مطعم شعنونة....

[بنت شعنونة]

بما اني قاعدا في البيت بقالي فترة

وبما ان زوجي بيحب الأكل

وبما ان اقرب طريق " لقلب" الراجل معدته ( قلبه = يخليه يقوم ينام :sad: )

ف انا احترفت الطبيخ

والحمدلله بيقولوا اكلي حلو

ولذلك قررت اعزمكم على مطعمممممممممممممي :D

يعني ها احط طريقة اكلات اتعلمتها سواء من النت او التلفزيون او كتابي بتاع الطبخ او اتعلمتها وخلاص

وها اعملها في شكل عزايم

وقولولي رايكم....

عزومة رقم 1

الطبق الرئيسي فراخ مشوية ع الفحم او على شواية البوتاجاز...

سلطات

مكرونة اسباجيتي

و الحلو سينابون ( عشان غالي جدا هنا الله يهدهم :blink: )

الفراخ

تقطع الدجاجة الى نصفين بعد غسلها جيدا بالماء و الملح و الخل ( عشان الأنفلونزا)

ثم نضعها في اناء لحد ما نعمل التتبيلة

التتبيلة بقى ودي تححححححححححفة وها تدعولي عليها :)

ربع كوب من الكاتشب ( سواء كاتشب عادي او بتاع الشوي ... ولو ان صوص الشوي بتديها طعم الذ بكتيييييييير) + 2 ملعقة اكل زيت زتون + 2 ملعقة اكل صوص صويا +3 ملعقة اكل خل ابيض + ملعقة صغيرة توم مفروم + ملعقة صغيرة شطة +ملعقة صغيرة فلفل احمر بارد ( باربيكيا) + نص ملعقة صغيرة فلفل اسمر + ملح + نص ملعقة صغيرة زعتر ناشف ( او 4 اعواد زعتر بري ودي تدي طعم احلى)

نخلط التتبيلة مع بعض كويسة جدااااااا

ثم نجيب سكينة و نخرم الفرخة شوية وبعدين نحكها في طبق التتبيلة بحيث نخلي التتبيلة تتخلل الفرخة كلها

بعدين نحط الفرخة جوا كيس تلااجا واصب جواها بقية التتبيلة واتركها لتاني يوم في اخر رف في التلاجة من تحت... ( ليييه بقى.. عشان لو حطيناها في رف فوق ها تسقع ومش ها تشرب التتبيلة :huh: )

تاني يوم نحط شواية البوتاجاز ونحط الفرخة فوقيها على نار متوسطة

وكل شوية بفرشاة دهان ندهن حبة من التتبيلة على وش الفرخة عشان ما تنشفش

لحد ما تستوي وبعدين تقدم و بالهنا و الشفا..

المكرونة معروفة طبعا هيا و السلطة :D

نيجي لل سينابون...

العجينة ( ودي تحفففففففففة وسريعة جدا اتعلمتها من النت)

مقدار فنجان قهوة من السكر + 2 ملعقة كبيرة خميرة + 1 و نص كوب ماء دافي + ذرة ملح + 2 كوب دقيق...

نخلطهم كلهم على بعض ونسيبهم يتخمروا لمدة عشر دقايق بسسسسسسس

وبعد ال عشر دقايق نضيف 3 كوب دقيق + نص كوب زيت ( نحطه شوية شوية لحد ما العجينة تتماسك واحنا بنعجن و ممكن ما يستخدمش كله)

بعد العجن نفرد جزء منها بشكل مربع ( بالنشابة)

ثم ندهن الوجه بقليل من الزيت

ثم نرش على الوجه سكر بودرة + قرفة مطحونة ( الكمية حسب الرغبة)

بعدين نبرم العجينة على بعض زي السويسرول ثم نقطعها قطع متساوية ونضعها في صنية مدهونة زيت

وتوضع في فرن متوسط الحرارة لمدة نص ساعا او اقل

واول ما تطلع نصب على الوجه يا اما لبن مركز ومحلى

او نجيب كوب سكر بودرة + نص كوب ماء و نخلطهم كويس لحد ما يبقى لونة زي الباشاميل كدا ونضعه على وجه كل سينابونة بعد الطلوع من الفرن مباشرة عشان تفضل طرية

