج فى السنة وبتكلم ب600ج طول السنةمنهم خواص120ج

والجزار والفكهانى والخضرى بيغشونى

وبدفع تامينات

وبدفع ضرايب

وبدفع مرتبات عمال وموظفين

وبمشى اكلم نفسى صباح كل يوم سبت

ومبخدش حقى منهم

وقريب هتجنن واسيب البلد بس بالعند فيهم هستحمل واصطعبط وعمل نفسى مشواخد بالى ومبسوط علشان بحب مصر

عيزة تانى عرفتى مصرى زى انا بقى المصرى اللى اصلى مصرى وبموت فى تراب حببتى مصر غصب عنى

[Tafshan]

يعني الأثبات مرهون بالخدمة....؟؟

صح والا ايه؟

اثبت انك مصري؟ :blink:

رغم احساسى انك عندك ربع ضارب يتماشى مع الثلاث ارباع اللى ضارب عندى لكن مواضيعك فعلاً بتجتذبنى ...

السابق كان هفلطة لابد منها :huh:

بصى يا شعنونه يا بنتِ (وش عماد حمدى )

الوطن عامل زى الام ... بنتولد نلاقيها موجودة و لازم نحبها و مش لازم نعمل لها حاجه لكن لازم هى توفر لنا الحد الادنى من اسباب الحياة و بالتالى حكمك بأن المصري بمدى عطائه انا مختلف معاه ..

لكن لو اعتبرت السؤال : ماذا قدمت لمصر ؟؟

ح نلاقيه سؤال وجيه ..

فعلاً انا مقدمتش لمصر حاجه - حسب معادلتك - لأنى معفي من الجيش :sad: بس هل ده معناه انى عاله على الوطن ؟؟

لأ خالص .. لأن الوطن ده هو انا و انتِ و كل من يعيش فيه .. و كل ما بنعمل حاجه لنفسنا الوطن ده بينمو و بيكبر لأننا احنا الوطن يا شانا ...

و صباح الخير

[زعلان]

طفشان اعطى للوطن جوجو :blink:

تم تعديل 5 يوليو 2006 بواسطة زعلان

[se_ Elsyed]

اثبت انك مصري؟ :blink:

أعمل إيه يعني ؟

أحلف بالطلاق إني مصري

ولا أجيب إتنين من السجق المدني يشهدوا إني مصري وبابا وماما مصريين هما كمان ؟

طب قوليلي أبدا منين وأنا أنطلق على طول

[سمـ مصر ــا]

لا ياشعنونة الإثبات مش مرهون بالخدمة

يعنى أنا خدمت الوطن سنة ..يبقى أنا وطنيتى مدتها سنة وبقيت السنين وطنية خليجية :blink:

لا لا ياشيخة اية اللى بتقولية دة :huh:

انا مصرية وان معشتش فى مصر لكن بتنفس فى كل لحظة عشق مصر

وبغنى مع عيالى راجعين راجعين صحيح مش شايلين فى ادنا سلاح لكن القلب بيرقص وأنا راجعة بلدى

فية أكثر من كدة إثبات

[زعلان]

اثبت انك مصري؟ :blink:

أعمل إيه يعني ؟

أحلف بالطلاق إني مصري

انت بتتلكك بأه

[عصام]

سؤال غريب انا مصرى طبعا لية اثبتلك

اول ماصحى من النوم بسمع اخبار فى الراديو

وبفطر فول

وباكل عيش مليان رمل

وبشرب شاى مغشوش بنشارة خشب وصبغة

وبشرب ماء من حنفية ميتها ملوثة وفيها كلور يجيب فشل كلوى

وانزل امشى ملقيش رصيف

واركب مواصلات جواها مطبات وبندالج جواها

واروح شغلى عندى صداع من تخبيط الناس فيا

وبدفع رشوة علشان امشى مصالحى

وبدفع الكهربا ومعاها النظافة مع انى انا اللى بشيل الكيس اللى مايتسمى الصبح

وبدفع للتليفون اشتراك 200ج فى السنة وبتكلم ب600ج طول السنةمنهم خواص120ج

والجزار والفكهانى والخضرى بيغشونى

وبدفع تامينات

وبدفع ضرايب

وبدفع مرتبات عمال وموظفين

وبمشى اكلم نفسى صباح كل يوم سبت

ومبخدش حقى منهم

وقريب هتجنن واسيب البلد بس بالعند فيهم هستحمل واصطعبط وعمل نفسى مشواخد بالى ومبسوط علشان بحب مصر

