يوميات مواطن مفروس

[alnoobi]

من الأعمده التى أحرص على متابعتها " يوميات مواطن مفروس " لمحمد الرفاعى بجريدة صوت الأمه .

كفايه .. ما تبسطهاش أكتر من كده ! 3/7/2006

مازال ميكروباص الاصلاح السياسى لصاحبه عزوز الضرير شغّال على خط امبابه الورّاق من غير فرامل و شكمانه مخروم و معلّق قدامه فردة شبشب قديمه مكتوب تحتها : "اديله بشبشب الاصلاح .. يا أبله انشراح !! " و " برطع يا حمار الاصلاح .. دى بلدنا نايمه بترتاح !! " و مازالت أزهى عصور الديمقراطيه لابسه جزمه ميرى و ماشيه تتدلع على صدر البنات فى عبدالخالق ثروت و تفوت على قفا الوطن يخضر !!

و مازالت المعلمه حريه بنت المعلمه سنجه المسجله خطر شايله خازوق و ماشيه تتسخمط مع العيال فى الشوارع عشان الجبان اللى مش عاجبه و واقف يجعر ياحريه فينك فينك , أهى جايّالك يا فالح .. بس لو جدع بقى استحمل , و مازالت حلّة الإنجازات بالتقليه عماله تندلق على دماغنا لدرجة اننا بدأنا نصرخ على طريقة عبدالسلام النابلسى .. كفايه .. ما تبسطهاش أكتر من كده .. فالإنجازات و الحمدلله كتيره .. بس فين النفس .. إنجازات بالجزمه و إنجازات على القفا .. و إنجازات على صدرها تنوّر .. " و يا تلبس الإنجاز .. يا نولّع فيك بجاز " .

فالإصلاح السياسى و الديمقراطيه و الحريه و إنجازات النظام الالكترونى لم تتوقف لحظه واحده , عكس ما يدعى العيال السمّاويه فالنظام يؤمن بالمثل الشعبى الرائع "اللى ينكسف من شعبه ما يجبشى منه عيال" , و لذلك تلاقيه واخدنا إحنا و الوطن فى حضنه طول الليل و نازل فينا إنجازات , أما الحراميه و الهجّامين و النخاسين و الموالى فلا يستحقون انجازا واحدا و لذلك تركهم فى الشارع و كل واحد و ضميره بقى " و اللى مالوش نظام يحضنه .. يسرق ما يسرق بس حد يضمنه !!" و " إنجاز ورا إنجاز .. ها تضيع سنين عمرنا !!" فبعد أن أفرغ النظام قفة انجازات غير مسبوقه أثناء معركته مع القضاة و المتضامنين معهم و شيّل كل واحد إنجاز على مقاسه , قرر أن يحتفل بمرور عام على البرنامج الانتخابى للسيد الرئيس بإنجاز جديد و أن يطفئ شمعته الأولى فى عين الوطن و العيال الجورنالجيه بتوع مصر يامّه يا بهيه يا أم خيبه و جلابيه و الذين لم يسمعوا كلامى عنما طلبت منهم أن يستخبوا فى الدره لغاية بس ما الحر ده يعدى على خير !

الانجاز الجديد هو استضافة العيال مقاصيف الرقبه فى فندق طره لمدة سنه ولا حاجه لحد ما يرمّوا عضمهم و وشهم يزنهر من كتر الأكل و الراحه و إذا كان وائل الابراشى قد فلت المره دى من الاستضافة عشان ضميره وحش لا مؤاخذه , فإن ابراهيم عيسى ظروفه صعبه و طول النهار ياخد شاى شكك من القهوه , لذلك قرر النظام استضافته مجانا لمدة سنه و إذا حب يكمل هو بعد كده فعلى حسابه بقى عشان يوسع شويه لاخواته اللى تنقلعلهم عين و النظام يستضيفهم و لو يوم واحد فى فندق طره و حتى لا يصبح شكل ابراهيم وحش قدام اخواته قرر النظام أن يلبّسه تهمه كده و كده يعنى فأعلن انه أهان رئيس الجمهوريه و هى التهمه اللى شغاله آخر حلاوه اليومين دول , و عندما ظهرت مشكلة إن السيد الرئيس مش ممكن يرفع قضيه على مواطن لأنه لم يقصف قلما واحدا فى عصره و إذا اتقصف غصبن عنه يعنى و هو مش واخد باله المخبرين يبروه بسرعه, قرر النظام أن من حق أى مواطن أن يرفع قضيه على أى صحفى بتهمة إهانة رئيس الجمهوريه و هى سابقه تحدث لأول مره فى مصر و لن تكون الأخيره لأن النظام أراد إرهاب و تصفية كل الصحفيين المعارضين .