و بالهنا و الشفا :D

[yacho]

وااااااااااااااااااااااااااااااااااااااااااااااو شعنونه

انا كل يوم مخى بيتفرتك حاعمل ايه اكل بكره .. والتغيير مطلوب

شوفى انا حاعمل طريقه الفراخ المشويه بتاعتك .. بس انا عندى مشكله عويصه

انا البوتاجاز عندى كهربا يعنى مسطح من فوق وازاز كله ..يعنى ماينفعش اشوى عليه

من فوق لازم فى الفرن .. وبصراحه انا عمرى ماشويت ف الفرن قولى لى بقى اعمل

ايه بالضبط عشان اشويهم فى الفرن .. اه انا عندى شوايه فى الفرن بس قلقانه

يتحمروا من فوق ومايكونوش مستويين كويس من جوا.

قولى يا شانا لحسن الاكله حتبوظ

وميرسى قوى على السينابون :) يام يام

[واحد تاني]

يا سلااام تسلم ايدك يا فندم ... لأ لذيذ فعلا الاكل ونفسك حلو كمان هي يمكن المكرونة لبكت شوية بس الصوص كان هايل :blink:

لو تسمحولي احكى لكم موقف حصل لي بسبب وصفة زي دى...

كنت من 3 سنين عايش كافي خيري شري وراضي بالبوتاجاز اللي بالكهربا اللى عندي (نظرا لأني مش بستخدمه اصلا)

كنت بالكتير اوي ممكن اعمل نيسكافيه كل فين وفين لو هفني الشوق ومليش مزاج انزل اقعد في كافيه

المهم بسبب وصفة زي دي اتوصفتلى من شخصية كويسة قررت ان انا لازم يبقى عندي بوتاجاز فيه فرن زي مخاليق ربنا

وعنها ... نزلت اشتريت احلى بوتاجاز بفرن ... وطبعا بعد ما فوقت لنفسي قلت ايه اللى هعمله ده ... هعمل كل البروسيدجرز دي عشان اكل حاجة فى النهاية ممكن اكلها في المكان اللى يعجبني فى الوقت اللى يعجبني و كمان بالطعم اللى يعجبني وكل ده من غير هيديك ولا تضيع وقت ...

ماطولش عليكم ... انبوبة الغاز لغاية دلوقتي لسه مليانة من 3 سنين ونص ومفتكرش اني هحتاج اعرف المكان اللى بيبدلوا منه الانابيب فين ولا اعتقد حتى اني ممكن احتاج اشتري مفتاح انابيب :)

تم تعديل 8 يوليو 2006 بواسطة واحد تاني

[بنت شعنونة]

ياشو

بصي يا ستي

يقولووووووون و العهدة على اللي قال

انك لو جبتي طاسا تيفال ورشيتي ( رشششششششششتي) رشة زيت عليها كدا وحطيتيها على نار متوسطة ها تعمل نفس التاثير

وفيه حل تاني اسرع

لو عندك اي صينية تكون حوافها عالية ( صنية المونيوم مثلا بتاعت فرن ) حطيها ع البوتاجاز وحطي فوقيها شبكة الشوي واشوي عادي خالص

انتي ما عندكيش شواية بوتاجاز لييييييييه :) :blink:

[se_ Elsyed]

شكراً شعنونة

أولاً لإنك أثبت لي إن الواحد لما بياكل حاجة مش عارفها ومن غير ما يسأل عن كينونتها .. بيريح دماغه

ثانياً أول ما قرأت موضوعك كنت هادخل فيكي شمال عشان السينابون ده .. لإني أول مره أسمع الإسم وإفتكرت بتشتمينا ..

