حضارة 7000 مداخلة... تحية للعضو سي السيد

[hopsan]

شوف يا س س ...رغم انك مذكرتنيش فى حسبتك و انت عارف كرم الإسكندرانيه بينقح عليهم عمال على بطال ..إلا انى بالأصاله عن نفسى و النيابه عن جدعان اسكندريه و حته ايوووووووووووووووه يا جدعان انا ناوى اطبرع بكام وقه سمك بساريه ( من اللى اشترتهم الحاجه كليو لما جت اسكندريه وكانت فاكره انها اشترت بلطى اصيل ) على كام كابوريايه مفعصه ( اصل مافيش كابوريا كويسه اليومين دول ..مش الموسم بتاعها ) على شويه جندوفلى ( اصله رخيص اليومين دول ) و نعملك زفه اسكندرانى عجب ...و نقعد نشكر فيك لحد ما تزعل بجد

مرسى يا ياشو ..انقذتينى ...طلعت مش انا لوحدى ...( اتابى ).( على رأى ال...ولا بلاش ) فيه حد تانى مقرأش قوانين المنتدى

بس ايه رأيك يا س س فى الفكره بتاعتى ؟؟؟

اقعد انت بس رد على كلامنا الحلو و سيب المنتدى يضرب يقلب

تم تعديل 9 يوليو 2006 بواسطة hopsan

[المدهش]

سي السيد يستحق بالفعل التحية والتقدير..

ليسفقط بسبب حجم مشاركاته المذهل ..ولكن أيضاً بسبب مضمون تلك المشاركات ..

سي السيد من أكثر من قرأت لهم بساطة وسلاسة في الأسلوب وخفة دم غير عادية وصدر رحب وتقبل جميل للنقد والرأي الآخر..

ألف تحية يا سين سين ..وعقبال المشاركة رقم بليون ..علشان تبقى بليونير مشاركات.

[Modest]

لقد نزل علينا الخبر كالصااااعقة :angry2:

و لكن ... و برغم كل شيء... لا يسعنا في هذا اليوم المشهود إلا أن نبارك للمعلم سين سين على هذا الإنجاز التاريخي :angry2:

موديست

500 مداخلة بطلوع الروح <_<

[الرافعي]

الفرح .. فرح

والليلة .. ليلة

وسى السيد .. سيد

وانا .. أنا

وانت .. إنت

وفرحتنا بالمعلم سيد .. سيد

واللى هانعمل معاه أحلى واجب .. واجب

أحلى واجب .. واجب

عشان دا حبيبنا .. بيبنا

حبييييبنا .. بييييبنا

والواجب بتاعنا .. تاعنا

إنذار أحمر اوى .. أوى

ورقابة على المداخلات .. لات

ووقف آى بى .. بى

وبلاغ لأمن الدولة .. دولة

وسمعنى يا جدع .. ما تزوقينى يا ماما

سلام حاير طاير عشان أخويا س.س بعد ربنا ما فك سجنه

وطك طك طك (صوت فرد محلي ) <_<

وسمعني سلام يا غالي عليا يا حبيبي يا خويا

وأحلى دورار لأحلى س.س ما يغلاش عليك يا خويا .. استنى عليا بس لما صاحبي الروسي يجيب شحنة الدورارات المضروبة :angry2: ، والتوصيل لحد الباب في منفوحة :angry2:

تم تعديل 9 يوليو 2006 بواسطة الرافعي

[وليد صفوت]

ايها السادة .....

اليوم فقدنا رجلاً من اعز الرجــ ................ لأ مش الورقة دى <_<

ثوانى :blink:

ايييييوة ........

إحم ......

ايها السادة .....