و طبقا لهذا المنطق يستطيع ابراهيم عيسى نفسه رفع قضيه ضد الدكتور فتحى سرور بتهمة إهانة رئيس الجمهوريه , فعندما طالبته نقابة الصحفيين بتنفيذ وعد الرئيس بإلغاء الحبس فى قانون النشر , قال اللى وعد

بحاجه ينفّذها !!

و إذا هاجم أى ناقد غلاوى عادل امام يستطيع أى مواطن أن يرفع عليه قضيه و يحبسه بتهمة إهانة الزعيم .

و إذا تجرأ أى صحفى جبان و كتب عن عسكرى المرور يستطيع أى مواطن أن يرفع عليه قضيه و يسجنه بتهمة إهانة رئيس الجمهوريه لأن العسكرى تبع الداخليه و الداخليه تبع السيد الرئيس .

و سايق عليكم النبى يا بعدا .. كفايه إنجازات لحد كده .. جتتنا اتهرت خلاص .

يوميات مواطن مفروس

محمد الرفاعى ( صوت الأمه )

الرئيس على الطريقه اليمنيه ! 26/6/2006

العرب .. جرب .. و أهل بداوه و غباوه و تناحه , فهم أول جنس فى التاريخ اخترع مبدأ الرئيس ولى من أولياء الله الصالحين اللى مكشوف عنهم الحجاب , و الرئيس اللى تعرفه حتى لو كان مش قد كده لا مؤاخذه يعنى أجدع من الرئيس اللى ما تعرفوش , و يؤمنون بأن تغيير الرؤساء كل شويه فال وحش و بيقل بركة البلد و بيقلق منام الناس , خصوصا ان الرؤساء العرب ربنا يا أخى مطول فى عمرهم بشكل غريب , ما تعرفش بيعذبهم ولا بيعذبنا احنا , يعنى الواحد فيهم يلبد فى الكرسى ما يطلعش بالطبل البلدى , ولا حتى بالزار , و يفضل قاعد على قلب الوطن لحد ما السر الإلاهى يطلع , أو ربنا يرزقه بإبن لبط صايع يخليه مسافر ولا نايم , و يفقعه الزومبه اللى هى , و يقعد مكانه و هو يغنى " يا عبدالله ياخويا سماح .. و سيبك من اللى عدّى و راح " .

و يبدو ان كرسى العرش له سحر غريب ولا السحر الافريقى الأسود و منيّل بستين نيله , يعنى الحاكم لو حب يقوم يتمشى شويه , ممكن يتشل , أو تطلع له العفاريت بالليل , و لذلك يظل جالسا فوق العرش ليس حبا فيه لا سمح الله , و لكن خوفا من اللعنه التى ستطارده حيا و ميتا , و لذلك لا يتصور أبدا و لو للحظه واحده أن يترك الحكم و يجيب لنفسه الكافيه و المرض , زى الجنرال فرانكو عندما كان على فراش الموت , و قالوا له إن الشعب قد جاء ليودعه فقال قولته الشهيره : ليه ؟ .. هو الشعب مسافر ؟!