بس لما دعمتي كلامك برسومات بيانية توضيحيه .. عرفت إن البتاع اللي كنت بأشترية من الفرن وأنا رايح المدرسة في إعدادي هو السينايون

يا سلام يا ولاد

هـــا هاتغديني إيه بكره ؟

[بنت شعنونة]

واحد تاني

دا انت مشششششششكلة :huh:

انا كنت زيك كدا

لحد ما الفراخ بقت ب 17 جنيه الكيلو

و اال سينابونااااااااااااااية الواحدا من دول ( سامعني يا سي السسسسسسسسيد) ب 12 جنييييييييييييييييييييييييييييه :blink:

بس ولا يهمك احلة عزومة ليك عندي ع الغدا

فينك يا مدام سنااااااااااااااء :)

وولاد اللذين بيعمولها حلو اوووووووووي

وانا بحبها و زوجي كمان

ف بدل ما اتشحتف

اتعلمتها :sad:

س س

ما تخافش الموضوع دا كله اشرح مع الرسم :D

[se_ Elsyed]

و ال سينابونااااااااااااااية الواحدا من دول ( سامعني يا سي السسسسسسسسيد) ب 12 جنييييييييييييييييييييييييييييه :blink:

شعنونة

أنا حاسس إنك بتقرطسيني عشان أنا مغترب ومعايا دولارات :)

بقى البتاعه اللي بأشتريها من عند الحلواني أو فرن الفينو بخمسة وسبعين ساغ بتبعيها بـ 12 ج ؟

ليه ...... أومال دستة الجاتوة بكام ؟

ولا البسبوسة أم بندق وفزدق ولوزدق بكام ؟

إكسبي زباين يا شعنن وخلي أسعارك إقتصادية وفي مستوى الطالب المتوسط

[بنت شعنونة]

عزومة رقم 2

عزومة عشا...

المنيوووووووو

ساندوتش العجيب

موكا

سلطات برضه ( نفسها بتاعت الغدا)

نبتدي بالساندوتش...

العجينة ممكن تبقى هيا نفسها اللي فوق...

او طريقة اخرى للعجينة

3/4 كيلو دقيق

1 كوب ماء دافي+2 ملعقه خميره صغيره+1 ملعقه سكر(مع بعض و سبيهم يتخمروا)

4 ملاعق زيت

ملح

بيض+فلفل اسود للوجه

نحط مقدار الخميره + الدقيق + الملح+ الزيت و نعجن 10 او لغايه ما تبقي عجينه ملمومه و مش بتلزء

العجينة تبقى عاملة كدا...

واسيبها تتخمر لمدة ساعة

بعدين افردها واحط الحشو

الحشو كالتالي..

جبنه ـ فلفل ـ سلامي ـ بصل ـ طماطم ـ زيتون ـ جبنه

ممكن تحشية اي حاجا بس دا برضه لذيذ

نفرد قطعة من العجينة

ونضع الحشو بالترتيب فوق بعضه

ونقطع العجينة من الأطراف مثل الصورة ثم نضفر الساندوتش ع الحشو

ادهني الصنيه بالزيت و حطي الساندوتشات و ادهني الوجه بخليط البيض و لو عندك سمسم رشي عليه

و بالهنا و الشفا :D

انا اتعلمت الساندوتش دا من ع النت وصاحبته هيا صاحبة الصور دي ( بس بتاعي شببببببببه والله :huh: )

الموكا..

معلقة نسكافية كبيرة + معلقة سكر كبيرة + 2كوب لبن + مكعبات تلج

نحط النسكافية و السكر في الخلاط وعليهم حبة بسسسسيطة جدا من الحليب و نخلطهم مع بعض لحد ما يذوب

بعدين نزود بقية اللبن و التلج ونخلط تاني

و بالهنا و الشفا ( لذييييييييييذ جدا)

ممكن تعمليه هوا نفسه بنفس الطريقة بس تجيبي بياض 3 بيضات وتضربية في الخلاط ثم تضيفي اللي عملناه فوق دا و تحطيه في الفريزر

ها يطلع حاجا زي الأيسكريم بس قومه اسفنجي ولذيذ قوي ( وطري جدا)

بس لازم يؤكل فور خروجه من الفريزر والا ها يسيح في خلال 10 دقايق...