عيزة تانى عرفتى مصرى زى انا بقى المصرى اللى اصلى مصرى وبموت فى تراب حببتى مصر غصب عنى

صــــــح

ولا فيه أكتر من كدا إثبات

أصبت كبد الحقيقة ..

[محمود الشاعر]

السؤال ده صعب جدا

هل لان شهادة الميلاد فيها الجنسية مصري وتبعا لذلك كل الاوراق الرسمية من بطاقة وجواز سفر وقسيمة الجواز وخلافه مكتوب فيها اني مصري ابقى مصري

سنة 1996 واحد شاعر صاحبنا اصله فلسطيني اتولد فى مصر وعاش فى مصر واتعلم فى مصر أكل من اكلها وشرب من ميتها عاش فى الحواري المصرية وفجأة قررت الحكومة ترحيل الفلسطينين من مصر عيط بشدة لما افتكر انه مش مصري ورفع قواضي على وزير الداخلية وعلى الحكومة علشان يدوه الجنسية ويحلف انا مصري معرفش حتة تانية غير مصر لما اتقبض عليه فى مظاهرات علشان مصر خدوا بعيد وربنا بعت له ظابطابن حلال قاله يا ابني انت مش مصري انت عاوز تترحل حلف له انه مصري وانه مستعد يدخل المعتقل ويضرب على انه مصري وميخرجش على انه مش مصري

للاسف الشديد هذا المصري الشديد الوفاء لمصر الشاعر نضال الذي عاش وتربي فى حضن مصر وعاش مصريا صميما مات مستبعدا بعيدا عن بلده الذي يعشقها والذي اثبت لنا جميعا انه مصريا حتى النخاع اكثر من كثير منا

[النسر المصري]

بالراحة ياجماعة بالراحة وبشويش كده وبلاش العصبيه دي والنبي

انتو مافهمتوش شانا قصدها ايه بصراحة

هي قصدها اننا بنقيس مصريتنا بالبلاوي اليوميه اللي بتحصل زي ماذكرها العزيز محمود مصطفى

او بنثبتها بالحلفان و وهو طهقان او (طفشان) زي ماعمل سي السيد باشا

لكن شانا جابتلكم الفكره من منظورها البؤري ذات الابعاد المنكسرة الأضلع

مصري يعني ايه...مصري يعني قاعد بتعمل حاجة لله وللوطن...وده مابيحصلش....

وصباع محشي كرنب يدخل في عين اللي يقول انه بيعمل حاجة لمصر من اجل مصر...كداااب في حبة عينه

كلنااااا...كلنااا بلا استثناء....بنمشي ف الشارع.....متأففين....قرفانين....بنشتم ف ده وده...ونقول اي الزباله اللي مرميه في الشوارع دي.....ايه الحفر والشوارع المكسره دي....ايه المناظر اللي بتجيب المغص دي...ايه القرف ده..حاجة تقرف..حاجة تطهق

بس فالحين نتكلم ونتأفف وبس...طب هل فكرت مثلا تعمل يوم كده تجمع فيه ولاد حارتك عشان كلكم كده تمسكو مقشه على كام جردل مونه على كام شتلة زرع..وتعملو يوووووم واااحد ف السنه نظافة لحارتكو او الشارع بتاعكو

ابداااان.....لا بنكن ادان....بقى انا المدير الباتنجاني..وانا الدكتور المقرفاني....اروح امسك مقشة..لا يابابا..لا ياحبيبي...انا راجل كوباره...آآآ..اومال ايه

طبعا الرد هيكون بايخ....وهنقول ياعم هو حد ناقص....هو حد فاضي.....ايه الهبل اللي انت بتقوله ده...طبعا ولا حد هيسمعلك.....