خاصة و أن الشعوب العربيه وشّها فيه السماحه و القبول , وتبقى أمّه داعياله اللى يحكمها و يعكمها من رقبتها , و يسحبها وراه زى البهيمه الفطسانه , و العرب هم أول من اخترع المبايعه و "بايعنى بايعنى .. بعادك لاوعنى "

و "اخترناك اخترناك .. و اتبهدلنا وراك" .

لكن الأخوه اليمنيين ابتكروا طريقه عبقريه للمبايعه , طريقه لم يتوصل إليها اخواننا بتوع سبعتلاف سنه حضاره و خساره و خيابه , و الذين رفعوا شعارات خايبه جابت الكلام للسيد الرئيس بدل ما تخدمه , زى حكاية الجنين فى بطن أمه يبايع الرئيس , و اختارك الله فلماذا لا نختارك , و الخيره فيما اختاره الله , و كام فتوى مضروبه من مشايخ الفتّه و الكوارع , إن الجبان ابن الجبان اللى مش ها ينتخب الرئيس كافر , وربنا ها يحرقه فى نار جهنم .. إلى آخر هذه البواخه و الهبل , مع إن الرئيس كان ناجح ناجح , بس تقول إيه بقى فى الحراميه اللى عاوزين يسرقوا من ورا الحكايه دى .

لكن تعالى اتفرج بقى على العبقريه اليمنيه , فقد خرج بعض الاخوه اليمنيين و بعد جلسة قات معتبره , و أعلنوا أنهم سوف يرفعون دعوى قضائيه ضد الرئيس اليمنى على عبدالله صالح اذا لم يرشح نفسه للرئاسه !!

شفتوا الرواقه و المزاج بجد ؟!

يعنى الأخ الرئيس اليمنى لو تعب ولا حاجه ــ و مش بعيد على ربنا يعنى ــ و حب يرتاح .. هيلاقى نفسه متهم و واقف فى القفص , و جايز كمان لو ركب دماغه و أصر على عدم الترشيح يخبطه القاضى عشر سنين سجن بتهمة اهانة الشعب اليمنى , لأنه ها يبقى شكله وحش قدام الشعوب العربيه , و ها تعايره بإنه ما عرفش يتمسك برئيسه .

و نحن طبعا لن نطالب بإدخال القات مصر , عشان نبقى آخر حلاوه و سطل , و نعرف نتمسك بالسيد الرئيس , و اللى حوالين السيد الرئيس , و أنجالهم طبعا , لكننا سنطالب بتطبيق تلك الفكره العبقريه , اللى جت لنا على الجاهز , فإذا فكر السيد الرئيس فى التخلى عننا , نقوم برفع قضيه ضده, و ساعتها بقى مافيش نطع من الأنطاع ها يقدر يفتح بقه , و يقول كفايه كده على الرئيس لأنه تعبان , فقد أصبح رئيسا بحكم المحكمه , و طبعا الداخليه ها تساعدنا فى تنفيذ الحكم , و فى حالة يعنى ما الرئيس زهق مننا و من قرفنا , و البعد عن خلقتنا غنيمه .. أو إذا كان الرئيس بعافيه .. فمعلش يستحمل شويه عشان خاطرنا , ماهو بوتفليقه أهه صحته متدهوره , و غيّر الدستور عشان يستمر فى الحكم , و ما يقهرش شعبه و يشحططه و تبقى سيرته على كل لسان , و الريس برضه مننا و علينا , و ما يرضاش نتبهدل و نتفضح وسط اللى يسوا و اللى ما يسواش , صحيح احنا شعب غلاّوى و رزل , و زى القطط ياكل و ينكر , بس معلش .. استحمل معانا شويه يا ريس , و سيبك من العيال الصيع السمّاويه اللى كل شويه يقولوا لك الريس بيقبض 450 ألف جنيه فى الشهر , طب ما يشوفوا الفرخه بكام .. ولا كيلو اللحمه بكام !!

و ربنا يوقفلك ولاد الحلال يا ريس و يكفيك شرّنا .

[Sherief AbdelWahab]

أستأذنك في النقل لمختارات من الصحافة..

خلص الكلام