و بالهنا و الشفا :D

ايه النظام؟ :sad:

يا س س

البتاعة اللي بقتول عليها دي داناااااااااااااااااااااااااش :)

وبتبقى محجرة كدا وملزقة و لسا ب 50 قرش

التاني دا سنابووووووووووووووووووووووووووووون :blink:

ما توعاش عليه لسا

لو عندك كارفور والا يمكن في اليورومارشية ممكن تلاقي محل سنابون هناك

ما بيبعش حاجا غيره اصلا :D

[yacho]

ياشو

بصي يا ستي

يقولووووووون و العهدة على اللي قال

انك لو جبتي طاسا تيفال ورشيتي ( رشششششششششتي) رشة زيت عليها كدا وحطيتيها على نار متوسطة ها تعمل نفس التاثير

وفيه حل تاني اسرع

لو عندك اي صينية تكون حوافها عالية ( صنية المونيوم مثلا بتاعت فرن ) حطيها ع البوتاجاز وحطي فوقيها شبكة الشوي واشوي عادي خالص

انتي ما عندكيش شواية بوتاجاز لييييييييه :) :blink:

شوايه البوتاجاز دى ينفع استخدمها على البوتاجاز الازاز المسطح ده .. ؟

انا مش عارفه ازاى .. ثم انا ماعنديش غير شوايه جوا الفرن :sad:

عموما انا حاجرب التيفال واقولك اللى حصل

طب لو حبيت اشويهم ف الفرن يبقى ازاى ممكن حد يقوللى لو سمحتم

نفسى اشوى ف الفرن بجد.

ادهني الصنيه بالزيت و حطي الساندوتشات و ادهني الوجه بخليط البيض و لو عندك سمسم رشي عليه

يا نهار ازرق كل ده شاندوتش.. هى المقادير اللى انتى كاتباها تطلعه بالمقاس ده

دا مفرود عالارض يا شانا :D دة واللا ايه اصل مفيش رخامه تاخد الحجم ده

بيتهيألى ولا الفرن .

بصى بما انك جربتيه قولى لى المقادير طلعته حجمه اد ايه

ميرسى يا شانا :huh:

[بنت شعنونة]

ياشو

انتي سككككككككككككككككر :D :huh:

اولا

شواية البوتاجاز دي شواية من 3 اجزاء وصغيرة كدا

جزء 1 = القاعدة لونها اسود و بتبقى مستطيلة

2= سلك الشواياة بتحط فوق الجزء 1

3= غطا الشوايا ودا بيتشال خالص او يتحط ويتقفل

ها ادعبسلك على صورتها كمان حبة واحطهالك :sad:

وهيا معمولة عشان تتحط فوق البوتاجاز سواء بقى الكهربا او العادي :blink:

العجييييييييييينة يا ليناااااااااااااااااا

مش ها تفرديها كلها

المقادير دي عملت معايا يجي 9 سندوتشات من حجم العملاق اللي بتقولي عليه دا

انتي ها تكوريها كور على المقاس اللي يعجبك وتفردي الكورة بالنشابة على المقاس اللي نفسك فيه

انا بعملها كبيرة عشان اخزنه مرة واحدا واطلع واحد بس يتقسم نصين ويكفي نفرين زي ما انتي شايفا كدا

لو عاوزة كمية قليلة ممكن تستعملي المقادير بتاعت عجينة ال تلات دقايق ها تريحك خالص مش ها تستنيها تخمر ولا يحزنون :)

ها اجيبلك طريقة سسسسسسسسكر دلوقتي للشوي جوا الفرن

بس خدتشششششششي بالك

لو ها تشوي فرخة يبقى حوالي ساعتين كدا جوا الفرن

اصبري بقى اجيبلك صور ومقادير الكلام الكبير دا واجي :D

[nancy]

حلو السندويتش دة ياشانا والموكا

لانى بحب اى حاجة فيها عيش وجبنة دة غرامى تقريبا

وفعلا السندويتش شكلة مغرى جدا

انا كمان شطرة فى المطبخ بس اكتر فى السمك الفيلية والجمبرى والسبيط كل ماعمل عزومة لازم تبقى على اسكندرانى