اليوم - و من هذاالمكان العريق - نحتفل باليوبيل الفزدقى لمداخلات حبيب الملايين و وحش الشاشة الإنترنيتية و رجل المباحث الدولية :angry2: ............. سيييييييين سيييييييييييين

( تصفيق حاد )

و جدير بالذكر انه مع حصول س س على اليوبيل الفزدقى اصبح من حقه ان يدخل ضمن حفريات و آثارات المحاورات :blink: يعنى نعملله موضوع نحط فيه الأفاتار بتاعه و الزوار تيجى تتفرج عليه من ورا زجاج الشاشة mfb: -_- :D

و تكريماً لهذا الحدث العظيم تتدارس الدولة حالياً نقل تمثال رمسيس من ميدان رمسيس و وضع تمثال لـ س س بدلاً منه و تسمية الميدان : ميدان س س و بناء مركز للدرسات البتروكيميائية و الهندسة الحيوية قرب الميدان و تسميته : مركز س س لدرسات التسمين :angry2: .... كما يستفضّل السيد الفادل فاروق حُسنى بتدشين المركز و التمثال بعد انتهاء جدول العمل بهما ....

طبعاً الكل معزوم لحفلة العشاء التى ستُقام فى الميدان ( قدام التمثال على طول ) احتفالاً بهذة المناسبة الخاصة ...

و ..........

نورتوا مصر :angry2:

[MZohairy]

فيليسيتاسيون يا مون شير دوبل سين

وبالمناسبه دي البتيديجونى بالبوربوار عليا

تحب ايه؟

بنانا بوت ولا فرى كاسى؟ <_<

تم تعديل 9 يوليو 2006 بواسطة mzohairy

[se_ Elsyed]

فيليسيتاسيون يا مون شير دوبل سين

وبالمناسبه دي البتيديجونى بالبوربوار عليا

<_<

الجدع ده ما فهمش هو بيقول إيه .. وحس إن كلامه بيوجع

تحب ايه؟

بنانا بوت ولا فرى كاسى؟

ممكن مانشستر يونايتد .. أهي دي الحاجة الوحيدة اللي أفهمها

------------

طبعاً الكل معزوم لحفلة العشاء التى ستُقام فى الميدان ( قدام التمثال على طول ) احتفالاً بهذة المناسبة الخاصة

تحية إعزاز وتقدرير لجنود مصر البواسل في عيدهم .. شكراً للدوندي المُدند وليد

إيه النظام يا واو ؟ عزومة العشا دي على مين ؟ كشكشها وما تعرضهاش أنا داخل على مسئوليات جِسام

---------

استنى عليا بس لما صاحبي الروسي يجيب شحنة الدورارات المضروبة ، والتوصيل لحد الباب في منفوحة

وماله يا معلم رافعي

شغال برضوا .. وعلى أتفقنا الأولاني : الدولار بـ 50 سنت ... والتسليم في بطن الزير ..

-------------

موديست

500 مداخلة بطلوع الروح

تدفع كام وأخليهم لك 1000 ؟

------

عزيز المدهش مدهش .. شاكر لذوقك وأخلاقك العالية

-----

[النسر المصري]

أصحابي الأناتيم بقى وبالذات المتريشين اللي شغالين بره - موظفي الحكومة يمتنعون .. دول عايزين اللي يعطف عليهم - زي سقراطيس ... واحد تاني ، أبو الأحاشيش ، الرافعي ، الخواجه ياسو اليوناني .. طفشان بن هربان ، لخبطه ، المدهش ، زُهيغي ، وجدي ، النسر المصري - ج

يعني بقى يامعلم سي السيد ملقتش حد تضيفه القايمه الخضرا المتنيله بستين نيله دي غيري انا.....طب ياراجل فكر شويه كده وارجع مارشيدير الماني بيكاكي كده وافتكر الذي مضى....