طب خلاص بقى يبقى لما ننزل كده ونبقى فاهمين يعني ايه نظافه وتحضر ونقدر نعملها...وقتها بقى ابقى قول انك وطني وبتحب مصر...مش تقيس حبك لمصر بالقرف اللي فيها...وتقولي انك بتاكل فول بغشوش وعيش مرمل ومش عارف ايه مهبهب

ويجعلو عامر

السؤال ده صعب جدا

هل لان شهادة الميلاد فيها الجنسية مصري وتبعا لذلك كل الاوراق الرسمية من بطاقة وجواز سفر وقسيمة الجواز وخلافه مكتوب فيها اني مصري ابقى مصري

سنة 1996 واحد شاعر صاحبنا اصله فلسطيني اتولد فى مصر وعاش فى مصر واتعلم فى مصر أكل من اكلها وشرب من ميتها عاش فى الحواري المصرية وفجأة قررت الحكومة ترحيل الفلسطينين من مصر عيط بشدة لما افتكر انه مش مصري ورفع قواضي على وزير الداخلية وعلى الحكومة علشان يدوه الجنسية ويحلف انا مصري معرفش حتة تانية غير مصر لما اتقبض عليه فى مظاهرات علشان مصر خدوا بعيد وربنا بعت له ظابطابن حلال قاله يا ابني انت مش مصري انت عاوز تترحل حلف له انه مصري وانه مستعد يدخل المعتقل ويضرب على انه مصري وميخرجش على انه مش مصري

للاسف الشديد هذا المصري الشديد الوفاء لمصر الشاعر نضال الذي عاش وتربي فى حضن مصر وعاش مصريا صميما مات مستبعدا بعيدا عن بلده الذي يعشقها والذي اثبت لنا جميعا انه مصريا حتى النخاع اكثر من كثير منا

يااااه...قد ايه ابكاني ذلك الموضوع.....رحمة الله عليه هذا الشاب الوفي الخلوق الصدوق.....

لكن لنتوقف لحظات هنا ولنرى من هو من حقه ان ياخذ الجنسيه...سنرى فنانين وفنانات وراقصات وعاهرات...ورجال عظامهم اكلها سوس الفساد...هم الذين يبرطعون ف بلادنا ويخربونها...بعضهم اخذ لجنسيه...والاخرون يدخلون البلاد ويقيمون فيها ولا اجدع مصري......اتفضلو خلي دمكم يولع حبتين

[nancy]

انا مصرية فى الشكل فى الطبع فى التاريخ فى التواجد فى القلب والعقل

المصرى مش محتاج يثبت دة محتاج يتعامل مع مصريتة بشكل مشرف بس

بحيث ان الى يعرفة عن قرب يقول اكيد كل المصريين كويسين كدة

المفروض نكون عنوان جيد لمصريتنا

انمانثبتها مش محتجين نثبتها

[بنت شعنونة]

برضه ما فهمتونيش... ;)

السؤال دا سؤال افتراضي او جدلي او سموه اي حاجا..

زي ما قلت في الفرضية بتاعتي اللي فهمها استاذ طفشان والنسسسسسسسسسر الله ينوووووووور عليك :wub:

الوطنية = الخدمة

مش ضروري جيش؟

مش ضروري حرب

مش ضروري كنس شوارع

المهم تكون عملت حاجا لمصر بمقابل زهيد او معدوم

يعني خدمت الأرض او الشعب

يعني لو انت عندك ارض بتزرعها ها تبقى خدمت الآرض ( طبعا دا مثال مش مظبوط اوي لأنك ها تاخد فلوس قد كدا من جني المحصول)

انا اخترت الجيش ك مثال عشان معدوم الفائدة العائدة عليك ماديا

اضرب مثل تاني

لو ها اصنف الوطنية على الأفتراضية بتاعتي

ها يبقى فيه وطنية ذهبية و فضية وبرونزية و فالصوا

الذهبية للي حااااااااارب مثلا عشان مصر ( دا ما حدش قده قدم روحة "خدمــــــــــة" لوطنه)

الفضية مثلا لللعلماء اللي بيكافحوا للوطن

و هكذا يعني........