انما مش باحس ان المطبخ مركز ابداعى

احبة واجيدة اه انما محددة ان المطبخ ميخدش منى اكتر من ساعة فى اليوم اكتر من كدة ممكن اكرهنى :)

لو عندك اى حاجت مشابهه اكتبيها واقولك لما اجربها حل اية

[بنت شعنونة]

ساعة واحدا بس يا نانسي؟؟ :D

كرهتك :huh:

انا بايتة في المطبخ تقريبا :sad:

بس عشان انا بعمل اكل الأسبوع كله مرة واحدا عشان اخلص :D

ها اهريكي حاجات سريعة ولا يهمك :D

ياشو

سبيشال ريكوست ليكي الشوي في الفرن...

بصي يا ستي

نبتدي ب شوي الفراخ...

اغسلي الفراخ كويس وسيبيها بحالها بدون تقطيع ( يعني الفرخة كاملة)

انواتع التتبيلات..

ممكن التتبيلة اللي كتبناها اول حاجا ( على فكرة دي برضة تنفع لل ستيك وبتبقى تحفففففففة)

او فيه تتبيلة بتتعمل للشيش طاووق وممكن تعمليها للفرخة كلها وهي...

علبة لبن رايب صغيرة + ربع كوب زيت + ملعقة كبيرة صوص صويا + 2 ملعقة صلصة صغيرة + لمونة + ملح + ملعقة صغيرة فلفل بارد ( باربيكيا) + ملعقة صغيرة زعتر + ملعقة صغيرة ثوم مفروم + فلفل اسود

تخلطي التتبيلة على بعض وبعدين تفركي بيها الفرخة كويس وتحطيها في كيس هيا و التتبيلة وتقفلي عليهم ل تاني يوم

http://up3.w6w.net/upload/23-02-2006/w6w_2...547c263ece8.JPG

او فيه تتبيلة الشوي العادية

بصلة كبيرة + طماطماية كبيرة + حبهان + لمونة + فلفل + ملح + اي توابل تفضليها

و تضربي كله في الخلاط وبعدين تصفيه وتاخد العصير بس تنقعي فيه الفرخة لحد تاني يوم...

نيجي بقى للشوي

فيه 3 طرق

الشوي ب الشواية اللي موجودة داخل الفرن و دي انا ما اعرفهاش :blink:

:o صريحة انا جدا

والطريقة التانية فيه عامود بيتباع في السوبر ماركت

عبارة عن طبق ستانلس طالع من نصه عامود.. شبه دا كدا بس دا بالسخان بتاعه ومش بيتحط في الفرن.. التاني بقى تحته طبق عادي

ب توقفي الفرخة عليه و تولعي الفرن على حرارة عالية ( بس مش عالية جدا عشان ما تتحرقش) وكل شوية تسقيها او تدهنيها بالتتبيلة لحد ما تستوي

http://forum.hawaaworld.com/attachment.php...hmentid=24349&s

لو ما عندكيش العامود دا

عارفا ازايز البيبسي الكبييرة الازاز؟

هاتي واحدا واملي نصها بس مية

و وقفي الفرخة عليها برضه وحطيها في طبق و في نص الفرن ونفس الطريقة السابقة

و ممكن معاه الفرخة تحطي شوية بطاطس على جزر بعد ما تتبيلهم بنفس التتبيلة ( خاصة الأخيرة) و تسيبيهم معاها في الفرن زي كدا

http://forum.hawaaworld.com/files/72082/DSC02197.jpg

ايه رايك بقى :)

تم تعديل 9 يوليو 2006 بواسطة بنت شعنونة

[ابو محمود]

اللة يسامحك ياصاحبة المطبخ انا ممنوع عليا العشى اعمل اية اةةةةةةةةةةةةةةةةةةةةةةةةةةةةةةةةة

انا جعت منك ولا بلاش ريحة اكلك حلوة انا بحب المشوى ممكن تعزمينى بكرة على كباب

[فنكوش]

<_<

عزومة رقم 2

عزومة عشا...