.بقى انا ...النسر المصري على سنه ورمح..الفنان الكبير.......اللي ماحصلش (طبعا الود ودك كيلو طماطم وف خلقتي ) ...بقى بعد واحد وتلاتين سنه ف الدنيا دي ماتهزليش شعره

قوووم انا اخسر عضويتي اللي بتمنمية مداخلة :P

واخسر مراخيري حبيبتي :blink:

واخسر شرفي مع البت سيتا الهنديه الممرضه ف المستشفى الجربانه اللي نشرت اشاعة اني انا كنت بحبها وعرضت عليها الجواز جت قطع رقبتها ..وقدت تنادي وتقول (انا يبي انت ..انا هوب انت وايد..انت كلب (قلب) مال انا :huh:

واخسر شغلي ومنصبي الكبير ودلوقتي بناشد الجمعيات الخيريه عشان اعرف آكل على الأقل بنانا بوت ولا فرى كاسى حتى من عند مسيو زوهيري -_-

وكمان مش قابض من خمس شهور فاتو -_-

بقى بعد ده كلووووو...تقوم تيجي انت ت ت ت ....وتقولي هات منالبتاع الأخضر دا هوااااااه..... مشعارف ايه وكام (وش الناظر في مدرسه المشاغبين) mfb:

انا عندي ليك اقتراح...اذا كنت عايز تعمل خير يعني ف واحد مشتت ذهيا وبطيخيا زي حالاتي...انت تلم اللمه بتاعتك دي وففتي ففتي وتصلي عالنبي...لحسن وحياة خالتي زكريا ام العباس...لابعت الواد لافاشكيري بتاعنا يقصفلك الراتب والجنسيه سوا سوا ..في الهوا هوا...وابقى غنيلي ياما ارحميني بعد كده mfb:

[last_Samurai]

الف مبروك يا س س من امام تمثال موازا دوم

ايه يا خويا

دوم دوم

انت مبتفهمشى صينى

هههههههههههههههههههههههه

الف مبروك

[سمـ مصر ــا]

7000 مداخلة ماشء الله mfb:

اية الهمة والنشاط والحيوية اللى عاملها ياس س فى المنتدى دة

انا عايزة أقولك على حاجة بالمناسبة دى

زى ما انت شايف أنا 133 مشاركة بس :huh:

أنا سمعاك وانت بتقول يعنى اية

يعنى اية اية الحدق يفهم وانت ابو المفهومية

ادينى شوية من عندك يعنى مش مشكلة لما يحتفلوا بيك وانت عندك 6000 مشاركة

وادينى الالف اكون بية نفسى ادام الناس فى المحاورات

وأنا فى إنتظار ردك ياس س :blink:

[إبن مصر]

الابن البار س.س تحضرنى بهذه المناسبه الساره قصيده كنت كتبتها تيمنا بما ألت اليه امكانياتك الفذه التى لم تأخذ حقها حتى الان فى خضم هذا الكم الهائل من الاحداث التى نلهث فى ملاحقتها علنا نستطيع ان نوفى الجميع حقهم فى التوصيف والتحليل والمشاركه الفعاله فى خضم زخم هائل من الامور التى تدفعنا دفعا ان ننتهح منهجا راديكاليا فى ردود الافعال بعيدا عن المنهج البرجماتى الذى لطالما وقفنا ضده سواء هذا المنهج او الاتجاه الديماجوجى الذى قاومناه بقوه واثبتنا فى خضم المقاومه منهجا وسطيا اقرب ما يكون الى الالتزام بالطريق الثالث كرؤيه ومبدأ نحاول من خلاله نشر الكثير والكثير مما استخلصناه من تجارب الحياه.

واليك اهدى هذه القصيده........