مش معنى اني باكل فول و بشرب شاي ابقى مصرية؟ :P

ولا ان شهادة ميلادي مصرية ابقى مصرية

انت خدمت في اييييييييييييييييييييه؟؟

ردوا بقى؟

استاذ محمود انت اصبت بيت القصيد فعلا :D

استاذ طفشان..

مش معنى اني انمي نفسي يبقى بالضرورة خدمت وطني؟

قولي ليه؟

يامااااااااااا ناس عقلية وثقافة وبتاع و جواسيس!!!؟

يبقى انا حاجا و الوطن حاجا ( معادلة صعبة وها تموتني بس ماشي )

استاذ محمود مصطفى

لو كتبت كلامك دا بالحرف في منتدى سوداني ها يقولوا عليك سوداني برضه!!!

اثبت انك مـــــــــصــــــــري؟؟

تم تعديل 5 يوليو 2006 بواسطة بنت شعنونة

[ابو محمود]

عروستى (ياست هانم ياشعنونة باشا انتى عوزة يعنى اقولك انا خدمت بلدى فى اية )

انا تفوقت فى شغلى ودى مهنة كويسة اوى وكنت بتعلمها وانا بدرس وخلصت واخت شهادة وتفوقت فى مهنتى لدرجة انى بقيت بقوم بتصميم يوازى ويضاهى اللى بنستوردة ولى اعمال باسمى وكنت باسهر الليالى وعينى ضعفت من كتر العمل وفى الاخر كانت اعمالى بتتسرق لان مافيش حماية ليها لانها لايوجد حماية ملكية فكرية لها وبعد 25سنة من التاليف والتصميم والتعب كنت سلم لناس معاها ملايين تخليها مليارات عيزة حاجة تانى تسبت لسيادتك انى مصرى

وحيات ولادى اللى بعلمهم الانتماء لمصر انا مصرى ولا يجرأ احدا من ابنائى على ايزاء اى حد ومعلمهم مايكلوش الا من ما كسبت ايديهم من عمل حلال وبيصلو ويذكو بس لسة ماحجوش وربنا يكفيهم شر الوحوش والناس اللى بيخدو ولا يدوش اتمنى ان اكون وصلت لك الرد اللى انتى عوزاة مصرى اسمة محمود مصطفى

[ابو محمود]

على فكرة انا خدمت فى القوات المسلحة واسمها كدة مش اسمها الجيش وكنت متفوق فيها من تدريب وتعلم وكنت فى سلاح صعب ومهربتش وكان تدريبى شاق وكان نسبة الاصابة فى التدريب فقط 25% يعنى مش كل واحد قضى سنة ولا عشرة فى خدمة عامة يبقى مصرى ياسيدتى المصرى من ينمى هذا الوطن ويعمل على رفعتة ويضيف الية ولما يعمل فى مهنة يحبها وينميها ومايقولش انا خدمت بلدى فى كذا وكذا ولاكن ممكن يقول ممكن ازاى نخدم بلدنا ومنسرقهاش اصل اليومين دول بيسرقوها باسم حب مصر ممكن تطلعى على بعض قضايا السلب والنهب من بنوك ومستشفيات ومدارس وجامعات باسم حب مصر وبيقولو خدمة عامة برضة وبدون اجر وممكن تلاقى مثلا واحد رائيس تحرير صحيفة مرتبة الشهرى600 الف جنية عرفتية كان مصرى وبيقدم خدمة لمصر وحيات ابو الهول والاهرام ههههههههههههه

انا مصرى

[El-Masri]

يحكى فى سالف العصر واالزمان أن المصرى عرف عنه الشهامة والشجاعة، وحيث أننا قاعدين زى الولايا نتفرج على الفلسطينيين من وار السلك بيتقلوا كل يوم، نساء على أطفال على شيوخ، يبقى إحنا جيل العار على مصر.

أبيض معذور إنه إفتكرنا تبع مصرانيم العبرية وليست مصر أرض الكنانة والعزة والكرامة.

تم تعديل 6 يوليو 2006 بواسطة El-Masri

[صبح]

أبيض معذور إنه إفتكرنا تبع مصرانيم العبرية وليست مصر أرض الكنانة والعزة والكرامة.