المنيوووووووو

الحاجة ام سمر

اولا:- تسلم ايديكي

ثانيا:-الله يسامحك انا خلاص مش هاعرف اكل في مطعم عروس دمشق تانى بقالي 4 شهور باكل عندة على ما تيجى ام العيال

ثالثا ودة الاهم مش ممكن تبعتى حتة من السندوتش دة في رساله email attchment :angry2: :angry2: :angry2:

[بنت شعنونة]

محمود مصطفى و فنكووووووووش

والله انتوا ناس سسسسسسسسسسسسسكر -_- :huh:

موتوني من الضحك

اولا احلى عزومة مني ليكوا وانتوا تؤمروا بس :blink:

ثانيا

بجد بجد

لييييييييييييييه ما تجربوش تعملوه مثلا؟

دا ساندوتش سهل وبسييييييييييييييييييييييط خالص mfb:

ها ادعبسلك على وجبة سهلللللللللة موووووووووت دلوقتي تعرف تعملها :P

[Sharkiah]

أنا من المستمتعين بالموضوع ده جدا

ونفسى أطلب طلب

لو تسنى ولو أمكن ـ لو يعنى ـ طريقه عمل الحواوشى

[se_ Elsyed]

لأ

لأ

لأ

اللي هايلغوص في الحواوشي ممكن أخسره

شرقية ... إنت سطقت من السماء كالنيزك المُشع وأنا أستلقطتك

بص يا سيدي .. هات ورقة وقلم وخد وصفة الحواوشي زي ما الكتاب بيقول .. صفحة الحواوشي رقم 33 على اليمين :

المقادير :

1- نص كيلو لحمه مفرومة ( وصلت 40 جنيك للكيلو وضرب نار للصبح يا ريس )

2- بصلتين كبار

3- ربع حزمة بقدونس

4- قرنين قول 3 شطة ( وماليش دعوة بالأعراض الجانبية للبنية التحتية )

5- ملح وتوابل على قد ما تقدر

6- ربع كوب زيت بناتي

طريقة التحضير :

- تقط البصل والبقدونس والفلفل قطع صغيرة جداً وتقلبها مع اللحمة المفرومه بشكل جيد وتضع الزيت أثناء التقليب .

وعندك حل من إتنين :

يا إما تشتري عيش نص سوا من الفرن وتقوم بحشو المحتويات في العيش وتلف الرغيف بورق ألمونيوم وتسويه في الفرن على نار متوسطة الحرارة وتخلي بالك أحسن العيش يتحرق لإن الحواوشي ما بياخدش سوا كثير ...

أو ترمي جتتك على أي فرن وتقوله خد اللحمة دي إعجنها لي مع العيش وسويها ..الطريقة دي بتطلع جنان

--------------

بالمناسبة

أنا سعيد جداً بعودة زميلنا القديم الغائب فنكوش

مرحباً بعودتك يا فنكوش .. وأرجوك ما تكسفنيش وتقبل مني عزومة حواوشي ملهلب ( هانخنسر رغفين من شرقيه نخمس فيهم سوا )

[بنت شعنونة]

استاذ شرقية

دا حضرتك منورنييييييييييييييي هنا والله :D

وسيبك من س س خالص :angry:

س س

المصري ها يفضل مصري

يعني عشان انا فتحت مطعم وربنا فاتح عليا ورازقني بالزباين تقوم تيجي تفتح مطعم جنبي؟؟؟؟؟؟؟ :blink:

اجري يا عم خلينا ناكل عيش :angry: :D

الحواوشي زي ما انت قلت صح

وفيه طريقة اسرع

لو بتحب العيش بتاعة مقرمش هات لحمة مفرومة واطبخها على النر زي ما انت قلت كدا لحد ما تستوي تمام

وبعدين هات عيش بلدي عادي من الفرن وبله من الوشين ب شوية زيت وحط فيه اللحمة المفرومة وبعدين حطه على طاسة تيفال ساخنة على النار لمدة 5 دقايق مع تقليب الوشين

وكل و ادعيلي :rolleyes:

نيجي بقى للأكلات السريعة

عزومة عشا رقم 2

وجبة هامبرجر وممكن تبقى غدا لو مستعجل

المكونات..