الهوبا فى الانانا والكرسى فى الكلوب

ما هو انت مش معانا والدنيا هوب هوب

ما تقولش بقى الانانا كانت محتاجه طب

اصل الدنيا هانانا والقلب مش هايطب

وايييييييييييييييييييييييييييييه

الهوبا فى الانانا والدنيا خلف خلاف

ماهو الى جاى رايح والبنطلون بكتاف

وان مره بردت منها اتغطى باللحاف

اصل الدنيا هانانا والقلب مش هايطب

واييييييييييييييييييييييييييه

الهوبا فى الانانا ما تنامش عالسرير

بكره يا حلو تبقى واد خلبوص كبير

وتطير من غير طياره وتزمر بالزماره

اصل الدنيا هانانا والقلب مش هايطب

واييييييييييييييييييييييييييييييه

بس خلاص

وشكرا

ابن مصر

دكتوراه فى التهنئه المقارنه من جامعه ميتشجان بالساحل ومبيض محاره

[الأفوكاتو]

بعد ما قاله الأخوة الزملاء, ليس لدى ما أقوله عن س س , إلا ذكريات من الماضى, عندما كنت أكتب عن سلبيات و أيجابيات المجتمعات المختلفة, و كنت أجر شكل سى سى ببدأ كل مقال بكلمة:

هذه المقالة مهداة إلى "سى السيد". و خاصة فى موضوعات " الثقافة التواليتية"

تحياتى لهذا الإنسان المصرى الصميم.

[حشيش]

أخوتى وأخواتى الأعزاء :D

أنتهز هذه الملحمة التى نشترك فيها جميعاً لتكريم رمز من رموز المحاورات (سى السيد) صاحب الخلق الكريم وخفة الظل بلا حدود والأكثر من هذا وذاك ال 7000 مداخلة فى حب مصر لأعيد نشر موضوع تكريم سابق له كتبته عنه منذ سنوات بعنوان (تحية لهذا العملاق) :D :

لا يشعر الإنسان بالنعمة إلا بعد زوالها....ولا تكرم الدولة مبدعيها إلا بعد رحيلهم....لذلك وجدت أنه من الواجب عليا أن أكرم رجلً من رجالات الفكر والأدب فى المحاورات قبل أن نفقده ويرحل عن عالمنا ...أردت بهذا الموضوع أن أكرم هذا العملاق المدعو (سى السيد) فى حياته وليس بعد موته (أدعو له بالشفاء حيث يرقد جسده الطاهرالأن فى مبرة محمد على بمصر القديمة بين الحياة والموت على إثر إصابته بمرض الحصبة الألمانى )

مواقفه الثابتة فى الفن والأدب:

تخرجت أنا والعملاق (سى السيد) من كلية التجارة بجامعة عين شمس لأبوين يتيمين ....أفقنا بعد التخرج لنجد أنفسنا فى الشارع بلا مأوى وبلا هدف....قلت له ما يهمكش يابو السيد حتفرج....تعالى بينا على كافيتريا كلية الأداب ناكل لنا سندوتشين كفتة أنا عازمك وأخرجت من جيبى جنيه.......فؤجئت بالعملاق وهو يصيح قائلاً لالالالالالالالالالا .........أمسك ذراعى بعنف وظل يصيح لالالالالالالالالالالالا ..... ظننت فى بادئ الأمر أنه قرر أن تكون العزومة عليه فشكرته وقلت له خلاص ماشى يابو السيد إبقى إدفع إنته الحساب ...... ولكن قبضته الحديدية ظلت ممسكه بذراعى اللى فيه الجنيه ثم سمعته يقول: كفتة لالالالالالالالا ...... إحنا أولى بالجنيه ده نشترى به كتاب أو كصة :blush: ..... ياحشيش غذاء العقل هو الكتاب وليس الكفتة :angry: .... شعرت بالخجل من نفسى وانحيت تقديراً لهذا العملاق وطلبت منه بأدب أن يترك ذراعى ولكنه ظل يسحبنى منه فى إتجاه سور الأزبكية لنشترى كتاب :blink: ..... قمت بإخراج برجل من جيب بنطلونى ورشقته فى عينه اليمنى حتى أخفف من قبضته الحديدية عن ذراعى ولكن لم يتزحزح العملاق عن موقفه وأكمل مسيرته فى إتجاه سور الأزبكية والبرجل فى عينه والدماء تسيل على وجهه وهو لا يزال ممسكاً بذراعى وأنا أردد فى سرى (يخرب بيت سنينك) ...... لم يسعنى أمام إصراره إلا أن أنحنى له مرة أخرى تقديراً لتمسكه بثوابته وشغفه الغير طبيعى بالفن والأدب ...... وصلنا بعد عناء ومشقة إلى سور الأزبكية لنشترى أول كتاب لنا وكان بعنوان (بوبى الخباز) الذى تصدره دار الطفل المعاق ببيروت لنبدأ به مشوارنا الأدبى الطويل حتى وصلنا إلى ما نحن عليه الأن من شهرة وصيت فى عالم الفن والأدب ....... فتحيةً إلى هذا العملاق :wub:

لا يفوتنى أيضاً فى هذا المقام أن أشكر أخى العزيز إبن مصر (أحمد محمود) وهو شاعر مغمور ومؤلف كصص بوليسية فاشل وحاصل على جائزة مبارك فى الكآبة عن العام 2004 وهو أيضاً خريج المعهد الفنى للتبريد والتكييف بإمبابة فقد بدأنا مشوارنا الأدبى والفنى سوياً مع أخونا العزيز سكوربيون . كنا نجتمع فى صالون الحلاقة بتاع العملاق سى السيد وكان يكرم وفادتنا قبل أن نبدأ فى قراءة كصة جديدة كل يوم لنزيد من حصيلتنا الأدبية ..... .كان العملاق ياخد لكل واحد فينا دقنه وشين لحد ما تبقى أنعم من دقن زبيدة ثروت فى فيلم (فى بيتنا رجل) وبعد كده يحلق لنا شعرنا ( أصة الهدهد- شوشة شعر أمامية والقفا محلوق بالورب) لنجلس بعدها نتجاذب أطراف الحديث حول رؤية كل منا النقدية للكصة ....وفى ذات يوم كنا نقرأ كصة (ياسمين والنحلة الشقية) ونشب خلاف بين إبن مصر والعملاق حول مغزى الرمز فى كصة ياسمين واشتبكوا بالأيدى فقمت أنا وسكوب بطعنهم بالمقصات وأمواس الحلاقة الموجودة فى شنطة الحلاقة الخاصة بالعملاق حتى إنفضت المشاجرة بخسائر طفيفة حيث فقد إبن مصر عينه اليسرى وفقد العملاق إصبع السبابة بيده اليمنى وعدنا لنكمل رؤيتنا النقدية حول الكصة :o ...... فتحية إلى هذا العملاق mfb:

--------------------

[yacho]

هههههههههههههههههههههههههههههههههههههههههههههههههه

هههههههههههههههههههههههههههههههههههههههههههههههههه

هههههههههههههههههههههههههههههههههههههههههههههههه

:D :D :P :P

[إبن مصر]

فتحية إلى هذا العملاق

معلش ولو فيها اساءه فهم منى يعنى....

مين فتحيه دى يا شيشو؟؟؟

قول بس انا عارف.. هافتكر.... بس شاور انت ... خدناها قبل كده.... بس عشان شكلى ما يبقاش وحش لو جت فى الامتحان

قول انا عارف ..

ايوه مين بقى..

ها ؟؟؟

ها؟؟؟؟

حشيش؟؟؟؟

انت سامعنى؟

[hopsan]

فتحية إلى هذا العملاق

احمد محمود ...انت مش فاهم ..ده عادى ...انا بقى فاهم ...وده مش عادى

شوف بقى .....