دى بقى حلوة.. :ninja:

[طه المصرى]

آه يا مصر الكل بسال انا خت ايه؟؟؟؟؟؟؟؟؟ ومحدش سال نفسه ولو مره انا اديت ايه ؟؟؟؟؟؟؟؟؟؟؟؟؟

يا امة ضحكت من جهلها الامم

فى الصين بيصمموا اللعب والعرايس وكماااااااااااان فوانيس رمضان( والله عيب )وهمه ميعرفوش اصلا ليه

كل دا داخل البيوت وبعدين يودوه المصنع يتغلف ويشطب ويتصدر الصيييييييييييييييييين

يا رب نخذى بقى

وحنا زعلنين بقينا 75مليون وانا آسف العدد فى اللموووووووووووووووووووووووووون

[بنت شعنونة]

يا نهار ابيض؟ :P

كل دا عشان بقول اثبت انك مصري؟ :)

انا حاسا زي ما اكون دخلت عنبر 101 في سجن جوانتانامو او سجن ابو غريب وكل معتقل من دول مادد ايده برا القضبان وهاتك يا صريخ بالظلم اللي وقع عليه!!!!!!!!!!!!!!

" ايه الأحساس البشع اللي جالي دا؟؟؟؟؟"

ما علينا ... نكمل...

يا استاذ محمود..

ممكن اسأل سؤال؟

المصري اللي بيروح يعمل مظاهرة عشان حاسس او معتقد انها ممكن تعمل حاجا لبلده وهوا عارف انه ممكن يتسجن او يتضرب وانه مافيش مقابل مادي له وممكن ما منهاش فايدة اصلا المظاهرة بس اهو بيحاول وبس

مش دا بيبقى بيعمل حاجا وطنية؟ ( خالصة مخلصة زي ما بيقولو بالبلدي؟؟)

لأنه بيأدي خدمة للوطن بدون مقابل...

هل دا ممكن تحلف انه مصري والا لا؟؟

انا ما قلتش ان اي خدمة عامة = خدمة للوطن..

لكن

لما تنتفي المصلحة الشخصية في الخدمة = خدمة للوطن..

حضرتك قلت عملت و صممت مشاريع وحاجات .. هايل..

هل خدمت نفسك كمان فيها؟ والا خدمت البلد بس؟ ( بغض النظر عن سرقتها)

[محمود الشاعر]

الاخت شعنونة

سؤالك مهم وانا لما حكيت الحكاية بتاعة صاحبي كنت فاهم قصدك كويس من السؤال واعتقد هو كمان سمعك وفهم قصدك وجاوب بطريقته الخاصة انا استغربت قوي من الاخوة اللي هجموكي او اللي السؤال نرفزهم السؤال مش معناه انت عملت ايه لمصر او قدمت ايه السؤال انت بتحبها ازاي انت حاسس نفسك ازاي

مش شرط امشي فى مظاهرة علشان اكون بحب بلدي او اني اكون فعلا مصري الشرط اني اكون بعمل ده علشنها فعلا مش علشان الحزب او مجموعة او فئة من الناس او حتى البنت اللي بحبها تشفني وانا راجل مناضل

اعتقد ان اللي فهم سؤالك على انه قدم ايه وجاوب اعتقد انه بيبرر لنفسه طب ما كتير عملوا وضحوا بحيتهم علشان فكرة او معنى زي نضال صديقى العاشق الولهان لتراب مصر

[El-Masri]

أعتقد أنه أسهل أن تثبت أنك مصرى من أن تثبت أنك مسلم.

إثبت أنك مسلم رغم أنك أسقطت فريضة الجهاد وأغمضت عنيك عن عرضك وشرفك.

إثبت أنك مسلم رغم إيمانك بفصل الدين عن الدولة وإيمانك بأن الديمقراطية وتشريع الأغلبية هو الحل.

إثبت أنك مسلم وأنت تردد عميانى إعلام الأعداء ثم تصف المجاهدين فى سبيل الله بأفظع الصفات وأحقر العبارات.

إثبت أنك مسلم.

تم تعديل 6 يوليو 2006 بواسطة El-Masri