8 قطع برجر من اي نوع تحبوه

3 فلفل رومي مقطع ترنشات

2 بصل مقطع ترنشات

3 طماطم مقطعه مربعات

1 ليمون معصورة

كوب ماء

ملح،فلفل،زعتر،توابل عربي حسب الرغبه

نحط التوابل + عصير اللمون علي كوب الماء و نقلب

بعدين نحط البصل على النار لحد ما يدبل

وبعدين نحط فوقه الفلفل الاخضر ونقلب

وبعدين نحط الطماطم المقطعة ونقلب لحد ما كلهم يدبلوا شوية

نحط كوب الميه اللي بالتوابل و اللمون علي الخضار و نقلب و تغطي حتي تغلي

بعدين نشيل نص الحاجات دي على جنب

ونرص 4 هامبورجر وبعدين نحط النص اللي شلناه فوقها وبعدين نحط ال 4 هامبرجر التانيين..

وبعدين نغطي الصنية ونسيبها تستوي يجي ربع ساعا..

و بالهنا و الشفا :D

اهي دي سهلة بقى؟؟

على فكرة

لو مش بتحبوا الحاجا مززة ممكن ما تحطوش لمون ( انا عن نفسي مش بحط لمون وبحط توابل عربي كتير)

[yacho]

ياشو

سبيشال ريكوست ليكي الشوي في الفرن...

نيجي بقى للشوي

فيه 3 طرق

الشوي ب الشواية اللي موجودة داخل الفرن و دي انا ما اعرفهاش :angry:

:D صريحة انا جدا

والطريقة التانية فيه عامود بيتباع في السوبر ماركت

عبارة عن طبق ستانلس طالع من نصه عامود.. شبه دا كدا بس دا بالسخان بتاعه ومش بيتحط في الفرن.. التاني بقى تحته طبق عادي

ب توقفي الفرخة عليه و تولعي الفرن على حرارة عالية ( بس مش عالية جدا عشان ما تتحرقش) وكل شوية تسقيها او تدهنيها بالتتبيلة لحد ما تستوي

http://forum.hawaaworld.com/attachment.php...hmentid=24349&s

لو ما عندكيش العامود دا

عارفا ازايز البيبسي الكبييرة الازاز؟

هاتي واحدا واملي نصها بس مية

و وقفي الفرخة عليها برضه وحطيها في طبق و في نص الفرن ونفس الطريقة السابقة

و ممكن معاه الفرخة تحطي شوية بطاطس على جزر بعد ما تتبيلهم بنفس التتبيلة ( خاصة الأخيرة) و تسيبيهم معاها في الفرن زي كدا

http://forum.hawaaworld.com/files/72082/DSC02197.jpg

ايه رايك بقى :rolleyes:

شعنونه

ماتعرفيش عمود دى اجيبها ازاى بالفرنساوى :angry: .. انا طلعت قاموس العيد الكبير

انى الاقى كلمه اقدر ابعبر بيها عن عمود الشوى ده مش لاقيه خالص.. حاموت .. :D

اما بالنسبه لازايز البيبسى الكبيره فاحنا الازايز الكبيره هنا كلها بلاستيك مفيش ازاز خالص

وبعدين لو فى ازاز انتى متاكده ان الازازه ماتفرقعش جوا الفرن بالميه اللى فيها :blink:

انا حسه الموضوع وسع قوى كل ده عشان عايزه اشوى فرخه اومال لو وزه واللا ديك رومى

كان حصل لنا ايه ؟

بقولك هو ماينفعش الشوى يكون فى صينيه فى الفرن؟

[Sharkiah]

سى السيد ، شعنونه

ألف شكر على الردود ، ها أنفذ وأقول لكم

بس سؤال على السريع ، من يعيش خارج مصر ولايوجد عنده عيش بلدى ينفع يجرب فى الشامى مثلا ؟

وكمان إزاى المطاعم فى مصر بتعمله بالورق الأبيض إللى بيستخدموه وبيدخلوا بيه العيش الفرن بدون ما يتحرق ؟

وألف شكر مره تانيه