فتحيه الى هذا العملاق يعنى فتحيه تروح لهذا العملاق ..بس نسى يقول و حسنيه الى ابن مصر البار و عديله الى كاتب الموضوع

فتحيه و عديله و حسنيه ..دول 3 ممرضات من الوزن التقيل و شلت مليانه اكل المرضى الغلابه و دول شغالين فى القصر العينى القسم المجانى ...و هما دول اللى حيعالجو اخوانا التلاته ...ازاى ...دى بقى ليها قصه تانيه

...فهمت و لا اقول تانى؟؟؟

تم تعديل 11 يوليو 2006 بواسطة hopsan

[إبن مصر]

:)

:D

:D

:D

الحل هو الفلايه صح؟؟؟؟؟؟؟؟؟؟

[hopsan]

الحل هو الفلايه صح؟؟؟؟؟؟؟؟؟؟

غريبه عرفت منين ؟؟؟

لا يا عم انا ماشى ...مش حعرف اشتغلك تانى

كفايه عليا بتوع تلته اعدادى

هو س س راح فين ...مش دى برضه جنز..اقصد فرحه؟؟

هو سابنا وراح فين؟

تم تعديل 11 يوليو 2006 بواسطة hopsan

[Sharkiah]

ألف مبروك هذا الرصيد الهائل من المداخلات والعمر المديد الحافل بالإنجازات من موقع المسئوليه التى تصديتم لها وأثبتم جداره غير مسبوقه فى تصريف شؤنها

فقط تساؤل برئ من فرد من جموع شعب المحاورات الباسل

أما آن أوان تفعيل العمل بالماده 234 من الباب التاسع والعشرون من الدستور الدائم للمحاورات والخاص بإفصاح أفراد الإداره عن ممتلكاتهم العينيه والنقديه قبل وبعد توليهم مسئوليه الإداره ؟

تعود بى الذاكره إلى أيام المحاورات القديمه عندما كنا نقرأ لسى السيد عن أيام الثانوى والجامعه والكفاح النبيل الشريف وفوره الشباب والكد والعرق والسعى الدؤوب وراء لقمه العيش وقسوه الإغتراب عن أرض الوطن ، كان هذا هو سى السيد الذى عرفناه وأحببناه وحملناه فوق الأكتاف ليتولى المسئوليه والمحاورات فى معترك إثبات الذات تتلاطمها الأمواج وبادلناه حبا بحب حتى رست سفينه المحاورات على شاطئ الإستقرار والسكينه يقودها سى السيد ورفاقه بكل تمكن وإقتدار

واليوم نعود للمحاورات بعد بضع سنين لنتصفح موضوعات شتى فى أقسام شتى تتحدث عن مضاربات سى السيد فى بورصه الرياض بل وبورصات منطقه الخليج قاطبه ، محفظه إستثمارات هائله ضخمه تمددت فى سنوات قليله لتتعدى الأسهم والسندات وتدلف إلى أسواق العملات والذهب والفضه والمنتجات البتروليه ، ونستمر فى القراءه لتداهم أعيننا موضوعات عن ممتلكات سى السيد العقاريه فى العبور والشروق والعاشر من رمضان بدءا بالأراضى ومرورا بالفيلات ووصولا إلى الأسواق التجاريه مما حذا بصغار المستثمرين أن يطلقوا عليه ديناصور العاشر من رمضان

فهل لنا نتساءل من أين كل هذا ؟

أين تذهب تبرعاتنا وإشتراكاتنا فى المحاورات ؟

وكيف يتم إبرام عقود الإعلانات ؟

وكيف تم إرساء عقود تحديث المنتدي ؟

ومن هى الجهات التى تتولى الرقابه على هذه الأنشطه ؟

وما هى سر السطوه التى يتمتع بها سى السيد لكى تقفز مشاركاته للرقم 7000 فى الوقت الذى لاتتعدى مشاركات غيره من أفراد الإداره 3000 مشاركه بالكاد ؟

كيف إستطاع فى هذا الزمن الوجيز الإستئثار بثقه الأدفايزور بحيث أصبح رجل السلطه القوى فى الإداره الذى يهابه الجميع ويتحسبون لغضبه ويحاولون كسب وده بشتى الطرق ؟

ماهى الأسس التى يتم على أساسها تحويل عدد من المستندات إلى غرفه خاصه به فى الإداره لا يطلع عليها أحد غيره تحت مسمى "سرى للغايه"؟

ما هو حجم فرع المحاورات فى الرياض وكيف يدار ؟

من يتحمل تكاليف الرحلات المكوكيه التى يقوم بها سى السيد من الرياض للقاهره وبالعكس تحت مسمى "شئون إداريه محاوراتيه" والتى بلغت فى العام المالى 2005/2006 فقط 34 رحله حسب تقرير الجهاز المركزى للرقابه الإنترنتيه ؟

هل الدعوات التى توجه لسى السيد للكتابه فى منتديات أجنبيه يتم تلبيتها بصفته الإداريه أم بصفته الشخصيه ؟ ولماذا تأتى بعضها عن طريق أجهزه مخابرات هذه المنتديات وليس عن طريق الإدارات ؟

وهل تدخل الهدايا الضخمه الماليه والعينيه التى يتلقاها بصفته ممثلا عن المحاورات عندما يزور منتديات صديقه سجلات ودفاتر المحاورات أم يتم إعتبارها ممتلكات شخصيه ؟

ما سر الصمت المريب للساده أحمد محمود وعصام شوقى وداروين وهشام عبدالوهاب وغيرهم من أفراد الإداره أمام هذه الحقائق وإجهاضهم دائما لأى محاوله لإثاراتها أمام الرأى العام ؟

كيف تم إقصاء لانسلوت والحاجه سلوى من الإداره وأصبحا أثرا بعد عين بجره قلم من سى السيد وإختفيا تماما من المحاورات بعد مجرد محاوله لطرح موضوع تضخم ثروه سى السيد على مائده النقاش فى أحد إجتماعات مجلس إداره المحاورات ؟

تحت أيدينا مستندات ووثائق تؤيد وتدعم كل كلمه بأعلى يحويها ملف ضخم قمنا بتقديمه للسيد نائب عام المحاورات فى مكتبه بقسم القضايا ، حتى لانتهم بالإتيان بأقوال مرسله ، والفيصل بيننا وبين سى السيد هو القانون والذى ننتظر مع الجميع كلمته على أحر من الجمر

[Modest]

فقط تساؤل برئ من فرد من جموع شعب المحاورات الباسل

أما آن أوان تفعيل العمل بالماده 234 من الباب التاسع والعشرون من الدستور الدائم للمحاورات والخاص بإفصاح أفراد الإداره عن ممتلكاتهم العينيه والنقديه قبل وبعد توليهم مسئوليه الإداره ؟

بالأصالة عن نفسي و بالنيابة عن جموع شعب المحاورات نتضامن مع الأستاذ شرقيه في طلب الرد على هذه التساؤلات :)

و أضف إليها ما رأيته بأم عيني عندما التقيته في الجناح الدائم الخاص به في فندق انتركونتيننتال أثناء طلبي لتدخله لنقل ابنائي إلى مدرسة حكومة بجوار البيت و إلى الآن يُماطل لأنني لم أدفع المعلوم (طيب أجيب منين يا ناس )... وجدت يا سادة بالصدفة على مكتبه ، أثناء وجوده في الجاكوزي الملحق بالجناح ، إيصال يفيد شراء أحدث البدل و الكرافتات و القمصان السينييه من بيوت الأزياء الباريسية و مجموعة نادرة من العطور التي صنِّعت خصيصاً لاستعماله الشخصي و 6 أطقم أقلام ذهب مرصع بالألماس.

هذا بالإضافة إلى السيارات الفارهة و الطائرة الخاصة .... و ما خفي كان أعظم :excl:

أما آن لزمن الصمت أن ينجلي .. و أن تُعلن الحقائق أمام الشعب :blink:

و إلى أن يرد السيد سي السيد أو من ينوب عنه بالوقائع و المستندات ، الدعوة عامة للاعتصام أمام باب القوانين و القضايا.

.